त्रिपुराकवचम् शिवप्रोक्तं Shivaproktam Tripura Kavacham

कवचं त्रिपुरायास्तु शृणु वेताल भैरव ।यज्ज्ञात्वा मन्त्रवित् सम्यक् फलमाप्नोति पूजने ॥ ५०॥

kavacaṃ tripurāyāstu śṛṇu vetāla bhairava |yajjñātvā mantravit samyak phalamāpnoti pūjane || 50||

उपचाराः पुरा प्रोक्ता येन एवात्र पूजने ।प्रतिपत्तिस्तु सैवात्र कीर्तिता नित्यपूजने ॥ ५१॥

upacārāḥ purā proktā yena evātra pūjane |pratipattistu saivātra kīrtitā nityapūjane || 51||

कवचस्य च माहात्म्यमहं ब्रह्मा न केशवः ।वक्तुं क्षमस्त्वनन्तोऽपि बहुजिह्वः कदाचन ॥ ५२॥

kavacasya ca māhātmyamahaṃ brahmā na keśavaḥ |vaktuṃ kṣamastvananto'pi bahujihvaḥ kadācana || 52||

क्रव्यादाद्भयं न लभते तथा तोयपरिप्लवे ।कवचस्मरणादेव सर्वं कल्याणमाप्नुयात् ॥ ५३॥

kravyādādbhayaṃ na labhate tathā toyapariplave |kavacasmaraṇādeva sarvaṃ kalyāṇamāpnuyāt || 53||

अथ कवचंॐ त्रिपुराकवचस्यास्य ऋषिर्दक्षिण उच्यते ।छन्दश्चित्राह्वयं प्रोक्तं देवी त्रिपुरभैरवी ।धर्मार्थकाममोक्षाणां विनियोगस्तु साधने ॥ ५४॥

atha kavacaṃoṃ tripurākavacasyāsya ṛṣirdakṣiṇa ucyate |chandaścitrāhvayaṃ proktaṃ devī tripurabhairavī |dharmārthakāmamokṣāṇāṃ viniyogastu sādhane || 54||

यथाद्यात्रिपुराख्याया बीजानि क्रमतः सुत ।नामतो वाग्भवादीनि कीर्तितानि मया पुरा ॥ ५५॥

yathādyātripurākhyāyā bījāni kramataḥ suta |nāmato vāgbhavādīni kīrtitāni mayā purā || 55||

तथा त्रिपुरभैरव्या बीजानामपि नामतः ।वाग्भवः कामराजश्च तथा त्रैलोक्यमोहनः ॥ ५६॥

tathā tripurabhairavyā bījānāmapi nāmataḥ |vāgbhavaḥ kāmarājaśca tathā trailokyamohanaḥ || 56||

अवतु सकलशीर्षं वाग्भवे वाचमुग्रांनिखिलरचितकामान् कामराजोऽवतान्मे ।सकलकरणवर्गमीश्वरः पातु नित्यंतनुगतबहुतेजो वर्धयन् बुद्धिहेतुः ॥ ५७॥

avatu sakalaśīrṣaṃ vāgbhave vācamugrāṃnikhilaracitakāmān kāmarājo'vatānme |sakalakaraṇavargamīśvaraḥ pātu nityaṃtanugatabahutejo vardhayan buddhihetuḥ || 57||

कूटैस्तु पञ्चभिरिदं गदितं हि यन्त्रंमन्त्रं ततोऽनु सततं मम तेज उग्रम् ।तेजोमयं महति नित्यपरायणस्थंतन्त्रो हृदि प्रविततां तनुतां सुबुद्धिम् ॥ ५८॥

kūṭaistu pañcabhiridaṃ gaditaṃ hi yantraṃmantraṃ tato'nu satataṃ mama teja ugram |tejomayaṃ mahati nityaparāyaṇasthaṃtantro hṛdi pravitatāṃ tanutāṃ subuddhim || 58||

आधारे वाग्भवः पातु कामराजस्तथा हृदि ।भ्रुवोर्मध्ये च शीर्षे च पातु त्रैलोक्यमोहनः ॥ ५९॥

ādhāre vāgbhavaḥ pātu kāmarājastathā hṛdi |bhruvormadhye ca śīrṣe ca pātu trailokyamohanaḥ || 59||

विततकुलकलाज्ञा कामिनी भैरवी यात्रिपुरपुरदहाख्या सर्वलोकस्य माता ।वितरतु मम नित्यं नाभिपद्मे सकुक्षौगणपतिवनिता मां रोगहानिं सुखं च ॥ ६०॥

vitatakulakalājñā kāminī bhairavī yātripurapuradahākhyā sarvalokasya mātā |vitaratu mama nityaṃ nābhipadme sakukṣaugaṇapativanitā māṃ rogahāniṃ sukhaṃ ca || 60||

योगैर्जगन्ति परिमोहयतीव नित्यंजागर्ति या त्रिपुरभैरवभामिनीति ।सायं च भावकलिता मम पञ्चभागेनासाक्षिकर्णरसनात्वचि पातु नित्यम् ॥ ६१॥

yogairjaganti parimohayatīva nityaṃjāgarti yā tripurabhairavabhāminīti |sāyaṃ ca bhāvakalitā mama pañcabhāgenāsākṣikarṇarasanātvaci pātu nityam || 61||

आद्या तु त्रिपुरेयं या मध्या या कामदायिनी ।त्रिधा तु ह्यवतां नित्यं देवी त्रिपुरभैरवी ॥ ६२॥

ādyā tu tripureyaṃ yā madhyā yā kāmadāyinī |tridhā tu hyavatāṃ nityaṃ devī tripurabhairavī || 62||

उदयदिशि सदा मां पातु बाला तु मातायमदिशि मम मध्याभद्रमुग्रं विदध्यात् ।वरुणपवनकाष्ठामध्यतो भैरवी मामवतु सकलरक्षां कुर्वती सुन्दरी मे ॥ ६३॥

udayadiśi sadā māṃ pātu bālā tu mātāyamadiśi mama madhyābhadramugraṃ vidadhyāt |varuṇapavanakāṣṭhāmadhyato bhairavī māmavatu sakalarakṣāṃ kurvatī sundarī me || 63||

महामाया महायोनिर्विश्वयोनिः सदैव तु ।सा पातु त्रिपुरा नित्यं सुन्दरी भैरवी च या ॥ ६४॥

mahāmāyā mahāyonirviśvayoniḥ sadaiva tu |sā pātu tripurā nityaṃ sundarī bhairavī ca yā || 64||

ललाटे सुभगा देवी पूर्वस्यां दिशि कामदा ।नित्यं तिष्ठतु रक्षन्ती सदा त्रिपुरसुन्दरी ॥ ६५॥

lalāṭe subhagā devī pūrvasyāṃ diśi kāmadā |nityaṃ tiṣṭhatu rakṣantī sadā tripurasundarī || 65||

भ्रुवोर्मध्ये तथाग्नेय्यां दिशि मां त्रिपुरा च या ।वर्धयन्ती भगगणान् पातु त्रिपुरभैरवी ॥ ६६॥

bhruvormadhye tathāgneyyāṃ diśi māṃ tripurā ca yā |vardhayantī bhagagaṇān pātu tripurabhairavī || 66||

वदने दक्षिणस्यां च दिशि मां भगसर्पिणी ।त्रिपुरा यमदूतादीन् वारयन्ती सदाऽवतु ॥ ६७॥

vadane dakṣiṇasyāṃ ca diśi māṃ bhagasarpiṇī |tripurā yamadūtādīn vārayantī sadā'vatu || 67||

कर्णयोः पश्चिमायां च दिशि मां भगमालिनी ।अयोनिजा जगद्योनिर्बाला मां त्रिपुराऽवतु ॥ ६८॥

karṇayoḥ paścimāyāṃ ca diśi māṃ bhagamālinī |ayonijā jagadyonirbālā māṃ tripurā'vatu || 68||

अनङ्गकुसुमा कण्ठे प्रतीच्यां दिशि सुन्दरी ।त्रिपुराभैरवी माता नित्यं पातु महेश्वरी ॥ ६९॥

anaṅgakusumā kaṇṭhe pratīcyāṃ diśi sundarī |tripurābhairavī mātā nityaṃ pātu maheśvarī || 69||

हृदि मारुतकाष्ठायां देवी चानङ्गमेखला ।नाभावुदीच्यां दिशि मां मातङ्गी त्रिपुरापरा ॥ ७०॥

hṛdi mārutakāṣṭhāyāṃ devī cānaṅgamekhalā |nābhāvudīcyāṃ diśi māṃ mātaṅgī tripurāparā || 70||

अनङ्गमदना देवी पातु त्रिपुरभैरवी ।ऐशान्यां दिशि लिङ्गे च मदविभ्रममन्थरा ॥ ७१॥

anaṅgamadanā devī pātu tripurabhairavī |aiśānyāṃ diśi liṅge ca madavibhramamantharā || 71||

वाग्वादिनी रक्षतु मां सदा त्रिपुरभैरवी ।गुदमेढ्रान्तरे पातु रतिस्त्रिपुरभैरवी ॥ ७२॥

vāgvādinī rakṣatu māṃ sadā tripurabhairavī |gudameḍhrāntare pātu ratistripurabhairavī || 72||

हृदयाभ्यन्तरे प्रीतिः पातु त्रिपुरभैरवी ।भ्रूनासयोर्मध्यदेशे नित्यं पातु मनोभवः ॥ ७३॥

hṛdayābhyantare prītiḥ pātu tripurabhairavī |bhrūnāsayormadhyadeśe nityaṃ pātu manobhavaḥ || 73||

द्रावणी मां ग्रहात् पातु वाणी मां दुर्गमूर्धनि ।क्षोभणा मां सदा पातु क्रव्याद्भ्योऽनिष्टभीतितः ॥ ७४॥

drāvaṇī māṃ grahāt pātu vāṇī māṃ durgamūrdhani |kṣobhaṇā māṃ sadā pātu kravyādbhyo'niṣṭabhītitaḥ || 74||

वशीकरणवाणी मामग्नितः पातु राजतः ।आकर्षणाह्वया वाणी मां पातु शस्त्रघाततः ॥ ७५॥

vaśīkaraṇavāṇī māmagnitaḥ pātu rājataḥ |ākarṣaṇāhvayā vāṇī māṃ pātu śastraghātataḥ || 75||

मोहनः सर्वभूतेभ्यः पिशाचेभ्यो जलात्तथा ।नित्यं पातु महाबाणस्तन्वानः काममुत्तमम् ॥ ७६॥

mohanaḥ sarvabhūtebhyaḥ piśācebhyo jalāttathā |nityaṃ pātu mahābāṇastanvānaḥ kāmamuttamam || 76||

माला मां शास्त्रबोधाय शास्त्रवादे सदाऽवतु ।पुस्तकं पातु मनसि सङ्कल्पं वर्धयन् मम ॥ ७७॥

mālā māṃ śāstrabodhāya śāstravāde sadā'vatu |pustakaṃ pātu manasi saṅkalpaṃ vardhayan mama || 77||

वरः पातु सदा धाम्नि धामतेजो विवर्धयन् ।अभयं ह्यभयं धत्तां सर्वेभ्यो भूतिभावनम् ॥ ७८॥

varaḥ pātu sadā dhāmni dhāmatejo vivardhayan |abhayaṃ hyabhayaṃ dhattāṃ sarvebhyo bhūtibhāvanam || 78||

ऊर्ध्वाधोभावभूतस्थिततरकरणै रक्तकीर्णा सुचक्राकालाग्निप्रख्यरोचिः सकलसुरगणैरर्चिता मुण्डमाला ।ज्ञानध्यानैकतानप्रबलबलकरं तत्त्वभूतप्रतिष्ठंपातादूर्ध्वं तथाधः सकलभयभृतो भोगभीरोस्तु विद्या ॥ ७९॥

ūrdhvādhobhāvabhūtasthitatarakaraṇai raktakīrṇā sucakrākālāgniprakhyarociḥ sakalasuragaṇairarcitā muṇḍamālā |jñānadhyānaikatānaprabalabalakaraṃ tattvabhūtapratiṣṭhaṃpātādūrdhvaṃ tathādhaḥ sakalabhayabhṛto bhogabhīrostu vidyā || 79||

हः पातु हृदि मां नित्यं सः शीर्षे पातु नित्यशः ।रः पातु गुह्यदेशे मां सौः पातु कण्ठपार्श्वयोः ॥ ८०॥

haḥ pātu hṛdi māṃ nityaṃ saḥ śīrṣe pātu nityaśaḥ |raḥ pātu guhyadeśe māṃ sauḥ pātu kaṇṭhapārśvayoḥ || 80||

रकारो मम नाडीषु शिरः सौः पातु सर्वदा ।शक्रः पातु सदाकाशे ब्रह्मा रक्षतु सर्वतः ॥ ८१॥

rakāro mama nāḍīṣu śiraḥ sauḥ pātu sarvadā |śakraḥ pātu sadākāśe brahmā rakṣatu sarvataḥ || 81||

विद्या विद्याभाविनी कामरूपास्थूला सूक्ष्मा मायया याऽऽदिमाया ।ब्रह्मेन्द्राद्यैरर्चिता भूतिदात्रीरक्षां कुर्यात् सर्वतो भैरवी माम् ॥ ८२॥

vidyā vidyābhāvinī kāmarūpāsthūlā sūkṣmā māyayā yā''dimāyā |brahmendrādyairarcitā bhūtidātrīrakṣāṃ kuryāt sarvato bhairavī mām || 82||

आद्या मध्या भाविनी नीतियुक्तासम्यग्ज्ञानज्ञेयरूपापरा या ।आदावन्ते मध्यभागे च तारापायाद्देवी त्रैपुरी भैरवी या ॥ ८३॥

ādyā madhyā bhāvinī nītiyuktāsamyagjñānajñeyarūpāparā yā |ādāvante madhyabhāge ca tārāpāyāddevī traipurī bhairavī yā || 83||

यन्मन्त्रभागतन्त्राणां यन्त्राणामपि केशवः ।ब्रह्मा रुद्रश्च जानाति तत्त्वं नान्यो नमोऽस्तु तान् ॥ ८४॥

yanmantrabhāgatantrāṇāṃ yantrāṇāmapi keśavaḥ |brahmā rudraśca jānāti tattvaṃ nānyo namo'stu tān || 84||

त्वं ब्रह्माणि भवानि विश्वभवितुर्लक्ष्मीरतिर्योगिनीत्वं वाग्मी सुभगा भवायुतयुतं मन्त्राक्षरं निष्कलम् ।वर्णास्ते निखिला स्तनावचलितस्त्वं कामिनीकामदात्वं देवि त्रिपुरे कवित्वममलं सौभाग्यमुच्चैः कुरु ॥ ८५॥

tvaṃ brahmāṇi bhavāni viśvabhaviturlakṣmīratiryoginītvaṃ vāgmī subhagā bhavāyutayutaṃ mantrākṣaraṃ niṣkalam |varṇāste nikhilā stanāvacalitastvaṃ kāminīkāmadātvaṃ devi tripure kavitvamamalaṃ saubhāgyamuccaiḥ kuru || 85||

इदं तु कवचं देव्या यो जानाति स मन्त्रवित् ।नाधयो व्याधयस्तस्य न भयं च सदा क्वचित् ॥ ८६॥

idaṃ tu kavacaṃ devyā yo jānāti sa mantravit |nādhayo vyādhayastasya na bhayaṃ ca sadā kvacit || 86||

इति ते परमं गुह्यमाख्यातं कवचं परम् ।तद्भजस्व महाभाग ततः सिद्धिमवाप्स्यसि ॥ ८७॥

iti te paramaṃ guhyamākhyātaṃ kavacaṃ param |tadbhajasva mahābhāga tataḥ siddhimavāpsyasi || 87||

इदं पवित्रं परमं पुण्यं कीर्तिविवर्धनम् ।त्रिपुरायास्त्रिमूर्तेस्तु कवचं मयकोदितम् ॥ ८८॥

idaṃ pavitraṃ paramaṃ puṇyaṃ kīrtivivardhanam |tripurāyāstrimūrtestu kavacaṃ mayakoditam || 88||

यः पठेत् प्रातरुत्थाय स प्राप्नोति मनोगतम् ।लिखितं कवचं यस्तु कण्ठे गृह्वाति मन्त्रवित् ॥ ८९॥

yaḥ paṭhet prātarutthāya sa prāpnoti manogatam |likhitaṃ kavacaṃ yastu kaṇṭhe gṛhvāti mantravit || 89||

न तस्य गात्रं कृन्तन्ति रणे शस्त्राणि भैरव ।सङ्ग्रामे शास्त्रवादे च विजयस्तस्य जायते ॥ ९०॥

na tasya gātraṃ kṛntanti raṇe śastrāṇi bhairava |saṅgrāme śāstravāde ca vijayastasya jāyate || 90||

इदं कवचमज्ञात्वा यो जपेत् त्रिपुरां नरः ।स शस्त्रघातमाप्नोति भैरवीं सुन्दरीमपि ॥ ९१॥

idaṃ kavacamajñātvā yo japet tripurāṃ naraḥ |sa śastraghātamāpnoti bhairavīṃ sundarīmapi || 91||

बीजमुच्चारयेत् स्वस्थो गतवाग्दोषनिश्चितः ।संयोगबोधः प्रत्येकभेदश्रवणगोचरः ॥ ९२॥

bījamuccārayet svastho gatavāgdoṣaniścitaḥ |saṃyogabodhaḥ pratyekabhedaśravaṇagocaraḥ || 92||

इति कालिकापुराणे पञ्चसप्ततितमाध्यायान्तर्गतं शिवप्रोक्तंत्रिपुराकवचं सम्पूर्णम् ।

iti kālikāpurāṇe pañcasaptatitamādhyāyāntargataṃ śivaproktaṃtripurākavacaṃ sampūrṇam |