कैलासवर्णनम् ४ कैलासशैले गणेशगोपुरवर्णनम् ४ Kailasavarnanam 4

(कैलासशैले गणेशगोपुरवर्णनम् ४)स्कन्दःपश्चाद्भागे हरिज्योतिहरिन्मणिविराजितम् ।पञ्चलक्षप्रमाणेन प्राकारं मणिगोपुरम् ॥ १॥

(kailāsaśaile gaṇeśagopuravarṇanam 4)skandaḥpaścādbhāge harijyotiharinmaṇivirājitam |pañcalakṣapramāṇena prākāraṃ maṇigopuram || 1||

महामरकतैः कॢप्तगवाक्षावलिभिर्युतम् ।अष्टाशीति सहस्राणि योजनैः परिकल्पितम् ॥ २॥

mahāmarakataiḥ kḷptagavākṣāvalibhiryutam |aṣṭāśīti sahasrāṇi yojanaiḥ parikalpitam || 2||

पश्चाद्भागे तु तद्योति हरिन्मणिनिभा दिशः ।तत्र गारुत्मतमणीकॢप्तमण्डपशोभितम् ॥ ३॥

paścādbhāge tu tadyoti harinmaṇinibhā diśaḥ |tatra gārutmatamaṇīkḷptamaṇḍapaśobhitam || 3||

उद्यदिन्दकरस्वच्छनिर्यज्झरिभिरावृतम् ।तत्राच्छस्फटिकोद्दामसिह्मासनशतैर्वृतम् ॥ ४॥

udyadindakarasvacchaniryajjharibhirāvṛtam |tatrācchasphaṭikoddāmasihmāsanaśatairvṛtam || 4||

धूपदीपादिबहुलं नानासुमनावृतम् ।मणिमाणिक्यखचितमण्डपे स्वास्तृतासने ॥ ५॥

dhūpadīpādibahulaṃ nānāsumanāvṛtam |maṇimāṇikyakhacitamaṇḍape svāstṛtāsane || 5||

तस्मिंस्तिष्ठति विश्वेशस्स्वगणैरर्चिताङ्घ्रिकः ।सप्तलक्षगणेन्द्रैश्च विघ्नाद्रिकुलिशो महान् ॥ ६॥

tasmiṃstiṣṭhati viśveśassvagaṇairarcitāṅghrikaḥ |saptalakṣagaṇendraiśca vighnādrikuliśo mahān || 6||

नानारत्नचितानेकभूषणैः परिशोभितः ।सिन्धूरविलसद्भालो महासिन्धूरवक्त्रकः ॥ ७॥

nānāratnacitānekabhūṣaṇaiḥ pariśobhitaḥ |sindhūravilasadbhālo mahāsindhūravaktrakaḥ || 7||

माणिक्यमुकुटोद्भासिभालचन्द्रविराजितः ।शुण्डादण्डमहोच्चण्डबृह्मितानन्दिताम्बरः ॥ ८॥

māṇikyamukuṭodbhāsibhālacandravirājitaḥ |śuṇḍādaṇḍamahoccaṇḍabṛhmitānanditāmbaraḥ || 8||

कुम्भान्तरललन्मुक्तागुच्छसच्छायितास्यकः ।कर्णपत्रमणिभ्राजञ्चलत्कर्णयुगछविः ॥ ९॥

kumbhāntaralalanmuktāgucchasacchāyitāsyakaḥ |karṇapatramaṇibhrājañcalatkarṇayugachaviḥ || 9||

दन्तावलिमहारत्नदन्तवेष्टनसुन्दरः ।तदधस्ताल्ललन्मुक्तामणिपत्रविराजितः ॥ १०॥

dantāvalimahāratnadantaveṣṭanasundaraḥ |tadadhastāllalanmuktāmaṇipatravirājitaḥ || 10||

सितभस्मत्रिपुण्ड्राङ्ककुम्भमध्यविराजितः ।सिन्धूरतिलकोत्फुल्लवदनानन्दशोभितः ॥ ११॥

sitabhasmatripuṇḍrāṅkakumbhamadhyavirājitaḥ |sindhūratilakotphullavadanānandaśobhitaḥ || 11||

मुक्तागुम्फितकर्णाग्रवीजितोड्डीनषट्पदः ।स्रवत्कटतटोद्भासि मदगन्धितदिक्तटः ॥ १२॥

muktāgumphitakarṇāgravījitoḍḍīnaṣaṭpadaḥ |sravatkaṭataṭodbhāsi madagandhitadiktaṭaḥ || 12||

शिवपादाम्बुजध्यानानन्दोन्मीलितलोचनः ।गणसन्दर्शनानन्दसदोन्मीलितलोचनः ॥ १३॥

śivapādāmbujadhyānānandonmīlitalocanaḥ |gaṇasandarśanānandasadonmīlitalocanaḥ || 13||

महानागनिबद्धोरुपिठरोदरसंयुतः ।फुल्लपद्मामलपदस्सुरासुरगणानतः ॥ १४॥

mahānāganibaddhorupiṭharodarasaṃyutaḥ |phullapadmāmalapadassurāsuragaṇānataḥ || 14||

पाशाङ्कुशरदद्योतिमोदकासक्तसत्करः ।रत्नाङ्गदैश्च केयूरैर्भ्राजत्करिकरप्रभः ॥ १५॥

pāśāṅkuśaradadyotimodakāsaktasatkaraḥ |ratnāṅgadaiśca keyūrairbhrājatkarikaraprabhaḥ || 15||

पादकॢप्तरणत्सिञ्जद्रत्नमञ्जीरशोभितः ।दिव्याङ्गरागसुभगो मणिहाराम्बरावृतः ॥ १६॥

pādakḷptaraṇatsiñjadratnamañjīraśobhitaḥ |divyāṅgarāgasubhago maṇihārāmbarāvṛtaḥ || 16||

पार्श्वद्वयविराजच्छ्रीसिद्धिबुद्धिविराजितः ।सर्वाभरणभूषाभ्यां सेवितः पार्श्वर्द्वयोः ॥ १७॥

pārśvadvayavirājacchrīsiddhibuddhivirājitaḥ |sarvābharaṇabhūṣābhyāṃ sevitaḥ pārśvardvayoḥ || 17||

गणेन्द्रैश्छत्रदण्डोद्यन्मणिचामरसत्करैः ।सेवितश्श्रीगणेशानस्तस्मिन्कैलासमण्डपे ॥ १८॥

gaṇendraiśchatradaṇḍodyanmaṇicāmarasatkaraiḥ |sevitaśśrīgaṇeśānastasminkailāsamaṇḍape || 18||

चलच्चामरवातैश्च चलत्कर्णाग्रचामराः ।तादृशा गणपास्तत्र पाशाङ्कुशधरास्तथा ॥ १९॥

calaccāmaravātaiśca calatkarṇāgracāmarāḥ |tādṛśā gaṇapāstatra pāśāṅkuśadharāstathā || 19||

महाबला महोत्साहाः कुठारवरपाणयः ।सिन्धूरारुणभालाग्रास्त्रिपुण्ड्रपरिशोभिताः ॥ २०॥

mahābalā mahotsāhāḥ kuṭhāravarapāṇayaḥ |sindhūrāruṇabhālāgrāstripuṇḍrapariśobhitāḥ || 20||

रक्षन्ति ते गणास्तत्र प्राकारं तच्च गोपुरम् ।सप्तलक्षामितवला गणेशा गणपास्तथा ॥ २१॥

rakṣanti te gaṇāstatra prākāraṃ tacca gopuram |saptalakṣāmitavalā gaṇeśā gaṇapāstathā || 21||

तत्रैव देवदेवस्य शासनाच्चन्द्रमौलिनः ।गणेशोऽपि सदा ध्यायन् गणेशेश्वरपूजकः ॥ २२॥

tatraiva devadevasya śāsanāccandramaulinaḥ |gaṇeśo'pi sadā dhyāyan gaṇeśeśvarapūjakaḥ || 22||

तत्रेष्टलिङ्गं तस्यैव वरप्राकारगोपुरम् ।नवरत्नचितन्दिव्यं मणिस्तम्भचितान्तरम् ॥ २३॥

tatreṣṭaliṅgaṃ tasyaiva varaprākāragopuram |navaratnacitandivyaṃ maṇistambhacitāntaram || 23||

गणेश्वराख्यं तल्लिङ्गं मणिधामगतं तथा ।प्रोद्यत्कुम्भपताकाग्रपवनाधूतसाञ्चलम् ॥ २४॥

gaṇeśvarākhyaṃ talliṅgaṃ maṇidhāmagataṃ tathā |prodyatkumbhapatākāgrapavanādhūtasāñcalam || 24||

स्वपुष्करधृतोत्तुङ्गकुम्भपञ्चामृतैरपि ।सुधाधाराभिरासिच्य चन्दनालेपिसुन्दरम् ॥ २५॥

svapuṣkaradhṛtottuṅgakumbhapañcāmṛtairapi |sudhādhārābhirāsicya candanālepisundaram || 25||

फणामणिमहामौलिरत्नाभरणशोभितम् ।सोऽद्यसम्पूजयत्येव बिल्वमन्दारचम्पकैः ॥ २६॥

phaṇāmaṇimahāmauliratnābharaṇaśobhitam |so'dyasampūjayatyeva bilvamandāracampakaiḥ || 26||

दूर्वाभिः कमलैरीशं धूपैर्दीपैर्मनोहरैः ।नैवेद्यैर्विविधैश्चैव ताम्बूलैश्छत्रचामरैः ॥ २७॥

dūrvābhiḥ kamalairīśaṃ dhūpairdīpairmanoharaiḥ |naivedyairvividhaiścaiva tāmbūlaiśchatracāmaraiḥ || 27||

गानैर्नृत्यैर्मृदङ्गाब्जकाहलानाञ्च निस्वनैः ।भस्मरुद्राक्षसम्पन्नस्स्तौति देवं महेश्वरम् ॥ २८॥

gānairnṛtyairmṛdaṅgābjakāhalānāñca nisvanaiḥ |bhasmarudrākṣasampannasstauti devaṃ maheśvaram || 28||

॥ इति शिवरहस्यान्तर्गते माहेश्वराख्ये कैलासशैले गणेशगोपुरवर्णनम् ॥॥ श्रीशिवरहस्यम् । माहेश्वराख्यः प्रथमांशः । अध्यायः २४ कैलासवर्णने गणेशकृतस्तुतिः । १२८॥

|| iti śivarahasyāntargate māheśvarākhye kailāsaśaile gaṇeśagopuravarṇanam |||| śrīśivarahasyam | māheśvarākhyaḥ prathamāṃśaḥ | adhyāyaḥ 24 kailāsavarṇane gaṇeśakṛtastutiḥ | 128||

– ॥ श्रीशिवरहस्यम् ।माहेश्वराख्यः प्रथमांशः ।अध्यायः २४ – कैलासवर्णने गणेशकृतस्तुतिः ।१-२८॥

– || śrīśivarahasyam |māheśvarākhyaḥ prathamāṃśaḥ |adhyāyaḥ 24 – kailāsavarṇane gaṇeśakṛtastutiḥ | 1-28||