तस्मै श्री गुरवे नमः Tasmai Shri Gurave Namah

गुरुः ब्रह्मेति सङ्कल्पो भारतेषु प्रवर्धते ।पुरुषस्यास्य संसृष्टौ गुरुरेव हि शक्तिमान् ॥अध्येता ध्यानशीलश्च परिष्कर्ता तथा पुनः ।कथाप्राणसमत्वाच्च सो\ऽध्यापक इहोच्यते ॥हितानुभवदाता स छात्रेभ्यो मार्गदर्शकः ।दोषाणां परिहर्ता च समदर्शी सत्यवागपि ॥मनसा कर्मणा वाचा छात्राणामुन्नतिं बहु ।सततं काङ्क्षते योगी निस्पृहः सत्यपालकः ॥आचार्यो भावनायुक्तः कलाकारश्च सात्विकः ।आशयग्रहणे दक्षो वाग्मी च क्षमायुतः ॥हारकः छात्रचित्तानां वर्धको मूल्यसंस्कृतेः ।चोदकः साधुवृत्तीनां नाशको दुष्टकर्मणः ॥पाठ्यांशान् सम्यगासूत्र्य यथाकालं सविस्तरं ।छात्रस्तरानुसारञ्च पाठ्यते तेन धीमता ॥पठनानुभवांस्तूर्णं मधुरैरनुभवैः समं ।समायोज्य यथाकालं सन्ददाति स पण्डितः ॥कालिकासु च वृत्तिषु यथाशक्ति यथोचितं ।छात्रशक्तिं समायोज्य लोकानुद्धरते गुरुः ॥छात्राणां प्रियमित्राणां चित्तपद्मेषु संश्रयन् ।कल्पान्तं जीवति प्राज्ञः पितृकल्पो नराग्रणीः ॥किं कर्म किमकर्मेति साधुबोधप्रदायिने ।उपदेशकवर्याय तस्मै श्री गुरवे नमः ॥

guruḥ brahmeti saṅkalpo bhārateṣu pravardhate |puruṣasyāsya saṃsṛṣṭau gurureva hi śaktimān ||adhyetā dhyānaśīlaśca pariṣkartā tathā punaḥ |kathāprāṇasamatvācca so\'dhyāpaka ihocyate ||hitānubhavadātā sa chātrebhyo mārgadarśakaḥ |doṣāṇāṃ parihartā ca samadarśī satyavāgapi ||manasā karmaṇā vācā chātrāṇāmunnatiṃ bahu |satataṃ kāṅkṣate yogī nispṛhaḥ satyapālakaḥ ||ācāryo bhāvanāyuktaḥ kalākāraśca sātvikaḥ |āśayagrahaṇe dakṣo vāgmī ca kṣamāyutaḥ ||hārakaḥ chātracittānāṃ vardhako mūlyasaṃskṛteḥ |codakaḥ sādhuvṛttīnāṃ nāśako duṣṭakarmaṇaḥ ||pāṭhyāṃśān samyagāsūtrya yathākālaṃ savistaraṃ |chātrastarānusārañca pāṭhyate tena dhīmatā ||paṭhanānubhavāṃstūrṇaṃ madhurairanubhavaiḥ samaṃ |samāyojya yathākālaṃ sandadāti sa paṇḍitaḥ ||kālikāsu ca vṛttiṣu yathāśakti yathocitaṃ |chātraśaktiṃ samāyojya lokānuddharate guruḥ ||chātrāṇāṃ priyamitrāṇāṃ cittapadmeṣu saṃśrayan |kalpāntaṃ jīvati prājñaḥ pitṛkalpo narāgraṇīḥ ||kiṃ karma kimakarmeti sādhubodhapradāyine |upadeśakavaryāya tasmai śrī gurave namaḥ ||

विजयन् वि\। पट्टाम्बि

vijayan vi\| paṭṭāmbi