कालिकाहृदयम् अथवा महाकौतूहल दक्षिणाकाली हृदय स्तोत्रम् Shri Kalika Hridayam

कालीरहस्ये महाकौतूहल दक्षिणाकाली हृदय स्तोत्रम्॥ श्रीगणेशाय नमः ॥॥ श्रीउमामहेश्वराभ्यां नमः ॥अथ श्रीकालीहृदयप्रारम्भः ।श्रीमहाकाल उवाच ।महाकौतूहलस्तोत्रं हृदयाख्यं महोत्तमम् ।शृणु प्रिये महागोप्यं दक्षिणायाः सुगोपितम् ॥ १॥

kālīrahasye mahākautūhala dakṣiṇākālī hṛdaya stotram|| śrīgaṇeśāya namaḥ |||| śrīumāmaheśvarābhyāṃ namaḥ ||atha śrīkālīhṛdayaprārambhaḥ |śrīmahākāla uvāca |mahākautūhalastotraṃ hṛdayākhyaṃ mahottamam |śṛṇu priye mahāgopyaṃ dakṣiṇāyāḥ sugopitam || 1||

अवाच्यमपि वक्ष्यामि तव प्रीत्या प्रकाशितम् ।अन्येभ्यः कुरु गोप्यं च सत्यं सत्यं च शैलजे ॥ २॥

avācyamapi vakṣyāmi tava prītyā prakāśitam |anyebhyaḥ kuru gopyaṃ ca satyaṃ satyaṃ ca śailaje || 2||

श्रीदेव्युवाच ।कस्मिन् युगे समुत्पन्नं केन स्तोत्रं कृतं पुरा ।तत्सर्वं कथ्यतां शम्भो दयानिधे महेश्वर ॥ ३॥

śrīdevyuvāca |kasmin yuge samutpannaṃ kena stotraṃ kṛtaṃ purā |tatsarvaṃ kathyatāṃ śambho dayānidhe maheśvara || 3||

श्रीमहाकाल उवाच ।पुरा प्रजापतेः शीर्षच्छेदनं कृतवानहम् ।ब्रह्महत्याकृतैः पापैर्भैरवत्वं ममागतम् ॥ ४॥

śrīmahākāla uvāca |purā prajāpateḥ śīrṣacchedanaṃ kṛtavānaham |brahmahatyākṛtaiḥ pāpairbhairavatvaṃ mamāgatam || 4||

ब्रह्महत्याविनाशाय कृतं स्तोत्रं मया प्रिये ।कृत्याविनाशकं स्तोत्रं ब्रह्महत्यापहारकम् ॥ ५॥

brahmahatyāvināśāya kṛtaṃ stotraṃ mayā priye |kṛtyāvināśakaṃ stotraṃ brahmahatyāpahārakam || 5||

ॐ अस्य श्रीदक्षिणकाल्या हृदयस्तोत्रमन्त्रस्य श्रीमहाकाल ऋषिः ।उष्णिक्छन्दः । श्रीदक्षिणकालिका देवता ।क्रीं बीजम् । ह्रीं शक्तिः । नमः कीलकम् ।सर्वत्र सर्वदा जपे विनियोगः ॥अथ हृदयादिन्यासः ।ॐ क्रां हृदयाय नमः ।ॐ क्रीं शिरसे स्वाहा ।ॐ क्रूं शिखायै वषट् ।ॐ क्रैं कवचाय हुं ।ॐ क्रौं नेत्रत्रयाय वौषट् ।ॐ क्रः अस्त्राय फट् ॥इति हृदयादिन्यासः ॥अथ ध्यानम् ।ॐ ध्यायेत्कालीं महामायां त्रिनेत्रां बहुरूपिणीम् ।चतुर्भुजां ललजिह्वां पूर्णचन्द्रनिभाननाम् ॥ १॥

oṃ asya śrīdakṣiṇakālyā hṛdayastotramantrasya śrīmahākāla ṛṣiḥ |uṣṇikchandaḥ | śrīdakṣiṇakālikā devatā |krīṃ bījam | hrīṃ śaktiḥ | namaḥ kīlakam |sarvatra sarvadā jape viniyogaḥ ||atha hṛdayādinyāsaḥ |oṃ krāṃ hṛdayāya namaḥ |oṃ krīṃ śirase svāhā |oṃ krūṃ śikhāyai vaṣaṭ |oṃ kraiṃ kavacāya huṃ |oṃ krauṃ netratrayāya vauṣaṭ |oṃ kraḥ astrāya phaṭ ||iti hṛdayādinyāsaḥ ||atha dhyānam |oṃ dhyāyetkālīṃ mahāmāyāṃ trinetrāṃ bahurūpiṇīm |caturbhujāṃ lalajihvāṃ pūrṇacandranibhānanām || 1||

नीलोत्पलदलप्रख्यां शत्रुसङ्घविदारिणीम् ।नरमुण्डं तथा खड्गं कमलं वरदं तथा ॥ २॥

nīlotpaladalaprakhyāṃ śatrusaṅghavidāriṇīm |naramuṇḍaṃ tathā khaḍgaṃ kamalaṃ varadaṃ tathā || 2||

बिभ्राणां रक्तवदनां दंष्ट्रालीं घोररूपिणीम् ।अट्टाट्टहासनिरतां सर्वदा च दिगम्बराम् ॥ ३॥

bibhrāṇāṃ raktavadanāṃ daṃṣṭrālīṃ ghorarūpiṇīm |aṭṭāṭṭahāsaniratāṃ sarvadā ca digambarām || 3||

शवासनस्थितां देवीं मुण्डमालाविभूषिताम् ।इति ध्यात्वा महादेवीं ततस्तु हृदयं पठेत् ॥ ४॥

śavāsanasthitāṃ devīṃ muṇḍamālāvibhūṣitām |iti dhyātvā mahādevīṃ tatastu hṛdayaṃ paṭhet || 4||

ॐ कालिका घोररूपाढया सर्वकामफलप्रदा ।सर्वदेवस्तुता देवी शत्रुनाशं करोतु मे ॥ ५॥

oṃ kālikā ghorarūpāḍhayā sarvakāmaphalapradā |sarvadevastutā devī śatrunāśaṃ karotu me || 5||

ह्रींह्रींस्वरूपिणी श्रेष्ठा त्रिषु लोकेषु दुर्लभा ।तव स्नेहान्मया ख्यातं न देयं यस्य कस्यचित् ॥ ६॥

hrīṃhrīṃsvarūpiṇī śreṣṭhā triṣu lokeṣu durlabhā |tava snehānmayā khyātaṃ na deyaṃ yasya kasyacit || 6||

अथ ध्यानं प्रवक्ष्यामि निशामय परात्मिके ।यस्य विज्ञानमात्रेण जीवन्मुक्तो भविष्यति ॥ ७॥

atha dhyānaṃ pravakṣyāmi niśāmaya parātmike |yasya vijñānamātreṇa jīvanmukto bhaviṣyati || 7||

नागयज्ञोपवीताञ्च चन्द्रार्द्धकृतशेखराम् ।जटाजूटाञ्च सञ्चिन्त्य महाकालसमीपगाम् ॥ ८॥

nāgayajñopavītāñca candrārddhakṛtaśekharām |jaṭājūṭāñca sañcintya mahākālasamīpagām || 8||

एवं न्यासादयः सर्वे ये प्रकुर्वन्ति मानवाः ।प्राप्नुवन्ति च ते मोक्षं सत्यं सत्यं वरानने ॥ ९॥

evaṃ nyāsādayaḥ sarve ye prakurvanti mānavāḥ |prāpnuvanti ca te mokṣaṃ satyaṃ satyaṃ varānane || 9||

यन्त्रं शृणु परं देव्याः सर्वार्थसिद्धिदायकम् ।गोप्यं गोप्यतरं गोप्यं गोप्यं गोप्यतरं महत् ॥ १०॥

yantraṃ śṛṇu paraṃ devyāḥ sarvārthasiddhidāyakam |gopyaṃ gopyataraṃ gopyaṃ gopyaṃ gopyataraṃ mahat || 10||

त्रिकोणं पञ्चकं चाष्टकमलं भूपुरान्वितम् ।मुण्डपङ्क्तिं च ज्वालां च कालीयन्त्रं सुसिद्धिदम् ॥ ११॥

trikoṇaṃ pañcakaṃ cāṣṭakamalaṃ bhūpurānvitam |muṇḍapaṅktiṃ ca jvālāṃ ca kālīyantraṃ susiddhidam || 11||

मन्त्रं तु पूर्वकथितं धारयस्व सदा प्रिये ।देव्या दक्षिणकाल्यास्तु नाममालां निशामय ॥ १२॥

mantraṃ tu pūrvakathitaṃ dhārayasva sadā priye |devyā dakṣiṇakālyāstu nāmamālāṃ niśāmaya || 12||

काली दक्षिणकाली च कृष्णरूपा परात्मिका ।मुण्डमाला विशालाक्षी सृष्टिसंहारकारिका ॥ १३ ॥

kālī dakṣiṇakālī ca kṛṣṇarūpā parātmikā |muṇḍamālā viśālākṣī sṛṣṭisaṃhārakārikā || 13 ||

स्थितिरूपा महामाया योगनिद्रा भगात्मिका ।भगसर्पिःपानरता भगोद्योता भगाङ्गजा ॥ १४ ॥

sthitirūpā mahāmāyā yoganidrā bhagātmikā |bhagasarpiḥpānaratā bhagodyotā bhagāṅgajā || 14 ||

आद्या सदा नवा घोरा महातेजाः करालिका ।प्रेतवाहा सिद्धिलक्ष्मीरनिरुद्धा सरस्वती ॥ १५॥

ādyā sadā navā ghorā mahātejāḥ karālikā |pretavāhā siddhilakṣmīraniruddhā sarasvatī || 15||

एतानि नाममाल्यानि ये पठन्ति दिने दिने ।तेषां दासस्य दासोऽहं सत्यं सत्यं महेश्वरि ॥ १६॥

etāni nāmamālyāni ye paṭhanti dine dine |teṣāṃ dāsasya dāso'haṃ satyaṃ satyaṃ maheśvari || 16||

ॐ कालीं कालहरां देवी कङ्कालबीजरूपिणीम् ।कालरूपां कलातीतां कालिकां दक्षिणां भजे ॥ १७॥

oṃ kālīṃ kālaharāṃ devī kaṅkālabījarūpiṇīm |kālarūpāṃ kalātītāṃ kālikāṃ dakṣiṇāṃ bhaje || 17||

कुण्डगोलप्रियां देवीं खयम्भूकुसुमे रताम् ।रतिप्रियां महारौद्रीं कालिकां प्रणमाम्यहम् ॥ १८॥

kuṇḍagolapriyāṃ devīṃ khayambhūkusume ratām |ratipriyāṃ mahāraudrīṃ kālikāṃ praṇamāmyaham || 18||

दूतीप्रियां महादूतीं दूतीयोगेश्वरीं पराम् ।दूतोयोगोद्भवरतां दूतीरूपां नमाम्यहम् ॥ १९॥

dūtīpriyāṃ mahādūtīṃ dūtīyogeśvarīṃ parām |dūtoyogodbhavaratāṃ dūtīrūpāṃ namāmyaham || 19||

क्रींमन्त्रेण जलं जप्त्वा सप्तधा सेचनेन तु ।सर्वे रोगा विनश्यन्ति नात्र कार्या विचारणा ॥ २०॥

krīṃmantreṇa jalaṃ japtvā saptadhā secanena tu |sarve rogā vinaśyanti nātra kāryā vicāraṇā || 20||

क्रींस्वाहान्तैर्महामन्त्रैश्चन्दनं साधयेत्ततः ।तिलकं क्रियते प्राज्ञैर्लोको वश्यो भवेत्सदा ॥ २१॥

krīṃsvāhāntairmahāmantraiścandanaṃ sādhayettataḥ |tilakaṃ kriyate prājñairloko vaśyo bhavetsadā || 21||

क्रीं हूं ह्रीं मन्त्रजप्तैश्च ह्यक्षतैः सप्तभिः प्रिये ।महाभयविनाशश्च जायते नात्र संशयः ॥ २२॥

krīṃ hūṃ hrīṃ mantrajaptaiśca hyakṣataiḥ saptabhiḥ priye |mahābhayavināśaśca jāyate nātra saṃśayaḥ || 22||

क्रीं ह्रीं ह्रूं स्वाहा मन्त्रेण श्मशानाग्निं च मन्त्रयेत् ।शत्रोर्गृहे प्रतिक्षिप्त्वा शत्रोर्मृत्युर्भविष्यति ॥ २३॥

krīṃ hrīṃ hrūṃ svāhā mantreṇa śmaśānāgniṃ ca mantrayet |śatrorgṛhe pratikṣiptvā śatrormṛtyurbhaviṣyati || 23||

ह्रूं ह्रीं क्रीं चैव उच्चाटे पुष्पं संशोध्य सप्तधा ।रिपूणां चैव चोच्चाटं नयत्येव न संशयः ॥ २४॥

hrūṃ hrīṃ krīṃ caiva uccāṭe puṣpaṃ saṃśodhya saptadhā |ripūṇāṃ caiva coccāṭaṃ nayatyeva na saṃśayaḥ || 24||

आकर्षणे च क्रीं क्रीं क्रीं जप्त्वाऽक्षतान् प्रतिक्षिपेत् ।सहस्रयोजनस्था च शीघ्रमागच्छति प्रिये ॥ २५॥

ākarṣaṇe ca krīṃ krīṃ krīṃ japtvā'kṣatān pratikṣipet |sahasrayojanasthā ca śīghramāgacchati priye || 25||

क्रीं क्रीं क्रीं ह्रूं ह्रूं ह्रीं ह्रीं च कज्जलं शोधितं तथा ।तिलकेन जगन्मोहः सप्तधा मन्त्रमाचरेत् ॥ २६॥

krīṃ krīṃ krīṃ hrūṃ hrūṃ hrīṃ hrīṃ ca kajjalaṃ śodhitaṃ tathā |tilakena jaganmohaḥ saptadhā mantramācaret || 26||

हृदयं परमेशानि सर्वपापहरं परम् ।अश्वमेधादियज्ञानां कोटिकोटिगुणोत्तरम् ॥ २७॥

hṛdayaṃ parameśāni sarvapāpaharaṃ param |aśvamedhādiyajñānāṃ koṭikoṭiguṇottaram || 27||

कन्यादानादिदानानां कोटिकोटिगुणं फलम् ।दूतीयागादियागानां कोटिकोटिफलं स्मृतम् ॥ २८॥

kanyādānādidānānāṃ koṭikoṭiguṇaṃ phalam |dūtīyāgādiyāgānāṃ koṭikoṭiphalaṃ smṛtam || 28||

गङ्गादिसर्वतीर्थानां फलं कोटिगुणं स्मृतम् ।एकधा पाठमात्रेण सत्यं सत्यं मयोदितम् ॥ २९॥

gaṅgādisarvatīrthānāṃ phalaṃ koṭiguṇaṃ smṛtam |ekadhā pāṭhamātreṇa satyaṃ satyaṃ mayoditam || 29||

कौमारीस्वेष्टरूपेण पूजां कृत्वा विधानतः ।पठेत्स्तोत्रं महेशानि जीवन्मुक्तः स उच्यते ॥ ३०॥

kaumārīsveṣṭarūpeṇa pūjāṃ kṛtvā vidhānataḥ |paṭhetstotraṃ maheśāni jīvanmuktaḥ sa ucyate || 30||

रजस्वलाभगं दृष्ट्वा पठेदेकाग्रमानसः ।लभते परमं स्थानं देवीलोके वरानने ॥ ३१॥

rajasvalābhagaṃ dṛṣṭvā paṭhedekāgramānasaḥ |labhate paramaṃ sthānaṃ devīloke varānane || 31||

महादुःखे महारोगे महासङ्कटके दिने ।महाभये महाघोरे पठेतस्तोत्रं महोत्तमम् ।सत्यं सत्यं पुनः सत्यं गोपायेन्मातृजारवत् ॥ ३२॥

mahāduḥkhe mahāroge mahāsaṅkaṭake dine |mahābhaye mahāghore paṭhetastotraṃ mahottamam |satyaṃ satyaṃ punaḥ satyaṃ gopāyenmātṛjāravat || 32||

इति कालीरहस्ये श्रीकालीहृदयं समाप्तम् ॥दक्षिणकालिकाहृदयं च

iti kālīrahasye śrīkālīhṛdayaṃ samāptam ||dakṣiṇakālikāhṛdayaṃ ca