छिन्नमस्तासहस्रनामस्तोत्रम् अथवा श्रीप्रचण्डचण्डिकासहस्रनामाअस्तोत्रम् Shri Chhhinnamasta Or Prachandachandika Sahasranama Stotram

श्रीगणेशाय नमः ।श्रीदेव्युवाच ।देवदेव महादेव सर्वशास्त्रविदांवर ।कृपां कुरु जगन्नाथ कथयस्व मम प्रभो ॥ १॥

śrīgaṇeśāya namaḥ |śrīdevyuvāca |devadeva mahādeva sarvaśāstravidāṃvara |kṛpāṃ kuru jagannātha kathayasva mama prabho || 1||

प्रचण्डचण्डिका देवी सर्वलोकहितैषिणी ।तस्याश्च कथितं सर्वं स्तवं च कवचादिकम् ॥ २॥

pracaṇḍacaṇḍikā devī sarvalokahitaiṣiṇī |tasyāśca kathitaṃ sarvaṃ stavaṃ ca kavacādikam || 2||

इदानीं छिन्नमस्ताया नाम्नां साहस्रकं शुभम् ।त्वं प्रकाशय मे देव कृपया भक्तवत्सल ॥ ३॥

idānīṃ chinnamastāyā nāmnāṃ sāhasrakaṃ śubham |tvaṃ prakāśaya me deva kṛpayā bhaktavatsala || 3||

श्रीशिव उवाच ।शृणु देवि प्रवक्ष्यामि छिन्नायाः सुमनोहरम् ।गोपनीयं प्रयत्नेन यदीच्छेदात्मनो हितम् ॥ ४॥

śrīśiva uvāca |śṛṇu devi pravakṣyāmi chinnāyāḥ sumanoharam |gopanīyaṃ prayatnena yadīcchedātmano hitam || 4||

न वक्तव्यं च कुत्रापि प्राणैः कण्ठगतैरपि ।तच्छृणुष्व महेशानि सर्वं तत्कथयामि ते ॥ ५॥

na vaktavyaṃ ca kutrāpi prāṇaiḥ kaṇṭhagatairapi |tacchṛṇuṣva maheśāni sarvaṃ tatkathayāmi te || 5||

विना पूजां विना ध्यानं विना जाप्येन सिद्ध्यति ।विना ध्यानं तथा देवि विना भूतादिशोधनम् ॥ ६॥

vinā pūjāṃ vinā dhyānaṃ vinā jāpyena siddhyati |vinā dhyānaṃ tathā devi vinā bhūtādiśodhanam || 6||

पठनादेव सिद्धिः स्यात्सत्यं सत्यं वरानने ।पुरा कैलासशिखरे सर्वदेवसभालये ॥ ७॥

paṭhanādeva siddhiḥ syātsatyaṃ satyaṃ varānane |purā kailāsaśikhare sarvadevasabhālaye || 7||

परिपप्रच्छ कथितं तथा शृणु वरानने ।ॐ अस्य श्रीप्रचण्डचण्डिकासहस्रनामस्तोत्रस्य भैरव ऋषिः \,सम्राट् छन्दः \, प्रचण्डचण्डिका देवता \,धर्मार्थकाममोक्षार्थे पाठे विनियोगः ॥ ८॥

paripapraccha kathitaṃ tathā śṛṇu varānane |oṃ asya śrīpracaṇḍacaṇḍikāsahasranāmastotrasya bhairava ṛṣiḥ \,samrāṭ chandaḥ \, pracaṇḍacaṇḍikā devatā \,dharmārthakāmamokṣārthe pāṭhe viniyogaḥ || 8||

ॐ प्रचण्डचण्डिका चण्डा चण्डदैत्यविनाशिनी ।चामुण्डा च सचण्डा च चपला चारुदेहिनी ॥ ९॥

oṃ pracaṇḍacaṇḍikā caṇḍā caṇḍadaityavināśinī |cāmuṇḍā ca sacaṇḍā ca capalā cārudehinī || 9||

ललजिह्वा चलद्रक्ता चारुचन्द्रनिभानना ।चकोराक्षी चण्डनादा चञ्चला च मनोन्मदा ॥ १०॥

lalajihvā caladraktā cārucandranibhānanā |cakorākṣī caṇḍanādā cañcalā ca manonmadā || 10||

चेतना चितिसंस्था च चित्कला ज्ञानरूपिणी ।महाभयङ्करी देवी वरदाभयधारिणी ॥ ११॥

cetanā citisaṃsthā ca citkalā jñānarūpiṇī |mahābhayaṅkarī devī varadābhayadhāriṇī || 11||

भवाढ्या भवरूपा च भवबन्धविमोचिनी ।भवानी भुवनेशी च भवसंसारतारिणी ॥ १२॥

bhavāḍhyā bhavarūpā ca bhavabandhavimocinī |bhavānī bhuvaneśī ca bhavasaṃsāratāriṇī || 12||

भवाब्धिर्भवमोक्षा च भवबन्धविघातिनी ।भागीरथी भगस्था च भाग्यभोगप्रदायिनी ॥ १३॥

bhavābdhirbhavamokṣā ca bhavabandhavighātinī |bhāgīrathī bhagasthā ca bhāgyabhogapradāyinī || 13||

कमला कामदा दुर्गा दुर्गबन्धविमोचिनी ।दुर्द्दर्शना दुर्गरूपा दुर्ज्ञेया दुर्गनाशिनी ॥ १४॥

kamalā kāmadā durgā durgabandhavimocinī |durddarśanā durgarūpā durjñeyā durganāśinī || 14||

दीनदुःखहरा नित्या नित्यशोकविनाशिनी ।नित्यानन्दमया देवी नित्यं कल्याणकारिणी ॥ १५॥

dīnaduḥkhaharā nityā nityaśokavināśinī |nityānandamayā devī nityaṃ kalyāṇakāriṇī || 15||

सर्वार्थसाधनकरी सर्वसिद्धिस्वरूपिणी ।सर्वक्षोभणशक्तिश्च सर्वविद्राविणी परा ॥ १६॥

sarvārthasādhanakarī sarvasiddhisvarūpiṇī |sarvakṣobhaṇaśaktiśca sarvavidrāviṇī parā || 16||

सर्वरञ्जनशक्तिश्च सर्वोन्मादस्वरूपिणी ।सर्वदा सिद्धिदात्री च सिद्धविद्यास्वरूपिणी ॥ १७॥

sarvarañjanaśaktiśca sarvonmādasvarūpiṇī |sarvadā siddhidātrī ca siddhavidyāsvarūpiṇī || 17||

सकला निष्कला सिद्धा कलातीता कलामयी ।कुलज्ञा कुलरूपा च चक्षुरानन्ददायिनी ॥ १८॥

sakalā niṣkalā siddhā kalātītā kalāmayī |kulajñā kularūpā ca cakṣurānandadāyinī || 18||

कुलीना सामरूपा च कामरूपा मनोहरा ।कमलस्था कञ्जमुखी कुञ्जरेश्वरगामिनी ॥ १९॥

kulīnā sāmarūpā ca kāmarūpā manoharā |kamalasthā kañjamukhī kuñjareśvaragāminī || 19||

कुलरूपा कोटराक्षी कमलैश्वर्यदायिनी ।कुन्ती ककुद्मिनी कुल्ला कुरुकुल्ला करालिका ॥ २०॥

kularūpā koṭarākṣī kamalaiśvaryadāyinī |kuntī kakudminī kullā kurukullā karālikā || 20||

कामेश्वरी काममाता कामतापविमोचिनी ।कामरूपा कामसत्वा कामकौतुककारिणी ॥ २१॥

kāmeśvarī kāmamātā kāmatāpavimocinī |kāmarūpā kāmasatvā kāmakautukakāriṇī || 21||

कारुण्यहृदया क्रींक्रींमन्त्ररूपा च कोटरा ।कौमोदकी कुमुदिनी कैवल्या कुलवासिनी ॥ २२॥

kāruṇyahṛdayā krīṃkrīṃmantrarūpā ca koṭarā |kaumodakī kumudinī kaivalyā kulavāsinī || 22||

केशवी केशवाराध्या केशिदैत्यनिषूदिनी ।क्लेशहा क्लेशरहिता क्लेशसङ्घविनाशिनी ॥ २३॥

keśavī keśavārādhyā keśidaityaniṣūdinī |kleśahā kleśarahitā kleśasaṅghavināśinī || 23||

कराली च करालास्या करालासुरनाशिनी ।करालचर्मासिधरा करालकलनाशिनी ॥ २४॥

karālī ca karālāsyā karālāsuranāśinī |karālacarmāsidharā karālakalanāśinī || 24||

कङ्किनी कङ्कनिरता कपालवरधारिणी ।खड्गहस्ता त्रिनेत्रा च खण्डमुण्डासिधारिणी ॥ २५॥

kaṅkinī kaṅkaniratā kapālavaradhāriṇī |khaḍgahastā trinetrā ca khaṇḍamuṇḍāsidhāriṇī || 25||

खलहा खलहन्त्री च क्षरन्ती खगता सदा ।गङ्गागौतमपूज्या च गौरी गन्धर्ववासिनी ॥ २६॥

khalahā khalahantrī ca kṣarantī khagatā sadā |gaṅgāgautamapūjyā ca gaurī gandharvavāsinī || 26||

गन्धर्वा गगणाराध्या गणा गन्धर्वसेविता ।गणत्कारगणा देवी निर्गुणा च गुणात्मिका ॥ २७॥

gandharvā gagaṇārādhyā gaṇā gandharvasevitā |gaṇatkāragaṇā devī nirguṇā ca guṇātmikā || 27||

गुणता गुणदात्री च गुणगौरवदायिनी ।गणेशमाता गम्भीरा गगणा ज्योतिकारिणी ॥ २८॥

guṇatā guṇadātrī ca guṇagauravadāyinī |gaṇeśamātā gambhīrā gagaṇā jyotikāriṇī || 28||

गौराङ्गी च गया गम्या गौतमस्थानवासिनी ।गदाधरप्रिया ज्ञेया ज्ञानगम्या गुहेश्वरी ॥ २९॥

gaurāṅgī ca gayā gamyā gautamasthānavāsinī |gadādharapriyā jñeyā jñānagamyā guheśvarī || 29||

गायत्री च गुणवती गुणातीता गुणेश्वरी ।गणेशजननी देवी गणेशवरदायिनी ॥ ३०॥

gāyatrī ca guṇavatī guṇātītā guṇeśvarī |gaṇeśajananī devī gaṇeśavaradāyinī || 30||

गणाध्यक्षनुता नित्या गणाध्यक्षप्रपूजिता ।गिरीशरमणी देवी गिरीशपरिवन्दिता ॥ ३१॥

gaṇādhyakṣanutā nityā gaṇādhyakṣaprapūjitā |girīśaramaṇī devī girīśaparivanditā || 31||

गतिदा गतिहा गीता गौतमी गुरुसेविता ।गुरुपूज्या गुरुयुता गुरुसेवनतत्परा ॥ ३२॥

gatidā gatihā gītā gautamī gurusevitā |gurupūjyā guruyutā gurusevanatatparā || 32||

गन्धद्वारा च गन्धाढ्या गन्धात्मा गन्धकारिणी ।गीर्वाणपतिसम्पूज्या गीर्वाणपतितुष्टिदा ॥ ३३॥

gandhadvārā ca gandhāḍhyā gandhātmā gandhakāriṇī |gīrvāṇapatisampūjyā gīrvāṇapatituṣṭidā || 33||

गीर्वाणाधिशरमणी गीर्वाणाधिशवन्दिता ।गीर्वाणाधिशसंसेव्या गीर्वाणाधिशहर्षदा ॥ ३४॥

gīrvāṇādhiśaramaṇī gīrvāṇādhiśavanditā |gīrvāṇādhiśasaṃsevyā gīrvāṇādhiśaharṣadā || 34||

गानशक्तिर्गानगम्या गानशक्तिप्रदायिनी ।गानविद्या गानसिद्धा गानसन्तुष्टमानसा ॥ ३५॥

gānaśaktirgānagamyā gānaśaktipradāyinī |gānavidyā gānasiddhā gānasantuṣṭamānasā || 35||

गानातीता गानगीता गानहर्षप्रपूरिता ।गन्धर्वपतिसंहृष्टा गन्धर्वगुणमण्डिता ॥ ३६॥

gānātītā gānagītā gānaharṣaprapūritā |gandharvapatisaṃhṛṣṭā gandharvaguṇamaṇḍitā || 36||

गन्धर्वगणसंसेव्या गन्धर्वगणमध्यगा ।गन्धर्वगणकुशला गन्धर्वगणपूजिता ॥ ३७॥

gandharvagaṇasaṃsevyā gandharvagaṇamadhyagā |gandharvagaṇakuśalā gandharvagaṇapūjitā || 37||

गन्धर्वगणनिरता गन्धर्वगणभूषिता ।घर्घरा घोररूपा च घोरघुर्घुरनादिनी ॥ ३८॥

gandharvagaṇaniratā gandharvagaṇabhūṣitā |ghargharā ghorarūpā ca ghoraghurghuranādinī || 38||

घर्मबिन्दुसमुद्भूता घर्मबिन्दुस्वरूपिणी ।घण्टारवा घनरवा घनरूपा घनोदरी ॥ ३९॥

gharmabindusamudbhūtā gharmabindusvarūpiṇī |ghaṇṭāravā ghanaravā ghanarūpā ghanodarī || 39||

घोरसत्वा च घनदा घण्टानादविनोदनी ।घोरचाण्डालिनी घोरा घोरचण्डविनाशिनी ॥ ४०॥

ghorasatvā ca ghanadā ghaṇṭānādavinodanī |ghoracāṇḍālinī ghorā ghoracaṇḍavināśinī || 40||

घोरदानवदमनी घोरदानवनाशिनी ।घोरकर्मादिरहिता घोरकर्मनिषेविता ॥ ४१॥

ghoradānavadamanī ghoradānavanāśinī |ghorakarmādirahitā ghorakarmaniṣevitā || 41||

घोरतत्वमयी देवी घोरतत्वविमोचनी ।घोरकर्मादिरहिता घोरकर्मादिपूरिता ॥ ४२॥

ghoratatvamayī devī ghoratatvavimocanī |ghorakarmādirahitā ghorakarmādipūritā || 42||

घोरकर्मादिनिरता घोरकर्मप्रवर्द्धिनी ।घोरभूतप्रमथिनी घोरवेतालनाशिनी ॥ ४३॥

ghorakarmādiniratā ghorakarmapravarddhinī |ghorabhūtapramathinī ghoravetālanāśinī || 43||

घोरदावाग्निदमनी घोरशत्रुनिषूदिनी ।घोरमन्त्रयुता चैव घोरमन्त्रप्रपूजिता ॥ ४४॥

ghoradāvāgnidamanī ghoraśatruniṣūdinī |ghoramantrayutā caiva ghoramantraprapūjitā || 44||

घोरमन्त्रमनोभिज्ञा घोरमन्त्रफलप्रदा ।घोरमन्त्रनिधिश्चैव घोरमन्त्रकृतास्पदा ॥ ४५॥

ghoramantramanobhijñā ghoramantraphalapradā |ghoramantranidhiścaiva ghoramantrakṛtāspadā || 45||

घोरमन्त्रेश्वरी देवी घोरमन्त्रार्थमानसा ।घोरमन्त्रार्थतत्वज्ञा घोरमन्त्रार्थपारगा ॥ ४६॥

ghoramantreśvarī devī ghoramantrārthamānasā |ghoramantrārthatatvajñā ghoramantrārthapāragā || 46||

घोरमन्त्रार्थविभवा घोरमन्त्रार्थबोधिनी ।घोरमन्त्रार्थनिचया घोरमन्त्रार्थजन्मभूः ॥ ४७॥

ghoramantrārthavibhavā ghoramantrārthabodhinī |ghoramantrārthanicayā ghoramantrārthajanmabhūḥ || 47||

घोरमन्त्रजपरता घोरमन्त्रजपोद्यता ।ङकारवर्णानिलया ङकाराक्षरमण्डिता ॥ ४८॥

ghoramantrajaparatā ghoramantrajapodyatā |ṅakāravarṇānilayā ṅakārākṣaramaṇḍitā || 48||

ङकारापररूपा ङकाराक्षररूपिणी ।चित्ररूपा चित्रनाडी चारुकेशी चयप्रभा ॥ ४९॥

ṅakārāpararūpā ṅakārākṣararūpiṇī |citrarūpā citranāḍī cārukeśī cayaprabhā || 49||

चञ्चला चञ्चलाकारा चारुरूपा च चण्डिका ।चतुर्वेदमयी चण्डा चण्डालगणमण्डिता ॥ ५०॥

cañcalā cañcalākārā cārurūpā ca caṇḍikā |caturvedamayī caṇḍā caṇḍālagaṇamaṇḍitā || 50||