शान्तिप्रार्थना Shanti Prarthana A Prayer For Peache

माऽहं ब्रह्म निराकुर्यां मा मा ब्रह्म निराकरोत् ।अनिराकरणं मेऽस्तु अनिराकरणं मम ॥ १॥

mā'haṃ brahma nirākuryāṃ mā mā brahma nirākarot |anirākaraṇaṃ me'stu anirākaraṇaṃ mama || 1||

स्वाविद्यैकनिबद्धोऽकरवं कर्माणि मुह्यमानः सन् ।दैवाद्विधूतबन्धः स्वात्मज्ञानान्मुनिः स्यां वा ॥ २॥

svāvidyaikanibaddho'karavaṃ karmāṇi muhyamānaḥ san |daivādvidhūtabandhaḥ svātmajñānānmuniḥ syāṃ vā || 2||

मायावशेन सुप्तो मध्येऽपश्यं सहस्रशः स्वप्नान् ।देशिकवचः प्रबुद्धो दीव्येयं मोदवारिधौ किं वा ॥ ३॥

māyāvaśena supto madhye'paśyaṃ sahasraśaḥ svapnān |deśikavacaḥ prabuddho dīvyeyaṃ modavāridhau kiṃ vā || 3||

जनिविपरीतक्रमतो बुद्।ह्ध्या प्रविलाप्य पञ्चभूतानि ।परिशिष्टमात्मतत्त्वं पश्येयं वा मुनिः शान्तः ॥ ४॥

janiviparītakramato bud|hdhyā pravilāpya pañcabhūtāni |pariśiṣṭamātmatattvaṃ paśyeyaṃ vā muniḥ śāntaḥ || 4||

जगदखिलमिदमसारं मायिकमेवेति मनसि मननेन ।पर्यटनपाटिताशः प्रगलितमदमत्सरः स्यां वा ॥ ५॥

jagadakhilamidamasāraṃ māyikameveti manasi mananena |paryaṭanapāṭitāśaḥ pragalitamadamatsaraḥ syāṃ vā || 5||

त्वमहमभिमानविहीनो मोदितनानाजनाचारः ।बालाचरितः स्यां वा विमलसुखाम्भोनिधौ मग्नः ॥ ६॥

tvamahamabhimānavihīno moditanānājanācāraḥ |bālācaritaḥ syāṃ vā vimalasukhāmbhonidhau magnaḥ || 6||

अवधूतकर्मजालो जडबधिरान्धोपमाचारः ।आत्मारामो यतवागकुतश्चनवसतिरासीय ॥ ७॥

avadhūtakarmajālo jaḍabadhirāndhopamācāraḥ |ātmārāmo yatavāgakutaścanavasatirāsīya || 7||

चपलं मनःकुरङ्गं चारु निगृह्णन्विमर्शवागुरया ।निगमारण्यविहारश्रान्तं शान्तं विदध्यां वा ॥ ८॥

capalaṃ manaḥkuraṅgaṃ cāru nigṛhṇanvimarśavāgurayā |nigamāraṇyavihāraśrāntaṃ śāntaṃ vidadhyāṃ vā || 8||

सन्त्यज्य शास्त्रवार्ताः संव्यवहारं च लौकिकं त्यक्त्वा ।अन्तरनुसन्दधन्मनुं ते स्यां वा निष्कम्पदीपवद्योगी ॥ ९॥

santyajya śāstravārtāḥ saṃvyavahāraṃ ca laukikaṃ tyaktvā |antaranusandadhanmanuṃ te syāṃ vā niṣkampadīpavadyogī || 9||

जात्यभिमानविहीनो जन्तुषु सर्वत्र पूर्णतां पश्यन् ।भूतं भावि च न विदन् निर्मृष्टाशेषविषयेहः ॥ १०॥

jātyabhimānavihīno jantuṣu sarvatra pūrṇatāṃ paśyan |bhūtaṃ bhāvi ca na vidan nirmṛṣṭāśeṣaviṣayehaḥ || 10||

त्यजतश्च न सम्पन्नं नासम्पन्नं च वाञ्छतः क्वापि ।तृप्तिमनुत्तमसीमां लब्धवतः किं लभेय पदम् ॥ ११॥

tyajataśca na sampannaṃ nāsampannaṃ ca vāñchataḥ kvāpi |tṛptimanuttamasīmāṃ labdhavataḥ kiṃ labheya padam || 11||

इति शान्तिप्रार्थना समाप्ता ।

iti śāntiprārthanā samāptā |