शिवस्तुतिः ०५ Shivastuti by Rati

नमः शिवायास्तु निरामयाय नमो शिवायास्तु मनोमयाय ।नमः शिवायास्तु सुरार्चिताय तुभ्यं सदा भक्तकृपापराय ॥ २६०॥ १॥

namaḥ śivāyāstu nirāmayāya namo śivāyāstu manomayāya |namaḥ śivāyāstu surārcitāya tubhyaṃ sadā bhaktakṛpāparāya || 260|| 1||

नमो भवायास्तु भवोद्भवाय नमोऽस्तु ते ध्वस्तमनोभवाय ।नमोऽस्तु ते गूढमहाव्रताय नमोऽस्तु मायागहनाश्रयाय ॥ १॥

namo bhavāyāstu bhavodbhavāya namo'stu te dhvastamanobhavāya |namo'stu te gūḍhamahāvratāya namo'stu māyāgahanāśrayāya || 1||

नमोऽस्तु शर्वाय नमः शिवाय नमोऽस्तु सिद्धाय पुरातनाय ।नमोऽस्तु कालाय नमः कलाय नमोऽस्तु ते ज्ञानवरप्रदाय ॥ २॥

namo'stu śarvāya namaḥ śivāya namo'stu siddhāya purātanāya |namo'stu kālāya namaḥ kalāya namo'stu te jñānavarapradāya || 2||

नमोऽस्तु ते कालकलातिगाय नमो निसर्गामलभूषणाय ।नमोऽस्त्वमेयान्धकमर्दकाय नमः शरण्याय नमोऽगुणाय ॥ ३॥

namo'stu te kālakalātigāya namo nisargāmalabhūṣaṇāya |namo'stvameyāndhakamardakāya namaḥ śaraṇyāya namo'guṇāya || 3||

नमोऽस्तु ते भीमगणानुगाय नमोऽस्तु नानाभुवनादिकर्त्रे ।नमोऽस्तु नानाजगतां विधात्रे नमोऽस्तु ते चित्रफलप्रयोक्त्रे ॥ ४॥

namo'stu te bhīmagaṇānugāya namo'stu nānābhuvanādikartre |namo'stu nānājagatāṃ vidhātre namo'stu te citraphalaprayoktre || 4||

सर्वावसाने ह्यविनाशनेत्रे नमोऽस्तु चित्राध्वरभागभोक्त्रे । सविनाशनेत्रेनमोऽस्तु भक्ताभिमतप्रदात्रे नमः सदा ते भवसङ्गहर्त्रे ॥ ५॥

sarvāvasāne hyavināśanetre namo'stu citrādhvarabhāgabhoktre | savināśanetrenamo'stu bhaktābhimatapradātre namaḥ sadā te bhavasaṅgahartre || 5||

अनन्तरूपाय सदैव तुभ्यमसह्यकोपाय नमोऽस्तु तुभ्यम् ।शशाङ्कचिह्नाय सदैव तुभ्यममेयमानाय नमः स्तुताय ॥ ६॥

anantarūpāya sadaiva tubhyamasahyakopāya namo'stu tubhyam |śaśāṅkacihnāya sadaiva tubhyamameyamānāya namaḥ stutāya || 6||

वृषेन्द्रयानाय पुरान्तकाय नमः प्रसिद्धाय महौषधाय ।नमोऽस्तु भक्त्याऽभिमतप्रदाय नमोऽस्तु सर्वार्त्तिहराय तुभ्यम् ॥ ७॥

vṛṣendrayānāya purāntakāya namaḥ prasiddhāya mahauṣadhāya |namo'stu bhaktyā'bhimatapradāya namo'stu sarvārttiharāya tubhyam || 7||

चराचराचारविचारवर्यमाचार्यमुत्प्रेक्षितभूतसर्गम् ।त्वामिन्दुमौलिं शरणं प्रपन्ना प्रियाप्रमेयं महतां महेशम् ॥ ८॥

carācarācāravicāravaryamācāryamutprekṣitabhūtasargam |tvāmindumauliṃ śaraṇaṃ prapannā priyāprameyaṃ mahatāṃ maheśam || 8||

प्रयच्छ मे कामयशःसमृद्धिं, पुनः प्रभो जीवतु कामदेवः ॥प्रियं विना त्वां प्रियजीवितेषु त्वत्तोऽपरः को भुवनेष्विहास्ति ॥ ९॥

prayaccha me kāmayaśaḥsamṛddhiṃ, punaḥ prabho jīvatu kāmadevaḥ ||priyaṃ vinā tvāṃ priyajīviteṣu tvatto'paraḥ ko bhuvaneṣvihāsti || 9||

प्रभुः प्रियायाः प्रसवः प्रियाणां प्रणीतपर्यायपरापरार्थः ।त्वमेवमेको भुवनस्य नाथो दयालुरुन्मीलितभक्तभीतिः ॥ २७०॥ ११॥

prabhuḥ priyāyāḥ prasavaḥ priyāṇāṃ praṇītaparyāyaparāparārthaḥ |tvamevameko bhuvanasya nātho dayālurunmīlitabhaktabhītiḥ || 270|| 11||

इति मत्स्यपुराणान्तर्गता रतिकृता शिवस्तुतिः समाप्ता ।(मत्स्यपुराणम्, १५४। २६०-२७०)

iti matsyapurāṇāntargatā ratikṛtā śivastutiḥ samāptā |(matsyapurāṇam, 154| 260-270)