शिवध्यानोपदेशम् Ishvaraproktam Shivadhyanopadesham

(शिवरहस्यान्तर्गते ईश्वराख्ये)शिवगौरीसंवादेशिव उवाच ।पूजाकोटिप्रदं ध्यानं कथयामि निबोधमे ।निर्वाते निर्भये शुद्धे सर्वालङ्कारशोभिते ॥ १॥

(śivarahasyāntargate īśvarākhye)śivagaurīsaṃvādeśiva uvāca |pūjākoṭipradaṃ dhyānaṃ kathayāmi nibodhame |nirvāte nirbhaye śuddhe sarvālaṅkāraśobhite || 1||

गन्धपुष्पामोदवरे मृदुतूलोपरिस्थितः ।ध्यायेतैवं महादेवि महाकैलासवासिनम् ॥ २॥

gandhapuṣpāmodavare mṛdutūloparisthitaḥ |dhyāyetaivaṃ mahādevi mahākailāsavāsinam || 2||

भस्मत्रिपुण्ड्ररुद्राक्षमालालङ्कृतविग्रहः ।पञ्चाक्षरवरास्योऽथ निमील्याक्षियुगं शिवे ॥ ३॥

bhasmatripuṇḍrarudrākṣamālālaṅkṛtavigrahaḥ |pañcākṣaravarāsyo'tha nimīlyākṣiyugaṃ śive || 3||

धारणाभिः समाहृत्य योगेनाप्लाव्य वै तनुम् ।सर्वतश्चित्तमाकृष्य हृदयाम्भोजमध्यमे ॥ ४॥

dhāraṇābhiḥ samāhṛtya yogenāplāvya vai tanum |sarvataścittamākṛṣya hṛdayāmbhojamadhyame || 4||

प्राणायामैर्विकसिते परमेश्वरमन्दिरे ।अष्टैश्वर्यदलोपेते विद्याकेसरसंयुते ॥ ५॥

prāṇāyāmairvikasite parameśvaramandire |aṣṭaiśvaryadalopete vidyākesarasaṃyute || 5||

ज्ञाननाले महाकन्दे प्रणवेन प्रबोधिते ।मध्ये हृदयपाथोजे महादेवासनोचिते ॥ ६॥

jñānanāle mahākande praṇavena prabodhite |madhye hṛdayapāthoje mahādevāsanocite || 6||

महिताकारशोभाढ्यं मण्डलं परिचिन्तयेत् ।अतिचिन्तामणिप्रख्यैरतिकौस्तुभकान्तिभिः ॥ ७॥

mahitākāraśobhāḍhyaṃ maṇḍalaṃ paricintayet |aticintāmaṇiprakhyairatikaustubhakāntibhiḥ || 7||

रत्नैरप्राकृतैर्लोकं रञ्जयन्तं समन्ततः ।दक्षिणद्वारपार्श्वेऽस्य संस्मरेन्नन्दिकेश्वरम् ॥ ८॥

ratnairaprākṛtairlokaṃ rañjayantaṃ samantataḥ |dakṣiṇadvārapārśve'sya saṃsmarennandikeśvaram || 8||

अनेकरुद्रप्रमथभूतसङ्घैर्निषेवितम् ।शिवधर्ममहाध्यक्षशिवान्तःपुरपालकम् ॥ ९॥

anekarudrapramathabhūtasaṅghairniṣevitam |śivadharmamahādhyakṣaśivāntaḥpurapālakam || 9||

चामीकराचलप्रख्यं सर्वाभरणभूषितम् ।बालेन्दमकुटं सौम्यं चतुर्बाहुं त्रिलोचनम् ॥ १०॥

cāmīkarācalaprakhyaṃ sarvābharaṇabhūṣitam |bālendamakuṭaṃ saumyaṃ caturbāhuṃ trilocanam || 10||

दीप्तशूलं मृगं टङ्कं स्वर्णवेत्रधरं प्रभुम् ।चन्द्रबिम्बाभवदनं भालपुण्ड्रं जटाधरम् ॥ ११॥

dīptaśūlaṃ mṛgaṃ ṭaṅkaṃ svarṇavetradharaṃ prabhum |candrabimbābhavadanaṃ bhālapuṇḍraṃ jaṭādharam || 11||

उत्तरद्वारपार्श्वे तु तत्पत्नीं मरुतां सुताम् ।सुयशां सुव्रतामम्बाम्पादमण्डनतत्पराम् ॥ १२॥

uttaradvārapārśve tu tatpatnīṃ marutāṃ sutām |suyaśāṃ suvratāmambāmpādamaṇḍanatatparām || 12||

सहितां रुद्रकन्याभिः सखीभिश्चाप्यनेकशः ।मध्येऽथ मण्टपस्यास्य वेदिकां विद्रुमप्रभाम् ॥ १३॥

sahitāṃ rudrakanyābhiḥ sakhībhiścāpyanekaśaḥ |madhye'tha maṇṭapasyāsya vedikāṃ vidrumaprabhām || 13||

चतुः स्तम्भयुतां ध्यायेत् त्रिपुरश्रीमनोरमाम् ।तस्यां शक्त्यादि सेसेव्यं तन्वि तत्परमासनम् ॥ १४॥

catuḥ stambhayutāṃ dhyāyet tripuraśrīmanoramām |tasyāṃ śaktyādi sesevyaṃ tanvi tatparamāsanam || 14||

आधारशक्तिं श्यामाङ्गीं करैर्धृतवराभयाम् ।तस्याः पुरस्तादाकण्ठमनन्तं कुण्डलावृतम् ॥ १५॥

ādhāraśaktiṃ śyāmāṅgīṃ karairdhṛtavarābhayām |tasyāḥ purastādākaṇṭhamanantaṃ kuṇḍalāvṛtam || 15||

तस्योपरि शुभं ध्यायेत्सिह्मासनमुमापतेः ।धर्मं ज्ञानं च वैराग्यमैश्वर्यं च तदङ्घ्रयः ॥ १६॥

tasyopari śubhaṃ dhyāyetsihmāsanamumāpateḥ |dharmaṃ jñānaṃ ca vairāgyamaiśvaryaṃ ca tadaṅghrayaḥ || 16||

आग्नेयादि स्थिताश्चैते पीतरक्तहरित्प्रभाः ।सिह्माकाराः सिह्मकोट्या प्रत्येकं परिवारिताः ॥ १७॥

āgneyādi sthitāścaite pītaraktaharitprabhāḥ |sihmākārāḥ sihmakoṭyā pratyekaṃ parivāritāḥ || 17||

अधर्मादीनि पूर्वादिदिशासु च समन्ततः ।राजासनं विभोर्ध्यायेत्कूर्माकृत्यनलप्रभम् ॥ १८॥

adharmādīni pūrvādidiśāsu ca samantataḥ |rājāsanaṃ vibhordhyāyetkūrmākṛtyanalaprabham || 18||

अस्याधश्छन्दनं पद्ममासनं विपुलं स्मरेत् ।शिवधर्ममहाकन्दं शिवज्ञानैकनालकम् ॥ १९॥

asyādhaśchandanaṃ padmamāsanaṃ vipulaṃ smaret |śivadharmamahākandaṃ śivajñānaikanālakam || 19||

अष्टैश्वर्यदलोपेतं पूर्वादिक्रमयोगतः ।अष्टवामादिशक्त्यङ्गरुद्रकल्पितकेसरम् ॥ २०॥

aṣṭaiśvaryadalopetaṃ pūrvādikramayogataḥ |aṣṭavāmādiśaktyaṅgarudrakalpitakesaram || 20||

वैराग्यकर्णिकान्तस्थं वामादिनवबीजकम् ।वामाज्येष्ठा तथा रौद्री कालीविकरिणी तथा ॥ २१॥

vairāgyakarṇikāntasthaṃ vāmādinavabījakam |vāmājyeṣṭhā tathā raudrī kālīvikariṇī tathā || 21||

बलपूर्वा विकरिणी बलप्रमथनी तथा ।अष्टावेताः सर्वभूतदमनी नवमी परा ॥ २२॥

balapūrvā vikariṇī balapramathanī tathā |aṣṭāvetāḥ sarvabhūtadamanī navamī parā || 22||

केसरेषु स्थिता ध्येया रक्तभा धृतचामराः ।कलाधरकलाद्योतत्कर्णिकायां मनोन्मनी ॥ २३॥

kesareṣu sthitā dhyeyā raktabhā dhṛtacāmarāḥ |kalādharakalādyotatkarṇikāyāṃ manonmanī || 23||

स्मर्तव्येशानन्दिग्भागे पाशाङ्कुश वराभयाःपद्मासनस्थितं ध्यायेद्देवस्य विमलासनम् ॥ २४॥

smartavyeśānandigbhāge pāśāṅkuśa varābhayāḥpadmāsanasthitaṃ dhyāyeddevasya vimalāsanam || 24||

गणाम्बिकां महादेवीं ततो गौरीं प्रचोदयात् ।क्रान्तं शक्तिभिरन्याभिः सौम्याभिर्विमलासनम् ॥ २५॥

gaṇāmbikāṃ mahādevīṃ tato gaurīṃ pracodayāt |krāntaṃ śaktibhiranyābhiḥ saumyābhirvimalāsanam || 25||

तस्योपरि गुणानां च मण्डलानां च साधकः ।तस्मिन् सदाशिवं ध्यायेद्बद्धपद्मासनस्थितम् ॥ २६॥

tasyopari guṇānāṃ ca maṇḍalānāṃ ca sādhakaḥ |tasmin sadāśivaṃ dhyāyedbaddhapadmāsanasthitam || 26||

शुद्धस्फटिकसङ्काशं प्रसन्नं शान्तविग्रहम् ।विद्युल्लतालवद्योतिजटामकुटधारिणम् ॥ २७॥

śuddhasphaṭikasaṅkāśaṃ prasannaṃ śāntavigraham |vidyullatālavadyotijaṭāmakuṭadhāriṇam || 27||

शार्दूलचर्मवसनं मन्दस्मितमुखाम्बुजम् ।रक्तपद्मदलप्रख्यपाणिपादतलं हरम् ॥ २८॥

śārdūlacarmavasanaṃ mandasmitamukhāmbujam |raktapadmadalaprakhyapāṇipādatalaṃ haram || 28||

द्वात्रिंशल्लक्षणोपेतं सर्वाभरणभूषितम् ।दिव्यगन्धानुलिप्ताङ्गं दिव्यमालैरलङ्कृतम् ॥ २९॥

dvātriṃśallakṣaṇopetaṃ sarvābharaṇabhūṣitam |divyagandhānuliptāṅgaṃ divyamālairalaṅkṛtam || 29||

पञ्चवक्त्रं दशभुजं प्रतिवक्त्रं त्रिलोचनम् ।दक्षिणे शूलवज्रासिपरश्वभयमुद्रिकम् ॥ ३०॥

pañcavaktraṃ daśabhujaṃ prativaktraṃ trilocanam |dakṣiṇe śūlavajrāsiparaśvabhayamudrikam || 30||

वामे च दधतं नागं पाशं घण्टां तथाङ्कुशम् ।अस्योर्ध्वविलसद्बालसुधांशुमकुटोज्ज्वलम् ॥ ३१॥

vāme ca dadhataṃ nāgaṃ pāśaṃ ghaṇṭāṃ tathāṅkuśam |asyordhvavilasadbālasudhāṃśumakuṭojjvalam || 31||

ध्यानस्थमूर्ध्वाभिमुखं गगनछाययासितम् ।पूर्ववक्त्रं महेन्द्रस्य छायया कनकप्रभम् ॥ ३२॥

dhyānasthamūrdhvābhimukhaṃ gaganachāyayāsitam |pūrvavaktraṃ mahendrasya chāyayā kanakaprabham || 32||

बालेन्दुमकुटं सौम्यं सम्प्राप्तनवयौवनम् ।दक्षिणं वदनं कालछायाशक्त्याञ्जनप्रभम् ॥ ३३॥

bālendumakuṭaṃ saumyaṃ samprāptanavayauvanam |dakṣiṇaṃ vadanaṃ kālachāyāśaktyāñjanaprabham || 33||

भ्रुकुटीकुटिलं घोरं रक्तवृत्तेक्षणत्रयम् ।दंष्ट्राकरालं दुर्धर्षं स्फुरिताधरपल्लवम् ॥ ३४॥

bhrukuṭīkuṭilaṃ ghoraṃ raktavṛttekṣaṇatrayam |daṃṣṭrākarālaṃ durdharṣaṃ sphuritādharapallavam || 34||

चन्द्रापीडं चलत्केशं किञ्चिच्चलितयौवनम् ।उत्तरं यक्षराजस्य छायया विद्रुमप्रभम् ॥ ३५॥

candrāpīḍaṃ calatkeśaṃ kiñciccalitayauvanam |uttaraṃ yakṣarājasya chāyayā vidrumaprabham || 35||

ललाटतिलकोपेतं नीलालकविभूषितम् ।सविलासं त्रिणयनं चन्द्राभरणभास्वरम् ॥ ३६॥

lalāṭatilakopetaṃ nīlālakavibhūṣitam |savilāsaṃ triṇayanaṃ candrābharaṇabhāsvaram || 36||

इच्छाज्ञानक्रियारूपविलसल्लोचनत्रयम् ।पश्चिमं पाशहस्तस्य छायया सदृशं निभम्(सदृशप्रभम् , मौक्तिकप्रभम्) ॥ ३७॥

icchājñānakriyārūpavilasallocanatrayam |paścimaṃ pāśahastasya chāyayā sadṛśaṃ nibham(sadṛśaprabham , mauktikaprabham) || 37||

चन्द्रोत्तंसं सिताकारं धृतभस्म त्रिपुण्ड्रकम् ।इति ध्यात्वा पुनरपि ध्यायेदेवं सदा शिवम् ॥ ३८॥

candrottaṃsaṃ sitākāraṃ dhṛtabhasma tripuṇḍrakam |iti dhyātvā punarapi dhyāyedevaṃ sadā śivam || 38||

सूर्यचन्द्राग्निनयनं नीलकण्ठं जटाधरम् ।ज्ञानचन्द्रकलाजूटमुद्यद्बाहुचतुष्टयम् ॥ ३९॥

sūryacandrāgninayanaṃ nīlakaṇṭhaṃ jaṭādharam |jñānacandrakalājūṭamudyadbāhucatuṣṭayam || 39||

त्रैगुण्यामलसम्भूतैर्दिव्यैर्दशभिरायुधैः ।सर्वज्ञतादिसंसिद्धं हृदयादिषङ्गकम् ॥ ४०॥

traiguṇyāmalasambhūtairdivyairdaśabhirāyudhaiḥ |sarvajñatādisaṃsiddhaṃ hṛdayādiṣaṅgakam || 40||

पञ्चब्रह्मात्मवदनं पञ्चसादाख्यमूर्तिकम् ।श्रीमत्पञ्चाक्षरमयं प्रणवाकारशालिनं(रूपिणम्) ॥ ४१॥ (प्रणवाकारमीश्वरम्)

pañcabrahmātmavadanaṃ pañcasādākhyamūrtikam |śrīmatpañcākṣaramayaṃ praṇavākāraśālinaṃ(rūpiṇam) || 41|| (praṇavākāramīśvaram)

समस्तवर्णरूपं च पञ्चब्रह्मकलामयम् ।निवृत्तिज्ञानवैराग्य योगमोक्ष प्रतिष्ठया ॥ ४२॥

samastavarṇarūpaṃ ca pañcabrahmakalāmayam |nivṛttijñānavairāgya yogamokṣa pratiṣṭhayā || 42||

आकण्ठं विद्यया सिद्धमाललाटं तु शान्तया ।तदूर्ध्वं शान्त्यतीताख्यकलया परिकल्पितम् ॥ ४३॥

ākaṇṭhaṃ vidyayā siddhamālalāṭaṃ tu śāntayā |tadūrdhvaṃ śāntyatītākhyakalayā parikalpitam || 43||

एवं पञ्चकलारूपमिदं सादाशिवं पुनः (वपुः) ।चतुर्मूर्तिश्चतुर्वर्णा प्रतिवक्त्रांशुमण्डला ॥ ४४॥

evaṃ pañcakalārūpamidaṃ sādāśivaṃ punaḥ (vapuḥ) |caturmūrtiścaturvarṇā prativaktrāṃśumaṇḍalā || 44||

एकवक्त्रा शशाङ्काभा प्रतिष्ठा पद्मधारिणी ।अग्निवर्णा त्रिवदना विद्याशान्तिविशोभिता ॥ ४५॥

ekavaktrā śaśāṅkābhā pratiṣṭhā padmadhāriṇī |agnivarṇā trivadanā vidyāśāntiviśobhitā || 45||

कृष्णवर्णा चतुर्वक्त्रा शान्तिध्वजविराजिता ।पाशहृत्पञ्चवदना शान्त्यतीता शशिप्रभा ॥ ४६॥

kṛṣṇavarṇā caturvaktrā śāntidhvajavirājitā |pāśahṛtpañcavadanā śāntyatītā śaśiprabhā || 46||

सर्वाः पद्माक्षमालाढ्याः अभयेन विराजिताः ।चतुर्भुजास्त्रिणयनाः पीनोन्नतपयोधराः ॥ ४७॥

sarvāḥ padmākṣamālāḍhyāḥ abhayena virājitāḥ |caturbhujāstriṇayanāḥ pīnonnatapayodharāḥ || 47||

आसां पञ्चाध्वगर्भान्ता पदाध्वान्ता सदाशिवः ।मन्त्राध्वा च पदाध्वा च वर्णाध्वा पवनाध्वकः ॥ ४८॥

āsāṃ pañcādhvagarbhāntā padādhvāntā sadāśivaḥ |mantrādhvā ca padādhvā ca varṇādhvā pavanādhvakaḥ || 48||

तत्त्वाध्वा च कलाध्वा च षडध्वान इतीरिताः ।चतुर्विंशत्पुराणानां भुवनानां शतद्वयम् ॥ ४९॥

tattvādhvā ca kalādhvā ca ṣaḍadhvāna itīritāḥ |caturviṃśatpurāṇānāṃ bhuvanānāṃ śatadvayam || 49||

भुवनाध्वा च स सञ्चिन्त्यो रोमवृन्दात्मना विभोः ।पञ्चरुद्रादिरूपैश्च वर्णैर्वर्णाध्वकल्पना ॥ ५०॥

bhuvanādhvā ca sa sañcintyo romavṛndātmanā vibhoḥ |pañcarudrādirūpaiśca varṇairvarṇādhvakalpanā || 50||

असौ त्वगात्मना चिन्त्यो देवदेवस्य शूलिनः ।सप्तकोट्या महामन्त्रैर्मूलविद्यासमुद्भवैः ॥ ५१॥

asau tvagātmanā cintyo devadevasya śūlinaḥ |saptakoṭyā mahāmantrairmūlavidyāsamudbhavaiḥ || 51||

मन्त्राध्वा रुधिरात्मासौ विचिन्त्यः पार्वतीपतेः ।अनेकभेदसम्भिन्ना मन्त्राणां पादसंहतिः ॥ ५२॥

mantrādhvā rudhirātmāsau vicintyaḥ pārvatīpateḥ |anekabhedasambhinnā mantrāṇāṃ pādasaṃhatiḥ || 52||

पादाध्वासौ पशुपतेः सिरामांसतया स्मृतम् ।पृथिव्यादीनि षट्त्रिंशत्तत्वान्यागमवेदिभिः ॥ ५३॥

pādādhvāsau paśupateḥ sirāmāṃsatayā smṛtam |pṛthivyādīni ṣaṭtriṃśattatvānyāgamavedibhiḥ || 53||

उक्तान्यमीभिस्तत्वाध्वा शुक्लमज्जास्थिरूपभृत् ।नास्य देहेऽस्ति रुधिरं मांसं वा नास्ति किञ्चनः ॥ ५४॥

uktānyamībhistatvādhvā śuklamajjāsthirūpabhṛt |nāsya dehe'sti rudhiraṃ māṃsaṃ vā nāsti kiñcanaḥ || 54||

प्रतिबिम्बमिवाकाशे शक्रचापमिवाम्बरे ।ज्योतिर्मयतया सिद्धमिदं सादाशिवं वपुः ॥ ५५॥

pratibimbamivākāśe śakracāpamivāmbare |jyotirmayatayā siddhamidaṃ sādāśivaṃ vapuḥ || 55||

तथापि कल्पनामात्रं कालव्याप्याध्वनामिदम् ।ब्रह्मात्वीशानमूर्धानः पुरुषेण चतुर्मुखः ॥ ५६॥

tathāpi kalpanāmātraṃ kālavyāpyādhvanāmidam |brahmātvīśānamūrdhānaḥ puruṣeṇa caturmukhaḥ || 56||

हृदयादीन्यघोरेण गुह्यादीन्यपि वामतः ।सद्योजातेन मन्त्रेण पादादीनि जगत्पतेः ॥ ५७॥

hṛdayādīnyaghoreṇa guhyādīnyapi vāmataḥ |sadyojātena mantreṇa pādādīni jagatpateḥ || 57||

पञ्चमन्त्रतनुः शम्भुरेवं कल्पनया भवेत् ।ओङ्कारबीजप्रभवः कलापञ्चकसंयुतः ॥ ५८॥

pañcamantratanuḥ śambhurevaṃ kalpanayā bhavet |oṅkārabījaprabhavaḥ kalāpañcakasaṃyutaḥ || 58||

शुद्धस्फटिकसङ्काशः शुभमेधाविवर्धनः ।सदाशिवात्मा व्योमस्थः ईशानः परिकीर्तितः ॥ ५९॥

śuddhasphaṭikasaṅkāśaḥ śubhamedhāvivardhanaḥ |sadāśivātmā vyomasthaḥ īśānaḥ parikīrtitaḥ || 59||

गायन्त्रीप्रभवोमन्त्रः स्वर्णवर्णश्चतुष्कलः ।वश्यकृद्गन्धवाहस्थः ईश्वरः पुरुषः स्मृतः ॥ ६०॥

gāyantrīprabhavomantraḥ svarṇavarṇaścatuṣkalaḥ |vaśyakṛdgandhavāhasthaḥ īśvaraḥ puruṣaḥ smṛtaḥ || 60||

अर्वप्रभवो मन्त्रः कलाष्टकविभूषितः ।अभिचारकमत्यर्थमञ्जनाद्रिसमप्रभः ॥ ६१॥

arvaprabhavo mantraḥ kalāṣṭakavibhūṣitaḥ |abhicārakamatyarthamañjanādrisamaprabhaḥ || 61||

अशेषाघहरः पुंसामघोरो रुद्रविग्रहः ।सामवेदभवो मन्त्रस्त्रयोदशकलान्वितः ॥ ६२॥

aśeṣāghaharaḥ puṃsāmaghoro rudravigrahaḥ |sāmavedabhavo mantrastrayodaśakalānvitaḥ || 62||

वामदेवः प्रवालाभो वारितत्वास्थितो हरिः ।यजुर्वेदोद्भवो मन्त्रः कलाष्टकयुतः स्थितः ॥ ६३॥

vāmadevaḥ pravālābho vāritatvāsthito hariḥ |yajurvedodbhavo mantraḥ kalāṣṭakayutaḥ sthitaḥ || 63||

शान्तिकृत्पृथिवी संस्थः सद्योजातः पितामहः ।तत्पूर्वश्चन्दबिम्बाभः ऋग्वेदवदनो अंशुमान् ॥ ६४॥

śāntikṛtpṛthivī saṃsthaḥ sadyojātaḥ pitāmahaḥ |tatpūrvaścandabimbābhaḥ ṛgvedavadano aṃśumān || 64||

कलापञ्चदशोपेतो मुख्यमन्त्रात्मको हि सः ।पञ्चवक्त्राः स्मृताः सर्वे दशदोर्दण्डभूषिताः ॥ ६५॥

kalāpañcadaśopeto mukhyamantrātmako hi saḥ |pañcavaktrāḥ smṛtāḥ sarve daśadordaṇḍabhūṣitāḥ || 65||

खड्गखेटधनुर्बाणकमण्डल्वक्षधारिणः ।वराभयोपेतकराः शूलपङ्कजपाणयः ॥ ६६॥

khaḍgakheṭadhanurbāṇakamaṇḍalvakṣadhāriṇaḥ |varābhayopetakarāḥ śūlapaṅkajapāṇayaḥ || 66||

अघोरो घोर एतेषु तदन्ये सौम्यविग्रहाः ।एवं ध्यात्वा सदेशस्य पञ्चब्रह्मात्मतां विभोः ॥ ६७॥

aghoro ghora eteṣu tadanye saumyavigrahāḥ |evaṃ dhyātvā sadeśasya pañcabrahmātmatāṃ vibhoḥ || 67||

तत्तद्बह्मकलाभेदैर्विचिन्त्याङ्गानि कल्पयेत् ॥ ६८॥

tattadbahmakalābhedairvicintyāṅgāni kalpayet || 68||

स्कन्द उवाच ।बुद्ध्याभिध्याय रुध्वा विषमविषयजागाधबाधाप्रमुग्धंदुग्धप्रायमदिग्धसर्वविषयाकारौघदग्धाघकम् ।ध्यायेत क्षणमेव शिक्षणचणं त्र्यक्षं महोक्षस्थितंसर्गापारविचक्षणेक्षणमुमे विक्षीणचिन्ताक्षकः ॥ ६९॥

skanda uvāca |buddhyābhidhyāya rudhvā viṣamaviṣayajāgādhabādhāpramugdhaṃdugdhaprāyamadigdhasarvaviṣayākāraughadagdhāghakam |dhyāyeta kṣaṇameva śikṣaṇacaṇaṃ tryakṣaṃ mahokṣasthitaṃsargāpāravicakṣaṇekṣaṇamume vikṣīṇacintākṣakaḥ || 69||

वारंवारमपारसारकरुणावाराशिभाराशिहृद्घोराशीविषयानुभूषितभवोऽप्युन्मादभावोज्झितः ।योषार्धाकृति कामकायदहनः सम्मोहनो मोहिनांहेयानामविहायिनां अगसुते भूमैकसीमा शिवः ॥ ७०॥

vāraṃvāramapārasārakaruṇāvārāśibhārāśihṛdghorāśīviṣayānubhūṣitabhavo'pyunmādabhāvojjhitaḥ |yoṣārdhākṛti kāmakāyadahanaḥ sammohano mohināṃheyānāmavihāyināṃ agasute bhūmaikasīmā śivaḥ || 70||

॥ इति शिवरहस्यान्तर्गते ईश्वरप्रोक्तं शिवध्यानोपदेशं सम्पूर्णम् ॥॥ श्रीशिवरहस्यम् । ईश्वराख्यः दशमांशः । अध्यायः ४८ शिवध्यानम् । १७०॥

|| iti śivarahasyāntargate īśvaraproktaṃ śivadhyānopadeśaṃ sampūrṇam |||| śrīśivarahasyam | īśvarākhyaḥ daśamāṃśaḥ | adhyāyaḥ 48 śivadhyānam | 170||

– ॥ श्रीशिवरहस्यम् ।ईश्वराख्यः दशमांशः ।अध्यायः ४८ शिवध्यानम् ।१-७०॥

– || śrīśivarahasyam |īśvarākhyaḥ daśamāṃśaḥ |adhyāyaḥ 48 śivadhyānam | 1-70||