कुळीराष्टकम् Khulirashtakam

तवास्याराद्धारः कति मुनिवराः कत्यपि सुराःतपस्यासन्नाहैः सुचिरममनोवाक्पथचरैः ।अमीषां केषामप्यसुलभममुष्मै पदमदाःकुळीरायोदारं शिव तव दया सा बलवती ॥ १॥

tavāsyārāddhāraḥ kati munivarāḥ katyapi surāḥtapasyāsannāhaiḥ suciramamanovākpathacaraiḥ |amīṣāṃ keṣāmapyasulabhamamuṣmai padamadāḥkuḷīrāyodāraṃ śiva tava dayā sā balavatī || 1||

अकर्तुं कर्तुं वा भुवनमखिलं ये किल भवन्त्यलं ते पादान्ते पुरहर वलन्ते तव सुराः ।कुटीरं कोटीरे त्वमहह कुळीराय कृतवान्भवान् विश्वस्येष्टे तव पुनरधीष्टे हि करुणा ॥ २॥

akartuṃ kartuṃ vā bhuvanamakhilaṃ ye kila bhavantyalaṃ te pādānte purahara valante tava surāḥ |kuṭīraṃ koṭīre tvamahaha kuḷīrāya kṛtavānbhavān viśvasyeṣṭe tava punaradhīṣṭe hi karuṇā || 2||

तवारूढो मौळिं तदनधिगमव्रीळनमितांचतुर्वक्त्रीं यस्त्वच्चरणसविधे पश्यति विधेः ।कुळीरस्यास्यायं कुलिशभृदलक्ष्यश्शिव भवद्दया सेयं त्वामप्यधरितवती किं न कुरुताम् ॥ ३॥

tavārūḍho mauḷiṃ tadanadhigamavrīḷanamitāṃcaturvaktrīṃ yastvaccaraṇasavidhe paśyati vidheḥ |kuḷīrasyāsyāyaṃ kuliśabhṛdalakṣyaśśiva bhavaddayā seyaṃ tvāmapyadharitavatī kiṃ na kurutām || 3||

श्रुतिस्मृत्यभ्यासो नयनिचयभूयःपरिचयःतथा तत्तत्कर्मव्यसनमपि शुष्कश्रमकृते ।त्वयि स्वान्तं लग्नं न यदि यदि लग्नं तदियताजिता कैवल्यश्रीः पुरहर कुळीरोऽत्र गमकः ॥ ४॥

śrutismṛtyabhyāso nayanicayabhūyaḥparicayaḥtathā tattatkarmavyasanamapi śuṣkaśramakṛte |tvayi svāntaṃ lagnaṃ na yadi yadi lagnaṃ tadiyatājitā kaivalyaśrīḥ purahara kuḷīro'tra gamakaḥ || 4||

तपोभिः प्राग्जन्मप्रकरपरिनम्रैः पुररिपोतनौ यस्यां कस्यामपि स हि भवार्तिप्रतिभटः ।त्वयि स्याद्धीबन्धस्तनुरचरमा सैव चरमाकुळीरो ब्रूते तन्महिमपथविद्वद्गुरुरयम् ॥ ५॥

tapobhiḥ prāgjanmaprakaraparinamraiḥ puraripotanau yasyāṃ kasyāmapi sa hi bhavārtipratibhaṭaḥ |tvayi syāddhībandhastanuracaramā saiva caramākuḷīro brūte tanmahimapathavidvadgururayam || 5||

धियो धानं नाम त्वयि शिव चिदानन्द परमोन्मिषत्साम्राज्यश्रीकुरळरभसाकर्षकुतुकम् ।कुळीरेण ज्ञातं कथमनधिगम्यं दिविषदांदया ते स्वच्छन्दा प्रथयति न कस्मै किमथवा ॥ ६॥

dhiyo dhānaṃ nāma tvayi śiva cidānanda paramonmiṣatsāmrājyaśrīkuraḷarabhasākarṣakutukam |kuḷīreṇa jñātaṃ kathamanadhigamyaṃ diviṣadāṃdayā te svacchandā prathayati na kasmai kimathavā || 6||

तदुच्चत्वं नैच्यं त्वितरदिति लोकाः शिव मुधाव्यवस्थामस्थाने विदधति च नन्दन्ति च मिथः।कुळीरस्त्वन्मौळिस्थितिमसुलभामेत्य स भवत्कृपामुच्चत्वं तद्विरहमपि नैच्यं प्रथयति ॥ ७॥

taduccatvaṃ naicyaṃ tvitaraditi lokāḥ śiva mudhāvyavasthāmasthāne vidadhati ca nandanti ca mithaḥ|kuḷīrastvanmauḷisthitimasulabhāmetya sa bhavatkṛpāmuccatvaṃ tadvirahamapi naicyaṃ prathayati || 7||

कुळीरेशाख्यातिर्गिरिश कृपयोच्चैरुपहृतातवेयं भक्तायोन्नतिवितरणश्रीगमनिका ।भवद्भक्त्युन्मीलत्फलगरिमटीकास्थितिजुषाकुळीरस्य ख्यात्या जगति सहचर्या विहरते ॥ ८॥

kuḷīreśākhyātirgiriśa kṛpayoccairupahṛtātaveyaṃ bhaktāyonnativitaraṇaśrīgamanikā |bhavadbhaktyunmīlatphalagarimaṭīkāsthitijuṣākuḷīrasya khyātyā jagati sahacaryā viharate || 8||

कुळीरेश स्तोत्रं त्वदनुपधिकानुग्रहभवंपठेयुर्ये नित्यं शृणुयुरपि वा ये पुनरिदम् ।प्रसादात्ते तेऽमी विधुतदुरितास्त्वय्यभिरताःभवेयुर्निर्यत्नाधिगतसकलाभीप्सितफलाः ॥ ९॥

kuḷīreśa stotraṃ tvadanupadhikānugrahabhavaṃpaṭheyurye nityaṃ śṛṇuyurapi vā ye punaridam |prasādātte te'mī vidhutaduritāstvayyabhiratāḥbhaveyurniryatnādhigatasakalābhīpsitaphalāḥ || 9||

कर्कटकचन्द्रयोगः कर्कटकेशान मूर्ध्नि ते दृष्टः ।कारय वृष्टिममोघां वारय वर्षोपरोधदुर्योगम् ॥ १०॥

karkaṭakacandrayogaḥ karkaṭakeśāna mūrdhni te dṛṣṭaḥ |kāraya vṛṣṭimamoghāṃ vāraya varṣoparodhaduryogam || 10||

इति श्री श्रीधरवेङ्कटेशार्य विरचितं कुळीराष्टकं समाप्तम् ॥

iti śrī śrīdharaveṅkaṭeśārya viracitaṃ kuḷīrāṣṭakaṃ samāptam ||