सहस्रारस्तुतिः Sahasrara Stutih

सहस्रार महाशूर रणधीर गिरा स्तुतिम् ।षट्कोण रिपुहृद्बाण सन्त्राण करवाणि ते ॥ १॥

sahasrāra mahāśūra raṇadhīra girā stutim |ṣaṭkoṇa ripuhṛdbāṇa santrāṇa karavāṇi te || 1||

यस्त्वक्तस्तप्तसुतनुः सोऽत्ति मुक्तिफलं किल ।नातप्ततनुरित्यस्तौत् ख्याता वाक् त्वां महौजस ॥ २॥

yastvaktastaptasutanuḥ so'tti muktiphalaṃ kila |nātaptatanurityastaut khyātā vāk tvāṃ mahaujasa || 2||

हतवक्रद्विषच्चक्र हरिचक्र नमोऽस्तु ते ।प्रकृतिघ्नासतां विघ्न त्वमभग्नपराक्रम ॥ ३॥

hatavakradviṣaccakra haricakra namo'stu te |prakṛtighnāsatāṃ vighna tvamabhagnaparākrama || 3||

कराग्रे भ्रमणं विष्णोर्यदा ते चक्र जायते ।तदा द्विधाऽपि भ्रमणं दृश्यतेऽन्तर्बहिर्द्विषाम् ॥ ४॥

karāgre bhramaṇaṃ viṣṇoryadā te cakra jāyate |tadā dvidhā'pi bhramaṇaṃ dṛśyate'ntarbahirdviṣām || 4||

वरादवध्यदैत्यौघशिरःखण्डनचातुरी ।हरेरायुध ते दृष्टा न दृष्टा या हरायुधे ॥ ५॥

varādavadhyadaityaughaśiraḥkhaṇḍanacāturī |harerāyudha te dṛṣṭā na dṛṣṭā yā harāyudhe || 5||

अवार्यवीर्यस्य हरेः कार्येषु त्वं धुरन्धरः ।असाध्यसाधको राट् ते त्वं चासाध्यस्य साधकः ॥ ६॥

avāryavīryasya hareḥ kāryeṣu tvaṃ dhurandharaḥ |asādhyasādhako rāṭ te tvaṃ cāsādhyasya sādhakaḥ || 6||

ये छिन्नकन्धराश्चक्र दैतेयास्तव धारया ।त एव चित्रमनयंस्तथाऽप्यच्छिन्नकन्धराम् ॥ ७॥

ye chinnakandharāścakra daiteyāstava dhārayā |ta eva citramanayaṃstathā'pyacchinnakandharām || 7||

अरे तवाग्रे नृहरेररिः कोऽपि न जीवति ।नेमे तवाग्रे कामाद्या नेमे जीवन्त्वहो द्विषः ॥ ८॥

are tavāgre nṛharerariḥ ko'pi na jīvati |neme tavāgre kāmādyā neme jīvantvaho dviṣaḥ || 8||

पवित्रपविवत्त्राहि पवित्रीकुरु चाश्रितान् ।चरण श्रीशचरणौ स्थिरीकुरु मनस्सु नः ॥ ९॥

pavitrapavivattrāhi pavitrīkuru cāśritān |caraṇa śrīśacaraṇau sthirīkuru manassu naḥ || 9||

यस्त्वं दुर्वाससः पृष्ठनिष्ठो दृष्टोऽखिलैः सुरैः ।अस्तावयः स्वभर्तारं स त्वं स्तावय मद्गिरा ॥ १०॥

yastvaṃ durvāsasaḥ pṛṣṭhaniṣṭho dṛṣṭo'khilaiḥ suraiḥ |astāvayaḥ svabhartāraṃ sa tvaṃ stāvaya madgirā || 10||

भूस्थदुर्दर्शनं सर्वं धिक्कुरुष्व सुदर्शन ।वायोः सुदर्शनं सर्वस्यायोध्यं कुरु ते नमः ॥ ११॥

bhūsthadurdarśanaṃ sarvaṃ dhikkuruṣva sudarśana |vāyoḥ sudarśanaṃ sarvasyāyodhyaṃ kuru te namaḥ || 11||

सुष्ठ दर्शय लक्ष्मीशतत्वं सूर्यायुतप्रभ ।द्वारं नः कुरु हर्याप्त्यै कृतद्वार तमस्यपि ॥ १२॥

suṣṭha darśaya lakṣmīśatatvaṃ sūryāyutaprabha |dvāraṃ naḥ kuru haryāptyai kṛtadvāra tamasyapi || 12||

पद्यानि निरवद्यानि वादिराजाभिधः सधीः ।द्वादश द्वादशारस्य चक्रस्य स्तुतयेऽकृत ॥ १३॥

padyāni niravadyāni vādirājābhidhaḥ sadhīḥ |dvādaśa dvādaśārasya cakrasya stutaye'kṛta || 13||

इति श्रीमद्वादिराजपूज्यचरणविरचिता सहस्रारस्तुतिः सम्पूर्णा ।भारतीरमणमुख्यप्राणान्तर्गत श्रीकृष्णार्पणमस्तु ।

iti śrīmadvādirājapūjyacaraṇaviracitā sahasrārastutiḥ sampūrṇā |bhāratīramaṇamukhyaprāṇāntargata śrīkṛṣṇārpaṇamastu |