विष्णुस्तोत्रम् (सनन्दनादियोगिभिःकृतं विष्णुपुराणान्तर्गतम् तं तुष्टुवुस्तोषपरीतचेतसो) Sanandanadi Yogibhih Kritam Vishnu Stotram

तं तुष्टुवुस्तोषपरीतचेतसो लोके जने ये निवसन्ति योगिनःसनन्दनाद्या ह्यतिनम्रकन्धरा धराधरं धीरतरोद्धतेक्षणम् ॥ ३०॥

taṃ tuṣṭuvustoṣaparītacetaso loke jane ye nivasanti yoginaḥsanandanādyā hyatinamrakandharā dharādharaṃ dhīrataroddhatekṣaṇam || 30||

सनन्दनाद्या योगिन ऊचुः ।जयेश्वराणां परमेश केशव प्रभो गदाशङ्खधरासिचक्रधृक्प्रसूतिनाशस्थितिहेतुरीश्वरस्त्वमेव नान्यत्परमं च यत्पदम् ॥ ३१॥

sanandanādyā yogina ūcuḥ |jayeśvarāṇāṃ parameśa keśava prabho gadāśaṅkhadharāsicakradhṛkprasūtināśasthitiheturīśvarastvameva nānyatparamaṃ ca yatpadam || 31||

पादेषु वेदास्तव यूपदंष्ट्रा दन्तेषु जज्ञाश्चितयश्च वक्त्रे ।हुताशजिह्वोऽसि तनूरुहाणि दर्भाः प्रभो यज्ञपुमांस्त्वमेव ॥ ३२॥

pādeṣu vedāstava yūpadaṃṣṭrā danteṣu jajñāścitayaśca vaktre |hutāśajihvo'si tanūruhāṇi darbhāḥ prabho yajñapumāṃstvameva || 32||

विलोचने रात्र्यहनी महात्मन्सर्वाश्रयं ब्रह्मपरं शिरस्ते ।सूक्तान्यशेषानि सटाकलापो घ्राणं समस्तानि हवींषि देव ॥ ३३॥

vilocane rātryahanī mahātmansarvāśrayaṃ brahmaparaṃ śiraste |sūktānyaśeṣāni saṭākalāpo ghrāṇaṃ samastāni havīṃṣi deva || 33||

स्रुक्तुण्डसामस्वरधीरनादप्राग्वंशकायाखिलसत्रसन्धे ।पूर्तेष्टधर्मश्रवणोऽसि देव सनातनात्मन्भगवन्प्रसीद ॥ ३४॥

sruktuṇḍasāmasvaradhīranādaprāgvaṃśakāyākhilasatrasandhe |pūrteṣṭadharmaśravaṇo'si deva sanātanātmanbhagavanprasīda || 34||

पदक्रमाक्रान्तभुवं भवन्तमादिस्थितं चाक्षरविश्वमूर्ते ।विश्वस्य विद्मः परमेश्वरोऽसि प्रसीद नाथोऽसि परावरस्य ॥ ३५॥

padakramākrāntabhuvaṃ bhavantamādisthitaṃ cākṣaraviśvamūrte |viśvasya vidmaḥ parameśvaro'si prasīda nātho'si parāvarasya || 35||

दंष्ट्राग्रविन्यस्तमशेषमेतद्भूमण्डलं नाथ विभाव्यते ते ।विगाहतः पद्मवनं विलग्नं सरोजिनीपत्रमिवोढपङ्कम् ॥ ३६॥

daṃṣṭrāgravinyastamaśeṣametadbhūmaṇḍalaṃ nātha vibhāvyate te |vigāhataḥ padmavanaṃ vilagnaṃ sarojinīpatramivoḍhapaṅkam || 36||

द्यावापृथिव्योरतुलप्रभाव यदन्तरं तद्वपुषा तवैव ।व्याप्तं जगद्व्याप्तिसमर्थदीप्ते हिताय विश्वस्य विभो भव त्वम् ॥ ३७॥

dyāvāpṛthivyoratulaprabhāva yadantaraṃ tadvapuṣā tavaiva |vyāptaṃ jagadvyāptisamarthadīpte hitāya viśvasya vibho bhava tvam || 37||

परमार्थस्त्वमेवैको नान्योऽस्ति जगतः पते ।तवैष महिमा येन व्याप्तमेतच्चराचरम् ॥ ३८॥

paramārthastvamevaiko nānyo'sti jagataḥ pate |tavaiṣa mahimā yena vyāptametaccarācaram || 38||

यदेतद्दृश्यते मूर्त्तमेतज्ज्ञानात्मनस्तव ।भ्रान्तिज्ञानेन पश्यन्ति जगद्रूपमयोगिनः ॥ ३९॥

yadetaddṛśyate mūrttametajjñānātmanastava |bhrāntijñānena paśyanti jagadrūpamayoginaḥ || 39||

ज्ञानस्वरूपमखिलं जगदेतदबुद्धयः ।अर्थस्वरूपं पश्यन्तो भ्राम्यन्ते मोहसम्प्लवे ॥ ४०॥

jñānasvarūpamakhilaṃ jagadetadabuddhayaḥ |arthasvarūpaṃ paśyanto bhrāmyante mohasamplave || 40||

ये तु ज्ञानविदः शुद्धचेतसस्तेऽखिलं जगत् ।ज्ञानात्मकं प्रपश्यन्ति त्वद्रूपं परमेश्वर ॥ ४१॥

ye tu jñānavidaḥ śuddhacetasaste'khilaṃ jagat |jñānātmakaṃ prapaśyanti tvadrūpaṃ parameśvara || 41||

प्रसीद सर्व सर्वात्मन्भवाय जगतामिमाम् ।उद्धरोर्वीममेयात्मञ्छन्नो देह्यब्जलोचन ॥ ४२॥

prasīda sarva sarvātmanbhavāya jagatāmimām |uddharorvīmameyātmañchanno dehyabjalocana || 42||

सत्त्वोद्रिक्तोऽसि भगवन् गोविन्द पृथिवीमिमाम् ।समुद्धर भवायेश शन्नो देह्यब्जलोचन ॥ ४३॥

sattvodrikto'si bhagavan govinda pṛthivīmimām |samuddhara bhavāyeśa śanno dehyabjalocana || 43||

सर्गप्रवृत्तिर्भवतो जगतामुपकारिणी ।भवत्वेषा नमस्तेऽस्तु शन्नो देह्यब्जलोचन ॥ ४४॥

sargapravṛttirbhavato jagatāmupakāriṇī |bhavatveṣā namaste'stu śanno dehyabjalocana || 44||

इति विष्णुपुराणे प्रथमभागे चतुर्थाध्यायान्तर्गतंसनन्दनादि योगिभिः कृतं विष्णुस्तोत्रं समाप्तम् ।विष्णुपुराण । अध्याय ४/३०४४॥विष्णुपुराण । अध्याय ४/३०-४४॥

iti viṣṇupurāṇe prathamabhāge caturthādhyāyāntargataṃsanandanādi yogibhiḥ kṛtaṃ viṣṇustotraṃ samāptam |viṣṇupurāṇa | adhyāya 4/3044||viṣṇupurāṇa | adhyāya 4/30-44||