सौभाग्याष्टोत्तरशतनामस्तोत्रम् Saubhagya Ashtottarashatanama Stotram

दत्तात्रेयेण कृतं सौभाग्याष्टोत्तरशतनामस्तोत्रोपदेशवर्णनम्निशम्यैतज्जामदग्न्यो माहात्म्यं सर्वतोऽधिकम् ।स्तोत्रस्य भूयः पप्रच्छ दत्तात्रेयं गुरूत्तमम् ॥ १॥

dattātreyeṇa kṛtaṃ saubhāgyāṣṭottaraśatanāmastotropadeśavarṇanamniśamyaitajjāmadagnyo māhātmyaṃ sarvato'dhikam |stotrasya bhūyaḥ papraccha dattātreyaṃ gurūttamam || 1||

भगवन् त्वन्मुखाम्भोजनिर्गमद्वाक्सुधारसम् ।पिबतः श्रोतमुखतो वर्धतेऽनुक्षणं तृषा ॥ २॥

bhagavan tvanmukhāmbhojanirgamadvāksudhārasam |pibataḥ śrotamukhato vardhate'nukṣaṇaṃ tṛṣā || 2||

अष्टोत्तरशतं नाम्नां श्रीदेव्या यत्प्रसादतः ।कामः सम्प्राप्तवान् लोके सौभाग्यं सर्वमोहनम् ॥ ३॥

aṣṭottaraśataṃ nāmnāṃ śrīdevyā yatprasādataḥ |kāmaḥ samprāptavān loke saubhāgyaṃ sarvamohanam || 3||

सौभाग्यविद्यावर्णानामुद्धारो यत्र संस्थितः ।तत्समाचक्ष्व भगवन् कृपया मयि सेवके ॥ ४॥

saubhāgyavidyāvarṇānāmuddhāro yatra saṃsthitaḥ |tatsamācakṣva bhagavan kṛpayā mayi sevake || 4||

निशम्यैवं भार्गवोक्तिं दत्तात्रेयो दयानिधिः ।प्रोवाच भार्गवं रामं मधुराऽक्षरपूर्वकम् ॥ ५॥

niśamyaivaṃ bhārgavoktiṃ dattātreyo dayānidhiḥ |provāca bhārgavaṃ rāmaṃ madhurā'kṣarapūrvakam || 5||

शृणु भार्गव ! यत् पृष्टं नाम्नामष्टोत्तरं शतम् ।श्रीविद्यावर्णरत्नानां निधानमिव संस्थितम् ॥ ६॥

śṛṇu bhārgava ! yat pṛṣṭaṃ nāmnāmaṣṭottaraṃ śatam |śrīvidyāvarṇaratnānāṃ nidhānamiva saṃsthitam || 6||

श्रीदेव्या बहुधा सन्ति नामानि शृणु भार्गव ।सहस्रशतसङ्ख्यानि पुराणेष्वागमेषु च ॥ ७॥

śrīdevyā bahudhā santi nāmāni śṛṇu bhārgava |sahasraśatasaṅkhyāni purāṇeṣvāgameṣu ca || 7||

तेषु सारतमं ह्येतत्सौभाग्याऽष्टोत्तराऽऽत्मकम् ।यदुवाच शिवः पूर्वं भवान्यै बहुधाऽर्थितः ॥ ८॥

teṣu sāratamaṃ hyetatsaubhāgyā'ṣṭottarā''tmakam |yaduvāca śivaḥ pūrvaṃ bhavānyai bahudhā'rthitaḥ || 8||

सौभाग्याऽष्टोत्तरशतनामस्तोत्रस्य भार्गव ।ऋषिरुक्तः शिवश्छन्दोऽनुष्टुप् श्रीललिताऽम्बिका ॥ ९॥

saubhāgyā'ṣṭottaraśatanāmastotrasya bhārgava |ṛṣiruktaḥ śivaśchando'nuṣṭup śrīlalitā'mbikā || 9||

देवता विन्यसेत्कूटत्रयेणाऽऽवर्त्य सर्वतः ।ध्यात्वा सम्पूज्य मनसा स्तोत्रमेतदुदीरयेत् ॥ १०॥

devatā vinyasetkūṭatrayeṇā''vartya sarvataḥ |dhyātvā sampūjya manasā stotrametadudīrayet || 10||

॥ त्रिपुराम्बिकायै नमः ॥ॐ कामेश्वरी कामशक्तिः कामसौभाग्यदायिनी।कामरूपा कामकला कामिनी कमलाऽऽसना ॥ ११॥

|| tripurāmbikāyai namaḥ ||oṃ kāmeśvarī kāmaśaktiḥ kāmasaubhāgyadāyinī|kāmarūpā kāmakalā kāminī kamalā''sanā || 11||

कमला कल्पनाहीना कमनीयकलावती ।कमला भारतीसेव्या कल्पिताऽशेषसंसृतिः ॥ १२॥

kamalā kalpanāhīnā kamanīyakalāvatī |kamalā bhāratīsevyā kalpitā'śeṣasaṃsṛtiḥ || 12||

अनुत्तराऽनघाऽनन्ताऽद्भुतरूपाऽनलोद्भवा ।अतिलोकचरित्राऽतिसुन्दर्यतिशुभप्रदा ॥ १३॥

anuttarā'naghā'nantā'dbhutarūpā'nalodbhavā |atilokacaritrā'tisundaryatiśubhapradā || 13||

अघहन्त्र्यतिविस्ताराऽर्चनतुष्टाऽमितप्रभा ।एकरूपैकवीरैकनाथैकान्ताऽर्चनप्रिया ॥ १४॥

aghahantryativistārā'rcanatuṣṭā'mitaprabhā |ekarūpaikavīraikanāthaikāntā'rcanapriyā || 14||

एकैकभावतुष्टैकरसैकान्तजनप्रिया ।एधमानप्रभावैधद्भक्तपातकनाशिनी ॥ १५॥

ekaikabhāvatuṣṭaikarasaikāntajanapriyā |edhamānaprabhāvaidhadbhaktapātakanāśinī || 15||

एलामोदमुखैनोऽद्रिशक्रायुधसमस्थितिः ।ईहाशून्येप्सितेशादिसेव्येशानवराङ्गना ॥ १६॥

elāmodamukhaino'driśakrāyudhasamasthitiḥ |īhāśūnyepsiteśādisevyeśānavarāṅganā || 16||

ईश्वराऽऽज्ञापिकेकारभाव्येप्सितफलप्रदा ।ईशानेतिहरेक्षेषदरुणाक्षीश्वरेश्वरी ॥ १७॥

īśvarā''jñāpikekārabhāvyepsitaphalapradā |īśānetiharekṣeṣadaruṇākṣīśvareśvarī || 17||

ललिता ललनारूपा लयहीना लसत्तनुः ।लयसर्वा लयक्षोणिर्लयकर्णी लयात्मिका ॥ १८॥

lalitā lalanārūpā layahīnā lasattanuḥ |layasarvā layakṣoṇirlayakarṇī layātmikā || 18||

लघिमा लघुमध्याऽऽढ्या ललमाना लघुद्रुता ।हयाऽऽरूढा हताऽमित्रा हरकान्ता हरिस्तुता ॥ १९॥

laghimā laghumadhyā''ḍhyā lalamānā laghudrutā |hayā''rūḍhā hatā'mitrā harakāntā haristutā || 19||

हयग्रीवेष्टदा हालाप्रिया हर्षसमुद्धता ।हर्षणा हल्लकाभाङ्गी हस्त्यन्तैश्वर्यदायिनी ॥ २०॥

hayagrīveṣṭadā hālāpriyā harṣasamuddhatā |harṣaṇā hallakābhāṅgī hastyantaiśvaryadāyinī || 20||

हलहस्ताऽर्चितपदा हविर्दानप्रसादिनी ।रामरामाऽर्चिता राज्ञी रम्या रवमयी रतिः ॥ २१॥

halahastā'rcitapadā havirdānaprasādinī |rāmarāmā'rcitā rājñī ramyā ravamayī ratiḥ || 21||

रक्षिणीरमणीराका रमणीमण्डलप्रिया ।रक्षिताऽखिललोकेशा रक्षोगणनिषूदिनी ॥ २२॥

rakṣiṇīramaṇīrākā ramaṇīmaṇḍalapriyā |rakṣitā'khilalokeśā rakṣogaṇaniṣūdinī || 22||

अम्बान्तकारिण्यम्भोजप्रियाऽन्तकभयङ्करी ।अम्बुरूपाऽम्बुजकराऽम्बुजजातवरप्रदा ॥ २३॥

ambāntakāriṇyambhojapriyā'ntakabhayaṅkarī |amburūpā'mbujakarā'mbujajātavarapradā || 23||

अन्तःपूजाप्रियाऽन्तःस्वरूपिण्यन्तर्वचोमयी ।अन्तकाऽरातिवामाङ्कस्थिताऽन्तःसुखरूपिणी ॥ २४॥

antaḥpūjāpriyā'ntaḥsvarūpiṇyantarvacomayī |antakā'rātivāmāṅkasthitā'ntaḥsukharūpiṇī || 24||

सर्वज्ञा सर्वगा सारा समा समसुखा सती ।सन्ततिः सन्तता सोमा सर्वा साङ्ख्या सनातनी ॥ २५॥

sarvajñā sarvagā sārā samā samasukhā satī |santatiḥ santatā somā sarvā sāṅkhyā sanātanī || 25||

॥ फलश्रुतिः॥एतत्ते कथितं राम नाम्नामष्टोत्तरं शतम् ।अतिगोप्यमिदं नाम्नः सर्वतः सारमुद्धृतम् ॥ २६॥

|| phalaśrutiḥ||etatte kathitaṃ rāma nāmnāmaṣṭottaraṃ śatam |atigopyamidaṃ nāmnaḥ sarvataḥ sāramuddhṛtam || 26||

एतस्य सदृशं स्तोत्रं त्रिषु लोकेषु दुर्लभम् ।अप्राकश्यमभक्तानां पुरतो देवताद्विषाम् ॥ २७॥

etasya sadṛśaṃ stotraṃ triṣu lokeṣu durlabham |aprākaśyamabhaktānāṃ purato devatādviṣām || 27||

एतत् सदाशिवो नित्यं पठन्त्यन्ये हरादयः ।एतत्प्रभावात्कन्दर्पस्त्रैलोक्यं जयति क्षणात् ॥ २८॥

etat sadāśivo nityaṃ paṭhantyanye harādayaḥ |etatprabhāvātkandarpastrailokyaṃ jayati kṣaṇāt || 28||

सौभाग्याऽष्टोत्तरशतनामस्तोत्रं मनोहरम् ।यस्त्रिसन्ध्यं पठेन्नित्यं न तस्य भुवि दुर्लभम् ॥ २९॥

saubhāgyā'ṣṭottaraśatanāmastotraṃ manoharam |yastrisandhyaṃ paṭhennityaṃ na tasya bhuvi durlabham || 29||

श्रीविद्योपासनवतामेतदावश्यकं मतम् ।सकृदेतत्प्रपठतां नाऽन्यत्कर्म विलुप्यते ॥ ३०॥

śrīvidyopāsanavatāmetadāvaśyakaṃ matam |sakṛdetatprapaṭhatāṃ nā'nyatkarma vilupyate || 30||

अपठित्वा स्तोत्रमिदं नित्यं नैमित्तिकं कृतम् ।व्यर्थीभवति नग्नेन कृतं कर्म यथा तथा ॥ ३१॥

apaṭhitvā stotramidaṃ nityaṃ naimittikaṃ kṛtam |vyarthībhavati nagnena kṛtaṃ karma yathā tathā || 31||

सहस्रनामपाठादावशक्तस्त्वेतदीरयेत् ।सहस्रनामपाठस्य फलं शतगुणं भवेत् ॥ ३२॥

sahasranāmapāṭhādāvaśaktastvetadīrayet |sahasranāmapāṭhasya phalaṃ śataguṇaṃ bhavet || 32||

सहस्रधा पठित्वा तु वीक्षणान्नाशयेद्रिपून् ।करवीररक्तपुष्पैर्हुत्वा लोकान् वशं नयेत् ॥ ३३॥

sahasradhā paṭhitvā tu vīkṣaṇānnāśayedripūn |karavīraraktapuṣpairhutvā lokān vaśaṃ nayet || 33||

स्तम्भेयत् श्वेतकुसुमैर्नीलैरुच्चाटयेद्रिपून् ।मरिचैर्विद्वेषेणाय लवङ्गैर्व्याधिनाशने ॥ ३४॥

stambheyat śvetakusumairnīlairuccāṭayedripūn |maricairvidveṣeṇāya lavaṅgairvyādhināśane || 34||

सुवासिनीर्ब्राह्मणान् वा भोजयेद्यस्तु नामभिः ।यश्च पुष्पैः फलैर्वापि पूजयेत् प्रतिनामभिः ॥ ३५॥

suvāsinīrbrāhmaṇān vā bhojayedyastu nāmabhiḥ |yaśca puṣpaiḥ phalairvāpi pūjayet pratināmabhiḥ || 35||

चक्रराजेऽथवाऽन्यत्र स वसेच्छ्रीपुरे चिरम् ।यः सदा वर्तयन्नास्ते नामाऽष्टशतमुत्तमम् ॥ ३६॥

cakrarāje'thavā'nyatra sa vasecchrīpure ciram |yaḥ sadā vartayannāste nāmā'ṣṭaśatamuttamam || 36||

तस्य श्रीललिता राज्ञी प्रसन्ना वाञ्छितप्रदा॥

tasya śrīlalitā rājñī prasannā vāñchitapradā||