योनिस्तोत्रम् Yoni Stotram

महादेव उवाच ।शृणु देवि सुरश्रेष्ठे सुरासुर नमस्कृते ।इदानीं श्रोतुमिच्छामि स्तोत्रं हि सर्वदुर्लभम् ।यस्यावबोधनाद्देहे देही ब्रह्ममयो भवेत् ॥ १॥

mahādeva uvāca |śṛṇu devi suraśreṣṭhe surāsura namaskṛte |idānīṃ śrotumicchāmi stotraṃ hi sarvadurlabham |yasyāvabodhanāddehe dehī brahmamayo bhavet || 1||

श्रीपार्वत्युवाच ।शृणु देव सुरश्रेष्ठ सर्वबीजस्य सम्मतम् ।न वक्तव्यं कदाचित्तु पाखण्डे नास्तिके नरे ॥ २॥

śrīpārvatyuvāca |śṛṇu deva suraśreṣṭha sarvabījasya sammatam |na vaktavyaṃ kadācittu pākhaṇḍe nāstike nare || 2||

ममैव प्राणसर्वस्वं लतास्तोत्रं दिगम्बर ।अस्य प्रपठनाद्देव जीवन्मुक्तोऽपि जायते ॥ ३॥

mamaiva prāṇasarvasvaṃ latāstotraṃ digambara |asya prapaṭhanāddeva jīvanmukto'pi jāyate || 3||

ॐ भगरूपा जगन्माता सृष्टिस्थितिलयान्विता ।दशविद्यास्वरूपात्मा योनिर्मां पातु सर्वदा ॥ ४॥

oṃ bhagarūpā jaganmātā sṛṣṭisthitilayānvitā |daśavidyāsvarūpātmā yonirmāṃ pātu sarvadā || 4||

कोणत्रय युता देवि स्तुतिनिन्दा विवर्जिता ।जगदानन्दसम्भूता योनिर्मां पातु सर्वदा ॥ ५॥

koṇatraya yutā devi stutinindā vivarjitā |jagadānandasambhūtā yonirmāṃ pātu sarvadā || 5||

रक्तरूपा जगन्माता योनिमध्ये सदा स्थिता ।ब्रह्मविष्णुशिवप्राणा योनिर्मां पातु सर्वदा ॥ ६॥

raktarūpā jaganmātā yonimadhye sadā sthitā |brahmaviṣṇuśivaprāṇā yonirmāṃ pātu sarvadā || 6||

कार्त्रिकीकुन्तलं रूपं योन्युपरि सुशोभितम् ।भुक्तिमुक्तिप्रदा योनिः योनिर्मां पातु सर्वदा ॥ ७॥

kārtrikīkuntalaṃ rūpaṃ yonyupari suśobhitam |bhuktimuktipradā yoniḥ yonirmāṃ pātu sarvadā || 7||

वीर्यरूपा शैलपुत्री मध्यस्थाने विराजिता ।ब्रह्मविष्णुशिव श्रेष्ठा योनिर्मां पातु सर्वदा ॥ ८॥

vīryarūpā śailaputrī madhyasthāne virājitā |brahmaviṣṇuśiva śreṣṭhā yonirmāṃ pātu sarvadā || 8||

योनिमध्ये महाकाली छिद्ररूपा सुशोभना ।सुखदा मदनागारा योनिर्मां पातु सर्वदा ॥ ९॥

yonimadhye mahākālī chidrarūpā suśobhanā |sukhadā madanāgārā yonirmāṃ pātu sarvadā || 9||

काल्यादियोगिनी देवी योनिकोणेषु संस्थिता ।मनोहरा दुःख लभ्या योनिर्मां पातु सर्वदा ॥ १०॥

kālyādiyoginī devī yonikoṇeṣu saṃsthitā |manoharā duḥkha labhyā yonirmāṃ pātu sarvadā || 10||

सदाशिवो मेरुरूपो योनिमध्ये वसेत् सदा ।कैवल्यदा काममुक्ता योनिर्मां पातु सर्वदा ॥ ११॥

sadāśivo merurūpo yonimadhye vaset sadā |kaivalyadā kāmamuktā yonirmāṃ pātu sarvadā || 11||

सर्वदेव स्तुता योनिः सर्वदेवप्रपूजिता ।सर्वप्रसवकर्त्री त्वं योनिर्मां पातु सर्वदा ॥ १२॥

sarvadeva stutā yoniḥ sarvadevaprapūjitā |sarvaprasavakartrī tvaṃ yonirmāṃ pātu sarvadā || 12||

सर्वतीर्थमयी योनिः सर्वपापप्रणाशिनी ।सर्वगेहे स्थिता योनिः योनिर्मां पातु सर्वदा ॥ १३॥

sarvatīrthamayī yoniḥ sarvapāpapraṇāśinī |sarvagehe sthitā yoniḥ yonirmāṃ pātu sarvadā || 13||

मुक्तिदा धनदा देवी सुखदा कीर्तिदा तथा ।आरोगयदा वीररता पञ्चतत्त्वयुता सदा ॥ १४॥

muktidā dhanadā devī sukhadā kīrtidā tathā |ārogayadā vīraratā pañcatattvayutā sadā || 14||

योनिस्तोत्रमिदं प्रोक्तं यः पठेत् योनिसन्निधौ ।शक्तिरूपा महादेवी तस्य गेहे सदा स्थिता ॥ १५॥

yonistotramidaṃ proktaṃ yaḥ paṭhet yonisannidhau |śaktirūpā mahādevī tasya gehe sadā sthitā || 15||

तीर्थ पर्यटनं नास्ति नास्ति पूजादि तर्पणम् ।पुरश्चरणं नास्त्येव तस्य मुक्तिरखण्डिता ॥ १६॥

tīrtha paryaṭanaṃ nāsti nāsti pūjādi tarpaṇam |puraścaraṇaṃ nāstyeva tasya muktirakhaṇḍitā || 16||

केवलं मैथुनेनैव शिवतुल्यो न संशयः ।सत्यं सत्यं पुनः सत्यं मम वाक्यं वृथा नहि ॥ १७॥

kevalaṃ maithunenaiva śivatulyo na saṃśayaḥ |satyaṃ satyaṃ punaḥ satyaṃ mama vākyaṃ vṛthā nahi || 17||

यदि मिथ्या मया प्रोक्ता तव हत्यासुपातकी ।कृताञ्जलिपुटो भूत्वा पठेत् स्तोत्रं दिगम्बर ! ॥ १८।

yadi mithyā mayā proktā tava hatyāsupātakī |kṛtāñjalipuṭo bhūtvā paṭhet stotraṃ digambara ! || 18|

सर्वतीर्थेषु यत् पुण्यं लभते च स साधकः ।काल्यादिदशविद्याश्च गङ्गादितीर्थकोटयः ।योनिदर्शनमात्रेण सर्वाः साक्षान्न संशय ॥ १९॥

sarvatīrtheṣu yat puṇyaṃ labhate ca sa sādhakaḥ |kālyādidaśavidyāśca gaṅgāditīrthakoṭayaḥ |yonidarśanamātreṇa sarvāḥ sākṣānna saṃśaya || 19||

कुलसम्भवपूजायामादौ चान्ते पठेदिदम् ।अन्यथा पूजनाद्देव रमणं मरणं भवेत् ॥ २०॥

kulasambhavapūjāyāmādau cānte paṭhedidam |anyathā pūjanāddeva ramaṇaṃ maraṇaṃ bhavet || 20||

एकसन्ध्यां त्रिसन्ध्यां वा पठेत् स्तोत्रमनन्यधीः ।निशायां सम्मुखेशक्त्याः स शिवो नात्र संशयः ॥ २१॥

ekasandhyāṃ trisandhyāṃ vā paṭhet stotramananyadhīḥ |niśāyāṃ sammukheśaktyāḥ sa śivo nātra saṃśayaḥ || 21||

इति निगमकल्पद्रुमे योनिस्तोत्रं समाप्तम् ।

iti nigamakalpadrume yonistotraṃ samāptam |