केदारेशशिवस्तुतिः एवं केदारनाथमहिम दिक्पालादिकृता Kedaranatha Mahima

केदारनाथमहिम अथवा दिक्पालादिकृत केदारेशशिवस्तुति वर्णनम्देव्युवाचश्रुतं बाणासुराख्यानं भवतः परमेश्वर ।केदारस्थानमहिमां वदाद्य शिव शङ्कर ॥ १॥

kedāranāthamahima athavā dikpālādikṛta kedāreśaśivastuti varṇanamdevyuvācaśrutaṃ bāṇāsurākhyānaṃ bhavataḥ parameśvara |kedārasthānamahimāṃ vadādya śiva śaṅkara || 1||

सूतःमहादेवो महेशान्या पृष्टो दक्षमखान्तकृत् ।देवीं प्राहारविन्दाक्षः केदारस्थानवैभवम् ॥ २॥

sūtaḥmahādevo maheśānyā pṛṣṭo dakṣamakhāntakṛt |devīṃ prāhāravindākṣaḥ kedārasthānavaibhavam || 2||

ईश्वरःअस्ति क्षेत्रवरं देवि केदारं भुवि विश्रुतम् ।तत्क्षेत्रमहिमा सुभ्रु वेदैर्न ज्ञायते शिवे ॥ ३॥

īśvaraḥasti kṣetravaraṃ devi kedāraṃ bhuvi viśrutam |tatkṣetramahimā subhru vedairna jñāyate śive || 3||

तस्मिन् क्षेत्रवरे देवि ब्रह्माद्या विबुवोत्तमाः ।निवसन्ति महाभागे केदारेश्वरपूजकाः ॥ ४॥

tasmin kṣetravare devi brahmādyā vibuvottamāḥ |nivasanti mahābhāge kedāreśvarapūjakāḥ || 4||

तल्लिङ्गसदृशं लिङ्गं न भूतं न भविष्यति ।हित्वा कैलासशिखरं गिरीशो वसतीश्वरः ॥ ५॥

talliṅgasadṛśaṃ liṅgaṃ na bhūtaṃ na bhaviṣyati |hitvā kailāsaśikharaṃ girīśo vasatīśvaraḥ || 5||

सदा तत्र महाशैवा वसन्ति शिवतत्पराः ।भस्मरुद्राक्षवीताङ्गा त्रिपुण्ड्रावलिभासुराः ॥ ६॥

sadā tatra mahāśaivā vasanti śivatatparāḥ |bhasmarudrākṣavītāṅgā tripuṇḍrāvalibhāsurāḥ || 6||

केदारेशस्य देवस्य नित्यमाराधने रताः ।षट्सहस्रं फलाहारा वाय्वाहाराश्च पञ्चकम् ॥ ७॥

kedāreśasya devasya nityamārādhane ratāḥ |ṣaṭsahasraṃ phalāhārā vāyvāhārāśca pañcakam || 7||

त्रिसहस्राम्बुपर्णाशा भासुराः शिवतत्पराः ।च्यवना भार्गवाश्चैव भारद्वाजाश्च काश्यपाः ॥ ८॥

trisahasrāmbuparṇāśā bhāsurāḥ śivatatparāḥ |cyavanā bhārgavāścaiva bhāradvājāśca kāśyapāḥ || 8||

मौद्गल्या वीतहव्याश्च वैश्वामित्रात्रिसम्भवाः ।मत्पादपूजकाः सर्वे केदारक्षेत्रवासिनः ॥ ९॥

maudgalyā vītahavyāśca vaiśvāmitrātrisambhavāḥ |matpādapūjakāḥ sarve kedārakṣetravāsinaḥ || 9||

ब्राह्मणा ब्रह्मसदृशाः ऋग्यजुःसामपारगाः ।निवसन्ति सदा देवि मम लिङ्गार्चने रताः ॥ १०॥

brāhmaṇā brahmasadṛśāḥ ṛgyajuḥsāmapāragāḥ |nivasanti sadā devi mama liṅgārcane ratāḥ || 10||

पञ्चाग्निनिरताः केचित्त्रेताग्निशरणाः परे ।नारदाद्याश्च मुनयो वसन्ति सततं शिवे ॥ ११॥

pañcāgniniratāḥ kecittretāgniśaraṇāḥ pare |nāradādyāśca munayo vasanti satataṃ śive || 11||

गन्धर्वाः सिद्धनागाद्या यक्षाः किम्पुरुषाः सदा ।पत्नीभिः शैलशिखरे केदारश्वरसेविनः ॥ १२॥

gandharvāḥ siddhanāgādyā yakṣāḥ kimpuruṣāḥ sadā |patnībhiḥ śailaśikhare kedāraśvarasevinaḥ || 12||

मामाराध्यं समाराध्य ब्रह्मविष्ण्वादयः सुराः ।स्वं स्वं स्थानमवापुस्ते केदारेशसमर्चनात् ॥ १३॥

māmārādhyaṃ samārādhya brahmaviṣṇvādayaḥ surāḥ |svaṃ svaṃ sthānamavāpuste kedāreśasamarcanāt || 13||

अत्र केदारनाथं यो शिवरात्रौ चतुर्दशीम् ।उपोष्य प्रयतो भक्त्या देवि यामचतुष्टयम् ॥ १४॥

atra kedāranāthaṃ yo śivarātrau caturdaśīm |upoṣya prayato bhaktyā devi yāmacatuṣṭayam || 14||

पूजां कुर्याद्बिल्वपत्रैः स मोक्षमधिगच्छति ।अन्यत्र कोटिलिङ्गार्चाफलं यत् सुरसत्तमे ॥ १५॥

pūjāṃ kuryādbilvapatraiḥ sa mokṣamadhigacchati |anyatra koṭiliṅgārcāphalaṃ yat surasattame || 15||

केदारेश्वरमौलौ तु एकबिल्वार्पणाद्धि तत् ।एकं वा भोजयेद्विप्रं केदारे कोटि तद्भवेत् ॥ १६॥

kedāreśvaramaulau tu ekabilvārpaṇāddhi tat |ekaṃ vā bhojayedvipraṃ kedāre koṭi tadbhavet || 16||

भोजयेच्छैवमेकं तु तदनन्तफलं स्मृतम् ।तस्य केदारनाथस्य कुण्डं पर्वतमूर्धनि ॥ १७॥

bhojayecchaivamekaṃ tu tadanantaphalaṃ smṛtam |tasya kedāranāthasya kuṇḍaṃ parvatamūrdhani || 17||

ख्यातं केदारकुण्डं तदुत्फुल्लकमलोज्ज्वलम् ।तत्कुण्डपूतपानीयैः स्नात्वा सन्तर्पयेत्पितॄन् ॥ १८॥

khyātaṃ kedārakuṇḍaṃ tadutphullakamalojjvalam |tatkuṇḍapūtapānīyaiḥ snātvā santarpayetpitṝn || 18||

पितरस्तृप्तिमायान्ति द्वादशाब्दं सुरेश्वरि ।पुरान्धकासुरं हत्वा तच्छूलाग्रेण शङ्करि ॥ १९॥

pitarastṛptimāyānti dvādaśābdaṃ sureśvari |purāndhakāsuraṃ hatvā tacchūlāgreṇa śaṅkari || 19||

त्वत्पितुः शिखरे पुण्ये त्वया तत्खानितं सरः ।तस्मिन्सरसि विस्तीर्णे त्वत्तटे त्वत्तपोवनम् ॥ २०॥

tvatpituḥ śikhare puṇye tvayā tatkhānitaṃ saraḥ |tasminsarasi vistīrṇe tvattaṭe tvattapovanam || 20||

मत्प्रीयते त्वया देवि विचीर्णाऽत्र तपःक्रिया ।तत्तीरे स्थापितं लिङ्गं त्वया गौरीश्वराभिधम् ॥ २१॥

matprīyate tvayā devi vicīrṇā'tra tapaḥkriyā |tattīre sthāpitaṃ liṅgaṃ tvayā gaurīśvarābhidham || 21||

तल्लिङ्गदर्शनादेव मम लोके महीयते ।वसिष्ठात्रिमृकण्ड्वाद्या भरद्वाजपराशरौ ॥ २२॥

talliṅgadarśanādeva mama loke mahīyate |vasiṣṭhātrimṛkaṇḍvādyā bharadvājaparāśarau || 22||

दुर्वासा गौतमाद्याश्च भृगुकुम्भोद्भवादयः ।दधीच्याङ्गिरसोचथ्याः जामदग्न्यो महाबलः ॥ २३॥

durvāsā gautamādyāśca bhṛgukumbhodbhavādayaḥ |dadhīcyāṅgirasocathyāḥ jāmadagnyo mahābalaḥ || 23||

क्षेत्रमुत्साद्य विप्रेन्द्रैः प्रार्थितः शममागतः ।हिमवन्मूर्ध्नि सरसस्तीरे तप्यन्ति तापसाः ॥ २४॥

kṣetramutsādya viprendraiḥ prārthitaḥ śamamāgataḥ |himavanmūrdhni sarasastīre tapyanti tāpasāḥ || 24||

केदारनाथं दृष्ट्वा मां पूज्य बिल्वैः सुकोमलैः ।उपहारैश्च विविधैरपारैः फलमण्डलैः ॥ २५॥

kedāranāthaṃ dṛṣṭvā māṃ pūjya bilvaiḥ sukomalaiḥ |upahāraiśca vividhairapāraiḥ phalamaṇḍalaiḥ || 25||

ईश्वरःतद्गौरीसरसि स्नात्वा पुण्ये पापौघहारिणि ।वृत्रं हत्वाथ जम्भारिर्वज्रेणासुरसत्तमम् ॥ २६॥

īśvaraḥtadgaurīsarasi snātvā puṇye pāpaughahāriṇi |vṛtraṃ hatvātha jambhārirvajreṇāsurasattamam || 26||

छद्मना स्वच्छसरसि गौर्याख्ये पापनुत्तये ।स्नात्वा सुरगणैः सार्धं वृत्रहा शुद्धिमागतः ॥ २७॥

chadmanā svacchasarasi gauryākhye pāpanuttaye |snātvā suragaṇaiḥ sārdhaṃ vṛtrahā śuddhimāgataḥ || 27||

केदारनाथं दृष्ट्वा मां शक्रः सुरगणैः सह ।तुष्टाव मां तदा भक्त्या तत्सुतिं शृणु शाम्भवि ॥ २८॥

kedāranāthaṃ dṛṣṭvā māṃ śakraḥ suragaṇaiḥ saha |tuṣṭāva māṃ tadā bhaktyā tatsutiṃ śṛṇu śāmbhavi || 28||

इन्द्रःशम्भो विश्वेश भर्ग त्रिनयन भगवन्कालकालान्धकारे पुरहर दुरिताहे घोररूपान्तकारे ।शमय शमय दुःखं दैत्यवर्गारियुद्ध ज्वरहर भयहारिन् पाहिं केदारनाथ ॥ २९॥

indraḥśambho viśveśa bharga trinayana bhagavankālakālāndhakāre purahara duritāhe ghorarūpāntakāre |śamaya śamaya duḥkhaṃ daityavargāriyuddha jvarahara bhayahārin pāhiṃ kedāranātha || 29||

ईश्वरःशक्रः केदारनाथं मामेवं स्तुत्वा प्रणम्य च ।विहाय पापं तद्देवि त्रिविष्टपमगात् तदा ॥ ३०॥

īśvaraḥśakraḥ kedāranāthaṃ māmevaṃ stutvā praṇamya ca |vihāya pāpaṃ taddevi triviṣṭapamagāt tadā || 30||

वरुणोऽपि महादेवि विप्रभार्यां पुराऽहरत् ।उचथ्यस्य बलात पाशी कामबाणप्रपीडितः ॥ ३१॥

varuṇo'pi mahādevi viprabhāryāṃ purā'harat |ucathyasya balāta pāśī kāmabāṇaprapīḍitaḥ || 31||

जलोदरमहारोगग्राहग्रस्तोऽभवच्छिवे ।प्रणम्य मां महादेवि केदारेशं प्रपूज्य च ॥ ३२॥

jalodaramahārogagrāhagrasto'bhavacchive |praṇamya māṃ mahādevi kedāreśaṃ prapūjya ca || 32||

विमुक्तस्तेन पापेन मां स्तुत्वैव स भक्तितः ॥ ३३॥

vimuktastena pāpena māṃ stutvaiva sa bhaktitaḥ || 33||

वरुणःमारमार करवीरसुमाढ्य स्रग्धरामरवारादिसुपूज्य ।संस्थितामरगणेन्द्रभूधर पाहि मामखिलपारदवीर्य ॥ ३४॥

varuṇaḥmāramāra karavīrasumāḍhya sragdharāmaravārādisupūjya |saṃsthitāmaragaṇendrabhūdhara pāhi māmakhilapāradavīrya || 34||

ईश्वरःस्तुत्वैवं पाशहस्तो मां नत्वा सम्पूज्य मा शिवे ।ययौ स्थानं स नीरोगो मुक्तमेघ इवोडुराट् ॥ ३५॥

īśvaraḥstutvaivaṃ pāśahasto māṃ natvā sampūjya mā śive |yayau sthānaṃ sa nīrogo muktamegha ivoḍurāṭ || 35||

माण्डव्येनापि सुभगे शप्तश्चण्डांशुनन्दनः ।शापमुक्त्यै स केदारं मां प्रणम्याथ शूलिनम् ॥ ३६॥

māṇḍavyenāpi subhage śaptaścaṇḍāṃśunandanaḥ |śāpamuktyai sa kedāraṃ māṃ praṇamyātha śūlinam || 36||

बिल्वपत्रैः समभ्यर्च्य स्नात्वा गौरीसरित्तटे ।पुण्याग्निसप्तकैर्मन्त्रैः समुद्धूल्य स्वकां तनुम् ॥ ३७॥

bilvapatraiḥ samabhyarcya snātvā gaurīsarittaṭe |puṇyāgnisaptakairmantraiḥ samuddhūlya svakāṃ tanum || 37||

तुष्टाव मां विशुद्धात्मा केदारेशं महेश्वरम् ।यमःतस्थुषस्पतिमहो भगवन्तं बभ्रुशं च हरिकेशमुदारम् ।मृगं न भीममुपहत्नुमुग्रं प्रसाद्य पापैर्न बिभेमि शम्भो ॥ ३८॥

tuṣṭāva māṃ viśuddhātmā kedāreśaṃ maheśvaram |yamaḥtasthuṣaspatimaho bhagavantaṃ babhruśaṃ ca harikeśamudāram |mṛgaṃ na bhīmamupahatnumugraṃ prasādya pāpairna bibhemi śambho || 38||

ईश्वरःएवं मामम्बिके स्तुत्वा मुक्तशापः स सूर्यजः ।जगाम दक्षिणामाशां पितृभिः परिपालिताम् ॥ ३९॥

īśvaraḥevaṃ māmambike stutvā muktaśāpaḥ sa sūryajaḥ |jagāma dakṣiṇāmāśāṃ pitṛbhiḥ paripālitām || 39||

कुबेरो यक्षराड्देवि पौलस्त्येनाथ निर्जितः ।जगाम परमामार्तिं मां केदारं प्रणम्य च ॥ ४०॥

kubero yakṣarāḍdevi paulastyenātha nirjitaḥ |jagāma paramāmārtiṃ māṃ kedāraṃ praṇamya ca || 40||

संस्नाय गौरीसरसि भस्मरुद्राक्षभूषणः ।तत्कुण्डशोधितैर्नीरैर्बिल्वपत्रैः समर्च्य च ॥ ४१॥

saṃsnāya gaurīsarasi bhasmarudrākṣabhūṣaṇaḥ |tatkuṇḍaśodhitairnīrairbilvapatraiḥ samarcya ca || 41||

यक्षराण्मां विरूपाक्षमस्तौषीज्जगदम्बिके ॥ ४२॥

yakṣarāṇmāṃ virūpākṣamastauṣījjagadambike || 42||

कुबेरःमीढुष्टमः शिवतमस्त्वमसि प्रसिद्धं सिद्धान्तसारमहिमन् मृडयाशु शम्भो ।संसारघोरविपिनोद्भवदावदग्धं त्वन्मूर्धचन्द्रकिरणैर्मम शीतयाङ्गम् ॥ ४३॥

kuberaḥmīḍhuṣṭamaḥ śivatamastvamasi prasiddhaṃ siddhāntasāramahiman mṛḍayāśu śambho |saṃsāraghoravipinodbhavadāvadagdhaṃ tvanmūrdhacandrakiraṇairmama śītayāṅgam || 43||

ईश्वरःइत्थं स यक्षराड्देवि स्तुत्वा मामगजापतिम् ।धनाधिपत्यं सम्प्राप उत्तराशापतिस्तदा ॥ ४४॥

īśvaraḥitthaṃ sa yakṣarāḍdevi stutvā māmagajāpatim |dhanādhipatyaṃ samprāpa uttarāśāpatistadā || 44||

एवं दिशानामधिपा विदिशां पतयस्तथा ।अभीष्टं प्रापुरत्यर्थं मामाराध्यैव भक्तितः ॥ ४५॥

evaṃ diśānāmadhipā vidiśāṃ patayastathā |abhīṣṭaṃ prāpuratyarthaṃ māmārādhyaiva bhaktitaḥ || 45||

अग्निश्च निरृतिर्वायुरीशानो मद्गणोत्तमः ।सत्सारूप्यं मुदा प्राप मां केदारं समर्चयन् ॥ ४६॥

agniśca nirṛtirvāyurīśāno madgaṇottamaḥ |satsārūpyaṃ mudā prāpa māṃ kedāraṃ samarcayan || 46||

तुष्टुवुर्विदिशां नाथा विप्रशापप्रपीडिताः ।अग्निश्च सर्वभक्षत्वं निरृतिः पापकारिताम् ॥ ४७॥

tuṣṭuvurvidiśāṃ nāthā vipraśāpaprapīḍitāḥ |agniśca sarvabhakṣatvaṃ nirṛtiḥ pāpakāritām || 47||

वायुरायासराहित्यमीशानो मत्स्वरूपताम् ।अग्निवायुनिरृतीशानाःमहादेवो देवः सकलजगदाराध्यचरणो जगद्रक्षाशिक्षास्थितिजननचातुर्यकरणः ।हरिर्ब्रह्मा स्कन्दो गणपतिरुमा शक्रदितिजास्त्वधर्वाणेषु त्वं प्रथितयशसो वै तव नमः ॥ ४८॥

vāyurāyāsarāhityamīśāno matsvarūpatām |agnivāyunirṛtīśānāḥmahādevo devaḥ sakalajagadārādhyacaraṇo jagadrakṣāśikṣāsthitijananacāturyakaraṇaḥ |harirbrahmā skando gaṇapatirumā śakraditijāstvadharvāṇeṣu tvaṃ prathitayaśaso vai tava namaḥ || 48||

ईश्वरःएवं स्तुत्वाऽथ ते सर्वे विदिशां पतयस्तथा ।लेभिरे परमां सिद्धिं केदारश्वरपूजनाम् ॥ ४९॥

īśvaraḥevaṃ stutvā'tha te sarve vidiśāṃ patayastathā |lebhire paramāṃ siddhiṃ kedāraśvarapūjanām || 49||

मुनयश्चापि देवेशि विश्वामित्रोऽत्रिरङ्गिराः ।तेपुस्तपो महाघोरं ज्वलत्पञ्चाग्निमध्यगाः ॥ ५०॥

munayaścāpi deveśi viśvāmitro'triraṅgirāḥ |tepustapo mahāghoraṃ jvalatpañcāgnimadhyagāḥ || 50||

ब्राह्मण्यप्राप्तये देवि विश्वामित्रेण संस्तुतः ॥ ५१॥

brāhmaṇyaprāptaye devi viśvāmitreṇa saṃstutaḥ || 51||

विश्वामित्रःगायत्र्या प्रतिपादितोऽसि भगवन् संसारसम्भर्जकोभर्गस्त्वं सवितुर्वरेण्यमहसस्त्वां सर्वदा धीमहि ।तेजस्त्वात्मगतं दिनोदयविधौ विप्रादिभिर्ध्यायसेबुद्धिं निश्चयकारिणीं च भगवन् सञ्चोदयस्यान्तरः ॥ ५२॥

viśvāmitraḥgāyatryā pratipādito'si bhagavan saṃsārasambharjakobhargastvaṃ saviturvareṇyamahasastvāṃ sarvadā dhīmahi |tejastvātmagataṃ dinodayavidhau viprādibhirdhyāyasebuddhiṃ niścayakāriṇīṃ ca bhagavan sañcodayasyāntaraḥ || 52||

अत्रिः पुत्रविहीनश्च रिरिचानोऽन्वतप्यत ।और्वाय पुत्रान् दत्वा स्वान् पुत्रानाप्तुं तदाद्रिजे ॥ ५३॥

atriḥ putravihīnaśca riricāno'nvatapyata |aurvāya putrān datvā svān putrānāptuṃ tadādrije || 53||

इष्टवांश्चातिरात्रेण ह्यस्मिन् भूधरसत्तमे ।मां स्तुत्वा चाम्बिके पुत्रांश्चतुरः प्राप्तवांस्तदा ॥ ५४॥

iṣṭavāṃścātirātreṇa hyasmin bhūdharasattame |māṃ stutvā cāmbike putrāṃścaturaḥ prāptavāṃstadā || 54||

अत्रिःराजानं त्वामध्वरेश च रुद्रं होतारं त्वा सत्ययुजं च रोदस्योः ।विद्युत्पातसमादचित्तमरणात्पूर्वं शिवं शाश्वतंप्राप्तोऽस्म्यन्वहमेकमेव शरणं हिरण्यरूपमवसे कृणुध्वम् ॥ ५५॥

atriḥrājānaṃ tvāmadhvareśa ca rudraṃ hotāraṃ tvā satyayujaṃ ca rodasyoḥ |vidyutpātasamādacittamaraṇātpūrvaṃ śivaṃ śāśvataṃprāpto'smyanvahamekameva śaraṇaṃ hiraṇyarūpamavase kṛṇudhvam || 55||

मन्त्रार्थवादविधिषु श्रुतिषु प्रवृत्ताः तासु क्रिया मखशतोत्थफलैर्विचित्रैः ।पोषं रयिं स्वर्गमथ प्रजां पशून् पुष्टिं प्रतिष्ठां च तथोजसि त्वम् ॥ ५६॥

mantrārthavādavidhiṣu śrutiṣu pravṛttāḥ tāsu kriyā makhaśatotthaphalairvicitraiḥ |poṣaṃ rayiṃ svargamatha prajāṃ paśūn puṣṭiṃ pratiṣṭhāṃ ca tathojasi tvam || 56||

तत्र प्ररोचकपदेषु निविष्टचित्ताः किं नश्वरैः फलगणैः प्रमथाधिनाथ ।त्वामध्वरेश्वरमहो फलदानशीलं नाराधयन्ति सहसा जडबुद्धयस्ते ॥ ५७॥

tatra prarocakapadeṣu niviṣṭacittāḥ kiṃ naśvaraiḥ phalagaṇaiḥ pramathādhinātha |tvāmadhvareśvaramaho phaladānaśīlaṃ nārādhayanti sahasā jaḍabuddhayaste || 57||

अङ्गिराश्च महादेवि केदारेशमथास्तवीत् ।भ्रात्रा विनिकृतः पूर्वं दौरात्म्यौद्धत्यगर्विणा ॥ ५८॥

aṅgirāśca mahādevi kedāreśamathāstavīt |bhrātrā vinikṛtaḥ pūrvaṃ daurātmyauddhatyagarviṇā || 58||

अङ्गिराःतथ्यं त्वदीयजन इत्ययि सामिचन्द्रचूड प्रभो मयि महाघसमुद्रकाये ।त्वं वेदगीत अधिवक्तृतया प्रसिद्ध पाहीश मामधिकया सहमान शम्भो ॥ ५९॥

aṅgirāḥtathyaṃ tvadīyajana ityayi sāmicandracūḍa prabho mayi mahāghasamudrakāye |tvaṃ vedagīta adhivaktṛtayā prasiddha pāhīśa māmadhikayā sahamāna śambho || 59||

एवं स्तुत्वाऽथ मुनयः स्वाभीष्टं प्रापुरम्बिके ।केदारेशप्रसादेन अन्ये सर्वे मरुद्गणाः ॥ ६०॥

evaṃ stutvā'tha munayaḥ svābhīṣṭaṃ prāpurambike |kedāreśaprasādena anye sarve marudgaṇāḥ || 60||

सूतःको वा केदारलिङ्गं जनिशतविततापारपापैकभङ्गं प्रालेयाचलकन्यकापरिलसद्वामाङ्गसङ्गं सदा ।दृष्ट्वाऽनङ्गभुजङ्गसङ्गजनितामन्दाङ्गकोपस्फुरत्भालापाङ्गकृताङ्गसङ्गरहितं श्रीशङ्गमीशं भजे ॥ ६१॥

sūtaḥko vā kedāraliṅgaṃ janiśatavitatāpārapāpaikabhaṅgaṃ prāleyācalakanyakāparilasadvāmāṅgasaṅgaṃ sadā |dṛṣṭvā'naṅgabhujaṅgasaṅgajanitāmandāṅgakopasphuratbhālāpāṅgakṛtāṅgasaṅgarahitaṃ śrīśaṅgamīśaṃ bhaje || 61||

॥ इति शिवरहस्यान्तर्गते शिवगौरीसंवादे केदारनाथमहिम अथवा दिक्पालादिकृत केदारेशशिवस्तुति वर्णनं सम्पूर्णम् ॥॥ श्रीशिवरहस्यम् । भर्गाख्यः पञ्चमांशः । अध्यायः ११॥– ॥ श्रीशिवरहस्यम् । भर्गाख्यः पन्चमांशः । अध्यायः ११॥

|| iti śivarahasyāntargate śivagaurīsaṃvāde kedāranāthamahima athavā dikpālādikṛta kedāreśaśivastuti varṇanaṃ sampūrṇam |||| śrīśivarahasyam | bhargākhyaḥ pañcamāṃśaḥ | adhyāyaḥ 11||– || śrīśivarahasyam | bhargākhyaḥ pancamāṃśaḥ | adhyāyaḥ 11||