कैलासवर्णनम् ३ कैलासशैले स्कन्दगोपुरवर्णनम् ३ Kailasavarnanam 3

(कैलासशैले स्कन्दगोपुरवर्णनम् ३)स्कन्दःशृणुध्वं ब्रह्मविष्ण्वाद्या जैगीषव्य गणोत्तमाः ।तत्रान्तरेऽस्ति प्राकारो गोमेदमणिकल्पितः ॥ १॥

(kailāsaśaile skandagopuravarṇanam 3)skandaḥśṛṇudhvaṃ brahmaviṣṇvādyā jaigīṣavya gaṇottamāḥ |tatrāntare'sti prākāro gomedamaṇikalpitaḥ || 1||

गोमेदगोपुरश्चैव चतुर्दिक्षु विराजितः ।चतुर्दिक्षु गोपुराणि लक्षमानेन सत्तमाः ॥ २॥

gomedagopuraścaiva caturdikṣu virājitaḥ |caturdikṣu gopurāṇi lakṣamānena sattamāḥ || 2||

वेदिकापट्टिकाभिश्च तोरणालङ्कृतानि हि ।राजत्कुम्भपताकाग्रैर्वृषभैस्तन्मणिप्रभैः ॥ ३॥

vedikāpaṭṭikābhiśca toraṇālaṅkṛtāni hi |rājatkumbhapatākāgrairvṛṣabhaistanmaṇiprabhaiḥ || 3||

रुद्रावताररचितैर्गवाक्षैस्स्फाटिकैरपि ।कुमुदैर्व्यालिपीठैश्च दैवगोष्ठ युतान्यपि ॥ ४॥

rudrāvatāraracitairgavākṣaissphāṭikairapi |kumudairvyālipīṭhaiśca daivagoṣṭha yutānyapi || 4||

मण्डपावलिसङ्कॢप्तैस्सहस्रायुतशो गणैः ।मणिकाञ्चनचित्रैश्च मुक्तावितततोरणैः ॥ ५॥

maṇḍapāvalisaṅkḷptaissahasrāyutaśo gaṇaiḥ |maṇikāñcanacitraiśca muktāvitatatoraṇaiḥ || 5||

सरोभिस्सागराकारै रत्नसोपानमण्डितैः ।तत्प्रान्तमण्डपवरैस्सहस्रस्तम्भशोभितैः ॥ ६॥

sarobhissāgarākārai ratnasopānamaṇḍitaiḥ |tatprāntamaṇḍapavaraissahasrastambhaśobhitaiḥ || 6||

सरोमध्यमणिभ्राजन्मण्टपैरुच्छितैरपि ।तत्रान्तरे तु प्राकारे गोपुरान्तरदक्षिणे ॥ ७॥

saromadhyamaṇibhrājanmaṇṭapairucchitairapi |tatrāntare tu prākāre gopurāntaradakṣiṇe || 7||

तत्र मत्सदनं दिव्यं नानारत्नचितं शुभम् ।लक्षस्तम्भयुतं सौधं नवरत्नाग्रशृङ्गकम् ॥ ८॥

tatra matsadanaṃ divyaṃ nānāratnacitaṃ śubham |lakṣastambhayutaṃ saudhaṃ navaratnāgraśṛṅgakam || 8||

तत्सालभञ्जिकानिर्यद्रनकान्तिविभासितम् ।(तमस्स्तोमतिरस्कारीतिकान्तिविभासितम् ।)तेतः पञ्चादंशुमद्भिर्मणिभिः कृतशेखरं ॥ ९॥

tatsālabhañjikāniryadranakāntivibhāsitam |(tamasstomatiraskārītikāntivibhāsitam |)tetaḥ pañcādaṃśumadbhirmaṇibhiḥ kṛtaśekharaṃ || 9||

गवाक्षितं विचित्रैश्च नवरत्नप्रभाधिकम् ।हरिन्मणिकृतैश्चैव मयूरवरकुक्कुटैः ॥ १०॥

gavākṣitaṃ vicitraiśca navaratnaprabhādhikam |harinmaṇikṛtaiścaiva mayūravarakukkuṭaiḥ || 10||

शोभितैर्मण्टपाग्रैश्च वरप्रासादतोरणैः ।प्राकारैस्सुन्दरतरैर्गोपुरावलिभासुरैः ॥ ११॥

śobhitairmaṇṭapāgraiśca varaprāsādatoraṇaiḥ |prākāraissundaratarairgopurāvalibhāsuraiḥ || 11||

मणिद्वारकवाटैश्च शातकुम्भशलाककैः ।धूपामोदयुतापाररम्योद्दामसुगन्धितम् ॥ १२॥

maṇidvārakavāṭaiśca śātakumbhaśalākakaiḥ |dhūpāmodayutāpāraramyoddāmasugandhitam || 12||

मणिदीपप्रभाभासिरञ्जिताखिलदिक्तटम् ।तत्र दिव्यसुमामोदि वनं चैत्ररथाधिकम् ॥ १३॥

maṇidīpaprabhābhāsirañjitākhiladiktaṭam |tatra divyasumāmodi vanaṃ caitrarathādhikam || 13||

मण्यालवालकलितरत्नवेदित्विषाततम् ।नानादेवद्रुमापारवल्लीगुच्छविराजितम् ॥ १४॥

maṇyālavālakalitaratnaveditviṣātatam |nānādevadrumāpāravallīgucchavirājitam || 14||

कौमारनाम तत्रास्ति सरश्चोत्फुल्लपङ्कजम् ।मणिसोपानपालीभिस्तत्प्रान्तमणिमण्डपैः ॥ १५॥

kaumāranāma tatrāsti saraścotphullapaṅkajam |maṇisopānapālībhistatprāntamaṇimaṇḍapaiḥ || 15||

क्रीडामृगैश्शुकैश्चापि मणिपञ्जरशारिकैः ।तत्र तत्सौधमध्यस्थं मम सौधवराश्रयम् ॥ १६॥

krīḍāmṛgaiśśukaiścāpi maṇipañjaraśārikaiḥ |tatra tatsaudhamadhyasthaṃ mama saudhavarāśrayam || 16||

सिह्मासनं रत्नकॢप्तं पञ्चयोजनविस्तृतम् ।तत्राहं सेवितो वीरैर्नवलक्षैरुदायुधैः ॥ १७॥

sihmāsanaṃ ratnakḷptaṃ pañcayojanavistṛtam |tatrāhaṃ sevito vīrairnavalakṣairudāyudhaiḥ || 17||

सिह्मसंहननैर्वीरैः कौमारैरुद्यदायुधैः ।मत्तद्विपकराकारबाहुभिश्शक्तिसंयुतैः ॥ १८॥

sihmasaṃhananairvīraiḥ kaumārairudyadāyudhaiḥ |mattadvipakarākārabāhubhiśśaktisaṃyutaiḥ || 18||

वीरबाहुप्रभृतिभिः पुष्पवस्त्राङ्गलेपनैः ।छत्रचामरहस्तैश्चाप्यासेऽहं सेवितस्तदा ॥ १९॥

vīrabāhuprabhṛtibhiḥ puṣpavastrāṅgalepanaiḥ |chatracāmarahastaiścāpyāse'haṃ sevitastadā || 19||

महार्हवसनोपेतो नवरत्नविभूषणः ।षड्वक्त्रमुकुटोद्भासि रत्नकुण्डलकाङ्गदः ॥ २०॥

mahārhavasanopeto navaratnavibhūṣaṇaḥ |ṣaḍvaktramukuṭodbhāsi ratnakuṇḍalakāṅgadaḥ || 20||

रत्नाङ्गुलीयविलसत्तलाङ्गुलिपदाम्बुजः ।मणिमाणिक्यमञ्जीररणन्नूपुरमेखलः ॥ २१॥

ratnāṅgulīyavilasattalāṅgulipadāmbujaḥ |maṇimāṇikyamañjīraraṇannūpuramekhalaḥ || 21||

देववल्या सेनया चापीन्द्राद्यैरपि सेवितः ।षड्भिश्च वदनैर्देवं स्तुवन्द्वादशलोचनैः ॥ २२॥

devavalyā senayā cāpīndrādyairapi sevitaḥ |ṣaḍbhiśca vadanairdevaṃ stuvandvādaśalocanaiḥ || 22||

पश्यन्लिङ्गं (पश्यँलिङ्गं) हि कैलासे कौमारेश्वरमीश्वरम् ।हीरसारमहाधाराप्रकारे दक्षिणे स्थितः ॥ २३॥

paśyanliṅgaṃ (paśyam̐liṅgaṃ) hi kailāse kaumāreśvaramīśvaram |hīrasāramahādhārāprakāre dakṣiṇe sthitaḥ || 23||

तन्नीलगोपुरोत्तुङ्गनीलधारातता दिशः ।रुद्रावतारक्रीडादितलशोभैकभासुरम् ॥ २४॥

tannīlagopurottuṅganīladhārātatā diśaḥ |rudrāvatārakrīḍāditalaśobhaikabhāsuram || 24||

राजल्ललामवृषभं शम्भोः कैलासगोपुरम् ।पञ्चलक्षप्रमाणेन कल्पितं विस्तरायतम् ॥ २५॥

rājallalāmavṛṣabhaṃ śambhoḥ kailāsagopuram |pañcalakṣapramāṇena kalpitaṃ vistarāyatam || 25||

दक्षिणे गोपुरप्रान्ते शम्भोः प्राकारमध्यमे ।तत्कौमारपुरं मेऽद्य नानासौधविराजितं ॥ २६॥

dakṣiṇe gopuraprānte śambhoḥ prākāramadhyame |tatkaumārapuraṃ me'dya nānāsaudhavirājitaṃ || 26||

कौमारैर्मद्गणश्रेष्ठैर्मया च परिपालितम् ।तत्र मत्पुरमध्यस्थं कौमारेशस्य गोपुरम् ॥ २७॥

kaumārairmadgaṇaśreṣṭhairmayā ca paripālitam |tatra matpuramadhyasthaṃ kaumāreśasya gopuram || 27||

नवरत्नप्रभाभास्वत्प्राकाराट्टालसुन्दरम् ।गर्भागारमहाकान्तिधगद्धगितदिङ्मुखम् ॥ २८॥

navaratnaprabhābhāsvatprākārāṭṭālasundaram |garbhāgāramahākāntidhagaddhagitadiṅmukham || 28||

मणिकुम्भोद्यतशिखावलीढगगनाङ्कणम् ।ममेष्टलिङ्गन्तत्रैव देवदेवस्य शूलिनः ॥ २९॥

maṇikumbhodyataśikhāvalīḍhagaganāṅkaṇam |mameṣṭaliṅgantatraiva devadevasya śūlinaḥ || 29||

त्रिकालं तत्र तल्लिङ्गं पूजयामि गणैर्वृतः ।धूपैदीम्पैश्च नैवेद्यैः पञ्चामृतनिषेचनैः ॥ ३०॥

trikālaṃ tatra talliṅgaṃ pūjayāmi gaṇairvṛtaḥ |dhūpaidīmpaiśca naivedyaiḥ pañcāmṛtaniṣecanaiḥ || 30||

वीणावेणमृदङ्गादिशङ्खकाहलनिस्वनैः ।मधुरोद्दामगीतैश्च कौमारीणाञ्च नर्तनैः ॥ ३१॥

vīṇāveṇamṛdaṅgādiśaṅkhakāhalanisvanaiḥ |madhuroddāmagītaiśca kaumārīṇāñca nartanaiḥ || 31||

हावभावमनोहारितौर्यत्रिकमनोहरैः ।षड्वक्त्रभालकलित त्रिपुण्ड्रतिलकोज्वलः ॥ ३२॥

hāvabhāvamanohāritauryatrikamanoharaiḥ |ṣaḍvaktrabhālakalita tripuṇḍratilakojvalaḥ || 32||

भस्मरुद्राक्षवलयसरावलिविभूषितः ।षडक्त्रपङ्कजस्यन्दिसुधासममहारसैः ॥ ३३॥

bhasmarudrākṣavalayasarāvalivibhūṣitaḥ |ṣaḍaktrapaṅkajasyandisudhāsamamahārasaiḥ || 33||

॥ इति शिवरहस्यान्तर्गते माहेश्वराख्ये कैलासशैले स्कन्दगोपुरवर्णनम् ॥॥ श्रीशिवरहस्यम् । माहेश्वराख्यः प्रथमांशः । अध्यायः २३ कैलासवर्णने स्कन्दकृतस्तुतिः । १३३॥

|| iti śivarahasyāntargate māheśvarākhye kailāsaśaile skandagopuravarṇanam |||| śrīśivarahasyam | māheśvarākhyaḥ prathamāṃśaḥ | adhyāyaḥ 23 kailāsavarṇane skandakṛtastutiḥ | 133||

– ॥ श्रीशिवरहस्यम् ।माहेश्वराख्यः प्रथमांशः ।अध्यायः २३ – कैलासवर्णने स्कन्दकृतस्तुतिः ।१-३३॥

– || śrīśivarahasyam |māheśvarākhyaḥ prathamāṃśaḥ |adhyāyaḥ 23 – kailāsavarṇane skandakṛtastutiḥ | 1-33||