राधाषोडशनामवर्णनम् अथवा श्रीषडक्षरीविद्याषोडशनामस्तोत्रं Radha Shodashanama Varnanam Or Shrishadaksharividyashodashanamastotram

ॐ अस्य श्रीषडक्षरीविद्याषोडशनामस्तोत्रस्य श्रीनारायण ऋषिः ।अनुष्टुप् छन्दः ।राधाम्बिका देवता ।ह्रीं बीजम् ।स्वाहा शक्तिः ।जपे विनियोगः ॥ऋष्यादिन्यासः ।ॐ श्रीनारायणऋषये नमः शिरसि ।ॐ अनुष्टुप्छन्दसे नमः मुखे ।ॐ राधाम्बिकादेवतायै नमः हृदि ।ॐ ह्रीम्बीजाय नमः गुह्ये ।ॐ स्वाहाशक्तये नमः पादयोः ।ॐ विनियोगाय नमः सर्वाङ्गे ॥करन्यासः ।ॐ क्लां अङ्गुष्ठाभ्यां नमः ।ॐ क्लीं तर्जनीभ्यां नमः ।ॐ क्लूं मध्यमाभ्यां नमः ।ॐ क्लैं अनामिकाभ्यां नमः ।ॐ क्लौं कनिष्ठिकाभ्यां नमः ।ॐ क्लः करतलकरपृष्ठाभ्यां नमः ॥षडङ्गन्यासः ।ॐ क्लां हृदयाय नमः ।ॐ क्लीं शिरसे स्वाहा ।ॐ क्लूं शिखायै वषट् ।ॐ क्लैं कवचाय हुम् ।ॐ क्लौं नेत्रत्रयाय वौषट् ।ॐ क्लः अस्त्राय फट् ॥दिग्बन्धःॐ भूर्भुवः स्वरोमिति दिग्बन्धः ॥अथ स्तोत्रपाठः ।श्रीनारायण उवाच ।राधा रासेश्वरी रासवासिनी रसिकेश्वरी ।कृष्णप्राणाधिका कृष्णप्रिया कृष्णस्वरूपिणी ॥ १॥

oṃ asya śrīṣaḍakṣarīvidyāṣoḍaśanāmastotrasya śrīnārāyaṇa ṛṣiḥ |anuṣṭup chandaḥ |rādhāmbikā devatā |hrīṃ bījam |svāhā śaktiḥ |jape viniyogaḥ ||ṛṣyādinyāsaḥ |oṃ śrīnārāyaṇaṛṣaye namaḥ śirasi |oṃ anuṣṭupchandase namaḥ mukhe |oṃ rādhāmbikādevatāyai namaḥ hṛdi |oṃ hrīmbījāya namaḥ guhye |oṃ svāhāśaktaye namaḥ pādayoḥ |oṃ viniyogāya namaḥ sarvāṅge ||karanyāsaḥ |oṃ klāṃ aṅguṣṭhābhyāṃ namaḥ |oṃ klīṃ tarjanībhyāṃ namaḥ |oṃ klūṃ madhyamābhyāṃ namaḥ |oṃ klaiṃ anāmikābhyāṃ namaḥ |oṃ klauṃ kaniṣṭhikābhyāṃ namaḥ |oṃ klaḥ karatalakarapṛṣṭhābhyāṃ namaḥ ||ṣaḍaṅganyāsaḥ |oṃ klāṃ hṛdayāya namaḥ |oṃ klīṃ śirase svāhā |oṃ klūṃ śikhāyai vaṣaṭ |oṃ klaiṃ kavacāya hum |oṃ klauṃ netratrayāya vauṣaṭ |oṃ klaḥ astrāya phaṭ ||digbandhaḥoṃ bhūrbhuvaḥ svaromiti digbandhaḥ ||atha stotrapāṭhaḥ |śrīnārāyaṇa uvāca |rādhā rāseśvarī rāsavāsinī rasikeśvarī |kṛṣṇaprāṇādhikā kṛṣṇapriyā kṛṣṇasvarūpiṇī || 1||

कृष्णवामाङ्गसम्भूता परमान्दरूपिणी ।कृष्णा वृन्दावनी वृन्दा वृन्दावनविनोदिनी ॥ २॥

kṛṣṇavāmāṅgasambhūtā paramāndarūpiṇī |kṛṣṇā vṛndāvanī vṛndā vṛndāvanavinodinī || 2||

चन्द्रावली चन्द्रकान्ता शतचन्द्रप्रभानना ।नामान्येतानि साराणि तेषामभ्यन्तराणि च ॥ ३॥

candrāvalī candrakāntā śatacandraprabhānanā |nāmānyetāni sārāṇi teṣāmabhyantarāṇi ca || 3||

राधेत्येवं च संसिद्धौ राकारो दानवाचकः ।स्वयं निर्वाणदात्री या सा राधा परिकीर्तिता ॥ ४॥

rādhetyevaṃ ca saṃsiddhau rākāro dānavācakaḥ |svayaṃ nirvāṇadātrī yā sā rādhā parikīrtitā || 4||

रासेसेश्वरस्य पत्नीयं तेन रासेश्वरी स्मृता ।रासे च वासो यस्याश्च तेन सा रासवासिनी ॥ ५॥

rāseseśvarasya patnīyaṃ tena rāseśvarī smṛtā |rāse ca vāso yasyāśca tena sā rāsavāsinī || 5||

सर्वासां रसिकानां च देवीनामीश्वरी परा ।प्रवदन्ति पुरा सन्तस्तेन तां रसिकेश्वरीम् ॥ ६॥

sarvāsāṃ rasikānāṃ ca devīnāmīśvarī parā |pravadanti purā santastena tāṃ rasikeśvarīm || 6||

प्राणाधिका प्रेयसी सा कृष्णस्य परमात्मनः ।कृष्णप्राणाधिका सा च कृष्णेन परिकीर्तिता ॥ ७॥

prāṇādhikā preyasī sā kṛṣṇasya paramātmanaḥ |kṛṣṇaprāṇādhikā sā ca kṛṣṇena parikīrtitā || 7||

कृष्णास्यातिप्रिया कान्ता कृष्णो वास्याः प्रियः सदा ।सर्वैर्देवगणैरुक्ता तेन कृष्णप्रिया स्मृता ॥ ८॥

kṛṣṇāsyātipriyā kāntā kṛṣṇo vāsyāḥ priyaḥ sadā |sarvairdevagaṇairuktā tena kṛṣṇapriyā smṛtā || 8||

कृष्णरूपं संनिधातुं या शक्ता चावलीलया ।सर्वांशैः कृष्णसदृशी तेन कृष्णस्वरूपिणी ॥ ९॥

kṛṣṇarūpaṃ saṃnidhātuṃ yā śaktā cāvalīlayā |sarvāṃśaiḥ kṛṣṇasadṛśī tena kṛṣṇasvarūpiṇī || 9||

वामाङ्गार्धेन कृष्णस्य या सम्भूता परा सती ।कृष्णवामाङ्गसम्भूता तेन कृष्णेन कीर्तिता ॥ १०॥

vāmāṅgārdhena kṛṣṇasya yā sambhūtā parā satī |kṛṣṇavāmāṅgasambhūtā tena kṛṣṇena kīrtitā || 10||

परमानन्दराशिश्च स्वयं मूर्तिमती सती ।श्रुतिभिः कीर्तिता तेन परमानन्दरूपिणी ॥ ११॥

paramānandarāśiśca svayaṃ mūrtimatī satī |śrutibhiḥ kīrtitā tena paramānandarūpiṇī || 11||

कृषिर्मोक्षार्थवचनो न एतोत्कृष्टवाचकः ।आकारो दातृवचनस्तेन कृष्णा प्रकीर्तिता ॥ १२॥

kṛṣirmokṣārthavacano na etotkṛṣṭavācakaḥ |ākāro dātṛvacanastena kṛṣṇā prakīrtitā || 12||

अस्ति वृन्दावनं यस्यास्तेन वृन्दावनी स्मृता ।वृन्दावनस्याधिदेवी तेन वाथ प्रकीर्तिता ॥ १३॥

asti vṛndāvanaṃ yasyāstena vṛndāvanī smṛtā |vṛndāvanasyādhidevī tena vātha prakīrtitā || 13||

सङ्घःसखीनां वृन्दः स्यादकारोऽप्यस्तिवाचकः ।सखिवृन्दोऽस्ति यस्याश्च सा वृन्दा परिकीर्तिता ॥ १४॥

saṅghaḥsakhīnāṃ vṛndaḥ syādakāro'pyastivācakaḥ |sakhivṛndo'sti yasyāśca sā vṛndā parikīrtitā || 14||

वृन्दावने विनोदश्च सोऽस्या ह्यस्ति च तत्र वै ।वेदा वदन्ति तां तेन वृन्दावनविनोदिनीम् ॥ १५॥

vṛndāvane vinodaśca so'syā hyasti ca tatra vai |vedā vadanti tāṃ tena vṛndāvanavinodinīm || 15||

नखचन्द्रावली वक्त्रचन्द्रोऽस्ति यत्र संततम् ।तेन चन्द्रवली सा च कृष्णेन परिकीर्तिता ॥ १६॥

nakhacandrāvalī vaktracandro'sti yatra saṃtatam |tena candravalī sā ca kṛṣṇena parikīrtitā || 16||

कान्तिरस्ति चन्द्रतुल्या सदा यस्या दिवानिशम् ।सा चन्द्रकान्ता हर्षेण हरिणा परिकीर्तिता ॥ १७॥

kāntirasti candratulyā sadā yasyā divāniśam |sā candrakāntā harṣeṇa hariṇā parikīrtitā || 17||

शरच्चन्द्रप्रभा यस्स्याश्चाननेऽस्ति दिवानिशम् ।मुनिना कीर्तीता तेन शरच्चन्द्रप्रभानना ॥ १८॥

śaraccandraprabhā yassyāścānane'sti divāniśam |muninā kīrtītā tena śaraccandraprabhānanā || 18||

इदं षोडशनामोक्तमर्थव्याख्यानसंयुतम् ॥नारायणेन यद्दत्तं ब्रह्मणे नाभिपङ्कजे।ब्रह्मणा च पुरा दत्तं धर्माय जनकाय मे ॥ १९॥

idaṃ ṣoḍaśanāmoktamarthavyākhyānasaṃyutam ||nārāyaṇena yaddattaṃ brahmaṇe nābhipaṅkaje|brahmaṇā ca purā dattaṃ dharmāya janakāya me || 19||

धर्मेण कृपया दत्तं मह्यमादित्यपर्वणि ।पुष्करे च महातीर्थे पुण्याहे देवसंसदि॥राधाप्रभावप्रस्तावे सुप्रसन्नेन चेतसा ॥ २०॥

dharmeṇa kṛpayā dattaṃ mahyamādityaparvaṇi |puṣkare ca mahātīrthe puṇyāhe devasaṃsadi||rādhāprabhāvaprastāve suprasannena cetasā || 20||

इदं स्तोत्रं महापुण्यं तुभ्यं दत्तं मया मुने ।निन्दकायावैष्णवाय न दातव्यं महामुने ॥ २१॥

idaṃ stotraṃ mahāpuṇyaṃ tubhyaṃ dattaṃ mayā mune |nindakāyāvaiṣṇavāya na dātavyaṃ mahāmune || 21||

यावज्जीवमिदं स्तोत्रं त्रिसंध्यं यः पठेन्नरः ।राधामाधवयोः पादपद्मे भक्तिर्भवेदिह ॥ २२॥

yāvajjīvamidaṃ stotraṃ trisaṃdhyaṃ yaḥ paṭhennaraḥ |rādhāmādhavayoḥ pādapadme bhaktirbhavediha || 22||

अन्ते लभेत्तयोर्दास्यं शश्वत्सहचरो भवेत् ।अणिमादिकसिधिं च सम्प्राप्य नित्यविग्रहम् ॥ २३॥

ante labhettayordāsyaṃ śaśvatsahacaro bhavet |aṇimādikasidhiṃ ca samprāpya nityavigraham || 23||

व्रतदानोपवाइश्च सर्वैर्नियमपूर्वकैः ।चतुर्णां चैव वेदानां पाठैः सर्वार्थसंयुतैः ॥ २४॥

vratadānopavāiśca sarvairniyamapūrvakaiḥ |caturṇāṃ caiva vedānāṃ pāṭhaiḥ sarvārthasaṃyutaiḥ || 24||

सर्वेषां यज्ञतीर्थानां करणैर्विधिवोधितः ।प्रदक्षिणेन भुमेश्च कृत्स्नाया एव सप्तधा ॥ २५॥

sarveṣāṃ yajñatīrthānāṃ karaṇairvidhivodhitaḥ |pradakṣiṇena bhumeśca kṛtsnāyā eva saptadhā || 25||

शरणागतरक्षायामज्ञानां ज्ञानदानतः ।देवानां वैष्णवानां च दर्शनेनापि यत् फलम् ॥ २६॥

śaraṇāgatarakṣāyāmajñānāṃ jñānadānataḥ |devānāṃ vaiṣṇavānāṃ ca darśanenāpi yat phalam || 26||

तदेव स्तोत्रपाठस्य कलां नार्हति षोडशीम् ।स्तोत्रस्यास्य प्रभावेण जीवन्मुक्तो भवेन्नरः ॥ २७॥

tadeva stotrapāṭhasya kalāṃ nārhati ṣoḍaśīm |stotrasyāsya prabhāveṇa jīvanmukto bhavennaraḥ || 27||

इति श्रीब्रह्मवैवर्ते श्रीनारायणकृतं राधाषोडशनामवर्णनंअथवा श्रीषडक्षरीविद्याषोडशनामस्तोत्रं सम्पूर्णम् ।

iti śrībrahmavaivarte śrīnārāyaṇakṛtaṃ rādhāṣoḍaśanāmavarṇanaṃathavā śrīṣaḍakṣarīvidyāṣoḍaśanāmastotraṃ sampūrṇam |