श्रीनिवासस्तोत्रम् श्रीनिवासस्तुतिः Shrinivasastotram by King Thondaman

ॐराजोवाचदर्शनात्तव गोविन्द नाधिकं वर्तते हरे ।त्वां वदन्ति सुराध्यक्षं वेदवेद्यं पुरातनम् ॥ १॥

oṃrājovācadarśanāttava govinda nādhikaṃ vartate hare |tvāṃ vadanti surādhyakṣaṃ vedavedyaṃ purātanam || 1||

मुनयो मनुजश्रेष्ठाः तच्छ्रुत्वाहमिहागतः ।स्वामिन्नच्युत गोविन्द पुराणपुरुषोत्तम ॥ २॥

munayo manujaśreṣṭhāḥ tacchrutvāhamihāgataḥ |svāminnacyuta govinda purāṇapuruṣottama || 2||

अप्राकृतशरीरोऽसि लीलामानुषविग्रहः ।त्वामेव सृष्टिकरणे पालने हरणे हरे ॥ ३॥

aprākṛtaśarīro'si līlāmānuṣavigrahaḥ |tvāmeva sṛṣṭikaraṇe pālane haraṇe hare || 3||

कारणं प्रकृतिर्योनिं वदन्ति च मनीषिणः ।जगदेकार्णवं कृत्वा भवानेकत्वमाप्य च ॥ ४॥

kāraṇaṃ prakṛtiryoniṃ vadanti ca manīṣiṇaḥ |jagadekārṇavaṃ kṛtvā bhavānekatvamāpya ca || 4||

जीवकोटिधनं देव जठरे परिपूरयन् ।क्रीडते रमया सार्धं रमणीयाङ्गविश्रमः ॥ ५॥

jīvakoṭidhanaṃ deva jaṭhare paripūrayan |krīḍate ramayā sārdhaṃ ramaṇīyāṅgaviśramaḥ || 5||

सहस्रशीर्षा पुरुषः सहस्राक्षः सहस्रपात् ।त्वन्मुखाद्विप्रनिचयो बाहुभ्यां क्षत्रमण्डलम् ॥ ६॥

sahasraśīrṣā puruṣaḥ sahasrākṣaḥ sahasrapāt |tvanmukhādvipranicayo bāhubhyāṃ kṣatramaṇḍalam || 6||

ऊरुभ्यामभवन्वैश्याः पद्भ्यां शुद्राः प्रकीर्तिताः ।प्रभुस्त्वं सर्वलोकानां देवानामपि योगिनाम् ॥ ७॥

ūrubhyāmabhavanvaiśyāḥ padbhyāṃ śudrāḥ prakīrtitāḥ |prabhustvaṃ sarvalokānāṃ devānāmapi yoginām || 7||

अन्तःसृष्टिकरस्त्वं हि बहिः सृष्टिकरो भवान् ।नमः श्रीवेङ्कटेशाय नमो ब्रह्मोदराय च ॥ ८॥

antaḥsṛṣṭikarastvaṃ hi bahiḥ sṛṣṭikaro bhavān |namaḥ śrīveṅkaṭeśāya namo brahmodarāya ca || 8||

नमो नाथाय कान्ताय रमायाः पुण्यमूर्तये ।नमः शान्ताय कृष्णाय नमस्तेऽद्भुतकर्मणे ॥ ९॥

namo nāthāya kāntāya ramāyāḥ puṇyamūrtaye |namaḥ śāntāya kṛṣṇāya namaste'dbhutakarmaṇe || 9||

अप्राकृतशरीराय श्रीनिवासाय ते नमः ।अनन्तमूर्तये नित्यमनन्तशिरसे नमः ॥ १०॥

aprākṛtaśarīrāya śrīnivāsāya te namaḥ |anantamūrtaye nityamanantaśirase namaḥ || 10||

अनन्तबाहवे श्रीमन्ननन्ताय नमो नमः ।सरीसृपगिरीशाय परब्रह्मन्नमो नमः ॥ ११॥

anantabāhave śrīmannanantāya namo namaḥ |sarīsṛpagirīśāya parabrahmannamo namaḥ || 11||

पन्नगाचलवासाय परब्रह्म नमो नमः ।इति स्तुत्वा श्रीनिवासं कमनीयकलेवरम् ॥ १२॥

pannagācalavāsāya parabrahma namo namaḥ |iti stutvā śrīnivāsaṃ kamanīyakalevaram || 12||

विरराम महाराज राजेन्द्रो रणकोविदः ।स्तोत्रेणानेन सुप्रीतस्तोण्डमानकृतेन च ॥ १३॥

virarāma mahārāja rājendro raṇakovidaḥ |stotreṇānena suprītastoṇḍamānakṛtena ca || 13||

सन्तुष्टः प्राह गोविन्दः श्रीमन्तं राजसत्तमम् ॥ १३॥

santuṣṭaḥ prāha govindaḥ śrīmantaṃ rājasattamam || 13||

श्रीनिवास उवाचराजन्नलमलं स्तोत्रं कृतं परमपावनम् ।अनेन स्तवराजेन मामर्चन्ति च ये जनाः ॥ १४॥

śrīnivāsa uvācarājannalamalaṃ stotraṃ kṛtaṃ paramapāvanam |anena stavarājena māmarcanti ca ye janāḥ || 14||

तेषां तु मम सालोक्यं भविष्यति न संशयः ।इति श्रीवेङ्कटाचलमाहात्म्यमन्तर्गतं तोण्डमानकृतंश्रीनिवासस्तोत्रं सम्पूर्णम् ।अथवा श्री श्रीनिवासस्तुतिः

teṣāṃ tu mama sālokyaṃ bhaviṣyati na saṃśayaḥ |iti śrīveṅkaṭācalamāhātmyamantargataṃ toṇḍamānakṛtaṃśrīnivāsastotraṃ sampūrṇam |athavā śrī śrīnivāsastutiḥ