अनन्तपद्मनाभमङ्गलस्तोत्रम् Shri Anantapadmanabha Mangala Stotram

श्रियःकान्ताय कल्याणनिधये निधयेऽर्थिनाम् ।श्री शेषशायिनेऽनन्तपद्मनाभाय मङ्गलम् ॥ १॥

śriyaḥkāntāya kalyāṇanidhaye nidhaye'rthinām |śrī śeṣaśāyine'nantapadmanābhāya maṅgalam || 1||

स्यानन्दूरपुरीभाग्यभव्यरूपाय विष्णवे ।आनन्दसिन्धवेऽनन्तपद्मनाभाय मङ्गलम् ॥ २॥

syānandūrapurībhāgyabhavyarūpāya viṣṇave |ānandasindhave'nantapadmanābhāya maṅgalam || 2||

हेमकूटविमानान्तः भ्राजमानाय हारिणे ।हरिलक्ष्मीसमेताय पद्मनाभाय मङ्गलम् ॥ ३॥

hemakūṭavimānāntaḥ bhrājamānāya hāriṇe |harilakṣmīsametāya padmanābhāya maṅgalam || 3||

श्रीवैकुण्ठविरक्ताय शङ्खतीर्थाम्बुधेः तटे ।रमया रममाणाय पद्मनाभाय मङ्गलम् ॥ ४॥

śrīvaikuṇṭhaviraktāya śaṅkhatīrthāmbudheḥ taṭe |ramayā ramamāṇāya padmanābhāya maṅgalam || 4||

अशेष चिदचिद्वस्तुशेषिणे शेषशायिने ।अशेषदायिनेऽनन्तपद्मनाभाय मङ्गलम् ॥ ५॥

aśeṣa cidacidvastuśeṣiṇe śeṣaśāyine |aśeṣadāyine'nantapadmanābhāya maṅgalam || 5||

यत्पदं परमं सेव्यं सदा पश्यन्ति सूरयः ।सेनापतिमुखास्तस्मै पद्मनाभाय मङ्गलम् ॥ ६॥

yatpadaṃ paramaṃ sevyaṃ sadā paśyanti sūrayaḥ |senāpatimukhāstasmai padmanābhāya maṅgalam || 6||

चुतुर्मुखेश्वरमुखैः पुत्रपौत्रादिशालिने ।समस्तपरिवाराय पद्मनाभाय मङ्गलम् ॥ ७॥

cuturmukheśvaramukhaiḥ putrapautrādiśāline |samastaparivārāya padmanābhāya maṅgalam || 7||

दिवाकरयतीशानयोगिहृत्पद्मभानवे ।परस्मै ब्रह्मणेऽनन्तपद्मनाभाय मङ्गलम् ॥ ८॥

divākarayatīśānayogihṛtpadmabhānave |parasmai brahmaṇe'nantapadmanābhāya maṅgalam || 8||

पराङ्कुशप्रबन्धोक्तिप्रथिताय परमात्मने ।पूर्णाय महतेऽनन्तपद्मनाभाय मङ्गलम् ॥ ९॥

parāṅkuśaprabandhoktiprathitāya paramātmane |pūrṇāya mahate'nantapadmanābhāya maṅgalam || 9||

वञ्चिभूपशिरोरत्नरश्मिनीराजिताङ्घ्रये ।वाञ्छिताखिलदायास्तु पद्मनाभाय मङ्गलम् ॥ १०॥

vañcibhūpaśiroratnaraśminīrājitāṅghraye |vāñchitākhiladāyāstu padmanābhāya maṅgalam || 10||

सर्वावयवसौन्दर्य सौवर्णसुषमा जुषे ।सदा सम्मोहनायास्तु पद्मनाभाय मङ्गलम् ॥ ११॥

sarvāvayavasaundarya sauvarṇasuṣamā juṣe |sadā sammohanāyāstu padmanābhāya maṅgalam || 11||

योगेश्वराय कृष्णाय नरसिंहाय योगिने ।योगमुद्राभिरामाय पद्मनाभाय मङ्गलम् ॥ १२॥

yogeśvarāya kṛṣṇāya narasiṃhāya yogine |yogamudrābhirāmāya padmanābhāya maṅgalam || 12||

अनन्तपुरनाथाय निरन्तरदयामुचे ।अनन्तपद्मनाभाय नित्यश्रीः नित्यमङ्गलम् ॥ १३॥

anantapuranāthāya nirantaradayāmuce |anantapadmanābhāya nityaśrīḥ nityamaṅgalam || 13||

इति श्रीअनन्तपद्मनाभमङ्गलस्तोत्रं सम्पूर्णम् ।

iti śrīanantapadmanābhamaṅgalastotraṃ sampūrṇam |