षोडशायुधस्तोत्रम् Shodashayudhastotram

वेदान्तदेशिकविरचितम् ।(श्रीसुदर्शनदेवस्य करस्थायुधस्तुतिः)स्वसङ्कल्पकलाकल्पैरायुधैरायुधेश्वरः ।जुष्टः षोडशभिर्दिव्यैर्जुषतां वः परः पुमान् ॥ १॥

vedāntadeśikaviracitam |(śrīsudarśanadevasya karasthāyudhastutiḥ)svasaṅkalpakalākalpairāyudhairāyudheśvaraḥ |juṣṭaḥ ṣoḍaśabhirdivyairjuṣatāṃ vaḥ paraḥ pumān || 1||

यदायत्तं जगच्चक्रं कालचक्रं च शाश्वतम् ।पातु वस्त्वपरं चक्रं चक्ररूपस्य चक्रिणः ॥ २॥

yadāyattaṃ jagaccakraṃ kālacakraṃ ca śāśvatam |pātu vastvaparaṃ cakraṃ cakrarūpasya cakriṇaḥ || 2||

यत्प्रसूतिशतैरासन् द्रुमाः परशुलाञ्छिताः ।स दिव्यो हेतिराजस्य परशुः परिपातु वः ॥ ३॥

yatprasūtiśatairāsan drumāḥ paraśulāñchitāḥ |sa divyo hetirājasya paraśuḥ paripātu vaḥ || 3||

हेलया हेतिराजेन यस्मिन् दैत्याः समुद्धृते ।शकुन्ता इव धावन्ति स कुन्तः पालयेत वः ॥ ४॥

helayā hetirājena yasmin daityāḥ samuddhṛte |śakuntā iva dhāvanti sa kuntaḥ pālayeta vaḥ || 4||

दैत्यदानवमुख्यानां दण्ड्यानां येन दण्डनम् ।हेतिदण्डेश दण्डोऽसौ भवतां दण्डयेद्।ह्विषः ॥ ५॥

daityadānavamukhyānāṃ daṇḍyānāṃ yena daṇḍanam |hetidaṇḍeśa daṇḍo'sau bhavatāṃ daṇḍayed|hviṣaḥ || 5||

अनन्यान्वयभक्तानां रुन्धन्नाशामतङ्गजान् ।अनङ्कुशविहारो वः पातु हेतीश्वराङ्कुशः ॥ ६॥

ananyānvayabhaktānāṃ rundhannāśāmataṅgajān |anaṅkuśavihāro vaḥ pātu hetīśvarāṅkuśaḥ || 6||

सम्भूय शलभायन्ते यत्र पापानि देहिनाम् ।स पातु शतवक्त्राग्निहेतिर्हेतीश्वरस्य वः ॥ ७॥

sambhūya śalabhāyante yatra pāpāni dehinām |sa pātu śatavaktrāgnihetirhetīśvarasya vaḥ || 7||

अविद्यां स्वप्रकाशेन विद्यारूपश्छिनत्ति यः ।स सुदर्शननिस्त्रिंशः सौतु वस्तत्त्वदर्शनम् ॥ ८॥

avidyāṃ svaprakāśena vidyārūpaśchinatti yaḥ |sa sudarśananistriṃśaḥ sautu vastattvadarśanam || 8||

क्रियाशक्तिगुणो विष्णोर्यो भवत्यतिशक्तिमान् ।अकुण्ठशक्तिः सा शक्तिरशक्तिं वारयेत वः ॥ ९॥

kriyāśaktiguṇo viṣṇoryo bhavatyatiśaktimān |akuṇṭhaśaktiḥ sā śaktiraśaktiṃ vārayeta vaḥ || 9||

तारत्वं यस्य संस्थाने शब्दे च परिदृश्यते ।प्रभोः प्रहरणेन्द्रस्य पाञ्चजन्यः स पातु वः ॥ १०॥

tāratvaṃ yasya saṃsthāne śabde ca paridṛśyate |prabhoḥ praharaṇendrasya pāñcajanyaḥ sa pātu vaḥ || 10||

यं सात्त्विकमहङ्कारमामनन्त्यक्षसायकम् ।अव्याद्वश्चक्ररूपस्य तद्धनुः शार्ङ्गिधन्वनः ॥ ११॥

yaṃ sāttvikamahaṅkāramāmanantyakṣasāyakam |avyādvaścakrarūpasya taddhanuḥ śārṅgidhanvanaḥ || 11||

आयुधेन्द्रेण येनैव विश्वसर्गो विविच्यते ।स वः सौदर्शनः कुर्यात्पाशः पाशविमोचनम् ॥ १२॥

āyudhendreṇa yenaiva viśvasargo vivicyate |sa vaḥ saudarśanaḥ kuryātpāśaḥ pāśavimocanam || 12||

विहारो येन देवस्य विश्वक्षेत्रकृषीवलः ।व्यज्यते तेन सारेण नासीरविजयोऽस्तु वः ॥ १३॥

vihāro yena devasya viśvakṣetrakṛṣīvalaḥ |vyajyate tena sāreṇa nāsīravijayo'stu vaḥ || 13||

आयुधानामहं वज्रं इत्यगीयत यः स वः ।अव्याद्धेतीश वज्रोऽसावदधीच्यस्थिसम्भवः ॥ १४॥

āyudhānāmahaṃ vajraṃ ityagīyata yaḥ sa vaḥ |avyāddhetīśa vajro'sāvadadhīcyasthisambhavaḥ || 14||

विश्वसंहृतिशक्तिर्या विश्रुता बुद्धिरूपिणी ।सा वः सौदर्शनी भूयाद्गदप्रशमिनी गदा ॥ १५॥

viśvasaṃhṛtiśaktiryā viśrutā buddhirūpiṇī |sā vaḥ saudarśanī bhūyādgadapraśaminī gadā || 15||

यात्यतिक्षोदशालित्वं मुसलो येन तेन वः ।हेतीश मुसलेनाशु भिद्यतां मोहमौसलम् ॥ १६॥

yātyatikṣodaśālitvaṃ musalo yena tena vaḥ |hetīśa musalenāśu bhidyatāṃ mohamausalam || 16||

शूलिदृष्टमनोर्वाच्यो येन शूलयति द्विषः ।भवतां तेन भवतात्त्रिशूलेन विशूलता ॥ १७॥

śūlidṛṣṭamanorvācyo yena śūlayati dviṣaḥ |bhavatāṃ tena bhavatāttriśūlena viśūlatā || 17||

अस्त्रग्रामस्य कृत्स्नस्य प्रसूतिं यं प्रचक्षते ।सोऽव्यात्सुदर्शनो विश्वमायुधैः षोडशायुधः ॥ १८॥

astragrāmasya kṛtsnasya prasūtiṃ yaṃ pracakṣate |so'vyātsudarśano viśvamāyudhaiḥ ṣoḍaśāyudhaḥ || 18||

श्रीमद्वेङ्कटनाथेन श्रेयसे भूयसे सताम् ।कृतेयमायुधेन्द्रस्य षोडशायुधसंस्तुतिः ॥ १९॥

śrīmadveṅkaṭanāthena śreyase bhūyase satām |kṛteyamāyudhendrasya ṣoḍaśāyudhasaṃstutiḥ || 19||

इति वेदान्तदेशिकविरचितं षोडशायुधस्तोत्रं सम्पूर्णम् ।

iti vedāntadeśikaviracitaṃ ṣoḍaśāyudhastotraṃ sampūrṇam |