रुद्रकवचम् २ Rudra Kavacham 2

भैरव उवाचवक्ष्यामि देवि कवचं मङ्गलं प्राणरक्षकम् ।अहोरात्रं महादेवरक्षार्थं देवमण्डितम् ॥ १॥

bhairava uvācavakṣyāmi devi kavacaṃ maṅgalaṃ prāṇarakṣakam |ahorātraṃ mahādevarakṣārthaṃ devamaṇḍitam || 1||

अस्य श्रीमहादेवकवचस्य वामदेव ऋषिः, पङ्क्तिश्छन्दः,सौः बीजं, रुद्राः देवता, सर्वार्थसाधने विनियोगः ।रुद्रो मामग्रतः पातु पृष्ठतः पातु शङ्करः ।कपर्दी दक्षिणे पातु वामपार्श्वे तथा हरः ॥ २॥

asya śrīmahādevakavacasya vāmadeva ṛṣiḥ, paṅktiśchandaḥ,sauḥ bījaṃ, rudrāḥ devatā, sarvārthasādhane viniyogaḥ |rudro māmagrataḥ pātu pṛṣṭhataḥ pātu śaṅkaraḥ |kapardī dakṣiṇe pātu vāmapārśve tathā haraḥ || 2||

शिवः शिरसि मां पातु ललाटे नीललोहितः ।नेत्रं मे त्र्यम्बकः पातु बाहुयुग्मं महेश्वरः ॥ ३॥

śivaḥ śirasi māṃ pātu lalāṭe nīlalohitaḥ |netraṃ me tryambakaḥ pātu bāhuyugmaṃ maheśvaraḥ || 3||

हृदये च महादेव ईश्वरश्च तथोदरे ।नाभौ कुक्षौ कटिस्थाने पादौ पातु महेश्वरः ॥ ४॥

hṛdaye ca mahādeva īśvaraśca tathodare |nābhau kukṣau kaṭisthāne pādau pātu maheśvaraḥ || 4||

सर्वं रक्षतु भूतेशः सर्वगात्राणि मे हरः ।पाशं शूलञ्च दिव्यास्त्रं खड्गं वज्रं तथैव च ॥ ५॥

sarvaṃ rakṣatu bhūteśaḥ sarvagātrāṇi me haraḥ |pāśaṃ śūlañca divyāstraṃ khaḍgaṃ vajraṃ tathaiva ca || 5||

नमस्करोमि भूतेश रक्ष मां जगदीश्वर ।पापेभ्यो नरकेभ्यश्च त्राहि मां भक्तवत्सल ॥ ६॥

namaskaromi bhūteśa rakṣa māṃ jagadīśvara |pāpebhyo narakebhyaśca trāhi māṃ bhaktavatsala || 6||

जन्ममृत्युजराव्याधिकामक्रोधादपि प्रभो ।लोभमोहान्महादेव रक्ष मां त्रिदशेश्वर ॥ ७॥

janmamṛtyujarāvyādhikāmakrodhādapi prabho |lobhamohānmahādeva rakṣa māṃ tridaśeśvara || 7||

त्वं गतिस्त्वं मतिश्चैव त्वं भूमिस्त्वं परायणः ।कायेन मनसा वाचा त्वयि भक्तिर्दृढास्तु मे ॥ ८॥

tvaṃ gatistvaṃ matiścaiva tvaṃ bhūmistvaṃ parāyaṇaḥ |kāyena manasā vācā tvayi bhaktirdṛḍhāstu me || 8||

फलश्रुतिः ।इत्येतद्रुद्रकवचं पाठनात्पापनाशनम् ।महादेवप्रसादेन भैरवेन च कीर्तितम् ॥ ९॥

phalaśrutiḥ |ityetadrudrakavacaṃ pāṭhanātpāpanāśanam |mahādevaprasādena bhairavena ca kīrtitam || 9||

न तस्य पापं देहेषु न भयं तस्य विद्यते ।प्राप्नोति सुखमारोग्यं पुत्रमायुः प्रवर्द्धनम् ॥ १०॥

na tasya pāpaṃ deheṣu na bhayaṃ tasya vidyate |prāpnoti sukhamārogyaṃ putramāyuḥ pravarddhanam || 10||

पुत्रार्थी लभते पुत्रान्धनार्थी धनमाप्नुयात् ।विद्यार्थी लभते विद्यां मोक्षार्थी मोक्षमेव च ॥ ११॥

putrārthī labhate putrāndhanārthī dhanamāpnuyāt |vidyārthī labhate vidyāṃ mokṣārthī mokṣameva ca || 11||

व्याधितो मुच्यते रोगाद्बद्धो मुच्येत बन्धनात् ।ब्रह्महत्यादि पापं च पठनादेव नश्यति ॥ १२॥

vyādhito mucyate rogādbaddho mucyeta bandhanāt |brahmahatyādi pāpaṃ ca paṭhanādeva naśyati || 12||

इति क्रियोड्डीशे महातन्त्रराजे देवीश्वरसंवादे रुद्रकवचं समाप्तम् ।अष्टमः पटलः

iti kriyoḍḍīśe mahātantrarāje devīśvarasaṃvāde rudrakavacaṃ samāptam |aṣṭamaḥ paṭalaḥ