काशीक्षेत्रस्थप्रार्थना Shri Kashikshetrastha Prarthana

(\*)विश्वेश्वर महादेव देवदेव दयानिधे ! ।दैवाधीनं जडं दीनं पाहि मां शरणागतम् ॥ १॥

(\*)viśveśvara mahādeva devadeva dayānidhe ! |daivādhīnaṃ jaḍaṃ dīnaṃ pāhi māṃ śaraṇāgatam || 1||

अन्नपूर्णे जगन्मातः कृपामृततरङ्गिणि! ।दैवाधीनं जडं दीनं पाहि मां शरणागतम् ॥ २॥

annapūrṇe jaganmātaḥ kṛpāmṛtataraṅgiṇi! |daivādhīnaṃ jaḍaṃ dīnaṃ pāhi māṃ śaraṇāgatam || 2||

बिन्दुमाधव विष्णो त्वं करुणावरुणालयः ।दैवाधीनं जडं दीनं पाहि मां शरणागतम् ॥ ३॥

bindumādhava viṣṇo tvaṃ karuṇāvaruṇālayaḥ |daivādhīnaṃ jaḍaṃ dīnaṃ pāhi māṃ śaraṇāgatam || 3||

कालभैरव देव त्वं ममासि कुलदैवतं ।दैवाधीनं जडं दीनं पाहि मां शरणागतम् ॥ ४॥

kālabhairava deva tvaṃ mamāsi kuladaivataṃ |daivādhīnaṃ jaḍaṃ dīnaṃ pāhi māṃ śaraṇāgatam || 4||

त्रिलोचन दयासिन्धो शरणागतवत्सल ! ।दैवाधीनं जडं दीनं पाहि मां शरणागतम् ॥ ५॥

trilocana dayāsindho śaraṇāgatavatsala ! |daivādhīnaṃ jaḍaṃ dīnaṃ pāhi māṃ śaraṇāgatam || 5||

वीरेश्वर त्रिलोकेशा प्रणतानां सुरद्रुम ।दैवाधीनं जडं दीनं पाहि मां शरणागतम् ॥ ६॥

vīreśvara trilokeśā praṇatānāṃ suradruma |daivādhīnaṃ jaḍaṃ dīnaṃ pāhi māṃ śaraṇāgatam || 6||

श्रीगङ्गे करुणामूर्ते भागीरथि नमोस्तु ते ।दैवाधीनं जडं दीनं पाहि मां शरणागतम् ॥ ७॥

śrīgaṅge karuṇāmūrte bhāgīrathi namostu te |daivādhīnaṃ jaḍaṃ dīnaṃ pāhi māṃ śaraṇāgatam || 7||

काशीनिवासिनो देवा भवद्भव्योस्तु नमो नमः ।कुरुध्वं करुणां दीने मयि स्वशरणागते ॥ ८॥

kāśīnivāsino devā bhavadbhavyostu namo namaḥ |kurudhvaṃ karuṇāṃ dīne mayi svaśaraṇāgate || 8||

विश्वेश्वरप्रिये काशि राशिस्त्वं यशसा मुदां ।दैवाधीनं जडं दीनं पाहि मां शरणागतम् ॥ ९॥

viśveśvarapriye kāśi rāśistvaṃ yaśasā mudāṃ |daivādhīnaṃ jaḍaṃ dīnaṃ pāhi māṃ śaraṇāgatam || 9||

ये वेदशास्त्रतत्वज्ञा विप्राः काशीनिवासिनः ।धन्याः संन्यासिनः शान्तास्तेभ्यो मेऽस्तु नमो नमः ॥ १०॥

ye vedaśāstratatvajñā viprāḥ kāśīnivāsinaḥ |dhanyāḥ saṃnyāsinaḥ śāntāstebhyo me'stu namo namaḥ || 10||

कीर्तयन्ति हरिं प्रेम्णा हरं चाभेददर्शिनः ।भक्ताः पुण्यकथासक्ता नमस्तेभ्योस्तु सर्वदा ॥ ११॥

kīrtayanti hariṃ premṇā haraṃ cābhedadarśinaḥ |bhaktāḥ puṇyakathāsaktā namastebhyostu sarvadā || 11||

भागीरथीस्नाननिष्ठा ये पुमांसः स्त्रियश्च याः ।तभ्यस्ताभ्यश्च साधुभ्यः साध्वीभ्योस्तु नमो नमः ॥ १२॥

bhāgīrathīsnānaniṣṭhā ye pumāṃsaḥ striyaśca yāḥ |tabhyastābhyaśca sādhubhyaḥ sādhvībhyostu namo namaḥ || 12||

शिवप्रसादभाजस्ते जीवाः काशीनिवासिनः ।पशवः पक्षिणः सर्वे तेभ्यो नित्यं नमो नमः ॥ १३॥

śivaprasādabhājaste jīvāḥ kāśīnivāsinaḥ |paśavaḥ pakṣiṇaḥ sarve tebhyo nityaṃ namo namaḥ || 13||

प्राणिनो ये वसन्त्यत्र अपि कीटाः पिपीलिकाः ।नमोस्तु तेभ्यो यत्पात्रं महेशानुग्रहस्य ते ॥ १४॥

prāṇino ye vasantyatra api kīṭāḥ pipīlikāḥ |namostu tebhyo yatpātraṃ maheśānugrahasya te || 14||

काश्यां ये जङ्गमाः सन्ति प्राणिनो येऽप्यजङ्गमाः ।नमोस्तु तेभ्यो मुक्तेभ्यो महेशितुरनुग्रहात् ॥ १५॥

kāśyāṃ ye jaṅgamāḥ santi prāṇino ye'pyajaṅgamāḥ |namostu tebhyo muktebhyo maheśituranugrahāt || 15||

काश्यां वसन्ति ये केचित्पिशाचा ब्रह्मराक्षसाः ।तेभ्यो नमोस्तु सर्वेभ्यः शवेभ्योऽपि नमो नमः ॥ १६॥

kāśyāṃ vasanti ye kecitpiśācā brahmarākṣasāḥ |tebhyo namostu sarvebhyaḥ śavebhyo'pi namo namaḥ || 16||

गङ्गायां यानि यादांसि बकाः काकाश्च ये तटे ।नमोस्तेभ्योऽतिपुण्येभ्यो भेकेभ्योऽस्तु नमो नमः ॥ १७॥

gaṅgāyāṃ yāni yādāṃsi bakāḥ kākāśca ye taṭe |namostebhyo'tipuṇyebhyo bhekebhyo'stu namo namaḥ || 17||

अविमुक्तेश्वरस्वामिन्नहं त्वां शरणं गतः ।देहि मे मरणं काश्यां वरमन्यं न कामये ॥ १८॥

avimukteśvarasvāminnahaṃ tvāṃ śaraṇaṃ gataḥ |dehi me maraṇaṃ kāśyāṃ varamanyaṃ na kāmaye || 18||

वक्रतुण्ड गणेशान (१)प्रत्यूहप्रशमाभिध ।पाहि मां प्रणतं दीनं ब्राह्मणं शरणागतम् ॥ १९॥

vakratuṇḍa gaṇeśāna (1)pratyūhapraśamābhidha |pāhi māṃ praṇataṃ dīnaṃ brāhmaṇaṃ śaraṇāgatam || 19||

वरुणे पाहि मां मातस्त्वमसि प्रतिपालय ।मन्दाकिनि नमस्तुभ्यं नमस्ते मणिकर्णिके ॥ २०॥

varuṇe pāhi māṃ mātastvamasi pratipālaya |mandākini namastubhyaṃ namaste maṇikarṇike || 20||

नमामि करुणासिन्धो तुभ्यं साक्षिविनायक ।मां तारय भवाम्भोधौ प्रणतं शरणागतम् ॥ २१॥

namāmi karuṇāsindho tubhyaṃ sākṣivināyaka |māṃ tāraya bhavāmbhodhau praṇataṃ śaraṇāgatam || 21||

इति श्रीरामनन्दनमयूरेश्वरकृता श्रीकाशीक्षेत्रस्थप्रार्थना समाप्ता ।टिप्पणि\* अस्यां प्रार्थनायां काशीक्षेत्रस्थाभ्यः सर्वाभ्यो देवताभ्यःप्रणामक्रियाव्याजेन तत्रस्था देवताः कविना क्रमेण वर्णिताइत्यवगन्तव्यं सहृदयैः । १। प्रत्यूहाः विघ्नास्तेषां प्रशमः

iti śrīrāmanandanamayūreśvarakṛtā śrīkāśīkṣetrasthaprārthanā samāptā |ṭippaṇi\* asyāṃ prārthanāyāṃ kāśīkṣetrasthābhyaḥ sarvābhyo devatābhyaḥpraṇāmakriyāvyājena tatrasthā devatāḥ kavinā krameṇa varṇitāityavagantavyaṃ sahṛdayaiḥ | 1| pratyūhāḥ vighnāsteṣāṃ praśamaḥ

अभिधा यस्य तत्सम्बुद्धौ । विघ्नहर्तः इत्यर्थः ।

abhidhā yasya tatsambuddhau |vighnahartaḥ ityarthaḥ |