राधाकृष्णप्रादुर्भावः Shri Radhakrishna Pradurbhavah

श्रीमते रामानुजाय नमः ।श्रीराधानटवराभ्यां नमः ।नमस्तस्मै भगवते कृष्णायाकुण्ठमेधसे ।नमो राधाधरसुधासिन्धुनित्यविहारिणे ॥ १॥

śrīmate rāmānujāya namaḥ |śrīrādhānaṭavarābhyāṃ namaḥ |namastasmai bhagavate kṛṣṇāyākuṇṭhamedhase |namo rādhādharasudhāsindhunityavihāriṇe || 1||

राधाकृष्णस्वरूपां वै कृष्णराधास्वरूपिणम् ।कालात्मानं निकुञ्जस्थं गुरुरूपं सदा भजे ॥ २॥

rādhākṛṣṇasvarūpāṃ vai kṛṣṇarādhāsvarūpiṇam |kālātmānaṃ nikuñjasthaṃ gururūpaṃ sadā bhaje || 2||

हरिणीं हारिणीं ह्रीणां हरितां चतुरक्रियाम् ।कौमारीं सततं वन्दे तप्तचामीकरप्रभाम् ॥ ३॥

hariṇīṃ hāriṇīṃ hrīṇāṃ haritāṃ caturakriyām |kaumārīṃ satataṃ vande taptacāmīkaraprabhām || 3||

मुग्धां स्निग्धां विदग्धां चासन्दिग्धां चतुरक्रियाम् ।वन्दे रणक्रियाभासा देवर्षिप्रमुखाकृतीः ॥ ४॥

mugdhāṃ snigdhāṃ vidagdhāṃ cāsandigdhāṃ caturakriyām |vande raṇakriyābhāsā devarṣipramukhākṛtīḥ || 4||

सिञ्जन्नूपुरपादपद्मयुगलां हंसीगतिं बिभ्रतींचञ्चत्खञ्जनमञ्जुलोचनयुगां पीनोल्लसत्कन्धराम् ।बिभ्रत्काञ्चनकङ्कणं द्युतिमिलत्पाणौ चलच्चामरंकुर्वाणां हरिराधिकोपरि सदा श्रीरङ्गदेवीं भजे ॥ ५॥

siñjannūpurapādapadmayugalāṃ haṃsīgatiṃ bibhratīṃcañcatkhañjanamañjulocanayugāṃ pīnollasatkandharām |bibhratkāñcanakaṅkaṇaṃ dyutimilatpāṇau calaccāmaraṃkurvāṇāṃ harirādhikopari sadā śrīraṅgadevīṃ bhaje || 5||

नव्यां नूतनचीरधारणपरां नीलप्रभां द्योतितांनीलेन्दीवरदीर्घसुन्दरदृशां नीलं निरीक्षद्वनम् ।वृन्दारण्यनिकुञ्जवासमुदितं राजीवनेत्रं हरिंध्यायन्ती धरणि स्थिरेण मनसा श्रीनव्यवासां भजे ॥ ६॥

navyāṃ nūtanacīradhāraṇaparāṃ nīlaprabhāṃ dyotitāṃnīlendīvaradīrghasundaradṛśāṃ nīlaṃ nirīkṣadvanam |vṛndāraṇyanikuñjavāsamuditaṃ rājīvanetraṃ hariṃdhyāyantī dharaṇi sthireṇa manasā śrīnavyavāsāṃ bhaje || 6||

वचनेमृतसागरायतीं गमने मत्तसुरद्विपायतीम् ।हसने मलमौक्तिकायतीं सततं श्रीसखिविश्वमां भजे ॥ ७॥

vacanemṛtasāgarāyatīṃ gamane mattasuradvipāyatīm |hasane malamauktikāyatīṃ satataṃ śrīsakhiviśvamāṃ bhaje || 7||

उत्तमाङ्गपरिरक्षणस्थिरामुत्तरोत्तररसप्रदायनीम् ।स्वामिनीं प्रणयपूरनिर्भरामुत्तमां च शिरसाभिवादये ॥ ८॥

uttamāṅgaparirakṣaṇasthirāmuttarottararasapradāyanīm |svāminīṃ praṇayapūranirbharāmuttamāṃ ca śirasābhivādaye || 8||

निजदासविलासदायिनीं निजनाथैकगुणौघगायिनीम् ।वयसा नयनेन्दुहायिनीं सुविलासां शिरसा नतोस्म्यहम् ॥ ९॥

nijadāsavilāsadāyinīṃ nijanāthaikaguṇaughagāyinīm |vayasā nayanenduhāyinīṃ suvilāsāṃ śirasā natosmyaham || 9||

रससागरपारधोरणीं रसरूपामृतचन्द्रतोरणीम् ।सरसस्मितहास्यवादिनीं सरसां रासकरीं भजामहे ॥ १०॥

rasasāgarapāradhoraṇīṃ rasarūpāmṛtacandratoraṇīm |sarasasmitahāsyavādinīṃ sarasāṃ rāsakarīṃ bhajāmahe || 10||

मधुरां मधुरप्रभाषिणीं हरिराधारतिरङ्गसाक्षिणीम् ।शशिकोटिविकाससुस्मितां प्रणमामि प्रणयात्मनि स्थिताम् ॥ ११॥

madhurāṃ madhuraprabhāṣiṇīṃ harirādhāratiraṅgasākṣiṇīm |śaśikoṭivikāsasusmitāṃ praṇamāmi praṇayātmani sthitām || 11||

भवतापहरां भयापहां भवपाथोधितरीं दयापराम् ।दलिताम्बुजनेत्रशालिनीमतिभद्रां मनसा स्मरे मुदा ॥ १२॥

bhavatāpaharāṃ bhayāpahāṃ bhavapāthodhitarīṃ dayāparām |dalitāmbujanetraśālinīmatibhadrāṃ manasā smare mudā || 12||

निजवर्गमधुव्रतावलीं कमनीयाङ्गुलिपल्लवप्ररूढाम् ।स्वजनामलमानसप्रसूतं प्रियपद्मापदपङ्कजं स्मरामि ॥ १३॥

nijavargamadhuvratāvalīṃ kamanīyāṅgulipallavaprarūḍhām |svajanāmalamānasaprasūtaṃ priyapadmāpadapaṅkajaṃ smarāmi || 13||

श्यामां श्यामवयोन्वितां परिलसन्नीलाम्बरं बिभ्रतींआकर्णायतनेत्रपङ्कजभरैरालस्यमातन्वतिम् ।लीलालोलमनङ्गरङ्गमधुरव्यापरभारावहांराधाकृष्णमुखारविन्दमतुलं सञ्चिनयन्तीं भजे ॥ १४॥

śyāmāṃ śyāmavayonvitāṃ parilasannīlāmbaraṃ bibhratīṃākarṇāyatanetrapaṅkajabharairālasyamātanvatim |līlālolamanaṅgaraṅgamadhuravyāparabhārāvahāṃrādhākṛṣṇamukhāravindamatulaṃ sañcinayantīṃ bhaje || 14||

वीणावादनतारतानमधुरत्वाविष्करत्रीं मुदांश्रीवृन्दावनचन्द्रकृष्णविलसत्पादाम्बुजध्यायिनीम् ।राधाहारविलासभारकुशलां कुन्देन्दुज्योत्स्नामुखामिच्छाशक्तिरतां हरेः प्रिवतरां श्रीशारदाम्बां भजे ॥ १५॥

vīṇāvādanatāratānamadhuratvāviṣkaratrīṃ mudāṃśrīvṛndāvanacandrakṛṣṇavilasatpādāmbujadhyāyinīm |rādhāhāravilāsabhārakuśalāṃ kundendujyotsnāmukhāmicchāśaktiratāṃ hareḥ privatarāṃ śrīśāradāmbāṃ bhaje || 15||

करेणोत्त्रीयं हसन्ती दधाना द्वितीयेन फुल्लारविन्दान्वहन्ती ।लसत्पीनवक्षो लसत्पुष्पहारां सदा संस्मरेहं कृपालामुदाराम् ॥ १६॥

kareṇottrīyaṃ hasantī dadhānā dvitīyena phullāravindānvahantī |lasatpīnavakṣo lasatpuṣpahārāṃ sadā saṃsmarehaṃ kṛpālāmudārām || 16||

रणच्चारुपादाम्बुजन्यासनिर्जिद्गजेन्द्रामुरौ मौक्लिकस्फारहाराम् ।सुधामाधुरीहारिमन्दस्मितास्यां भजे देवदेवीं सुरप्रार्थ्यदास्याम् ॥ १७॥

raṇaccārupādāmbujanyāsanirjidgajendrāmurau mauklikasphārahārām |sudhāmādhurīhārimandasmitāsyāṃ bhaje devadevīṃ suraprārthyadāsyām || 17||

स्फुरत्सुन्दरोदारमन्दारहारस्तनद्वन्द्वभारावसीदत्सुमध्याम् ।लसद्धस्तविन्यस्तताम्बूलपत्रां भजे सुन्दरीं सुन्दराकारछत्राम् ॥ १८॥

sphuratsundarodāramandārahārastanadvandvabhārāvasīdatsumadhyām |lasaddhastavinyastatāmbūlapatrāṃ bhaje sundarīṃ sundarākārachatrām || 18||

पादारविन्दं शिथिलं दधाना पद्मालया पद्मपरागरञ्जिता ।पद्मप्रभा पद्मकुचाभिरामा नमामि तस्याः पदपङ्कजं सदा ॥ १९॥

pādāravindaṃ śithilaṃ dadhānā padmālayā padmaparāgarañjitā |padmaprabhā padmakucābhirāmā namāmi tasyāḥ padapaṅkajaṃ sadā || 19||

अनाप्नुवंस्तन्मुखचन्द्रमस्तुलां विधुर्गतः खं त्रपया ज्वरार्दितः ।जले पतन्नाप्तमुखाम्बुजश्रीस्तामिन्दिरां चेतसि भावयामि ॥ २०॥

anāpnuvaṃstanmukhacandramastulāṃ vidhurgataḥ khaṃ trapayā jvarārditaḥ |jale patannāptamukhāmbujaśrīstāmindirāṃ cetasi bhāvayāmi || 20||

कामाङ्गनाकोटिमनोज्ञरूपां मुखप्रभानीर्जितरात्रिभूपाम् ।स्वीयप्रियास्नेहनिधानकूपां रामां स्मरे कृष्णमनोनुरूपाम् ॥ २१॥

kāmāṅganākoṭimanojñarūpāṃ mukhaprabhānīrjitarātribhūpām |svīyapriyāsnehanidhānakūpāṃ rāmāṃ smare kṛṣṇamanonurūpām || 21||

प्रावृट् प्रफुल्लनवचारुकदम्बपुष्पहारामुखद्युतिविनिर्जितचन्द्रवारा ।कान्ताङ्गसङ्गजनिताङ्कनिदर्शनाय वामा करोदभिलसन्मुकुरस्वसख्याः ॥ २२॥

prāvṛṭ praphullanavacārukadambapuṣpahārāmukhadyutivinirjitacandravārā |kāntāṅgasaṅgajanitāṅkanidarśanāya vāmā karodabhilasanmukurasvasakhyāḥ || 22||

कृष्णामहमभिवन्दे युगलपदाम्भोजभावनामुदिताम् ।कृष्णरसायनतृटमि साक्षादिव सिन्धुजां कॢप्ताम् ॥ २३॥

kṛṣṇāmahamabhivande yugalapadāmbhojabhāvanāmuditām |kṛṣṇarasāyanatṛṭami sākṣādiva sindhujāṃ kḷptām || 23||

यमुनातीरनिकुञ्जे मधुकरपुञ्जे विनिद्रतरुवृन्दे ।पद्मामहमभिबन्दे रटतीं कृष्णेति कृष्णेति ॥ २४॥

yamunātīranikuñje madhukarapuñje vinidrataruvṛnde |padmāmahamabhibande raṭatīṃ kṛṣṇeti kṛṣṇeti || 24||

अयुतायुतेन्दुरूपां सकलसखीमालिकानूपाम् ।वन्देऽहं श्रुतिरूपां कोटिस्मरकान्तिसरूपाम् ॥ २५॥

ayutāyutendurūpāṃ sakalasakhīmālikānūpām |vande'haṃ śrutirūpāṃ koṭismarakāntisarūpām || 25||

मदनमोहनमोहनसुन्दरस्मितविलासकलासु कुतूहलाम् ।प्रमुदितेन हृदा त्वभिवादये मनसि भागवतीं भगवत्प्रियाम् ॥ २६॥

madanamohanamohanasundarasmitavilāsakalāsu kutūhalām |pramuditena hṛdā tvabhivādaye manasi bhāgavatīṃ bhagavatpriyām || 26||

वसन्तकालोदयपुष्पितानि द्विसन्धिरागायुतपङ्कजानि ।प्रियप्रियाचारुपदाम्बुजेषु प्रीत्यार्पयन्तीं प्रणमामि माधवीम् ॥ २७॥

vasantakālodayapuṣpitāni dvisandhirāgāyutapaṅkajāni |priyapriyācārupadāmbujeṣu prītyārpayantīṃ praṇamāmi mādhavīm || 27||

यच्छोभाभरजलधौ विधिमुखविबुधालयं ययुः सुचिरम् ।असितायाश्च तदास्यं शारदविधुमण्डलाकृतिं ध्याये ॥ २८॥

yacchobhābharajaladhau vidhimukhavibudhālayaṃ yayuḥ suciram |asitāyāśca tadāsyaṃ śāradavidhumaṇḍalākṛtiṃ dhyāye || 28||

शृङ्गारभारं विविधं विधाय प्रातः स्थिताया निजदेवतायाः ।मुखारविन्दैकनिरीक्षणाय गुणाकरी दर्पणमाचकार ॥ २९॥

śṛṅgārabhāraṃ vividhaṃ vidhāya prātaḥ sthitāyā nijadevatāyāḥ |mukhāravindaikanirīkṣaṇāya guṇākarī darpaṇamācakāra || 29||

द्विजराजकलाविरजमानां मुखशोभाजितफुल्लकञ्जलक्ष्मीम् ।मृगराजकटिं मृगायताक्षीमहमीडे सततं सुवल्लभाख्याम् ॥ ३०॥

dvijarājakalāvirajamānāṃ mukhaśobhājitaphullakañjalakṣmīm |mṛgarājakaṭiṃ mṛgāyatākṣīmahamīḍe satataṃ suvallabhākhyām || 30||

शारदीयविधुबिम्बमुखाभां कुन्दपङ्क्तिरदनश्रियमेकाम् ।तुङ्गपीनकुचभारविनम्रामानतोऽस्मि शाशिगौरतराङ्गीम् ॥ ३१॥

śāradīyavidhubimbamukhābhāṃ kundapaṅktiradanaśriyamekām |tuṅgapīnakucabhāravinamrāmānato'smi śāśigauratarāṅgīm || 31||

मयूरपिच्छद्युतिहारचामरप्रभातिरस्कारि निजप्रियायाः ।सङ्गुम्फयन्तीं विलसत्कराभ्यां धम्मिल्लभारं प्रणमामि केशीम् ॥ ३२॥

mayūrapicchadyutihāracāmaraprabhātiraskāri nijapriyāyāḥ |saṅgumphayantīṃ vilasatkarābhyāṃ dhammillabhāraṃ praṇamāmi keśīm || 32||

जगत्पवित्रं कुरुते हि यस्या दृगन्तपातो वितनोति सौख्यम् ।श्रीस्वामिनी स्नेहनिधानभूतां श्रीकृष्णमित्रां प्रभजे पवित्राम् ॥ ३३॥

jagatpavitraṃ kurute hi yasyā dṛgantapāto vitanoti saukhyam |śrīsvāminī snehanidhānabhūtāṃ śrīkṛṣṇamitrāṃ prabhaje pavitrām || 33||

काश्मीरपङ्काङ्कितहृत्सरोजां सम्भावितश्रीपतिपत्सरोजाम् ।विनिद्ररक्तोत्पललोचनाभां मुदा स्मरे चेतसि कुङ्कुमाभाम् ॥ ३४॥

kāśmīrapaṅkāṅkitahṛtsarojāṃ sambhāvitaśrīpatipatsarojām |vinidraraktotpalalocanābhāṃ mudā smare cetasi kuṅkumābhām || 34||

समस्तनानाविधदेवतागणैर्विरिञ्चिगङ्गाधरशारदादिभिः ।मूर्ध्नाभिवन्द्यारुणपादपद्मां श्रीश्रीहितां सन्ततमानतोऽस्मि ॥ ३५॥

samastanānāvidhadevatāgaṇairviriñcigaṅgādharaśāradādibhiḥ |mūrdhnābhivandyāruṇapādapadmāṃ śrīśrīhitāṃ santatamānato'smi || 35||

विलोहितप्रान्तविशाललोचनां मुखप्रभापूर्णनिशाकरोपमाम् ।सुचामरालङ्कृतहस्तपङ्कजां श्रीरङ्गदेवीं मनसा स्मरामि ताम् ॥ ३६॥

vilohitaprāntaviśālalocanāṃ mukhaprabhāpūrṇaniśākaropamām |sucāmarālaṅkṛtahastapaṅkajāṃ śrīraṅgadevīṃ manasā smarāmi tām || 36||

अलिन्दे कालिन्दीकमलसुरभीकुञ्जवसतौवसन्ती वासन्ती नवपरिमलोद्गारिवदनाम् ।तदुत्तुङ्गे लीलामदमुकुलिताक्षीं पुनरिमांकदाहं सेव्यंसे किसलयकलापप्रमदने ॥ ३७॥

alinde kālindīkamalasurabhīkuñjavasatauvasantī vāsantī navaparimalodgārivadanām |taduttuṅge līlāmadamukulitākṣīṃ punarimāṃkadāhaṃ sevyaṃse kisalayakalāpapramadane || 37||

श्यामालिङ्गितगौरदेहलतया विद्युच्छविं निन्दतींश्यामाम्भोधरमाधुरीपरिणतीं पद्भयां तिरस्कुर्वतीम् ।सर्वासां रतिकेलिभावचतुरां स्त्रीणां शिरोभूषणांश्रीकृष्णस्मरमन्त्रदेशनगुरुं तां राधिकामाश्रये ॥ ३८॥

śyāmāliṅgitagauradehalatayā vidyucchaviṃ nindatīṃśyāmāmbhodharamādhurīpariṇatīṃ padbhayāṃ tiraskurvatīm |sarvāsāṃ ratikelibhāvacaturāṃ strīṇāṃ śirobhūṣaṇāṃśrīkṛṣṇasmaramantradeśanaguruṃ tāṃ rādhikāmāśraye || 38||

श्यामप्रेमविलासनीतिनिपुणा शृङ्गारभावान्वितावैदग्धीमदमञ्जतीरसमयी लावण्यविश्रामभूः ।रासोल्लासरसप्रबन्धरसिका सौन्दर्यसीमाश्रयाश्रीवृन्दावनदेवता विजयते राधा सुधामञ्जरी ॥ ३९॥

śyāmapremavilāsanītinipuṇā śṛṅgārabhāvānvitāvaidagdhīmadamañjatīrasamayī lāvaṇyaviśrāmabhūḥ |rāsollāsarasaprabandharasikā saundaryasīmāśrayāśrīvṛndāvanadevatā vijayate rādhā sudhāmañjarī || 39||

श्रीश्रीकोटिनितान्तरूपरुचिरां सौन्दर्यसम्मोहिनींश्रीवृदावनमञ्जुकुञ्जनिभृतिक्रीडरसावेशिनीम् ।श्रीमद्रासविलासलालसमहानन्दामृतप्लाविनींश्रीमद्दुर्लभदुर्लभा विजयते राधा सुधामञ्जरी ॥ ४०॥

śrīśrīkoṭinitāntarūparucirāṃ saundaryasammohinīṃśrīvṛdāvanamañjukuñjanibhṛtikrīḍarasāveśinīm |śrīmadrāsavilāsalālasamahānandāmṛtaplāvinīṃśrīmaddurlabhadurlabhā vijayate rādhā sudhāmañjarī || 40||

उत्तुङ्गस्तनभारभङ्गुरतनुर्विद्याच्छटाकछवीप्रोद्यन्नीलनवाम्बरा मृदुपदाम्भोजस्फुरन्मञ्जरी ।सुस्मेराधरबिम्बचन्द्रवदनी कन्दर्पदर्पाङ्कुराप्रेमाब्धौ मदमन्थरा विजयते प्राणाधिका राधिका ॥ ४१॥

uttuṅgastanabhārabhaṅguratanurvidyācchaṭākachavīprodyannīlanavāmbarā mṛdupadāmbhojasphuranmañjarī |susmerādharabimbacandravadanī kandarpadarpāṅkurāpremābdhau madamantharā vijayate prāṇādhikā rādhikā || 41||

भस्मीभूतमनोभवं हरदृशोदारस्फुलिङ्गाङ्कुरैर्लीलापाङ्गनिरीक्षणेन कुतुका तत्सञ्जयन्ती पुनः ।मृग्यन्ती स्मरकेलिकुञ्जभवनेकान्तं सखीभिः समंनित्यं नित्यविनोदिनां विजयते प्राणाधिका राधिका ॥ ४२॥

bhasmībhūtamanobhavaṃ haradṛśodārasphuliṅgāṅkurairlīlāpāṅganirīkṣaṇena kutukā tatsañjayantī punaḥ |mṛgyantī smarakelikuñjabhavanekāntaṃ sakhībhiḥ samaṃnityaṃ nityavinodināṃ vijayate prāṇādhikā rādhikā || 42||

उन्मीलन्नवनेत्रपङ्कजतरोः फुल्लस्तनालङ्कृतासुश्रोणीभरभङ्गुरा सुरुचिरां स्मेराधरामेदुराम् ।रक्षन्ती निजवल्लभं नवघनश्यामालिकेलिस्थलीप्रोन्मीलन्कुचकोरका विजयते प्राणाधिका राधिका ॥ ४३॥

unmīlannavanetrapaṅkajataroḥ phullastanālaṅkṛtāsuśroṇībharabhaṅgurā surucirāṃ smerādharāmedurām |rakṣantī nijavallabhaṃ navaghanaśyāmālikelisthalīpronmīlankucakorakā vijayate prāṇādhikā rādhikā || 43||

श्रीमत्कोटिमनोभवैर्विजयते यत्रार्थसंवादिनीश्रीमद्गानवसन्तरागविलसद् वक्त्राम्बुजामोहिनीम् ।श्रीवृन्दावनवल्लभा विजयते राधा सुधामञ्जरी ॥ ४४॥

śrīmatkoṭimanobhavairvijayate yatrārthasaṃvādinīśrīmadgānavasantarāgavilasad vaktrāmbujāmohinīm |śrīvṛndāvanavallabhā vijayate rādhā sudhāmañjarī || 44||

कलाकुशलरङ्गिनी नटति यत्र राधा नटीन यत्र मुरलीश्रुतिप्रियसखो भवेहागपि ।यदीह तरुपक्षिणामनुभवोस्ति सङ्ग्राहकस्स्मरामि यमुनातटे रसिकवृन्दवृन्दावनम् ॥ ४५॥

kalākuśalaraṅginī naṭati yatra rādhā naṭīna yatra muralīśrutipriyasakho bhavehāgapi |yadīha tarupakṣiṇāmanubhavosti saṅgrāhakassmarāmi yamunātaṭe rasikavṛndavṛndāvanam || 45||

प्रथममिलितभीताह्रायिता सा स्वराशौप्रियतमभुजराधाव्यग्रहस्तौ हसन्तौ ।अनमनमतिलीलागद्गदोक्तेर्मदान्धौस्मरनिभृतनिकुञ्जौ राधिकाकृष्णचन्द्रौ ॥ ४६॥

prathamamilitabhītāhrāyitā sā svarāśaupriyatamabhujarādhāvyagrahastau hasantau |anamanamatilīlāgadgadoktermadāndhausmaranibhṛtanikuñjau rādhikākṛṣṇacandrau || 46||

हृतकनकसुगौरस्निग्धमेघौघनीलच्छविभिरखिलवृन्दारण्यमार्गे व्रजन्तौ ।मृदुलनवदुकूले नीलपीते दधानौस्मरनिभृतनिकुञ्जौ राधिकाकृष्णचन्द्रौ ॥ ४७॥

hṛtakanakasugaurasnigdhameghaughanīlacchavibhirakhilavṛndāraṇyamārge vrajantau |mṛdulanavadukūle nīlapīte dadhānausmaranibhṛtanikuñjau rādhikākṛṣṇacandrau || 47||

नवललितवपुष्कौ नव्यलावण्यपुञ्जौनवरसचलचित्तौ नूतनप्रेमवृत्तौ ।नवनिधिवनलीलाकौतुकेनातिलोलौस्मरनिभृतनिकुञ्जौ राधिकाकृष्णचन्द्रौ ॥ ४८॥

navalalitavapuṣkau navyalāvaṇyapuñjaunavarasacalacittau nūtanapremavṛttau |navanidhivanalīlākautukenātilolausmaranibhṛtanikuñjau rādhikākṛṣṇacandrau || 48||

निखिलनिगमगूढौ नित्यमत्यन्तगूढौप्रणतपरनिबद्धौ शृङ्खलाबद्धचेष्टौ ।सुरतरतिमदान्धौ न्यस्तमिश्रौघकन्दौस्मरनिभृतनिकुञ्जौ राधिकाकृष्णचन्द्रौ ॥ ४९॥

nikhilanigamagūḍhau nityamatyantagūḍhaupraṇataparanibaddhau śṛṅkhalābaddhaceṣṭau |surataratimadāndhau nyastamiśraughakandausmaranibhṛtanikuñjau rādhikākṛṣṇacandrau || 49||

जघनलुलितवेणूविस्फुरद्बर्हचूडौरुचिरकनकचूडाकङ्कणद्वन्द्वपाणी ।विलसदरुणरोचिः पीतकौशेयरम्यौस्मरनिभृतनिकुञ्जौ राधिकाकृष्णचन्द्रौह ॥ ५०॥

jaghanalulitaveṇūvisphuradbarhacūḍaurucirakanakacūḍākaṅkaṇadvandvapāṇī |vilasadaruṇarociḥ pītakauśeyaramyausmaranibhṛtanikuñjau rādhikākṛṣṇacandrauha || 50||

गहनसुरतलीलापाशसंस्विन्नगात्रौदयितनिजसखीभिर्वेद्यमानौ पटान्ते ।सुरतसुभुजवल्लीपीड्यमानौ च भूयःस्मरनिभृतनिकुञ्जौ राधिकाकृष्णचन्द्रौ ॥ ५१॥

gahanasuratalīlāpāśasaṃsvinnagātraudayitanijasakhībhirvedyamānau paṭānte |suratasubhujavallīpīḍyamānau ca bhūyaḥsmaranibhṛtanikuñjau rādhikākṛṣṇacandrau || 51||

विलुलितवरवेणीहारनालावतंसौमृदुलमधुरहासोल्लासवक्त्रारविन्दौ ।अतिरसमदनान्धौ चित्रकन्दर्पकेलीस्मरनिभृतनिकुल्लौ राधिकाकृष्णचन्द्रौ ॥ ५२॥

vilulitavaraveṇīhāranālāvataṃsaumṛdulamadhurahāsollāsavaktrāravindau |atirasamadanāndhau citrakandarpakelīsmaranibhṛtanikullau rādhikākṛṣṇacandrau || 52||

इति श्रीराधाकृष्णप्रादुर्भावः सम्पूर्तिमगात् ॥

iti śrīrādhākṛṣṇaprādurbhāvaḥ sampūrtimagāt ||