राधाकवचम् २ Shri Radhakavacha Shtotram

ॐ अस्य श्रीराधाकवचस्य नारायण ऋषिः ।गायत्री छन्दः । राधिका प्रेमभक्तिप्रदायिका देवता ।धर्मार्थकाममोक्षेषु विनियोगः ॥करन्यासः ।ॐ रां अङ्गुष्ठाभ्यां नमः ।ॐ रीं तर्जनीभ्यां नमः ।ॐ रूं मध्यमाभ्यां नमः ।ॐ रैं अनामिकाभ्यां नमः ।ॐ रौं कनिष्ठिकाभ्यां नमः ।ॐ रः करतलकरपृष्ठाभ्यां नमः ॥षडङ्गन्यासः ।ॐ रां हृदयाय नमः ।ॐ रीं शिरसे स्वाहा ।ॐ रूं शिखायै वषट् ।ॐ रैं कवचाय हुम् ।ॐ रौं नेत्रत्रयाय वौषट् ।ॐ रः अस्त्राय फट् ॥श्रीपार्वत्युवाच ॥ॐ देवदेव महादेव परमप्रीतिदायक ।राधायाः कवचं देव कथय प्राणवल्लभ ॥ १॥

oṃ asya śrīrādhākavacasya nārāyaṇa ṛṣiḥ |gāyatrī chandaḥ | rādhikā premabhaktipradāyikā devatā |dharmārthakāmamokṣeṣu viniyogaḥ ||karanyāsaḥ |oṃ rāṃ aṅguṣṭhābhyāṃ namaḥ |oṃ rīṃ tarjanībhyāṃ namaḥ |oṃ rūṃ madhyamābhyāṃ namaḥ |oṃ raiṃ anāmikābhyāṃ namaḥ |oṃ rauṃ kaniṣṭhikābhyāṃ namaḥ |oṃ raḥ karatalakarapṛṣṭhābhyāṃ namaḥ ||ṣaḍaṅganyāsaḥ |oṃ rāṃ hṛdayāya namaḥ |oṃ rīṃ śirase svāhā |oṃ rūṃ śikhāyai vaṣaṭ |oṃ raiṃ kavacāya hum |oṃ rauṃ netratrayāya vauṣaṭ |oṃ raḥ astrāya phaṭ ||śrīpārvatyuvāca ||oṃ devadeva mahādeva paramaprītidāyaka |rādhāyāḥ kavacaṃ deva kathaya prāṇavallabha || 1||

श्रीमहादेवौवाच ॥साधु साधु महादेवि भद्रं भद्रं सुमङ्गलम् ।प्रेमभावान्वितायाश्च राधायाः कवचं परम् ॥ २॥

śrīmahādevauvāca ||sādhu sādhu mahādevi bhadraṃ bhadraṃ sumaṅgalam |premabhāvānvitāyāśca rādhāyāḥ kavacaṃ param || 2||

श्यामप्रेमविलासन्या गोपिन्या प्रेमसागरे ।मग्नायाः कवचं देवि कथयामि शृणुष्व तत् ॥ ३॥

śyāmapremavilāsanyā gopinyā premasāgare |magnāyāḥ kavacaṃ devi kathayāmi śṛṇuṣva tat || 3||

ऋषिर्नारायणः प्रोक्तो गायत्री छन्द इत्यपि ।देवता राधिकादेवी प्रेमभक्तिप्रदायिका ॥ ४॥

ṛṣirnārāyaṇaḥ prokto gāyatrī chanda ityapi |devatā rādhikādevī premabhaktipradāyikā || 4||

धर्मार्थकाममोक्षेषु विनियोगः प्रकीर्तितः ।तप्तकाश्चनगौराङ्गी राधा वृन्दावनेश्वरी ॥ ५॥

dharmārthakāmamokṣeṣu viniyogaḥ prakīrtitaḥ |taptakāścanagaurāṅgī rādhā vṛndāvaneśvarī || 5||

वृषभानुसुतां देवीं नमामि श्रीहरिप्रियाम् ।ॐ राधा मे हृदयं पातु मस्तकं पातु गोपिका ॥ ६॥

vṛṣabhānusutāṃ devīṃ namāmi śrīharipriyām |oṃ rādhā me hṛdayaṃ pātu mastakaṃ pātu gopikā || 6||

श्रीकृष्णहृदयासक्ता पातु नाभिं सदा मुदा ।श्रीकृष्णानन्दकलिता पातु पादयुगं मम ॥ ७॥

śrīkṛṣṇahṛdayāsaktā pātu nābhiṃ sadā mudā |śrīkṛṣṇānandakalitā pātu pādayugaṃ mama || 7||

गोविन्दभावरचिता बाहुयुग्मं सदावतु ।श्रीराधायै वह्निजाया सर्वाङ्गं पातु सर्वदा ॥ ८॥

govindabhāvaracitā bāhuyugmaṃ sadāvatu |śrīrādhāyai vahnijāyā sarvāṅgaṃ pātu sarvadā || 8||

श्री क्लीं राधायै तथा स्वाहा पातु नित्यं षडक्षरी ।श्री रां हीं राधायै वह्निजायान्ते च महामनुः ॥ ९॥

śrī klīṃ rādhāyai tathā svāhā pātu nityaṃ ṣaḍakṣarī |śrī rāṃ hīṃ rādhāyai vahnijāyānte ca mahāmanuḥ || 9||

अष्टाक्षरो महामन्त्रः सर्वकार्येषु रक्षतु ।विष्णुवक्षःस्थलस्था च पुत्रान् रक्षतु मे सदा ॥ १०॥

aṣṭākṣaro mahāmantraḥ sarvakāryeṣu rakṣatu |viṣṇuvakṣaḥsthalasthā ca putrān rakṣatu me sadā || 10||

विष्णोर्भावेन मुदिता गृहं पातु च सर्वदा ।कृष्णभावरता देवी जिह्वाग्रं मम रक्षतु ॥ ११॥

viṣṇorbhāvena muditā gṛhaṃ pātu ca sarvadā |kṛṣṇabhāvaratā devī jihvāgraṃ mama rakṣatu || 11||

श्यामप्रेमोद्धता देवी राज्यस्थाने सदावतु ।कृष्णे निवेदिताङ्गी च भक्तिभावं सदावतु ॥ १२॥

śyāmapremoddhatā devī rājyasthāne sadāvatu |kṛṣṇe niveditāṅgī ca bhaktibhāvaṃ sadāvatu || 12||

कृष्णार्तिवर्द्धिनी देवी सर्वबन्धून् सदावतु ।इन्द्राद्याः सकला देवाः पान्तु पूर्वादिदिक्षु च ॥ १३॥

kṛṣṇārtivarddhinī devī sarvabandhūn sadāvatu |indrādyāḥ sakalā devāḥ pāntu pūrvādidikṣu ca || 13||

रक्षां कुर्वन्तु मां नित्यं धनधान्यप्रदायिका ।ॐ श्री राधायै विद्महे वृन्दावनविलासिन्यै धीमहितन्नो राधा प्रचोदयात् ॥ १४॥

rakṣāṃ kurvantu māṃ nityaṃ dhanadhānyapradāyikā |oṃ śrī rādhāyai vidmahe vṛndāvanavilāsinyai dhīmahitanno rādhā pracodayāt || 14||

इति ते कथितं भद्रे गुह्याद्गुह्यतरं परम् ।यः पठेत् साधकश्रेष्ठो भक्तियुक्तः सद भुवि ॥ १५॥

iti te kathitaṃ bhadre guhyādguhyataraṃ param |yaḥ paṭhet sādhakaśreṣṭho bhaktiyuktaḥ sada bhuvi || 15||

गृहे निवसते लक्ष्मीर्वाणी वक्त्रे न संशयः ।राजानो दासतां यान्ति देवतुल्यो भवेन्नरः ॥ १६॥

gṛhe nivasate lakṣmīrvāṇī vaktre na saṃśayaḥ |rājāno dāsatāṃ yānti devatulyo bhavennaraḥ || 16||

कवचं परमं पुण्यं सोऽपि पुण्यवतां वरः ।सर्वसिद्धियुतो भूत्वा त्रैलोक्यविजयी भवेत् ॥ १७॥

kavacaṃ paramaṃ puṇyaṃ so'pi puṇyavatāṃ varaḥ |sarvasiddhiyuto bhūtvā trailokyavijayī bhavet || 17||

भक्तियुक्ताय शिष्याय साधकाय प्रकाशयेत् ।भक्तिहीनाय दुष्टाय कदाचिन्न प्रकाशयेत् ॥ १८॥

bhaktiyuktāya śiṣyāya sādhakāya prakāśayet |bhaktihīnāya duṣṭāya kadācinna prakāśayet || 18||

द्विजाय भक्तिहीनाय कदाचिन्न प्रदर्शयेत् ।श्वपचाय सदा देयं यदि भक्तीयुतो भवेत् ॥ १९॥

dvijāya bhaktihīnāya kadācinna pradarśayet |śvapacāya sadā deyaṃ yadi bhaktīyuto bhavet || 19||

भक्तिश्रद्धाविहीनाय न देयं हि द्विजाय ते ।अज्ञात्वा कवचं देवि राधाकृष्णो भजेत्तु यः ॥ २०॥

bhaktiśraddhāvihīnāya na deyaṃ hi dvijāya te |ajñātvā kavacaṃ devi rādhākṛṣṇo bhajettu yaḥ || 20||

युगायुतकृतक्लेशं प्रेमभक्तिर्नजायते ।मायया रहिता धीराः सर्वमेतत्परात्परम् ॥ २१॥

yugāyutakṛtakleśaṃ premabhaktirnajāyate |māyayā rahitā dhīrāḥ sarvametatparātparam || 21||

यथा राधा तथा लक्ष्मीस्तथात्वं हि न संशयः ॥ २२॥

yathā rādhā tathā lakṣmīstathātvaṃ hi na saṃśayaḥ || 22||

इति श्रीब्रह्मयामले हरगौरीसंवादे श्रीराधाकवचं सम्पूर्णम् ॥॥ शुभम् ॥

iti śrībrahmayāmale haragaurīsaṃvāde śrīrādhākavacaṃ sampūrṇam |||| śubham ||