तोताद्रिनाथमङ्गलाशासनम् Shri Totadrinatha Mangalashasanam

श्रीः ।श्रीमते रामानुजाय नमः ।श्रीमद् वरवर मुनये नमः ।श्रीमद् वानमहाचल गुरुभ्यो नमः ।अथ श्रीतोताद्रिनाथमङ्गलाशासनम् ।विष्णुचित्त मुनीन्द्रस्य विमलाङ्घ्रियुगे नतिम् ।विधाय देवदेवस्य विदधे मङ्गलावळिम् ॥ १॥

śrīḥ |śrīmate rāmānujāya namaḥ |śrīmad varavara munaye namaḥ |śrīmad vānamahācala gurubhyo namaḥ |atha śrītotādrināthamaṅgalāśāsanam |viṣṇucitta munīndrasya vimalāṅghriyuge natim |vidhāya devadevasya vidadhe maṅgalāvaḷim || 1||

श्रीदेवि भूमिसेव्याय दिनकृच्चन्द्रभासिने ।देवीयुग्मोपवीज्याय देवदेवाय मङ्गलम् ॥ २॥

śrīdevi bhūmisevyāya dinakṛccandrabhāsine |devīyugmopavījyāya devadevāya maṅgalam || 2||

मार्कण्डेयेन भृगुणा सेनान्या च गरुत्मता ।वन्द्याय सततं वानमहाशैलाय मङ्गलम् ॥ ३॥

mārkaṇḍeyena bhṛguṇā senānyā ca garutmatā |vandyāya satataṃ vānamahāśailāya maṅgalam || 3||

शेषतल्पपनिषण्णाय शेषभूतखिलात्मने ।शेषिताश्रितदोषाय शेषिणे मम मङ्गलम् ॥ ४॥

śeṣatalpapaniṣaṇṇāya śeṣabhūtakhilātmane |śeṣitāśritadoṣāya śeṣiṇe mama maṅgalam || 4||

श्रीवैकुण्ठविमानाग्र्ये श्रीपङ्काब्जसरस्तटे ।स्वयं व्यक्ताय मेदिन्यां सुरनाथाय मङ्गलम् ॥ ५॥

śrīvaikuṇṭhavimānāgrye śrīpaṅkābjasarastaṭe |svayaṃ vyaktāya medinyāṃ suranāthāya maṅgalam || 5||

प्रयोगचक्रहस्ताय प्रणताभयदायिने ।प्रसन्नवदनाब्जाय प्रफुल्लाक्षाय मङ्गलम् ॥ ६॥

prayogacakrahastāya praṇatābhayadāyine |prasannavadanābjāya praphullākṣāya maṅgalam || 6||

अङ्कविन्यस्तसव्यश्री हस्तेनाश्रयणोन्मुखान् ।आरोपयितुमुत्सङ्गं आदृतायेव मङ्गलम् ॥ ७॥

aṅkavinyastasavyaśrī hastenāśrayaṇonmukhān |āropayitumutsaṅgaṃ ādṛtāyeva maṅgalam || 7||

प्रीतिपुष्करिणीरूप लक्ष्मीकौस्तुभवक्षसे ।प्रलम्बकुण्डलानृष्ट वनमालाय मङ्गलम् ॥ ८॥

prītipuṣkariṇīrūpa lakṣmīkaustubhavakṣase |pralambakuṇḍalānṛṣṭa vanamālāya maṅgalam || 8||

प्रकाशाय प्रथमतः प्रियरोमशयोगिनः ।प्रमग्नोद्धरणाद् भूमेः प्रियकाराय मङ्गलम् ॥ ९॥

prakāśāya prathamataḥ priyaromaśayoginaḥ |pramagnoddharaṇād bhūmeḥ priyakārāya maṅgalam || 9||

नैमिशारण्यवासानां व्रतिनां प्रीतिहेतवे ।भौमदेवसुतार्तिघ्ने भव्यरूपाय मङ्गलम् ॥ १०॥

naimiśāraṇyavāsānāṃ vratināṃ prītihetave |bhaumadevasutārtighne bhavyarūpāya maṅgalam || 10||

पङ्कपद्मसरस्नातां सङ्कल्पफलयिष्णवे ।किङ्करीकृतलोकाय पङ्कजाक्षाय मङ्गलम् ॥ ११॥

paṅkapadmasarasnātāṃ saṅkalpaphalayiṣṇave |kiṅkarīkṛtalokāya paṅkajākṣāya maṅgalam || 11||

वैनतेयानुरोधेन वैखानसमुनिं गुरुम् ।नियुज्य निजपूजायां नित्यहृष्टाय मङ्गलम् ॥ १२॥

vainateyānurodhena vaikhānasamuniṃ gurum |niyujya nijapūjāyāṃ nityahṛṣṭāya maṅgalam || 12||

गुणशीलस्य राजर्षेः शुनो रूपेण शोचतः ।विनोदिताग्रयशापाय व्योमाद्रीशाय मङ्गलम् ॥ १३॥

guṇaśīlasya rājarṣeḥ śuno rūpeṇa śocataḥ |vinoditāgrayaśāpāya vyomādrīśāya maṅgalam || 13||

पद्मतीर्थतटीतप्यत् पद्मापाणिगृहीतये ।पद्मजन्मप्रगीताय पद्मनाभाय मङ्गलम् ॥ १४॥

padmatīrthataṭītapyat padmāpāṇigṛhītaye |padmajanmapragītāya padmanābhāya maṅgalam || 14||

शठकोपशरण्याय सर्वदेवान्तरात्मने ।सहस्रगीतिसाराय सुपर्वेशाय मङ्गलम् ॥ १५॥

śaṭhakopaśaraṇyāya sarvadevāntarātmane |sahasragītisārāya suparveśāya maṅgalam || 15||

वानाद्रियोगिना नित्यं वरमङ्कारमामुदे ।ननोपचारसेव्याय मानातीताय मङ्गलम् ॥ १६॥

vānādriyoginā nityaṃ varamaṅkāramāmude |nanopacārasevyāya mānātītāya maṅgalam || 16||

सर्वोत्सवसमाजेषु शताधिकसुवैष्णवैः ।चतुस्सहश्रीगाधाभिः शम्स्यमानाय मङ्गलम् ॥ १७॥

sarvotsavasamājeṣu śatādhikasuvaiṣṇavaiḥ |catussahaśrīgādhābhiḥ śamsyamānāya maṅgalam || 17||

फाल्गुनोत्तरफल्गुन्योश्चैत्रे चाहनि रौहिणे ।तीर्थान्तादि महद्वन्द्व सेवनीयाय मङ्गलम् ॥ १८॥

phālgunottaraphalgunyoścaitre cāhani rauhiṇe |tīrthāntādi mahadvandva sevanīyāya maṅgalam || 18||

भट्टनाथयतीन्द्रेण भक्तिभावितगोरथे ।भव्यदेन्दिरया साकं भासमानाय मङ्गलम् ॥ १९॥

bhaṭṭanāthayatīndreṇa bhaktibhāvitagorathe |bhavyadendirayā sākaṃ bhāsamānāya maṅgalam || 19||

स्वर्णशैलसमानाभे पुण्यकोटिविमानके ।कलिजिद्योगिन्सङ्कॢप्ते कान्ताहृष्टाय मङ्गलम् ॥ २०॥

svarṇaśailasamānābhe puṇyakoṭivimānake |kalijidyoginsaṅkḷpte kāntāhṛṣṭāya maṅgalam || 20||

सहकारवनाभोगे सह देव्या विहारिणे ।वसन्तऋतुयात्रायां वानाद्रीशाय मङ्गलम् ॥ २१॥

sahakāravanābhoge saha devyā vihāriṇe |vasantaṛtuyātrāyāṃ vānādrīśāya maṅgalam || 21||

व्याख्यातोभयवेदान्ते वानाचलमठे मुदा ।वैष्णवाराधनान्नित्यं वर्धमानाय मङ्गलम् ॥ २२॥

vyākhyātobhayavedānte vānācalamaṭhe mudā |vaiṣṇavārādhanānnityaṃ vardhamānāya maṅgalam || 22||

श्रीभूमिगोदादेवीभिः साकं श्रिवरमङ्कया ।दिव्यसिम्हासनस्थाय देवनाथाय मङ्गलम् ॥ २३॥

śrībhūmigodādevībhiḥ sākaṃ śrivaramaṅkayā |divyasimhāsanasthāya devanāthāya maṅgalam || 23||

तोदाद्रिनाथसान्निध्ये गोपालार्यनिवेदितम् ।मङ्गलं पठितॄणां श्रीवरमङ्का प्रसीदतु ॥ २४॥

todādrināthasānnidhye gopālāryaniveditam |maṅgalaṃ paṭhitṝṇāṃ śrīvaramaṅkā prasīdatu || 24||

॥ इति श्रीगोपाल अय्य्ंगारविरचितं तोदाद्रिनाथमङ्गलाशासनं सम्पूर्णम् ॥

|| iti śrīgopāla ayyṃgāraviracitaṃ todādrināthamaṅgalāśāsanaṃ sampūrṇam ||