शङ्करस्तोत्रम् १ Shankara Stotram 1

नमस्तुभ्यं भगवते शङ्कराय महात्मने ।जगदुत्पत्तिविनाशानां हेतवे मोक्षहेतवे ॥ १॥

namastubhyaṃ bhagavate śaṅkarāya mahātmane |jagadutpattivināśānāṃ hetave mokṣahetave || 1||

सर्वदेवाधिदेवाय पार्वतीपतये नमः ।ऋषियोगिमुनीन्द्राणां त्वमेव परमा गतिः ॥ २॥

sarvadevādhidevāya pārvatīpataye namaḥ |ṛṣiyogimunīndrāṇāṃ tvameva paramā gatiḥ || 2||

ब्रह्माण्डगोलके देव दयालुनां त्वमग्रणीः ।अत एवोल्बणं पीतं त्वया हालाहलं विषम् ॥ ३॥

brahmāṇḍagolake deva dayālunāṃ tvamagraṇīḥ |ata evolbaṇaṃ pītaṃ tvayā hālāhalaṃ viṣam || 3||

गङ्गाधर महादेव चन्द्रालङ्कृतमस्तक ।परमेश्वर मां पाहि भयं वारय वारय ॥ ४॥

gaṅgādhara mahādeva candrālaṅkṛtamastaka |parameśvara māṃ pāhi bhayaṃ vāraya vāraya || 4||

सर्वपापं प्रशमय सर्वतापं निवारय ।दुःखं हर हराशेषं मृत्युं विद्रावय द्रुतम् ॥ ५॥

sarvapāpaṃ praśamaya sarvatāpaṃ nivāraya |duḥkhaṃ hara harāśeṣaṃ mṛtyuṃ vidrāvaya drutam || 5||

स्तुतिं कर्तुं न मे शक्तिस्तव वाग्गत्यगोचर ।देहि सत्सङ्गतिं भकिन्त निश्चलां त्वयि शङ्कर ॥ ६॥

stutiṃ kartuṃ na me śaktistava vāggatyagocara |dehi satsaṅgatiṃ bhakinta niścalāṃ tvayi śaṅkara || 6||

सर्वारिष्टं परिहर सर्वशत्रून्विनाशय ।दारिद्र्यं हर सर्वेश सर्वान्कामान् प्रपूरय ॥ ७॥

sarvāriṣṭaṃ parihara sarvaśatrūnvināśaya |dāridryaṃ hara sarveśa sarvānkāmān prapūraya || 7||

मुखे नाम दृशो रूपं हृदये त्वत्पदाम्बुजम् ।ममास्तु ते नमः साम्ब प्रसन्नो भव सर्वदा ॥ ८॥

mukhe nāma dṛśo rūpaṃ hṛdaye tvatpadāmbujam |mamāstu te namaḥ sāmba prasanno bhava sarvadā || 8||

त्वदर्चनविधिं जाने न भक्तिस्त्वयि मे हृदि ।अथाप्यनुग्रहाणेश केवलं दययोद्धर ॥ ९॥

tvadarcanavidhiṃ jāne na bhaktistvayi me hṛdi |athāpyanugrahāṇeśa kevalaṃ dayayoddhara || 9||

इति श्रीवासुदेवानन्दसरस्वतीविरचितं शङ्करस्तोत्रं सम्पूर्णम् ।

iti śrīvāsudevānandasarasvatīviracitaṃ śaṅkarastotraṃ sampūrṇam |