ॐकारस्तोत्रम् Omkara Shtotram

अकारात्मकः सृष्टिकर्ता स्वयम्भूरुकारात्मकः पालकश्चक्रपाणिः ।मकारात्मकः शङ्करः शं तनोति तमोङ्कारमादिस्वरूपं नमामि ॥ १॥

akārātmakaḥ sṛṣṭikartā svayambhūrukārātmakaḥ pālakaścakrapāṇiḥ |makārātmakaḥ śaṅkaraḥ śaṃ tanoti tamoṅkāramādisvarūpaṃ namāmi || 1||

अकारे स्थितं देहिनां स्थूलकर्म उकारे स्थितः सूक्ष्मसद्भक्तिभावः ।मकारे स्थितं कारणं ज्ञानपूर्णं तमोङ्कारमादिस्वरूपं नमामि ॥ २॥

akāre sthitaṃ dehināṃ sthūlakarma ukāre sthitaḥ sūkṣmasadbhaktibhāvaḥ |makāre sthitaṃ kāraṇaṃ jñānapūrṇaṃ tamoṅkāramādisvarūpaṃ namāmi || 2||

अकाराश्रितं विश्वमूलाश्रयं सत् उकाराश्रितं सर्वभूतान्तरं चित् ।मकाराश्रितः शुद्ध आनन्दकन्दस्तमोङ्कारमादिस्वरूपं नमामि ॥ ३॥

akārāśritaṃ viśvamūlāśrayaṃ sat ukārāśritaṃ sarvabhūtāntaraṃ cit |makārāśritaḥ śuddha ānandakandastamoṅkāramādisvarūpaṃ namāmi || 3||

अकारस्तु सट्त्वं स्वयं ब्रह्मसंस्थं उकारो रजः क्षत्रिये सन्निविष्टम् ।मकारो विषां दृश्यते तत्तमः स्यात्तमोङ्कारमादिस्वरूपं नमामि ॥ ४॥

akārastu saṭtvaṃ svayaṃ brahmasaṃsthaṃ ukāro rajaḥ kṣatriye sanniviṣṭam |makāro viṣāṃ dṛśyate tattamaḥ syāttamoṅkāramādisvarūpaṃ namāmi || 4||

अकारस्तु पाताललोकाख्यको भूरुकारो भुवर्भूमिलोकप्रसिद्धः ।मकारस्तु स्वः कथ्यते स्वर्गलोकस्तमोङ्कारमादिस्वरूपं नमामि ॥ ५॥

akārastu pātālalokākhyako bhūrukāro bhuvarbhūmilokaprasiddhaḥ |makārastu svaḥ kathyate svargalokastamoṅkāramādisvarūpaṃ namāmi || 5||

अखण्डं निजं निर्गुणं निर्विकल्पं विभुं व्यापकं सर्ववेदादिमूलम् ।स्मरन्मुच्यते पापतापान्मनुष्यस्तमोङ्कारमादिस्वरूपं नमामि ॥ ६॥

akhaṇḍaṃ nijaṃ nirguṇaṃ nirvikalpaṃ vibhuṃ vyāpakaṃ sarvavedādimūlam |smaranmucyate pāpatāpānmanuṣyastamoṅkāramādisvarūpaṃ namāmi || 6||

इति तन्त्रसारे ओङ्कारस्तोत्रं सम्पूर्णम् ।

iti tantrasāre oṅkārastotraṃ sampūrṇam |