राधाकृष्णकवचम् Shri Radhakrishna Kavacham

ॐ श्रीगणेशाय नमः ।श्रीभैरव उवाच ।अधुना कथयिष्यामि राधकृष्णस्य भैरवि ।कवचं मन्त्रगर्भं तु वज्रपञ्जरसंज्ञकम् ॥ १॥

oṃ śrīgaṇeśāya namaḥ |śrībhairava uvāca |adhunā kathayiṣyāmi rādhakṛṣṇasya bhairavi |kavacaṃ mantragarbhaṃ tu vajrapañjarasaṃjñakam || 1||

रहस्यं सर्वदेवानां मर्त्यानां च विशेषतः ।अस्यैव धारणाच्चाहं सर्वज्ञोऽस्मि महेश्वरि ॥ २॥

rahasyaṃ sarvadevānāṃ martyānāṃ ca viśeṣataḥ |asyaiva dhāraṇāccāhaṃ sarvajño'smi maheśvari || 2||

यद्धारणात्ससर्जादौ ब्रह्मा सृष्टिं पृथग्विधाम् ।यं धृत्वा त्रिदशेन्द्रत्वं प्रालेभे पाकशासनः ॥ ३॥

yaddhāraṇātsasarjādau brahmā sṛṣṭiṃ pṛthagvidhām |yaṃ dhṛtvā tridaśendratvaṃ prālebhe pākaśāsanaḥ || 3||

व्योम्नि प्रकाशते भानुर्नित्यं यद्धारणात्प्रिये ॥सर्वप्राणिनियन्तापि बभूव धर्मराड्यतः ॥ ४॥

vyomni prakāśate bhānurnityaṃ yaddhāraṇātpriye ||sarvaprāṇiniyantāpi babhūva dharmarāḍyataḥ || 4||

धनाध्यक्षः कुबेरोऽभूदस्य सन्धारणादपि ॥यस्मिन्धृते पाशहस्तः सलिलेशो बभूव ह ॥ ५॥

dhanādhyakṣaḥ kubero'bhūdasya sandhāraṇādapi ||yasmindhṛte pāśahastaḥ salileśo babhūva ha || 5||

ये ये पूर्वं दानवेन्द्राः प्रबलाः कर्मणापि च ॥अस्यैव धारणात्सर्वे ते ते नीता मृतिं मया ॥ ६॥

ye ye pūrvaṃ dānavendrāḥ prabalāḥ karmaṇāpi ca ||asyaiva dhāraṇātsarve te te nītā mṛtiṃ mayā || 6||

शक्नुयात्को गणयितुं माहात्म्यमस्य चेश्वरि ।विनानेन न सिद्धिः स्यादिह लोके परत्र च ॥ ७॥

śaknuyātko gaṇayituṃ māhātmyamasya ceśvari |vinānena na siddhiḥ syādiha loke paratra ca || 7||

कवचं यं समाबध्य मन्त्रजापं समाचरेत् ।तेनैव मन्त्रसिद्धिश्च जायते परमाद्भुता ॥ ८॥

kavacaṃ yaṃ samābadhya mantrajāpaṃ samācaret |tenaiva mantrasiddhiśca jāyate paramādbhutā || 8||

कवचस्यास्य देवेशि ब्रह्मा प्रोक्तो मुनिस्तथा ।गायत्रं छन्द इत्युक्तं श्रीराधाप्रियवल्लभः ॥ ९॥

kavacasyāsya deveśi brahmā prokto munistathā |gāyatraṃ chanda ityuktaṃ śrīrādhāpriyavallabhaḥ || 9||

देवतात्र परं बीजं मायायाः परमेश्वरि ।रमा शक्तिः कामराजबीजं कीलकमीश्वरि ॥ १०॥

devatātra paraṃ bījaṃ māyāyāḥ parameśvari |ramā śaktiḥ kāmarājabījaṃ kīlakamīśvari || 10||

चतुर्वर्गफलावाप्तौ विनियोगः प्रकीर्तितः ॥ ११॥

caturvargaphalāvāptau viniyogaḥ prakīrtitaḥ || 11||

अथ ध्यानम् ॥ध्यानं वक्ष्ये महादेवि श्रीराधामाधवस्य च ।यज्ज्ञात्वा मन्त्रवित्प्राज्ञः सिद्धिं प्राप्नोति चैश्वरीम् ॥ १२।

atha dhyānam ||dhyānaṃ vakṣye mahādevi śrīrādhāmādhavasya ca |yajjñātvā mantravitprājñaḥ siddhiṃ prāpnoti caiśvarīm || 12|

श्रीमदुद्यानकल्पद्रुमविटपलसत्स्वर्णदोलाधिरूढंश्रीराधां रिङ्खमाणं कटितटविलसत्क्षुद्रघणटारवाढयम् ।वंशीरन्ध्रान्तरं श्रीमुखकमलगलद्वायुना पूर्यमाणंराधाप्रेक्षणहर्षफुल्लनयनं वन्दे सदा माधवम् ॥ १३॥

śrīmadudyānakalpadrumaviṭapalasatsvarṇadolādhirūḍhaṃśrīrādhāṃ riṅkhamāṇaṃ kaṭitaṭavilasatkṣudraghaṇaṭāravāḍhayam |vaṃśīrandhrāntaraṃ śrīmukhakamalagaladvāyunā pūryamāṇaṃrādhāprekṣaṇaharṣaphullanayanaṃ vande sadā mādhavam || 13||

श्यामं पूर्णेन्दुवदनं वराभयलसत्करम् ।राधाऽऽश्लिष्टतनुं कान्तं मुक्तिदं माधवं भजे ॥ १४॥

śyāmaṃ pūrṇenduvadanaṃ varābhayalasatkaram |rādhā''śliṣṭatanuṃ kāntaṃ muktidaṃ mādhavaṃ bhaje || 14||

ॐ ह्रीं मस्तकं माधवोऽव्याच्छ्रीं श्रीकृष्णो ललाटकम् ।पायान्नेत्रे सदा पातु क्लीं गोविन्दः समन्ततः ॥ १५॥

oṃ hrīṃ mastakaṃ mādhavo'vyācchrīṃ śrīkṛṣṇo lalāṭakam |pāyānnetre sadā pātu klīṃ govindaḥ samantataḥ || 15||

श्रीराधावल्लभः पातु नासां मे भक्तवत्सलः ॥दामोदरो मुखं पातु वैकुण्ठः पातु कण्ठकम् ॥ १६॥

śrīrādhāvallabhaḥ pātu nāsāṃ me bhaktavatsalaḥ ||dāmodaro mukhaṃ pātu vaikuṇṭhaḥ pātu kaṇṭhakam || 16||

वक्षःस्थलं सदा पायान्मम श्रीवत्सलाञ्छनः ॥चतुर्भुजो भुजौ पातु हस्तौ रक्षतु केशवः ॥ १७॥

vakṣaḥsthalaṃ sadā pāyānmama śrīvatsalāñchanaḥ ||caturbhujo bhujau pātu hastau rakṣatu keśavaḥ || 17||

पार्श्वौ मम सदा पातु पूर्णचन्द्रनिभाननः ॥हृदयं मुकुन्दः पायान्मे कुक्षिं विश्वम्भरो मम ॥ १८॥

pārśvau mama sadā pātu pūrṇacandranibhānanaḥ ||hṛdayaṃ mukundaḥ pāyānme kukṣiṃ viśvambharo mama || 18||

पृष्ठं पार्थसखः पातु नाभिं पञ्चजनाभियुक् ॥गुह्यं मे रक्षतु श्रीमान्सर्वतोविष्टरश्रवाः ॥ १९॥

pṛṣṭhaṃ pārthasakhaḥ pātu nābhiṃ pañcajanābhiyuk ||guhyaṃ me rakṣatu śrīmānsarvatoviṣṭaraśravāḥ || 19||

शिश्नं श्रीशः सदा पायात्कटिं कैटभजित्तथा ॥ऊरू त्रिविक्रमः पातु जानुनी च जनार्दनः ॥ २०॥

śiśnaṃ śrīśaḥ sadā pāyātkaṭiṃ kaiṭabhajittathā ||ūrū trivikramaḥ pātu jānunī ca janārdanaḥ || 20||

जङ्घे गदाधरः पातु गुल्फौ मे गरुडध्वजः ॥पादौ सहस्रपात्पातु राधेशः सकलं वपुः ॥ २१॥

jaṅghe gadādharaḥ pātu gulphau me garuḍadhvajaḥ ||pādau sahasrapātpātu rādheśaḥ sakalaṃ vapuḥ || 21||

इन्द्रो मां पूर्वतः पातु वह्निर्वह्नौ सदा मम ॥यमो दक्षिणतः पातु नैरृते निरृतिस्तथा ॥ २२॥

indro māṃ pūrvataḥ pātu vahnirvahnau sadā mama ||yamo dakṣiṇataḥ pātu nairṛte nirṛtistathā || 22||

वरुणः पश्चिमे पायाद्वायव्येऽव्यात्सदागतिः ॥कुबेर उत्तरे पायादैशान्यामीश्वरोऽवतु ॥ २३॥

varuṇaḥ paścime pāyādvāyavye'vyātsadāgatiḥ ||kubera uttare pāyādaiśānyāmīśvaro'vatu || 23||

दशदिक्षु सदा पातु श्रीराधावल्लभः प्रभुः ॥प्रभाते पातु श्रीकृष्णो मध्याह्ने गोपवल्लभः ॥ २४॥

daśadikṣu sadā pātu śrīrādhāvallabhaḥ prabhuḥ ||prabhāte pātu śrīkṛṣṇo madhyāhne gopavallabhaḥ || 24||

सायं राधाप्रियः पातु प्रदोषे गोपतिप्रियः ॥अर्धरात्रे सदा पातु प्रद्युम्नो भगवान्मम ॥ २५॥

sāyaṃ rādhāpriyaḥ pātu pradoṣe gopatipriyaḥ ||ardharātre sadā pātu pradyumno bhagavānmama || 25||

निशान्ते माधवः पातु विष्वक्सेनस्तु सर्वदा ॥रणे राजभये द्यूते विवादे शत्रुसङ्कटे ॥ २६॥

niśānte mādhavaḥ pātu viṣvaksenastu sarvadā ||raṇe rājabhaye dyūte vivāde śatrusaṅkaṭe || 26||

ॐ ह्रीं श्रीं क्लीं सदा पातु श्रीराधावल्लभः प्रभुः ॥ २७॥

oṃ hrīṃ śrīṃ klīṃ sadā pātu śrīrādhāvallabhaḥ prabhuḥ || 27||

ॐ ह्रीं श्रीं गरुडध्वजः सगतिमान्पायाद्रणे सङ्कटेश्रीकृष्णो भगवान्ममारिनिवहान्विध्वंसयेत्तत्क्षणात् ।गोविन्दोऽवतु मां सदा हरिभयाद्राधाप्रियो माधवोमां पायाद्विपदः श्मशानगचरोऽव्याद्भयात्सर्वतः ॥ २८॥

oṃ hrīṃ śrīṃ garuḍadhvajaḥ sagatimānpāyādraṇe saṅkaṭeśrīkṛṣṇo bhagavānmamārinivahānvidhvaṃsayettatkṣaṇāt |govindo'vatu māṃ sadā haribhayādrādhāpriyo mādhavomāṃ pāyādvipadaḥ śmaśānagacaro'vyādbhayātsarvataḥ || 28||

(तोयौघाज्ज्वलनोद्भवादरिभयान्माम्पातु राधेश्वरः)।इतीदं कवचं दिव्यं वज्रपञ्जरकाभिधम् ॥सर्वसौभाग्यजननं सुखदं सन्ततिप्रदम् ॥ २९॥

(toyaughājjvalanodbhavādaribhayānmāmpātu rādheśvaraḥ)|itīdaṃ kavacaṃ divyaṃ vajrapañjarakābhidham ||sarvasaubhāgyajananaṃ sukhadaṃ santatipradam || 29||

लक्ष्मीसंवर्धनं देवि परमार्थरसायनम् ॥ ३०॥

lakṣmīsaṃvardhanaṃ devi paramārtharasāyanam || 30||

मन्त्रगर्भपरं साररहस्यं त्रिदिवौकसाम् ।त्रिसन्ध्यं यः पठेन्नित्यं कवचं प्रयतः पुमान् ॥ ३१॥

mantragarbhaparaṃ sārarahasyaṃ tridivaukasām |trisandhyaṃ yaḥ paṭhennityaṃ kavacaṃ prayataḥ pumān || 31||

स याति परमं धाम वैष्णवं साधकोत्तमः ।दशवारं पठेद्यस्तु रतादौ वैष्णवोत्तमः ॥ ३२॥

sa yāti paramaṃ dhāma vaiṣṇavaṃ sādhakottamaḥ |daśavāraṃ paṭhedyastu ratādau vaiṣṇavottamaḥ || 32||

विष्णुभक्तिरतं पुत्रं प्राप्नोति कुलदीपकम् ॥रविवारे लिखेद्यस्तु तिष्यर्क्षे साधकोत्तमः ॥ ३३॥

viṣṇubhaktirataṃ putraṃ prāpnoti kuladīpakam ||ravivāre likhedyastu tiṣyarkṣe sādhakottamaḥ || 33||

गन्धाष्टकेन विमले भूर्जे रन्ध्रविहीनके ॥लिखित्वा रक्तवस्त्रेण संवेष्ट्य स मनुं जपन् ॥ ३४॥

gandhāṣṭakena vimale bhūrje randhravihīnake ||likhitvā raktavastreṇa saṃveṣṭya sa manuṃ japan || 34||

सुवर्णगुटिकामध्ये स्थापयित्वा विधानतः ॥मूर्ध्नि तान्धारयेद्धीमान् श्रीराधावल्लभं स्मरन् ॥ ३५॥

suvarṇaguṭikāmadhye sthāpayitvā vidhānataḥ ||mūrdhni tāndhārayeddhīmān śrīrādhāvallabhaṃ smaran || 35||

रणे रिपूञ्जयत्याशु वादे स्तुत्यो भविष्यति ॥नारीं रूपवतीं साध्वीं लभते नात्रसंशयः ॥ ३६॥

raṇe ripūñjayatyāśu vāde stutyo bhaviṣyati ||nārīṃ rūpavatīṃ sādhvīṃ labhate nātrasaṃśayaḥ || 36||

वन्ध्या वा काकवन्ध्या वा मृतवत्सापि याङ्गना ॥सा बध्नीयात्कण्ठदेशे लभेत्पुत्रांश्चिरायुषः ॥ ३७॥

vandhyā vā kākavandhyā vā mṛtavatsāpi yāṅganā ||sā badhnīyātkaṇṭhadeśe labhetputrāṃścirāyuṣaḥ || 37||

गुरूपदेशतो धृत्वा गुरुं ध्यात्वा मनुं जपन् ॥वर्णलक्षपुरश्चर्याफलं प्राप्नोति साधकः ॥ ३८॥

gurūpadeśato dhṛtvā guruṃ dhyātvā manuṃ japan ||varṇalakṣapuraścaryāphalaṃ prāpnoti sādhakaḥ || 38||

बहुनात्र किमुक्तेन कवचस्यास्य पार्वति ॥विनानेन न सिद्धिः स्यान्मन्त्रस्यास्य महेश्वरि ॥ ३९॥

bahunātra kimuktena kavacasyāsya pārvati ||vinānena na siddhiḥ syānmantrasyāsya maheśvari || 39||

गोप्याद्गोप्यं महादेवि श्रीराधाकृष्णसम्भवम् ।वज्रपञ्जरकं वर्म गोपनीयं महेश्वरि ॥ ४०॥

gopyādgopyaṃ mahādevi śrīrādhākṛṣṇasambhavam |vajrapañjarakaṃ varma gopanīyaṃ maheśvari || 40||

दीक्षिताय कुलीनाय शिष्याय गुणशालिने ।दातव्यं श्रद्दधानाय कृष्णभक्तिरतायच ॥ ४१॥

dīkṣitāya kulīnāya śiṣyāya guṇaśāline |dātavyaṃ śraddadhānāya kṛṣṇabhaktiratāyaca || 41||

अभक्ताय न दातव्यं कुचैलाय दुरात्मने ॥क्रूराय परशिष्याय शठाय परमेश्वरि ॥ ४२॥

abhaktāya na dātavyaṃ kucailāya durātmane ||krūrāya paraśiṣyāya śaṭhāya parameśvari || 42||

रहस्यं सर्वसाराढ्यं गोपनीयं स्वयोनिवत् ॥ ४३॥

rahasyaṃ sarvasārāḍhyaṃ gopanīyaṃ svayonivat || 43||

॥ इति श्रीविश्वनाथसारोद्धारे महातन्त्रेश्रीराधाकृष्णकवचं समाप्तम् ॥

|| iti śrīviśvanāthasāroddhāre mahātantreśrīrādhākṛṣṇakavacaṃ samāptam ||