बलभद्रस्तवराजः Balabhadrastavaraja

दुर्योधन उवाचस्तोत्रं श्रीबलदेवस्य प्राड्विपाक महामुने ।वद मां कृपया साक्षात्सर्वसिद्धिप्रदायकम् ॥ १॥

duryodhana uvācastotraṃ śrībaladevasya prāḍvipāka mahāmune |vada māṃ kṛpayā sākṣātsarvasiddhipradāyakam || 1||

प्राड्विपाक उवाचस्तवराजं तु रामस्य वेदव्यासकृतं शुभम् ।सर्वसिद्धिप्रदं राजञ्छृणु कैवल्यदं नृणाम् ॥ २॥

prāḍvipāka uvācastavarājaṃ tu rāmasya vedavyāsakṛtaṃ śubham |sarvasiddhipradaṃ rājañchṛṇu kaivalyadaṃ nṛṇām || 2||

देवादिदेव भगवन्कामपाल नमोऽस्तु ते ।नमोऽनन्ताय शेषाय साक्षाद्रामाय ते नमः ॥ ३॥

devādideva bhagavankāmapāla namo'stu te |namo'nantāya śeṣāya sākṣādrāmāya te namaḥ || 3||

धराधराय पूर्णाय स्वधाम्ने सीरपाणये ।सहस्रशिरसे नित्यं नमः सङ्कर्षणाय ते ॥ ४॥

dharādharāya pūrṇāya svadhāmne sīrapāṇaye |sahasraśirase nityaṃ namaḥ saṅkarṣaṇāya te || 4||

रेवतीरमण त्वं वै बलदेवाच्युताग्रजः ।हलायुध प्रलम्बघ्न पाहि मां पुरुषोत्तम ॥ ५॥

revatīramaṇa tvaṃ vai baladevācyutāgrajaḥ |halāyudha pralambaghna pāhi māṃ puruṣottama || 5||

बलाय बलभद्राय तालाङ्काय नमो नमः ।नीलाम्बराय गौराय रौहणेयाय ते नमः ॥ ६॥

balāya balabhadrāya tālāṅkāya namo namaḥ |nīlāmbarāya gaurāya rauhaṇeyāya te namaḥ || 6||

धेनुकारिर्मुष्टिकारिः कूटारिर्बल्वलान्तकः ।रुक्म्यरिः कूपकर्णारिः कुम्भाण्डारिस्त्वमेव हि ॥ ७॥

dhenukārirmuṣṭikāriḥ kūṭārirbalvalāntakaḥ |rukmyariḥ kūpakarṇāriḥ kumbhāṇḍāristvameva hi || 7||

कालिन्दीभेदनोऽसि त्वं हस्तिनापुरकर्षकः ।द्विविदारिर्यादवेन्द्रो व्रजमण्डलमण्डनः ॥ ८॥

kālindībhedano'si tvaṃ hastināpurakarṣakaḥ |dvividāriryādavendro vrajamaṇḍalamaṇḍanaḥ || 8||

कंसभ्रातृप्रहन्तासि तीर्थयात्राकरः प्रभुः ।दुर्योधनगुरुः साक्षात्पाहि पाहि प्रभो त्वतः ॥ ९॥

kaṃsabhrātṛprahantāsi tīrthayātrākaraḥ prabhuḥ |duryodhanaguruḥ sākṣātpāhi pāhi prabho tvataḥ || 9||

जय जयाच्युतदेव परात्पर स्वयमनन्तदिगन्तगतश्रुत ।सुरमुनीन्द्रफणीन्द्रवराय ते मुसलिने बलिने हलिने नमः ॥ १०॥

jaya jayācyutadeva parātpara svayamanantadigantagataśruta |suramunīndraphaṇīndravarāya te musaline baline haline namaḥ || 10||

यः पठेत्सततं स्तवनं नरः स तु हरेः परमं पदमाव्रजेत् ।जगति सर्वबलं त्वरिमर्दनं भवति तस्य धनं स्वजनं धनम् ॥ ११॥

yaḥ paṭhetsatataṃ stavanaṃ naraḥ sa tu hareḥ paramaṃ padamāvrajet |jagati sarvabalaṃ tvarimardanaṃ bhavati tasya dhanaṃ svajanaṃ dhanam || 11||

इति श्रीगर्गसंहितायां बलभद्रखण्डेबलभद्रस्तवराजवर्णनं नामैकादशोऽध्यायः ॥ ग\। सं\। अधाय ११॥

iti śrīgargasaṃhitāyāṃ balabhadrakhaṇḍebalabhadrastavarājavarṇanaṃ nāmaikādaśo'dhyāyaḥ || ga\| saṃ\| adhāya 11||