प्रेमाम्भोजमरन्दस्तवराजः Premambhojamarandastavarajah

महाभावोज्ज्वलच्चिन्तारत्नोद्भावितविग्रहाम् ।सखीप्रणयसद्गन्धवरोद्वर्तनसुप्रभाम् ॥ १॥

mahābhāvojjvalaccintāratnodbhāvitavigrahām |sakhīpraṇayasadgandhavarodvartanasuprabhām || 1||

कारुण्यामृतवीचिभिस्तारुण्यामृतधारया ।लावण्यामृतवन्याभिः स्नपितां ग्लप्तेन्दिराम् ॥ २॥

kāruṇyāmṛtavīcibhistāruṇyāmṛtadhārayā |lāvaṇyāmṛtavanyābhiḥ snapitāṃ glaptendirām || 2||

ह्रीपट्टवस्त्रगुप्ताङ्गीं सौन्दर्यघुसृणाञ्चिताम् ।श्यामलोज्ज्वलकस्तूरीविचित्रितकलेवराम् ॥ ३॥

hrīpaṭṭavastraguptāṅgīṃ saundaryaghusṛṇāñcitām |śyāmalojjvalakastūrīvicitritakalevarām || 3||

कम्पाश्रुपुलकस्तम्भस्वेदगद्गदरक्तताः ।उन्मादो जाड्यमित्येतै रथनिर्नवभिरुत्तमैः ॥ ४॥

kampāśrupulakastambhasvedagadgadaraktatāḥ |unmādo jāḍyamityetai rathanirnavabhiruttamaiḥ || 4||

कॢप्तालङ्कृतिसंस्लिष्टां गुणालीपुष्पमालिनीम् ।धीराधीरात्वसद्वासपटवासैः परिष्कृताम् ॥ ५॥

kḷptālaṅkṛtisaṃsliṣṭāṃ guṇālīpuṣpamālinīm |dhīrādhīrātvasadvāsapaṭavāsaiḥ pariṣkṛtām || 5||

प्रच्छन्नमानधम्मिल्लां सौभाग्यतिलकोज्ज्वलाम् ।कृष्णनामयशःश्राववतंसोल्लासिकर्णिकाम् ॥ ६॥

pracchannamānadhammillāṃ saubhāgyatilakojjvalām |kṛṣṇanāmayaśaḥśrāvavataṃsollāsikarṇikām || 6||

रागताम्बूलरक्तौष्ठीं प्रेमकौटिल्यकज्जलाम् ।नर्मभाषितनिस्यन्दस्मितकर्पूरवासिताम् ॥ ७॥

rāgatāmbūlaraktauṣṭhīṃ premakauṭilyakajjalām |narmabhāṣitanisyandasmitakarpūravāsitām || 7||

सौरभान्तःपुरे गर्वपर्यङ्कोपरि लीलया ।निविष्टां प्रेमवैचित्त्यविचलत्तरलाञ्चिताम् ॥ ८॥

saurabhāntaḥpure garvaparyaṅkopari līlayā |niviṣṭāṃ premavaicittyavicalattaralāñcitām || 8||

प्रणयक्रोधसच्चोलीबन्ध्गुप्तीकृतस्तनाम् ।सपत्नीवक्त्रहृच्छोषियशःश्रीकच्छपीवराम् ॥ ९॥

praṇayakrodhasaccolībandhguptīkṛtastanām |sapatnīvaktrahṛcchoṣiyaśaḥśrīkacchapīvarām || 9||

मध्यतात्मसखीस्कन्धलीलान्यस्तकराम्बुजाम् ।श्यामां श्यामस्मरामोदमधुलीपरिवेशिकाम् ॥ १०॥

madhyatātmasakhīskandhalīlānyastakarāmbujām |śyāmāṃ śyāmasmarāmodamadhulīpariveśikām || 10||

त्वां नत्वा याचते धृत्वा तृणं दन्तैरयं जनः ।स्वदास्यामृतसेकेन जीवयामुं सुदुःखितम् ॥ ११॥

tvāṃ natvā yācate dhṛtvā tṛṇaṃ dantairayaṃ janaḥ |svadāsyāmṛtasekena jīvayāmuṃ suduḥkhitam || 11||

न मुञ्चेच्छरणायातमपि दुष्टं दयामयः ।अतो गान्धर्विके हा हा मुञ्चैनं नैव तादृशम् ॥ १२॥

na muñceccharaṇāyātamapi duṣṭaṃ dayāmayaḥ |ato gāndharvike hā hā muñcainaṃ naiva tādṛśam || 12||

प्रेमाम्भोजमरन्दाख्यं स्तवराजमिमं जनः ।श्रीराधिकाकृपाहेतुं पठंस्तद्दास्यमाप्नुयात् ॥ १३॥

premāmbhojamarandākhyaṃ stavarājamimaṃ janaḥ |śrīrādhikākṛpāhetuṃ paṭhaṃstaddāsyamāpnuyāt || 13||

इति श्रीरघुनाथदासगोस्वामिविरचितस्तवावल्यांप्रेमाम्भोजमरन्दस्तवराजः सम्पूर्णः ।

iti śrīraghunāthadāsagosvāmiviracitastavāvalyāṃpremāmbhojamarandastavarājaḥ sampūrṇaḥ |