शिवमङ्गलाष्टकम् Shivamangalashtakam

भवाय चन्द्रचूडाय निर्गुणाय गुणात्मने ।कालकालाय रुद्राय नीलग्रीवाय मङ्गलम् ॥ १॥

bhavāya candracūḍāya nirguṇāya guṇātmane |kālakālāya rudrāya nīlagrīvāya maṅgalam || 1||

वृषारूढाय भीमाय व्याघ्रचर्माम्बराय च ।पशूनां पतये तुभ्यं गौरीकान्ताय मङ्गलम् ॥ २॥

vṛṣārūḍhāya bhīmāya vyāghracarmāmbarāya ca |paśūnāṃ pataye tubhyaṃ gaurīkāntāya maṅgalam || 2||

भस्मोद्धूलितदेहाय व्यालयज्ञोपवीतिने ।रुद्राक्षमालाभूषाय व्योमकेशाय मङ्गलम् ॥ ३॥

bhasmoddhūlitadehāya vyālayajñopavītine |rudrākṣamālābhūṣāya vyomakeśāya maṅgalam || 3||

सूर्यचन्द्राग्निनेत्राय नमः कैलासवासिने ।सच्चिदानन्दरूपाय प्रमथेशाय मङ्गलम् ॥ ४॥

sūryacandrāgninetrāya namaḥ kailāsavāsine |saccidānandarūpāya pramatheśāya maṅgalam || 4||

मृत्युंजयाय सांबाय सृष्टिस्थित्यन्तकारिणे ।त्र्यंबकाय सुशान्ताय त्रिलोकेशाय मङ्गलम् ॥ ५॥

mṛtyuṃjayāya sāṃbāya sṛṣṭisthityantakāriṇe |tryaṃbakāya suśāntāya trilokeśāya maṅgalam || 5||

गंगाधराय सोमाय नमो हरिहरात्मने ।उग्राय त्रिपुरघ्नाय वामदेवाय मङ्गलम् ॥ ६॥

gaṃgādharāya somāya namo hariharātmane |ugrāya tripuraghnāya vāmadevāya maṅgalam || 6||

सद्योजाताय शर्वाय दिव्यज्ञानप्रदायिने ।ईशानाय नमस्तुभ्यं पञ्चवक्त्राय मङ्गलम् ॥ ७॥

sadyojātāya śarvāya divyajñānapradāyine |īśānāya namastubhyaṃ pañcavaktrāya maṅgalam || 7||

सदाशिवस्वरूपाय नमस्तत्पुरुषाय च ।अघोरायच घोराय महादेवाय मङ्गलम् ॥ ८॥

sadāśivasvarūpāya namastatpuruṣāya ca |aghorāyaca ghorāya mahādevāya maṅgalam || 8||

मङ्गलाष्टकमेतद्वै शंभोर्यः कीर्तयेद्दिने ।तस्य मृत्युभयं नास्ति रोगपीडाभयं तथा ॥ ९ ॥

maṅgalāṣṭakametadvai śaṃbhoryaḥ kīrtayeddine |tasya mṛtyubhayaṃ nāsti rogapīḍābhayaṃ tathā || 9 ||

इति श्रीशिवमङ्गलाष्टकं सम्पूर्णम् ।

iti śrīśivamaṅgalāṣṭakaṃ sampūrṇam |