प्रपन्नमकरन्दस्तोत्रम् Prapannamakarandastotram

कलयतु कुशलानि कालमेघद्युतिमदधूननधीरदिव्यकान्ति ।किमपि रघुकुलाम्बुराशिरत्नं सकलशुभावहनाम तच्चिरत्नम् ॥ १॥

kalayatu kuśalāni kālameghadyutimadadhūnanadhīradivyakānti |kimapi raghukulāmburāśiratnaṃ sakalaśubhāvahanāma tacciratnam || 1||

घनतरकरुणामृताम्बुराशिप्रसरदुदारतरङ्गकैरपाङ्गैः ।प्रशमितविनताळिचित्ततापं किमपि महो हृदि मेऽस्तु दिव्यरूपम् ॥ २॥

ghanatarakaruṇāmṛtāmburāśiprasaradudārataraṅgakairapāṅgaiḥ |praśamitavinatāḷicittatāpaṃ kimapi maho hṛdi me'stu divyarūpam || 2||

विविधमणिमरीचिजाललीलाशबलितहेमकिरीटलोलमालं।मृगमदतिलकस्फुरन्निटालं हृदय सदा भज कोसलेन्द्रबालम् ॥ ३॥

vividhamaṇimarīcijālalīlāśabalitahemakirīṭalolamālaṃ|mṛgamadatilakasphuranniṭālaṃ hṛdaya sadā bhaja kosalendrabālam || 3||

विमलकिरणब्राललीलभालप्रतिलुलितालकजाललालनीयम् ।नवनलिनदलामलायताक्षं कमपि वशे कलयानि दीनरक्षम् ॥ ४॥

vimalakiraṇabrālalīlabhālapratilulitālakajālalālanīyam |navanalinadalāmalāyatākṣaṃ kamapi vaśe kalayāni dīnarakṣam || 4||

सुललितचलितातिविभ्रमभ्रूकलनविलोलितभूसुरान्तरङ्गे ।मुकुरतललसत्कपोलभावे लगतु चिरं मम चित्तमादिदेवे ॥ ५॥

sulalitacalitātivibhramabhrūkalanavilolitabhūsurāntaraṅge |mukuratalalasatkapolabhāve lagatu ciraṃ mama cittamādideve || 5||

मणिगणरुचिराङ्गकुण्डलश्रीकवचितकर्णयुगे मनोज्ञनासे ।विहरतु मम चित्तवृत्तिरेषा धरणिसुतावशगे चिराय धाम्नि ॥ ६॥

maṇigaṇarucirāṅgakuṇḍalaśrīkavacitakarṇayuge manojñanāse |viharatu mama cittavṛttireṣā dharaṇisutāvaśage cirāya dhāmni || 6||

रसभरपरिपाकराजमानस्फुटतरदाडिमबीजदन्तपङ्क्तिम् ।अधरमणिसुधाविधूतसीताहृदयजतापमुपास्महे पुमांसम् ॥ ७॥

rasabharaparipākarājamānasphuṭataradāḍimabījadantapaṅktim |adharamaṇisudhāvidhūtasītāhṛdayajatāpamupāsmahe pumāṃsam || 7||

शरदुदितसुधाकरांशुशैलीमदहरशीतलवाचि सुप्रसन्ने ।अरुणकिरणभिन्नपद्मलक्ष्मीविजयिनि राममुखेऽस्तु मानसं मे ॥ ८॥

śaraduditasudhākarāṃśuśailīmadaharaśītalavāci suprasanne |aruṇakiraṇabhinnapadmalakṣmīvijayini rāmamukhe'stu mānasaṃ me || 8||

दरदळदरविन्दमन्दमन्दप्रसरदमन्दमरन्दसुन्दराङ्गाः ।विवशितधरणीसुतान्तरङ्गा रघुनृपतेः प्रसरन्तु मय्यपाङ्गाः ॥ ९॥

daradaḷadaravindamandamandaprasaradamandamarandasundarāṅgāḥ |vivaśitadharaṇīsutāntaraṅgā raghunṛpateḥ prasarantu mayyapāṅgāḥ || 9||

अमृतरुचिसहोदरस्मितश्रीजुषि घनकम्बुविडम्बिकन्धरेऽस्मिन् ।सितकरकिरणात्युदारहारे मम हृदयं भवताद्विहारि वीरे ॥ १०॥

amṛtarucisahodarasmitaśrījuṣi ghanakambuviḍambikandhare'smin |sitakarakiraṇātyudārahāre mama hṛdayaṃ bhavatādvihāri vīre || 10||

करकमलगळन्मरन्दधाराविशयवदावददिव्यचापदण्डम् ।अशिशिरकरवंशजाग्रगण्यं विशतु मनो मम धन्विनां वरेण्यम् ॥ ११॥

karakamalagaḷanmarandadhārāviśayavadāvadadivyacāpadaṇḍam |aśiśirakaravaṃśajāgragaṇyaṃ viśatu mano mama dhanvināṃ vareṇyam || 11||

निशिचरकुलकल्पितोग्रदण्डं मनसि महो मम भासतामखण्डम् ।अरिसरसिजधूनुनातिशौण्डद्विरदकरायितदीर्घबाहुदण्डम् ॥ १२॥

niśicarakulakalpitogradaṇḍaṃ manasi maho mama bhāsatāmakhaṇḍam |arisarasijadhūnunātiśauṇḍadviradakarāyitadīrghabāhudaṇḍam || 12||

मरकतहरिनीलपद्मरागस्फुरितमहाङ्गदकङ्कणादिसेव्यम् ।मम नयनपथेऽस्तु वस्तु दिव्यं शुभहरिचन्दनचर्चनातिभव्यम् ॥ १३॥

marakataharinīlapadmarāgasphuritamahāṅgadakaṅkaṇādisevyam |mama nayanapathe'stu vastu divyaṃ śubhaharicandanacarcanātibhavyam || 13||

नवतरुणिमजानकीमनोज्ञस्तनयुगकर्कशतारसज्ञवक्षः ।किमपि सकललोकभागधेयं मयि विशताच्छुभदायि नामधेयम् ॥ १४॥

navataruṇimajānakīmanojñastanayugakarkaśatārasajñavakṣaḥ |kimapi sakalalokabhāgadheyaṃ mayi viśatācchubhadāyi nāmadheyam || 14||

नवजलधरवृन्दतुन्ददीव्यत्तटिदुपमानसुवर्णचारुचेलम् ।त्रिवळिसुललितोदरं सुशीलं रघुकुलरत्नमुपास्महेऽतिनीलम् ॥ १५॥

navajaladharavṛndatundadīvyattaṭidupamānasuvarṇacārucelam |trivaḷisulalitodaraṃ suśīlaṃ raghukularatnamupāsmahe'tinīlam || 15||

कमलजजनिगेहनाभिपद्मस्फुटरसलोलुपरोमभृङ्गराजि ।हृदि परिकलयामि कोसलेन्द्रक्षितिरमणीमृगनाभिचित्रकं तत् ॥ १६॥

kamalajajanigehanābhipadmasphuṭarasaloluparomabhṛṅgarāji |hṛdi parikalayāmi kosalendrakṣitiramaṇīmṛganābhicitrakaṃ tat || 16||

मृगपतितनुमध्यमुन्नतांसं सुविपुलपीवरदिव्यबाहुमध्यम् ।विधुकररुचिरान्तरीयमीडे कमपि युवानमुदारचारुमूर्तिम् ॥ १७॥

mṛgapatitanumadhyamunnatāṃsaṃ suvipulapīvaradivyabāhumadhyam |vidhukararucirāntarīyamīḍe kamapi yuvānamudāracārumūrtim || 17||

तरुणिममदनेभयुग्मलीलाप्रसृतकरद्वयसन्निभोरुयुग्मम् ।सुमशरजयकाहळायमानस्फुटतरजङ्घमहं भजामि देवम् ॥ १८॥

taruṇimamadanebhayugmalīlāprasṛtakaradvayasannibhoruyugmam |sumaśarajayakāhaḷāyamānasphuṭatarajaṅghamahaṃ bhajāmi devam || 18||

शरणगजनचित्तभक्तिपूरहृदकमलाद्वितयं तदङ्घ्रियुग्मम् ।मृदुलशुभतरांङ्गुळीमनोज्ञं रुचिरनखं परिचुम्बतान्मनो मे ॥ १९॥

śaraṇagajanacittabhaktipūrahṛdakamalādvitayaṃ tadaṅghriyugmam |mṛdulaśubhatarāṃṅguḷīmanojñaṃ ruciranakhaṃ paricumbatānmano me || 19||

रघुकुलमणिदिव्यसौधदीपं सुरुचिररूपविधूतपुष्पचापम् ।घनतरमदताटकास्वरूपज्वलनशिखाजलदं भजेऽभिरूपम् ॥ २०॥

raghukulamaṇidivyasaudhadīpaṃ surucirarūpavidhūtapuṣpacāpam |ghanataramadatāṭakāsvarūpajvalanaśikhājaladaṃ bhaje'bhirūpam || 20||

चरणनखपरागजातकन्यावितरणमोदितगौतमातिमान्ये ।विलगतु हृदयं महावदान्ये नवतरुणे मम भूसुताप्तिधन्ये ॥ २१॥

caraṇanakhaparāgajātakanyāvitaraṇamoditagautamātimānye |vilagatu hṛdayaṃ mahāvadānye navataruṇe mama bhūsutāptidhanye || 21||

जनकवचनपालनात्तदीक्षे भरतमनोरथदायिदिव्यवीक्षे ।विपिनभुवि विराधदत्तशिक्षे सततमियं मतिरस्तु दीनरक्षे ॥ २२॥

janakavacanapālanāttadīkṣe bharatamanorathadāyidivyavīkṣe |vipinabhuvi virādhadattaśikṣe satatamiyaṃ matirastu dīnarakṣe || 22||

जरठतमजटायुमुक्तिदानप्रकटितनैजमहावदान्यभावे ।कपिकुलपतिक्लृप्तमित्रभावे विहरतु मे हृदयं चिराय देवे ॥ २३॥

jaraṭhatamajaṭāyumuktidānaprakaṭitanaijamahāvadānyabhāve |kapikulapatiklṛptamitrabhāve viharatu me hṛdayaṃ cirāya deve || 23||

सरिदधिपतिमध्यबद्धसेतुच्छलपरिदर्शितवैरिधूमकेतुः ।दशवदनविधूननैकहेतुर्हृदि नटताद्रघुवंशदिव्यकेतुः ॥ २४॥

saridadhipatimadhyabaddhasetucchalaparidarśitavairidhūmaketuḥ |daśavadanavidhūnanaikaheturhṛdi naṭatādraghuvaṃśadivyaketuḥ || 24||

रघुकुलधरणीशराज्यसिंहासनलसितं धरणीसुतात्तभावम् ।शुभतमकरुणानिधिं भजामस्सकलगुणाकरमेनमादिदेवम् ॥ २५॥

raghukuladharaṇīśarājyasiṃhāsanalasitaṃ dharaṇīsutāttabhāvam |śubhatamakaruṇānidhiṃ bhajāmassakalaguṇākaramenamādidevam || 25||

वितरतु जगतां शुभानि कृष्णाभिधपरकालयतीश्वरेण क्लृप्ता ।स्तुतिरिह महिशूरराजधानीनृपमणिकृष्णमहेन्द्रदेशिकेन ॥ २६॥

vitaratu jagatāṃ śubhāni kṛṣṇābhidhaparakālayatīśvareṇa klṛptā |stutiriha mahiśūrarājadhānīnṛpamaṇikṛṣṇamahendradeśikena || 26||

इति प्रपन्नमकरन्दस्तुतिस्सम्पूर्णा ।

iti prapannamakarandastutissampūrṇā |