प्रपन्नानन्दस्तोत्रम् Prapannanandastotram

श्रीवेङ्कटधरणीधरपतिवक्षस्स्थलविशालकेलिगृहम् ।जगदुज्जीवनसुस्मितललितमुखं तन्ममास्तु वस्तु हृदि ॥ १॥

śrīveṅkaṭadharaṇīdharapativakṣassthalaviśālakeligṛham |jagadujjīvanasusmitalalitamukhaṃ tanmamāstu vastu hṛdi || 1||

निबरीसभ्रमरीरुचिकबरीसङ्गतमनोज्ञसुमहारान् ।कलयामहेऽत्युदारान्मुररिपुदारान्कृतार्तिपरिहारान् ॥ २॥

nibarīsabhramarīrucikabarīsaṅgatamanojñasumahārān |kalayāmahe'tyudārānmuraripudārānkṛtārtiparihārān || 2||

नववज्रकलितदिनकरसितकिरणाभरणरुचिरकचभारान् ।करुणाभरसुस्मेरात्रुचिरविहारान्भजे हरेर्दारान् ॥ ३॥

navavajrakalitadinakarasitakiraṇābharaṇarucirakacabhārān |karuṇābharasusmerātruciravihārānbhaje harerdārān || 3||

कुङ्कुमतिलकितभाल विलुलितसुस्निग्धमुग्धकुन्तलजालम् ।कलये वदान्यशीलं कलशाम्बुनिधेरपत्यमच्युतलोलम् ॥ ४॥

kuṅkumatilakitabhāla vilulitasusnigdhamugdhakuntalajālam |kalaye vadānyaśīlaṃ kalaśāmbunidherapatyamacyutalolam || 4||

निटिलविजितेन्दुबालं भ्रूवल्लिस्फुरणवशितयदुबालम् ।लक्ष्मीवदान्यलीलं वस्तु मदियेऽस्तु हृदि विनतपालम् ॥ ५॥

niṭilavijitendubālaṃ bhrūvallisphuraṇavaśitayadubālam |lakṣmīvadānyalīlaṃ vastu madiye'stu hṛdi vinatapālam || 5||

चम्पकसुमसमनासां सम्पन्निधिमाश्रयेंऽबुधिं भासाम् ।अमरीणां सर्वासां शरण्यचरणां सरोरुहनिवासाम् ॥ ६॥

campakasumasamanāsāṃ sampannidhimāśrayeṃ'budhiṃ bhāsām |amarīṇāṃ sarvāsāṃ śaraṇyacaraṇāṃ saroruhanivāsām || 6||

कुवलयरुचिमदविघटनपटुनयनयुगं तवार्थिकल्पनगम् ।स्वान्ते करोमि मुररिपुकान्ते शान्ते नितान्तमेकान्ते ॥ ७॥

kuvalayarucimadavighaṭanapaṭunayanayugaṃ tavārthikalpanagam |svānte karomi muraripukānte śānte nitāntamekānte || 7||

कलिताश्रितार्तिभङ्गान् वशितमहापुरुषविभ्रमविभङ्गान् ।सञ्चिन्तयाम्यपाङ्गान्मङ्गल्देव्यास्सदा महोत्तुङ्गान् ॥ ८॥

kalitāśritārtibhaṅgān vaśitamahāpuruṣavibhramavibhaṅgān |sañcintayāmyapāṅgānmaṅgaldevyāssadā mahottuṅgān || 8||

वदनरुचिह्वदविहरन्नयनमहामीनराजनिष्ठथूतम् ।नासाविवरविलग्नं नूनं ध्यायामि मौक्तिकं देव्याः ॥ ९॥

vadanarucihvadaviharannayanamahāmīnarājaniṣṭhathūtam |nāsāvivaravilagnaṃ nūnaṃ dhyāyāmi mauktikaṃ devyāḥ || 9||

मुखविजितचन्द्रबिम्बं मुग्धाधरकान्तिधूतनवबिम्बम् ।पङ्कजनयनकुटुम्बं सङ्कलये सर्वसुरजनालम्बम् ॥ १०॥

mukhavijitacandrabimbaṃ mugdhādharakāntidhūtanavabimbam |paṅkajanayanakuṭumbaṃ saṅkalaye sarvasurajanālambam || 10||

सकलजगदग्रगण्यं सरसिजनयनस्य परिणतं पुण्यम् ।अस्मादृशां शरण्यं विभावये मनसि किमपि लावण्यम् ॥ ११॥

sakalajagadagragaṇyaṃ sarasijanayanasya pariṇataṃ puṇyam |asmādṛśāṃ śaraṇyaṃ vibhāvaye manasi kimapi lāvaṇyam || 11||

जगदीश्वरत्वयोग्य जगदीश्वरविहरणैकतमभोग्यम् ।तत्किमपि महाभाग्यं मम नृत्यतु मनसि कल्पितारोग्यम् ॥ १२॥

jagadīśvaratvayogya jagadīśvaraviharaṇaikatamabhogyam |tatkimapi mahābhāgyaṃ mama nṛtyatu manasi kalpitārogyam || 12||

शुभदायिनामधेयं सकलसुरस्तोमयुवतिजनगेयम् ।गोविन्दभागधेयं गोपायतु मा नतावलिविधेयम् ॥ १३॥

śubhadāyināmadheyaṃ sakalasurastomayuvatijanageyam |govindabhāgadheyaṃ gopāyatu mā natāvalividheyam || 13||

मलयानिलकेलिसखं सुधासहाध्यायिदिव्यतररचनम् ।वचनं सुधाब्धिपुत्र्या रचयतु सकलां श्रियं ममाविकलाम् ॥ १४॥

malayānilakelisakhaṃ sudhāsahādhyāyidivyatararacanam |vacanaṃ sudhābdhiputryā racayatu sakalāṃ śriyaṃ mamāvikalām || 14||

निजदयितवदनविधुरुचिविलोकनायात्तमुकुरयुगलमिव ।विमलं कपोलयुगलं कमलायाश्चिन्तयान्तरङ्ग मम ॥ १५॥

nijadayitavadanavidhurucivilokanāyāttamukurayugalamiva |vimalaṃ kapolayugalaṃ kamalāyāścintayāntaraṅga mama || 15||

लक्ष्म्या वदनशशाङ्कं श्रुतियुगसङ्कलितवज्रताटङ्कम् ।ध्यायामि धुतातङ्कं मुक्तामणिभूषितं गताशङ्कम् ॥ १६॥

lakṣmyā vadanaśaśāṅkaṃ śrutiyugasaṅkalitavajratāṭaṅkam |dhyāyāmi dhutātaṅkaṃ muktāmaṇibhūṣitaṃ gatāśaṅkam || 16||

धृतदिव्यकनकचेलाः कैरवबन्धुस्तनन्धयनिटालाः ।दिव्याः काश्चन लीला अव्यासुर्विकचपद्मवनलोला ॥ १७॥

dhṛtadivyakanakacelāḥ kairavabandhustanandhayaniṭālāḥ |divyāḥ kāścana līlā avyāsurvikacapadmavanalolā || 17||

चञ्चलकटाक्षरेखान्कांश्चिदुदञ्चितविभूषणमयूखान् ।किलिकिञ्चितपरिवञ्चितबलिवञ्चकमानसान्भजामि रसान् ॥ १८॥

cañcalakaṭākṣarekhānkāṃścidudañcitavibhūṣaṇamayūkhān |kilikiñcitaparivañcitabalivañcakamānasānbhajāmi rasān || 18||

कनकसरोरुहकुट्मलदायादस्तनभरान्गभीरतरान् ।कलयामि रूपविभवान्कांश्वन लीलातरङ्गितात्मभवान् ॥ १९॥

kanakasaroruhakuṭmaladāyādastanabharāngabhīratarān |kalayāmi rūpavibhavānkāṃśvana līlātaraṅgitātmabhavān || 19||

अमृतसखव्याहारानाश्रयविधुकिरणमदहरणहारान् ।विभवान्काञ्चिदपरान्विश्वजगज्जीवनस्तनक्षीरान् ॥ २०॥

amṛtasakhavyāhārānāśrayavidhukiraṇamadaharaṇahārān |vibhavānkāñcidaparānviśvajagajjīvanastanakṣīrān || 20||

नलिनालङ्कृतहस्ता नलिनाक्षस्य प्रियां सुगुणशस्ताम् ।प्रणमामश्शतशस्तां शरणागतरक्षणेष्वविस्रस्ताम् ॥ २१॥

nalinālaṅkṛtahastā nalinākṣasya priyāṃ suguṇaśastām |praṇamāmaśśataśastāṃ śaraṇāgatarakṣaṇeṣvavisrastām || 21||

मणिमयकङ्कणवलयं कलितसुराधीशखेदभरविलयम् ।काञ्चनकाञ्चिकलापानञ्चितविद्युल्लतासदृशरूपान् ॥ २२॥

maṇimayakaṅkaṇavalayaṃ kalitasurādhīśakhedabharavilayam |kāñcanakāñcikalāpānañcitavidyullatāsadṛśarūpān || 22||

शरणागतभरणानघचरणामरुणाधरां जगज्जननीम् ।करुणाभरवरुणालयपरिणाहिविलोचनां भजे शरणम् ॥ २३॥

śaraṇāgatabharaṇānaghacaraṇāmaruṇādharāṃ jagajjananīm |karuṇābharavaruṇālayapariṇāhivilocanāṃ bhaje śaraṇam || 23||

किं बहुभिर्देवैरिह शम्बरडम्बरहरस्य तामम्बाम् ।अश्रुजनयनसखीं विधुबिम्बमुखीं संश्रयानिशं हृदय ॥ २४॥

kiṃ bahubhirdevairiha śambaraḍambaraharasya tāmambām |aśrujanayanasakhīṃ vidhubimbamukhīṃ saṃśrayāniśaṃ hṛdaya || 24||

ललितपदं कलितमुदं जननिपदं श्रेयसां पठन्विशदम् ।स्तवमिह तव प्रपन्नानन्दं विन्दत्यमन्दमानन्दम् ॥ २५॥

lalitapadaṃ kalitamudaṃ jananipadaṃ śreyasāṃ paṭhanviśadam |stavamiha tava prapannānandaṃ vindatyamandamānandam || 25||

स्तुतिमिति महिशूरपुरीचाममहीपालकुलसमृद्धिकृते ।तत्कुलगुरुर्व्यतानीच्छ्रीकृष्णब्रह्मतन्त्रपरकालः ॥ २६॥

stutimiti mahiśūrapurīcāmamahīpālakulasamṛddhikṛte |tatkulagururvyatānīcchrīkṛṣṇabrahmatantraparakālaḥ || 26||

इति श्रीकृष्ण ब्रह्मतन्त्र परकाल महादेशिकानां कृतिषुश्रीप्रपन्नानन्दस्तोत्रं सम्पूर्णम् ।

iti śrīkṛṣṇa brahmatantra parakāla mahādeśikānāṃ kṛtiṣuśrīprapannānandastotraṃ sampūrṇam |