तोटकाष्टकं श्रीशङ्करदेशिकाष्टकं च Totakashtakam Praise of Shankaracharya

ईन्वोचतिओन्:शंकरं शंकराचार्यं केशवं बादरायणम् ।सूत्रभाष्यकृतौ वन्दे भगवन्तौ पुनः पुनः ॥अद्वैत गुरु-परम्परा:नारायणं पद्मभुवं वसिष्ठं शक्तिं च तत्पुत्रपराशरं चव्यासं शुकं गौडपदं महान्तं गोविन्दयोगीन्द्रमथास्य शिष्यम् ।श्री शंकराचार्यमथास्य पद्मपादं च हस्तामलकं च शिष्यम्तं तोटकं वार्तिककारमन्यानस्मद्गुरून् संततमानतोऽस्मि ॥॥ तोटकाष्टकं ॥विदिताखिलशास्त्रसुधाजलधे महितोपनिषत् कथितार्थनिधे ।हृदये कलये विमलं चरणं भव शंकर देशिक मे शरणम् ॥ १॥

īnvocation:śaṃkaraṃ śaṃkarācāryaṃ keśavaṃ bādarāyaṇam |sūtrabhāṣyakṛtau vande bhagavantau punaḥ punaḥ ||advaita guru-paramparā:nārāyaṇaṃ padmabhuvaṃ vasiṣṭhaṃ śaktiṃ ca tatputraparāśaraṃ cavyāsaṃ śukaṃ gauḍapadaṃ mahāntaṃ govindayogīndramathāsya śiṣyam |śrī śaṃkarācāryamathāsya padmapādaṃ ca hastāmalakaṃ ca śiṣyamtaṃ toṭakaṃ vārtikakāramanyānasmadgurūn saṃtatamānato'smi |||| toṭakāṣṭakaṃ ||viditākhilaśāstrasudhājaladhe mahitopaniṣat kathitārthanidhe |hṛdaye kalaye vimalaṃ caraṇaṃ bhava śaṃkara deśika me śaraṇam || 1||

करुणावरुणालय पालय मां भवसागरदुःखविदूनहृदम् ।रचयाखिलदर्शनतत्त्वविदं भव शंकर देशिक मे शरणम् ॥ २॥

karuṇāvaruṇālaya pālaya māṃ bhavasāgaraduḥkhavidūnahṛdam |racayākhiladarśanatattvavidaṃ bhava śaṃkara deśika me śaraṇam || 2||

भवता जनता सुहिता भविता निजबोधविचारण चारुमते ।कलयेश्वरजीवविवेकविदं भव शंकर देशिक मे शरणम् ॥ ३॥

bhavatā janatā suhitā bhavitā nijabodhavicāraṇa cārumate |kalayeśvarajīvavivekavidaṃ bhava śaṃkara deśika me śaraṇam || 3||

भव एव भवानिति मे नितरां समजायत चेतसि कौतुकिता ।मम वारय मोहमहाजलधिं भव शंकर देशिक मे शरणम् ॥ ४॥

bhava eva bhavāniti me nitarāṃ samajāyata cetasi kautukitā |mama vāraya mohamahājaladhiṃ bhava śaṃkara deśika me śaraṇam || 4||

सुकृतेऽधिकृते बहुधा भवतो भविता समदर्शनलालसता ।अतिदीनमिमं परिपालय मां भव शंकर देशिक मे शरणम् ॥ ५॥

sukṛte'dhikṛte bahudhā bhavato bhavitā samadarśanalālasatā |atidīnamimaṃ paripālaya māṃ bhava śaṃkara deśika me śaraṇam || 5||

जगतीमवितुं कलिताकृतयो विचरन्ति महामहसश्छलतः ।अहिमांशुरिवात्र विभासि गुरो भव शंकर देशिक मे शरणम् ॥ ६॥

jagatīmavituṃ kalitākṛtayo vicaranti mahāmahasaśchalataḥ |ahimāṃśurivātra vibhāsi guro bhava śaṃkara deśika me śaraṇam || 6||

गुरुपुंगव पुंगवकेतन ते समतामयतां नहि कोऽपि सुधीः ।शरणागतवत्सल तत्त्वनिधे भव शंकर देशिक मे शरणम् ॥ ७॥

gurupuṃgava puṃgavaketana te samatāmayatāṃ nahi ko'pi sudhīḥ |śaraṇāgatavatsala tattvanidhe bhava śaṃkara deśika me śaraṇam || 7||

विदिता न मया विशदैककला न च किंचन काञ्चनमस्ति गुरो ।द्रुतमेव विधेहि कृपां सहजां भव शंकर देशिक मे शरणम् ॥ ८॥

viditā na mayā viśadaikakalā na ca kiṃcana kāñcanamasti guro |drutameva vidhehi kṛpāṃ sahajāṃ bhava śaṃkara deśika me śaraṇam || 8||

इति श्रीमत्तोटकाचार्यविरचितं श्रीशङ्करदेशिकाष्टकं सम्पूर्णम् ।

iti śrīmattoṭakācāryaviracitaṃ śrīśaṅkaradeśikāṣṭakaṃ sampūrṇam |