कैलासवर्णनम् ५ कैलासशैले वृषगोपुरवर्णनम् ५ Kailasavarnanam 5

(कैलासशैले वृषगोपुरवर्णनम् ५)स्कन्दःकैलासान्तरतः प्राच्यां पुष्परागविनिर्मितम् ।पञ्चलक्षप्रमाणेन प्राकारवरगोपुरम् ॥ १॥

(kailāsaśaile vṛṣagopuravarṇanam 5)skandaḥkailāsāntarataḥ prācyāṃ puṣparāgavinirmitam |pañcalakṣapramāṇena prākāravaragopuram || 1||

उद्यद्भानुशताधिक्यचाकचक्यमनोहरम् ।पुष्परागमणिप्रोद्यद्वृषभैस्समधिष्ठितम् ॥ २॥

udyadbhānuśatādhikyacākacakyamanoharam |puṣparāgamaṇiprodyadvṛṣabhaissamadhiṣṭhitam || 2||

प्राकारं लक्षमानेन मनसा शूलिना कृतम् ।रुद्रावतारचरितैर्वेदिकापट्टिकान्वितम् ॥ ३॥

prākāraṃ lakṣamānena manasā śūlinā kṛtam |rudrāvatāracaritairvedikāpaṭṭikānvitam || 3||

राजद्वृषभकुम्भाग्रदोधूयितपताककम् ।पुष्परागमणिज्योतितिरस्कृतशशिद्युति ॥ ४॥

rājadvṛṣabhakumbhāgradodhūyitapatākakam |puṣparāgamaṇijyotitiraskṛtaśaśidyuti || 4||

तत्रैवान्तर्महारत्नगर्भमण्डपमुत्तमम् ।स्तम्भैश्च दशसाहस्रैस्समुन्नतिमनोहरम् ॥ ५॥

tatraivāntarmahāratnagarbhamaṇḍapamuttamam |stambhaiśca daśasāhasraissamunnatimanoharam || 5||

शिखाभिर्मणिकॢप्ताभिर्वलिभिश्चुम्बिताम्बरम् ।नानारत्नमहावेदिपीठविद्रुमपुत्रिकैः ॥ ६॥

śikhābhirmaṇikḷptābhirvalibhiścumbitāmbaram |nānāratnamahāvedipīṭhavidrumaputrikaiḥ || 6||

शोभितं रत्नगुच्छाच्छ मालालम्बितपीठकम् ।तत्र सिह्मासने दिव्ये नवरत्नगणैश्चिते ॥ ७॥

śobhitaṃ ratnagucchāccha mālālambitapīṭhakam |tatra sihmāsane divye navaratnagaṇaiścite || 7||

धूपदीपादिबहुले मुक्तामालापरिष्कृते ।वितानद्योतिदिक्चक्रे नानारुद्रगणैर्युते ॥ ८॥

dhūpadīpādibahule muktāmālāpariṣkṛte |vitānadyotidikcakre nānārudragaṇairyute || 8||

षष्टिसाहस्रसङ्ख्याकैरहिमन्युभिरुद्धते ।त्रिपुण्ड्रविलसत्कालै रुद्राक्षवरभूषणैः ॥ ९॥

ṣaṣṭisāhasrasaṅkhyākairahimanyubhiruddhate |tripuṇḍravilasatkālai rudrākṣavarabhūṣaṇaiḥ || 9||

त्रिशूलोद्यत्करैश्शुभ्रैर्हेतिचापशरावृतैः ।जटातटनिवद्धेन्दुशेखरैरिन्दुसमप्रभैः ॥ १०॥

triśūlodyatkaraiśśubhrairheticāpaśarāvṛtaiḥ |jaṭātaṭanivaddhenduśekharairindusamaprabhaiḥ || 10||

समन्तात्सेवितो नित्यं वृषो धर्माकृतिर्महान् ।धर्माधारमहापादो युगनाभोरुपादकः ॥ ११॥

samantātsevito nityaṃ vṛṣo dharmākṛtirmahān |dharmādhāramahāpādo yuganābhorupādakaḥ || 11||

सन्ध्यांशसुखुरोद्दामवर्णाश्रमकृताङ्घ्रिकः ।मणिमञ्जीरनिनदनानाधर्मैकशब्दवान् ॥ १२॥

sandhyāṃśasukhuroddāmavarṇāśramakṛtāṅghrikaḥ |maṇimañjīraninadanānādharmaikaśabdavān || 12||

चतुर्वेदोपवेदोद्यद्वेदान्तिमतदन्तकः ।पुराणन्यायमीमांसाद्वयतन्त्रोरुघण्टकः ॥ १३॥

caturvedopavedodyadvedāntimatadantakaḥ |purāṇanyāyamīmāṃsādvayatantrorughaṇṭakaḥ || 13||

पूर्वसिद्धान्तराद्धान्ततत्वशब्दघणाघणः ।ग्रैवेयशोभितोदारघण्टाकलितकन्धरः ॥ १४॥

pūrvasiddhāntarāddhāntatatvaśabdaghaṇāghaṇaḥ |graiveyaśobhitodāraghaṇṭākalitakandharaḥ || 14||

कैलासो जङ्गम इव शृङ्गद्वयविभूषितः ।सुधामण्डलजोत्तुङ्गसुपाण्डरमहाछविः ॥ १५॥

kailāso jaṅgama iva śṛṅgadvayavibhūṣitaḥ |sudhāmaṇḍalajottuṅgasupāṇḍaramahāchaviḥ || 15||

संस्थितो देवदेवस्य सन्निधौ नन्दिकेश्वरः ।पञ्चलक्षप्रमाणेन गणैः (गात्रैः) कर्पूरसन्निभैः ॥ १६॥

saṃsthito devadevasya sannidhau nandikeśvaraḥ |pañcalakṣapramāṇena gaṇaiḥ (gātraiḥ) karpūrasannibhaiḥ || 16||

उद्यत्सुधांशुपूर्णाङ्गो लक्षयोजनपृष्टभूः ।ककुदा दशसाहस्रयोजनोन्नतवृत्तया ॥ १७॥

udyatsudhāṃśupūrṇāṅgo lakṣayojanapṛṣṭabhūḥ |kakudā daśasāhasrayojanonnatavṛttayā || 17||

मुखेन त्रिंशत्साहस्रं नेत्रयोर्द्विसहस्रकम् ।कर्णयोः पञ्चसाहस्रं विषाणे च सहस्रकम् ॥ १८॥

mukhena triṃśatsāhasraṃ netrayordvisahasrakam |karṇayoḥ pañcasāhasraṃ viṣāṇe ca sahasrakam || 18||

नासाविवरमुक्ताच्छनासापञ्चसहस्रकम् ।सहस्रयोजनायामलेलिहानाग्रजिह्वकम् ॥ १९॥

nāsāvivaramuktācchanāsāpañcasahasrakam |sahasrayojanāyāmalelihānāgrajihvakam || 19||

पश्यन्ननिमिषेणैव लोचनाभ्यां महेश्वरम् ।स्वपृष्टास्तृतरत्नाच्छपल्यङ्कालम्बिमौक्तिकम् ॥ २०॥

paśyannanimiṣeṇaiva locanābhyāṃ maheśvaram |svapṛṣṭāstṛtaratnācchapalyaṅkālambimauktikam || 20||

स्वनासाविवरोत्थानवातोद्भूत महागिरिम् ।तद्वातोद्धूतवेलाश्च चोद्यतोद्यत्तरङ्गकाः ॥ २१॥

svanāsāvivarotthānavātodbhūta mahāgirim |tadvātoddhūtavelāśca codyatodyattaraṅgakāḥ || 21||

समुद्रास्सरितश्चैव तच्चलत्खुरदारिता ।भूर्भाति कम्पिता शैलैस्सागरैश्च विलोलिता ॥ २२॥

samudrāssaritaścaiva taccalatkhuradāritā |bhūrbhāti kampitā śailaissāgaraiśca vilolitā || 22||

शृङ्गकोटिमणिभ्राजिमुकुटेन विराजितम् ।कर्णालम्बिशशिज्योतिधवलालम्बिचामरम् ॥ २३॥

śṛṅgakoṭimaṇibhrājimukuṭena virājitam |karṇālambiśaśijyotidhavalālambicāmaram || 23||

पञ्चाशल्लक्षमानेन पदैः खुरवरैर्युतम् ।दशसाहस्रविस्तारैरिन्द्रनीलमणिप्रभैः ॥ २४॥

pañcāśallakṣamānena padaiḥ khuravarairyutam |daśasāhasravistārairindranīlamaṇiprabhaiḥ || 24||

खुराघृष्टगिरिव्रातं नादमोदितकन्दरम् ।सास्त्रया लम्बितास्वच्छपञ्चसाहस्त्रयोजनम् ॥ २५॥

khurāghṛṣṭagirivrātaṃ nādamoditakandaram |sāstrayā lambitāsvacchapañcasāhastrayojanam || 25||

हुंभारवमहाभीत त्रैलोक्यतलवासिनम् ।कामधेनुगणैश्चैव कोटिभिः परितोवृतम् ॥ २६॥

huṃbhāravamahābhīta trailokyatalavāsinam |kāmadhenugaṇaiścaiva koṭibhiḥ paritovṛtam || 26||

शरच्चन्द्रप्रभाभास्वद्भिरिमौलिविदारणम् ।लम्बिना वृषणेनापि शतयोजनकेन च ॥ २७॥

śaraccandraprabhābhāsvadbhirimaulividāraṇam |lambinā vṛṣaṇenāpi śatayojanakena ca || 27||

वालेन त्रिंशत्साहस्रयोजनेन विलम्बिना ।चामराग्रमहाकेशपुच्छभारेण शोभितः ॥ २८॥

vālena triṃśatsāhasrayojanena vilambinā |cāmarāgramahākeśapucchabhāreṇa śobhitaḥ || 28||

मुक्तामाणिक्यजालैश्च प्रोत्थितेन मणिप्रभः ।तत्रास्ति गोपुरं शम्भोर्धामतत्र वृषेशितुः ॥ २९॥

muktāmāṇikyajālaiśca protthitena maṇiprabhaḥ |tatrāsti gopuraṃ śambhordhāmatatra vṛṣeśituḥ || 29||

प्राकारराजद्वृषभं तस्येष्टंलिङ्गमैश्वरम् ।कामधेनूधसोद्भूतैः पयोभिरभिषिच्य च ॥ ३०॥

prākārarājadvṛṣabhaṃ tasyeṣṭaṃliṅgamaiśvaram |kāmadhenūdhasodbhūtaiḥ payobhirabhiṣicya ca || 30||

गन्धैर्बिल्यैश्च मन्दारैः पङ्कजैर्धूपदीपकैः ।नैवेद्यैः पायसापूपताम्बूलछत्रचामरैः ॥ ३१॥

gandhairbilyaiśca mandāraiḥ paṅkajairdhūpadīpakaiḥ |naivedyaiḥ pāyasāpūpatāmbūlachatracāmaraiḥ || 31||

सम्पूज्यस्तौतिधर्मेशं भस्मरुद्राक्षभूषितः ।मुक्तात्रिपुण्ड्रभालाङ्को शशिधृक्छृङ्गयोर्द्वयोः ॥ ३२॥

sampūjyastautidharmeśaṃ bhasmarudrākṣabhūṣitaḥ |muktātripuṇḍrabhālāṅko śaśidhṛkchṛṅgayordvayoḥ || 32||

पश्यन्त्संस्तौति हृष्टात्मा नादकीलितदिक्तटः ॥ ३३॥

paśyantsaṃstauti hṛṣṭātmā nādakīlitadiktaṭaḥ || 33||

॥ इति शिवरहस्यान्तर्गते माहेश्वराख्ये कैलासशैले वृषगोपुरवर्णनम् ॥॥ श्रीशिवरहस्यम् । माहेश्वराख्यः प्रथमांशः । अध्यायः २५ कैलासवर्णने वृष(कृत)स्तुतिः । १३३॥

|| iti śivarahasyāntargate māheśvarākhye kailāsaśaile vṛṣagopuravarṇanam |||| śrīśivarahasyam | māheśvarākhyaḥ prathamāṃśaḥ | adhyāyaḥ 25 kailāsavarṇane vṛṣa(kṛta)stutiḥ | 133||

– ॥ श्रीशिवरहस्यम् ।माहेश्वराख्यः प्रथमांशः ।अध्यायः २५ – कैलासवर्णने वृष(कृत)स्तुतिः ।१-३३॥

– || śrīśivarahasyam |māheśvarākhyaḥ prathamāṃśaḥ |adhyāyaḥ 25 – kailāsavarṇane vṛṣa(kṛta)stutiḥ | 1-33||