भगवत्स्तोत्रम् (भागवतमहापुराणान्तर्गतं शिवकृतम्) Shivakritam Bhagavatstotram or Rudrakritam Vishnustotram

श्रीगणेशाय नमः ।शिव उवाच । (रुद्र उवाच ।)जितं त आत्मविद्धुर्य स्वस्तये स्वस्तिरस्तु मे ।भवता राधसा राद्धे सर्वस्मा आत्मने नमः ॥ १॥

śrīgaṇeśāya namaḥ |śiva uvāca | (rudra uvāca |)jitaṃ ta ātmaviddhurya svastaye svastirastu me |bhavatā rādhasā rāddhe sarvasmā ātmane namaḥ || 1||

अमः पङ्क्रजनाभाय भूतसूक्ष्मेन्द्रियात्मने ।वासुदेवाय शान्ताय कूटस्थाय स्वरोचिषे ॥ २॥

amaḥ paṅkrajanābhāya bhūtasūkṣmendriyātmane |vāsudevāya śāntāya kūṭasthāya svarociṣe || 2||

सङ्कर्षणाय सूक्ष्माय दुरन्तायान्तकाय च ।नमो विश्वप्रबोधाय प्रद्युम्नायान्तरात्मने ॥ ३॥

saṅkarṣaṇāya sūkṣmāya durantāyāntakāya ca |namo viśvaprabodhāya pradyumnāyāntarātmane || 3||

नमो नमोऽनिरुद्धाय हृषीकेशेन्द्रियात्भने ।नमः परमहंसाय पूर्णाय निभृतात्मने ॥ ४॥

namo namo'niruddhāya hṛṣīkeśendriyātbhane |namaḥ paramahaṃsāya pūrṇāya nibhṛtātmane || 4||

स्वर्गापवर्गद्वाराय नित्यं शुचिपदे नमः ।नमो हिरण्यवीर्याय चातुर्होत्राय तन्तवे ॥ ५॥

svargāpavargadvārāya nityaṃ śucipade namaḥ |namo hiraṇyavīryāya cāturhotrāya tantave || 5||

नम ऊर्जैषेत्रय्याःपतये यज्ञरेतसे ।तृप्तिदाय च जीवानां नमः सर्वरसात्मने ॥ ६॥

nama ūrjaiṣetrayyāḥpataye yajñaretase |tṛptidāya ca jīvānāṃ namaḥ sarvarasātmane || 6||

सर्वसत्वात्मदेहाय विशेषाय स्थवीयसे ।नभस्त्रैंलोक्यपालाय सहओजोबलाय च ॥ ७॥

sarvasatvātmadehāya viśeṣāya sthavīyase |nabhastraiṃlokyapālāya sahaojobalāya ca || 7||

अर्थलिङ्गाय नभसे नमोऽन्तर्बहिरात्मने ।नमः पुण्याय लोकाय अमुष्मै भूरिवर्चसे ॥ ८॥

arthaliṅgāya nabhase namo'ntarbahirātmane |namaḥ puṇyāya lokāya amuṣmai bhūrivarcase || 8||

प्रवृत्ताय निवृत्ताय पितृदेवाय कर्मणे ।नमो धर्मविपाकाय मृत्यवे दुःखदाय च ॥ ९॥

pravṛttāya nivṛttāya pitṛdevāya karmaṇe |namo dharmavipākāya mṛtyave duḥkhadāya ca || 9||

नमस्त आशिषामीश मनवे कारणात्मने ।नमो धर्माय बृहते कृष्णायाकुण्ठमेधसे ।पुरुषाय पुराणाय साङ्ख्ययोगेश्वराय च ॥ १०॥

namasta āśiṣāmīśa manave kāraṇātmane |namo dharmāya bṛhate kṛṣṇāyākuṇṭhamedhase |puruṣāya purāṇāya sāṅkhyayogeśvarāya ca || 10||

शक्तित्रयसमेताय मीढुषेऽहङ्कृतात्भने ।चेताकूतिरूपाय मनोवाचोविभूतये ॥ ११॥

śaktitrayasametāya mīḍhuṣe'haṅkṛtātbhane |cetākūtirūpāya manovācovibhūtaye || 11||

दर्शनं नो दिदृक्षूणां देहि भागवतार्चितम् ।रूपं प्रियतमं स्वानां सर्वेन्द्रियगुणाञ्जनम् ॥ १२॥

darśanaṃ no didṛkṣūṇāṃ dehi bhāgavatārcitam |rūpaṃ priyatamaṃ svānāṃ sarvendriyaguṇāñjanam || 12||

स्निग्धप्रावृड्घनश्यामं सर्वसौन्दर्यसङ्ग्रहम् ।चार्वायतचतुर्बाहुं सुजातरुचिराननम् ॥ १३॥

snigdhaprāvṛḍghanaśyāmaṃ sarvasaundaryasaṅgraham |cārvāyatacaturbāhuṃ sujātarucirānanam || 13||

पद्मकाशपलाशाक्षं सुन्दरभ्रु सुनासिकम् ।सुद्विजं सूकपोलास्यं समकर्णविभूषणम् ॥ १४॥

padmakāśapalāśākṣaṃ sundarabhru sunāsikam |sudvijaṃ sūkapolāsyaṃ samakarṇavibhūṣaṇam || 14||

प्रीतिप्रहसितापाङ्गमलकैरुपशोभितम् ।लसत्पङ्कजकिञ्जल्कदुकूलं मृष्टकुण्डलम् ॥ १५॥

prītiprahasitāpāṅgamalakairupaśobhitam |lasatpaṅkajakiñjalkadukūlaṃ mṛṣṭakuṇḍalam || 15||

स्फुरत्किरीटवलयहारनूपुरमेखलम् ।शङ्खचक्रगदापद्ममालामण्युत्तमर्धिमत् ॥ १६॥

sphuratkirīṭavalayahāranūpuramekhalam |śaṅkhacakragadāpadmamālāmaṇyuttamardhimat || 16||

सिंहस्कन्धत्विषो बिभ्रत्सौभाग्यग्रीवकौस्तुभम् ।श्रियानपायिन्याक्षिप्तनिकषाश्मोरसोल्लसत् ॥ १७॥

siṃhaskandhatviṣo bibhratsaubhāgyagrīvakaustubham |śriyānapāyinyākṣiptanikaṣāśmorasollasat || 17||

पूररेचकसंविग्नवलिवल्गुदलोदरम् ।प्रतिसङ्क्रामयद्विश्वं नाभ्यावर्तगभीरया ॥ १८॥

pūrarecakasaṃvignavalivalgudalodaram |pratisaṅkrāmayadviśvaṃ nābhyāvartagabhīrayā || 18||

श्यामश्रोण्याधिरोचिष्णु दुकूलस्वर्णमेखलम् ।समचार्वङ्घ्रिजघोरुनिम्नजानुसुदर्शनम् ॥ १९॥

śyāmaśroṇyādhirociṣṇu dukūlasvarṇamekhalam |samacārvaṅghrijaghorunimnajānusudarśanam || 19||

पदा शरत्पद्मपलाशरोचिषा नखद्युभिर्नोऽन्तरधं विधुन्वता ।प्रदर्शय स्वीयमपास्तसाध्वसं पदं गुरो मार्गगुरुस्तमोजुषाम् ॥ २०॥

padā śaratpadmapalāśarociṣā nakhadyubhirno'ntaradhaṃ vidhunvatā |pradarśaya svīyamapāstasādhvasaṃ padaṃ guro mārgagurustamojuṣām || 20||

एतद्रूपमनुध्येयमात्मशुद्धिमभीप्सताम् ।यद्भक्तियोगोऽभयदः स्वधर्ममनुतिष्ठताम् ॥ २१॥

etadrūpamanudhyeyamātmaśuddhimabhīpsatām |yadbhaktiyogo'bhayadaḥ svadharmamanutiṣṭhatām || 21||

भवान् भक्तिमता लभ्यो दुर्लभः सर्वदेहिनाम् ।स्वाराज्यस्याप्यभिमत एकान्तेनात्मविद्गतिः ॥ २२॥

bhavān bhaktimatā labhyo durlabhaḥ sarvadehinām |svārājyasyāpyabhimata ekāntenātmavidgatiḥ || 22||

तं दुराराध्यमाराध्यं सतामपि दुरापया ।एकान्तभक्त्या को वाञ्छेत्पादमूलं विना बहिः ॥ २३॥

taṃ durārādhyamārādhyaṃ satāmapi durāpayā |ekāntabhaktyā ko vāñchetpādamūlaṃ vinā bahiḥ || 23||

यत्र निर्विष्टमरणं कृतान्तो नाभिमन्यते ।विश्वं विध्वंसयन् वीर्यशौर्यविस्फूर्जितभ्रुवा ॥ २४॥

yatra nirviṣṭamaraṇaṃ kṛtānto nābhimanyate |viśvaṃ vidhvaṃsayan vīryaśauryavisphūrjitabhruvā || 24||

क्षणार्धेनापि तुलये न स्वर्गं नापुनर्भवम् ।भगवत्सङ्गिसङ्गस्य मर्त्यानां किमुताशिषः ॥ २५॥

kṣaṇārdhenāpi tulaye na svargaṃ nāpunarbhavam |bhagavatsaṅgisaṅgasya martyānāṃ kimutāśiṣaḥ || 25||

अथानधाङ्घ्रेस्तव कीर्तितीर्थयोरतर्बहिःस्नानविधूपतपाप्मनाम् ।भूतेष्वनुक्रोशसुसत्त्वशालिनां स्यात्सङ्गमोऽनुग्रह एष नस्तव ॥ २६॥

athānadhāṅghrestava kīrtitīrthayoratarbahiḥsnānavidhūpatapāpmanām |bhūteṣvanukrośasusattvaśālināṃ syātsaṅgamo'nugraha eṣa nastava || 26||

न यस्य चित्तं बहिरर्थविभ्रमं तमोगुहायां च विशुद्धमाविशत् ।यद्भक्तियोगानुगृहीतमजसा मुनिर्विचष्टे ननु तत्र ते गतिम् ॥ २७॥

na yasya cittaṃ bahirarthavibhramaṃ tamoguhāyāṃ ca viśuddhamāviśat |yadbhaktiyogānugṛhītamajasā munirvicaṣṭe nanu tatra te gatim || 27||

यत्रेदं व्यज्यते विश्वं विश्वस्मिन्नवभाति यत् ।तत्त्वं ब्रह्म परं ज्योतिराकाशमिव विस्तृतम् ॥ २८॥

yatredaṃ vyajyate viśvaṃ viśvasminnavabhāti yat |tattvaṃ brahma paraṃ jyotirākāśamiva vistṛtam || 28||

यो माययेदं पुरुरूपयाऽसृजद्बिभर्ति भूयः क्षपयत्यविक्रियः ।यद्भेदबुद्धिः स दिवात्मदुःस्थया तमात्मतन्त्रं भगवन् प्रतीमहि ॥ २९॥

yo māyayedaṃ pururūpayā'sṛjadbibharti bhūyaḥ kṣapayatyavikriyaḥ |yadbhedabuddhiḥ sa divātmaduḥsthayā tamātmatantraṃ bhagavan pratīmahi || 29||

क्रियाकलापैरिदमेव योगिनः श्रद्धान्विताः साधु जयन्ति सिद्धये ।भूतेन्द्रियातःकरणोपलक्षितं वेदे च तन्त्रे च त एव कोविदाः ॥ ३०॥

kriyākalāpairidameva yoginaḥ śraddhānvitāḥ sādhu jayanti siddhaye |bhūtendriyātaḥkaraṇopalakṣitaṃ vede ca tantre ca ta eva kovidāḥ || 30||

त्वमेक आद्यः पुरुषः सुप्तशक्तिस्तया रजःसत्त्वतमो विभिद्यते ।महानहं खं मरुदग्निवार्धराः सुरर्षयो भूतगणा इदं यतः ॥ ३१॥

tvameka ādyaḥ puruṣaḥ suptaśaktistayā rajaḥsattvatamo vibhidyate |mahānahaṃ khaṃ marudagnivārdharāḥ surarṣayo bhūtagaṇā idaṃ yataḥ || 31||

सृष्टं स्वशक्त्येदमनुप्रविष्टश्चतुर्विधं पुरमात्मांशकेन ।अथो विदुस्तं पुरुषं सन्तमन्तर्भुक्ते हृषीकैर्मधु सारघं यः ॥ ३२॥

sṛṣṭaṃ svaśaktyedamanupraviṣṭaścaturvidhaṃ puramātmāṃśakena |atho vidustaṃ puruṣaṃ santamantarbhukte hṛṣīkairmadhu sāraghaṃ yaḥ || 32||

स एष लोकानतिचण्डवेगो विकर्षसि त्वं खलु कालयानः ।भूतानि भूतैरनुमेयतत्त्वो घनावलीवायुरिवाविषह्यः ॥ ३३॥

sa eṣa lokānaticaṇḍavego vikarṣasi tvaṃ khalu kālayānaḥ |bhūtāni bhūtairanumeyatattvo ghanāvalīvāyurivāviṣahyaḥ || 33||

प्रमत्तमुच्चैरितिकृत्यचिन्तया प्रवृद्धलोभं विषयेषु लालसम् ।त्वमप्रमत्तः सहसाभिपद्यसे क्षुल्लेलिहानोऽहिरिवाखुमन्तकः ॥ ३४॥

pramattamuccairitikṛtyacintayā pravṛddhalobhaṃ viṣayeṣu lālasam |tvamapramattaḥ sahasābhipadyase kṣullelihāno'hirivākhumantakaḥ || 34||

कस्त्वत्पदाब्जं विजहाति पण्डितो यस्तेऽवमानव्ययमानकेतनः ।विशङ्कयास्मद्गुरुरर्चति स्म यद्विनोपपत्तिं मनवश्चतुर्दश ॥ ३५॥

kastvatpadābjaṃ vijahāti paṇḍito yaste'vamānavyayamānaketanaḥ |viśaṅkayāsmadgururarcati sma yadvinopapattiṃ manavaścaturdaśa || 35||

अथ त्वमसि नो ब्रह्मन् परमात्मन् विपश्चिताम् ।विश्वं रुद्रभयध्वस्तमकुतश्चिद्भया गतिः ॥ ३६,॥इदं जपत भद्रं वो विशुद्धा नृपनन्दनाः ।स्वधर्ममनुतिष्ठन्तो भगवत्यर्पिताशयाः ॥ ३७॥

atha tvamasi no brahman paramātman vipaścitām |viśvaṃ rudrabhayadhvastamakutaścidbhayā gatiḥ || 36,||idaṃ japata bhadraṃ vo viśuddhā nṛpanandanāḥ |svadharmamanutiṣṭhanto bhagavatyarpitāśayāḥ || 37||

तमेवात्मानमात्मस्थं सर्वभूतेष्ववस्थितम् ।पूजयध्वं गृणन्तश्च ध्यायन्तश्चासकृद्धरिम् ॥ ३८॥

tamevātmānamātmasthaṃ sarvabhūteṣvavasthitam |pūjayadhvaṃ gṛṇantaśca dhyāyantaścāsakṛddharim || 38||

इदमाह पुरास्माकं भगवान् विश्वसृक्पतिः ।भृग्वादीनामात्मजानां सिसृक्षुः संसिसृक्षताम् ॥ ३९॥

idamāha purāsmākaṃ bhagavān viśvasṛkpatiḥ |bhṛgvādīnāmātmajānāṃ sisṛkṣuḥ saṃsisṛkṣatām || 39||

ते वयं नोदिताः सर्वे प्रजासर्गे प्रजेश्वराः ।अनेन ध्वस्ततमसः सिसृक्ष्मो विधिधाः प्रजाः ॥ ४०॥

te vayaṃ noditāḥ sarve prajāsarge prajeśvarāḥ |anena dhvastatamasaḥ sisṛkṣmo vidhidhāḥ prajāḥ || 40||

य इमं श्रद्धया युक्तो मद्गीतं भगवत्स्तवम् ।अधीयानो दुराराध्यं हरिमाराधयत्यसौ ॥ ४१॥

ya imaṃ śraddhayā yukto madgītaṃ bhagavatstavam |adhīyāno durārādhyaṃ harimārādhayatyasau || 41||

विन्दते पुरुषोऽमुष्माद्यद्यदिच्छत्यसत्वरम् ।मद्गीतगीतात्सुप्रीताच्छ्रेयसामेकवल्लभात् ॥ ४२॥

vindate puruṣo'muṣmādyadyadicchatyasatvaram |madgītagītātsuprītācchreyasāmekavallabhāt || 42||

इदं यः कल्य उत्थाय प्राञ्जलिः श्रद्धान्वितः ।शृणुयाच्छ्रावयेन्मर्त्यो मुच्यते कर्मबन्धनैः ॥ ४३॥

idaṃ yaḥ kalya utthāya prāñjaliḥ śraddhānvitaḥ |śṛṇuyācchrāvayenmartyo mucyate karmabandhanaiḥ || 43||

इति शिवकृतं भगवत्स्तोत्रं सम्पूर्णम् ॥इति श्रीमद्भागवतमहापुराणे चतुर्थस्कन्धे चतुर्विंशाध्यायान्तर्गतं रुद्रकृतं विष्णुस्तोत्रं समाप्तम् ।भागवतपुराण । अध्याय ४/२४/३३७५॥भागवतपुराण । अध्याय ४/२४/३३-७५॥

iti śivakṛtaṃ bhagavatstotraṃ sampūrṇam ||iti śrīmadbhāgavatamahāpurāṇe caturthaskandhe caturviṃśādhyāyāntargataṃ rudrakṛtaṃ viṣṇustotraṃ samāptam |bhāgavatapurāṇa | adhyāya 4/24/3375||bhāgavatapurāṇa | adhyāya 4/24/33-75||