शिवस्तुतिः १२ Shivastuti by Lankeshvara Ravana

श्रीगणेशाय नमः ।गले कलितकालिम प्रकटितेन्दुभालस्थले विनाटितजटोत्करं रुचिरपाणिपाथोरुहे ।उदञ्चितकपालकं जघनसीम्नि सन्दर्शितद्विपाजिनमनुक्षणं किमपि धाम वन्दामहे ॥ १॥

śrīgaṇeśāya namaḥ |gale kalitakālima prakaṭitendubhālasthale vināṭitajaṭotkaraṃ rucirapāṇipāthoruhe |udañcitakapālakaṃ jaghanasīmni sandarśitadvipājinamanukṣaṇaṃ kimapi dhāma vandāmahe || 1||

वृषोपरि परिस्फुरद्धवलधामधामश्रियां कुबेरगिरिगौरिमप्रभवगर्वनिर्वासि तत् ।क्वचित्पुनरुमाकुचोपचितकुङ्कुमै रञ्जितं गजाजिनविराजितं वृजिनभङ्गबीजं भजे ॥ २॥

vṛṣopari parisphuraddhavaladhāmadhāmaśriyāṃ kuberagirigaurimaprabhavagarvanirvāsi tat |kvacitpunarumākucopacitakuṅkumai rañjitaṃ gajājinavirājitaṃ vṛjinabhaṅgabījaṃ bhaje || 2||

उदित्वरविलोचनत्रयविसृत्वरज्योतिषा कलाकरकलाकरव्यतिकरेण चाहर्निशम् ।विकासितजटाटवीविहरणोत्सवप्रोल्लसत्तरामरतरङ्गिणीतरलचूडमीडे मृडम् ॥ ३॥

uditvaravilocanatrayavisṛtvarajyotiṣā kalākarakalākaravyatikareṇa cāharniśam |vikāsitajaṭāṭavīviharaṇotsavaprollasattarāmarataraṅgiṇītaralacūḍamīḍe mṛḍam || 3||

विहाय कमलालयाविलसितानि विद्युन्नटीविडम्बनपटूनि मे विहरणं विधत्तां मनः ।कपर्दिनि कुमुद्वतीरमणखण्डचूडामणौ कटीतटपटीभवत्करटिचर्मणि ब्रह्मणि ॥ ४॥

vihāya kamalālayāvilasitāni vidyunnaṭīviḍambanapaṭūni me viharaṇaṃ vidhattāṃ manaḥ |kapardini kumudvatīramaṇakhaṇḍacūḍāmaṇau kaṭītaṭapaṭībhavatkaraṭicarmaṇi brahmaṇi || 4||

भवद्भवनदेहलीविकटतुण्डदण्डाहतित्रुटन्मुकुटकोटिभिर्मघवदादिभिर्भूयते ।व्रजेम भवदन्तिकं प्रकृतिमेत्य पैशाचिकीं किमित्यमरसम्पदः प्रमथनाथ नाथामहे ॥ ५॥

bhavadbhavanadehalīvikaṭatuṇḍadaṇḍāhatitruṭanmukuṭakoṭibhirmaghavadādibhirbhūyate |vrajema bhavadantikaṃ prakṛtimetya paiśācikīṃ kimityamarasampadaḥ pramathanātha nāthāmahe || 5||

त्वदर्चनपरायणप्रमथकन्यकालुण्ठितप्रसूनसफलद्रुमं कमपि शैलमाशास्महे ।अलं तटवितर्दिकाशयितसिद्धिसीमन्तिनीप्रकीर्णसुमनोमनोरमणमेरुणामेरुणा ॥ ६॥

tvadarcanaparāyaṇapramathakanyakāluṇṭhitaprasūnasaphaladrumaṃ kamapi śailamāśāsmahe |alaṃ taṭavitardikāśayitasiddhisīmantinīprakīrṇasumanomanoramaṇameruṇāmeruṇā || 6||

न जातु हर यातु मे विषयदुर्विलासं मनोमनोभवकथास्तु मे न च मनोरथातिथ्यभूः ।स्फुरत्सुरतरङ्गिणीतटकुटीरकोटौ वसन्नये शिव दिवानिशं तव भवानि पूजापरः ॥ ७॥

na jātu hara yātu me viṣayadurvilāsaṃ manomanobhavakathāstu me na ca manorathātithyabhūḥ |sphuratsurataraṅgiṇītaṭakuṭīrakoṭau vasannaye śiva divāniśaṃ tava bhavāni pūjāparaḥ || 7||

विभूषणसुरापगाशुचितरालवालावलीवलद्वहलसीकरप्रकरसेकसंवर्धिता ।महेश्वरसुरद्रुमस्फुरितसज्जटामञ्जरी नमज्जनफलप्रदा मम नु हन्त भूयादियम् ॥ ८॥

vibhūṣaṇasurāpagāśucitarālavālāvalīvaladvahalasīkaraprakarasekasaṃvardhitā |maheśvarasuradrumasphuritasajjaṭāmañjarī namajjanaphalapradā mama nu hanta bhūyādiyam || 8||

बहिर्विषयसङ्गतिप्रतिनिवर्तिताक्षावलेः समाधिकलितात्मनः पशुपतेरशेषात्मनः ।शिरःसुरसरित्तटीकुटिलकल्पकल्पद्रुमं निशाकरकलामहं बटुविमृश्यमानां भजे ॥ ९॥

bahirviṣayasaṅgatipratinivartitākṣāvaleḥ samādhikalitātmanaḥ paśupateraśeṣātmanaḥ |śiraḥsurasarittaṭīkuṭilakalpakalpadrumaṃ niśākarakalāmahaṃ baṭuvimṛśyamānāṃ bhaje || 9||

त्वदीयसुरवाहिनीविमलवारिधारावलज्जटागहनगाहिनी मतिरियं मम क्रामतु ।उपोत्तमसरित्तटीविटपिताटवी प्रोल्लसत्तपस्विपरिषत्तुलाममलमल्लिकाभ प्रभो ॥ १०॥

tvadīyasuravāhinīvimalavāridhārāvalajjaṭāgahanagāhinī matiriyaṃ mama krāmatu |upottamasarittaṭīviṭapitāṭavī prollasattapasvipariṣattulāmamalamallikābha prabho || 10||

इति श्रीलङ्केश्वरविरचिता शिवस्तुतिः समाप्ता ॥

iti śrīlaṅkeśvaraviracitā śivastutiḥ samāptā ||