नरकोत्तारणस्तोत्रम् Narakottarana Stotram

ॐ नारायणं नमस्कृत्य नरं चैव नरोत्तमम् ।देवीं सरस्वतीं व्यासं ततो जयमुदीरयेत् ॥ १॥

oṃ nārāyaṇaṃ namaskṛtya naraṃ caiva narottamam |devīṃ sarasvatīṃ vyāsaṃ tato jayamudīrayet || 1||

नारायणं जगद्बीजं पुराणं पुरुषोत्तमम् ।परिपृच्छति धर्मात्मा पाण्डुपुत्रो युधिष्ठिरः ॥ २॥

nārāyaṇaṃ jagadbījaṃ purāṇaṃ puruṣottamam |paripṛcchati dharmātmā pāṇḍuputro yudhiṣṭhiraḥ || 2||

श्रीयुधिष्ठिर उवाचकिं जपन्पुरुषो मुच्येद्यमलोकैकशासनात् ।तन्मे कथय तत्त्वेन भक्तस्य तव केशव ॥ ३॥

śrīyudhiṣṭhira uvācakiṃ japanpuruṣo mucyedyamalokaikaśāsanāt |tanme kathaya tattvena bhaktasya tava keśava || 3||

श्रीभगवानुवाचशृणु राजन्महाबाहो धर्मात्मन्पाण्डुनन्दन ।अहं ते कथयिष्यामि नरकोत्तारणं महत् ॥ ४॥

śrībhagavānuvācaśṛṇu rājanmahābāho dharmātmanpāṇḍunandana |ahaṃ te kathayiṣyāmi narakottāraṇaṃ mahat || 4||

ओङ्कारात्मन्नमस्तेऽस्तु ऋग्यजुःसामरूपिणे ।यज्ञात्मने नमस्तेऽस्तु सर्वशास्त्रात्मने नमः ॥ ५॥

oṅkārātmannamaste'stu ṛgyajuḥsāmarūpiṇe |yajñātmane namaste'stu sarvaśāstrātmane namaḥ || 5||

भूतभव्यजगन्नाथ सर्वभूत जगत्पते ।नमस्ते सर्वलोकेश महापुरुष पूर्वज ॥ ६॥

bhūtabhavyajagannātha sarvabhūta jagatpate |namaste sarvalokeśa mahāpuruṣa pūrvaja || 6||

नमोमत्स्याय कूर्माय मूलप्रकृतये नमः ।नमो यज्ञवराहाय नरसिंहाय वै नमः ॥ ७॥

namomatsyāya kūrmāya mūlaprakṛtaye namaḥ |namo yajñavarāhāya narasiṃhāya vai namaḥ || 7||

त्रिविक्रमाय रामाय वैकुण्ठाय नराय च ।नमस्तेऽश्वमुखायापि कूटस्थायाक्षराय च ॥ ८॥

trivikramāya rāmāya vaikuṇṭhāya narāya ca |namaste'śvamukhāyāpi kūṭasthāyākṣarāya ca || 8||

अनन्तायाच्युतायापि जामदग्न्याय वै नमः ।मधुकैटभनाशाय शङ्कराय नमोनमः ॥ ९॥

anantāyācyutāyāpi jāmadagnyāya vai namaḥ |madhukaiṭabhanāśāya śaṅkarāya namonamaḥ || 9||

रामाय विश्वरूपाय वासुदेवाय वै नमः ।पीताम्बराय देवाय युगवर्णाय वै नमः ॥ १०॥

rāmāya viśvarūpāya vāsudevāya vai namaḥ |pītāmbarāya devāya yugavarṇāya vai namaḥ || 10||

स्थित्युत्पत्तिविनाशानां हेतुरूपाय वै नमः ।ब्रह्मणे वायुरूपाय रुद्ररूपाय वै नमः ॥ ११॥

sthityutpattivināśānāṃ heturūpāya vai namaḥ |brahmaṇe vāyurūpāya rudrarūpāya vai namaḥ || 11||

धनदेशस्वरूपाय मोक्षरूपाय वै नमः ।सोमाय सूर्यरूपाय हविर्गन्धाय वै नमः ॥ १२॥

dhanadeśasvarūpāya mokṣarūpāya vai namaḥ |somāya sūryarūpāya havirgandhāya vai namaḥ || 12||

परमेश्वररूपाय नमः श्रीवत्सधारिणे ।बिभ्रत्सरस्वतीं वक्रे सर्वज्ञोऽसि नमोऽस्तु ते ॥ १३॥

parameśvararūpāya namaḥ śrīvatsadhāriṇe |bibhratsarasvatīṃ vakre sarvajño'si namo'stu te || 13||

लक्ष्मीप्रियाय देवाय ह्यतसीश्यामरूपिणे ।प्रसीद मम दीनस्य भक्तियुक्तस्य माधव ॥ १४॥

lakṣmīpriyāya devāya hyatasīśyāmarūpiṇe |prasīda mama dīnasya bhaktiyuktasya mādhava || 14||

रौरवान्नरकाद्घोरात्पाहि मां गरुडध्वज ।असिपत्रवनात्पाहिशङ्खचक्रगदाधर ॥ १५॥

rauravānnarakādghorātpāhi māṃ garuḍadhvaja |asipatravanātpāhiśaṅkhacakragadādhara || 15||

कुम्भीपाकान्महादेव पाहि मां शरणागतम् ।अवीचेः कालसूत्राच्च पाहि मां दुःखनाशन ॥ १६॥

kumbhīpākānmahādeva pāhi māṃ śaraṇāgatam |avīceḥ kālasūtrācca pāhi māṃ duḥkhanāśana || 16||

सूच्यागारादम्बरीषात्पाहि मां मधुसूदन ।असृक्केशास्थिवाहिन्या वैतरण्याश्चतुर्भुज ॥ १७॥

sūcyāgārādambarīṣātpāhi māṃ madhusūdana |asṛkkeśāsthivāhinyā vaitaraṇyāścaturbhuja || 17||

पाहि मां कर्मसाक्षी त्वं शरणागतवत्सल ।इक्षुपीडनकैर्यन्त्रैः पीड्यन्ते यत्र मानवाः ॥ १८॥

pāhi māṃ karmasākṣī tvaṃ śaraṇāgatavatsala |ikṣupīḍanakairyantraiḥ pīḍyante yatra mānavāḥ || 18||

देशात्तस्माज्जगन्नाथ पाहि मां भक्तवत्सल ।तप्तवालुकदेशश्च शल्मल्यायामवल्लितः ॥ १९॥

deśāttasmājjagannātha pāhi māṃ bhaktavatsala |taptavālukadeśaśca śalmalyāyāmavallitaḥ || 19||

तद्देशात्पुण्डरीकाक्ष पाहि मां करुणानिधे ।क्रकचैर्यत्र पाट्यन्ते मानुषा देवदारुवत् ॥ २०॥

taddeśātpuṇḍarīkākṣa pāhi māṃ karuṇānidhe |krakacairyatra pāṭyante mānuṣā devadāruvat || 20||

तेभ्योऽपि रक्ष मां हंस शरणागतवत्सल ।सारमेयैश्च खाद्यन्ते यामे वर्त्मनि मानवाः ॥ २१॥

tebhyo'pi rakṣa māṃ haṃsa śaraṇāgatavatsala |sārameyaiśca khādyante yāme vartmani mānavāḥ || 21||

महाभयात्प्रभो तस्मात्केशव क्लेशनाशन ।अन्ये च नरका घोरा यमलोके प्रतिष्ठिताः ॥ २२॥

mahābhayātprabho tasmātkeśava kleśanāśana |anye ca narakā ghorā yamaloke pratiṣṭhitāḥ || 22||

तेभ्योऽपि रक्ष मां हंस नमस्तेऽस्तु सहस्रशः ।तिर्यग्योनिगतस्यापि भक्तिर्मे तव केशव ॥ २३॥

tebhyo'pi rakṣa māṃ haṃsa namaste'stu sahasraśaḥ |tiryagyonigatasyāpi bhaktirme tava keśava || 23||

अचला स्याद्यथा कृष्ण तथा कुरु वरप्रद ।बहुबाहूरुपादस्त्वं बहुकर्णाक्षिशीर्षवान् ॥ २४॥

acalā syādyathā kṛṣṇa tathā kuru varaprada |bahubāhūrupādastvaṃ bahukarṇākṣiśīrṣavān || 24||

सर्वतो रक्ष मां हंस सर्वात्मन् सर्वतोमुख ।नमस्ते देवदेवेश यथा पास्यऽखिलं जगत् ॥ २५॥

sarvato rakṣa māṃ haṃsa sarvātman sarvatomukha |namaste devadeveśa yathā pāsya'khilaṃ jagat || 25||

स्थितौ तथा समस्तेभ्यो दोषेभ्यो मां समुद्धर ।कृष्णाच्युत हृषीकेश सर्वभूतेश केशव ॥ २६॥

sthitau tathā samastebhyo doṣebhyo māṃ samuddhara |kṛṣṇācyuta hṛṣīkeśa sarvabhūteśa keśava || 26||

महात्मन् पाहि मां भक्तं वासुदेव नमोऽस्तु ते ।इति स्तवन्नरो राजन्सदा नारायणं प्रभुम् ॥ २७॥

mahātman pāhi māṃ bhaktaṃ vāsudeva namo'stu te |iti stavannaro rājansadā nārāyaṇaṃ prabhum || 27||

यमलोकं न पश्येच्च नरकं च कुतः पुनः ।स्मरन्नपि सदा मर्त्यः शृण्वन्नपि युधिष्ठिर ॥ २८॥

yamalokaṃ na paśyecca narakaṃ ca kutaḥ punaḥ |smarannapi sadā martyaḥ śṛṇvannapi yudhiṣṭhira || 28||

महापातकजैर्घौरैर्मुच्यते सर्वकिल्बिषैः ।आयुरारोग्यमैश्वर्यं श्रियं मेधां तथा बलम् ॥ २९॥

mahāpātakajairghaurairmucyate sarvakilbiṣaiḥ |āyurārogyamaiśvaryaṃ śriyaṃ medhāṃ tathā balam || 29||

प्राप्नोति च पठेन्नित्यं तद्विष्णोः परमं पदम् ।भयकान्तारदुर्गेषु तथा संसारसागरात् ॥ ३०॥

prāpnoti ca paṭhennityaṃ tadviṣṇoḥ paramaṃ padam |bhayakāntāradurgeṣu tathā saṃsārasāgarāt || 30||

सत्यं सन्तरते मर्त्यः स्तवस्याप्यनुकीर्तनात् ।अन्ते सायुज्यमाप्नोति तद्विष्णोः परमं पदम् ॥ ३१॥

satyaṃ santarate martyaḥ stavasyāpyanukīrtanāt |ante sāyujyamāpnoti tadviṣṇoḥ paramaṃ padam || 31||

इति श्रीनरकोत्तारणस्तोत्रं सम्पूर्णम् ।

iti śrīnarakottāraṇastotraṃ sampūrṇam |