पापप्रशमनस्तोत्रम् Papa Prashamana Stotram

पुलस्त्य उवाचनमेस्तेऽस्तु जगन्नाथ देवदेव नमोऽस्तु ते ।वासुदेव नमस्तेऽस्तु बहुरूप नमोऽस्तु ते ॥ १॥

pulastya uvācanameste'stu jagannātha devadeva namo'stu te |vāsudeva namaste'stu bahurūpa namo'stu te || 1||

एकशृङ्ग नमस्तुभ्यं नमस्तुभ्यं वृषाकपे ।श्रीनिवास नमस्तेऽस्तु नमस्ते भूतभावन ॥ २॥

ekaśṛṅga namastubhyaṃ namastubhyaṃ vṛṣākape |śrīnivāsa namaste'stu namaste bhūtabhāvana || 2||

विष्वक्सेन नमस्तुभ्यं नारायण नमोऽस्तु ते ।ध्रुवध्वज नमस्तेऽस्तु सत्यध्वज नमोऽस्तु ते ॥ ३॥

viṣvaksena namastubhyaṃ nārāyaṇa namo'stu te |dhruvadhvaja namaste'stu satyadhvaja namo'stu te || 3||

यज्ञध्वज नमस्तुभ्यं धर्मध्वज नमोऽस्तु ते ।तालध्वज नमस्तेऽस्तु नमस्ते गरुडध्वज ॥ ४॥

yajñadhvaja namastubhyaṃ dharmadhvaja namo'stu te |tāladhvaja namaste'stu namaste garuḍadhvaja || 4||

वरेण्य विष्णो वैकुण्ठ नमस्ते पुरुषोत्तम ।नमो जयन्त विजय जयानन्तापराजित ॥ ५॥

vareṇya viṣṇo vaikuṇṭha namaste puruṣottama |namo jayanta vijaya jayānantāparājita || 5||

कृतावर्त महावर्त महादेव नमोऽस्तु ते ।अनाद्याद्यन्तमध्यान्त नमस्ते पद्मजाप्रिय ॥ ६॥

kṛtāvarta mahāvarta mahādeva namo'stu te |anādyādyantamadhyānta namaste padmajāpriya || 6||

पुरञ्जय नमस्तुभ्यं शत्रुञ्जय नमोऽस्तु ते ।शुभञ्जय नमस्तेऽस्तु नमस्तेऽस्तु धनञ्जय ॥ ७॥

purañjaya namastubhyaṃ śatruñjaya namo'stu te |śubhañjaya namaste'stu namaste'stu dhanañjaya || 7||

सृष्टिगर्भ नमस्तुभ्यं शुचिश्रवः पृथुश्रवः ।नमो हिरण्यगर्भाय पद्मगर्भाय ते नमः ॥ ८॥

sṛṣṭigarbha namastubhyaṃ śuciśravaḥ pṛthuśravaḥ |namo hiraṇyagarbhāya padmagarbhāya te namaḥ || 8||

नमः कमलनेत्राय कालनेत्राय ते नमः ।कालनाभ नमस्तुभ्यं महानाभ नमो नमः ॥ ९॥

namaḥ kamalanetrāya kālanetrāya te namaḥ |kālanābha namastubhyaṃ mahānābha namo namaḥ || 9||

वृष्टिमूल महामूल मूलावास नमोऽस्तु ते ।धर्मावास जलावास श्रीनिवास नमोऽस्तु ते ॥ १०॥

vṛṣṭimūla mahāmūla mūlāvāsa namo'stu te |dharmāvāsa jalāvāsa śrīnivāsa namo'stu te || 10||

धर्माध्यक्ष प्रजाध्यक्ष लोकाध्यक्ष नमो नमः ।सेनाध्यक्ष नमस्तुभयं कालाध्यक्ष नमोऽस्तु ते ॥ ११॥

dharmādhyakṣa prajādhyakṣa lokādhyakṣa namo namaḥ |senādhyakṣa namastubhayaṃ kālādhyakṣa namo'stu te || 11||

गदाधर श्रुतिधर चक्रधारिन् श्रियोधर ।वनमालाधर हरे नमस्ते धरणीधर ॥ १२॥

gadādhara śrutidhara cakradhārin śriyodhara |vanamālādhara hare namaste dharaṇīdhara || 12||

आर्चिषेण महासेन नमस्तेऽस्तु पुरुष्टुत ।बहुकल्प महाकल्प नमस्ते कल्पनामुख ॥ १३॥

ārciṣeṇa mahāsena namaste'stu puruṣṭuta |bahukalpa mahākalpa namaste kalpanāmukha || 13||

सर्वात्मन् सर्वग विभो विरिञ्चे श्वेत केशव ।नील रक्त महानील अनिरुद्ध नमोऽस्तु ते ॥ १४॥

sarvātman sarvaga vibho viriñce śveta keśava |nīla rakta mahānīla aniruddha namo'stu te || 14||

द्वादशात्मक कालात्मन् सामात्मन् परमात्मक ।व्योमकात्मक सुब्रह्मन् भूतात्मक नमोऽस्तु ते ॥ १५॥

dvādaśātmaka kālātman sāmātman paramātmaka |vyomakātmaka subrahman bhūtātmaka namo'stu te || 15||

हरिकेश महाकेश गुडाकेश नमोऽस्तु ते ।मुञ्जकेश हृषीकेश सर्वनाथ नमोऽस्तु ते ॥ १६॥

harikeśa mahākeśa guḍākeśa namo'stu te |muñjakeśa hṛṣīkeśa sarvanātha namo'stu te || 16||

सूक्ष्म स्थूल महास्थूल महासूक्ष्म शुभङ्कर ।श्वेतपीताम्बरधर नीलवास नमोऽस्तु ते ॥ १७॥

sūkṣma sthūla mahāsthūla mahāsūkṣma śubhaṅkara |śvetapītāmbaradhara nīlavāsa namo'stu te || 17||

कुशेशय नमस्तेऽस्तु पद्मेशय जलेशय ।गोविन्दप्रीतिकर्ता च हंस पीताम्बरप्रिय ॥ १८॥

kuśeśaya namaste'stu padmeśaya jaleśaya |govindaprītikartā ca haṃsa pītāmbarapriya || 18||

अधोक्षज नमस्तुभ्यं सीरध्वज जनार्दन ।वामनाय नमस्तेऽस्तु नमस्ते मधुसूदन ॥ १९॥

adhokṣaja namastubhyaṃ sīradhvaja janārdana |vāmanāya namaste'stu namaste madhusūdana || 19||

सहस्रशीर्षाय नमो ब्रह्मशीर्षाय ते नमः ।नमः सहस्रनेत्राय सोमसूर्यानलेक्षण ॥ २०॥

sahasraśīrṣāya namo brahmaśīrṣāya te namaḥ |namaḥ sahasranetrāya somasūryānalekṣaṇa || 20||

नमश्चाऽथर्वशिरसे महाशीर्षाय ते नमः ।नमस्ते धर्मनेत्राय महानेत्राय ते नमः ॥ २१॥

namaścā'tharvaśirase mahāśīrṣāya te namaḥ |namaste dharmanetrāya mahānetrāya te namaḥ || 21||

नमः सहस्रपादाय सहस्रभुज मन्यवे ।नमो यज्ञवराहाय महारूपाय ते नमः ॥ २२॥

namaḥ sahasrapādāya sahasrabhuja manyave |namo yajñavarāhāya mahārūpāya te namaḥ || 22||

नमस्ते विश्वदेवाय विश्वात्मन् विश्वसम्भव ।विश्वरूप नमस्तेऽस्तु त्वत्तो विश्वमभूदिदम् ॥ २३॥

namaste viśvadevāya viśvātman viśvasambhava |viśvarūpa namaste'stu tvatto viśvamabhūdidam || 23||

न्यग्रोधस्त्वं महाशाखस्त्वं मूलकुसुमार्चितः ।स्कन्धपत्राङ्कुरलतापल्लवाय नमोऽस्तु ते ॥ २४॥

nyagrodhastvaṃ mahāśākhastvaṃ mūlakusumārcitaḥ |skandhapatrāṅkuralatāpallavāya namo'stu te || 24||

मूलं ते ब्राह्मणा ब्रह्मन् स्कन्धस्ते क्षत्रियाः प्रभो ।वैश्याः शाखा दलं शूद्रा वनस्पते नमोऽस्तु ते ॥ २५॥

mūlaṃ te brāhmaṇā brahman skandhaste kṣatriyāḥ prabho |vaiśyāḥ śākhā dalaṃ śūdrā vanaspate namo'stu te || 25||

ब्राह्मणाः साऽग्नयो वक्त्राः दोर्दण्डाः सायुधा नृपाः ।पार्श्वाद्विशश्चोरुयुगाज्जाताः शूद्राश्च पादतः ॥ २६॥

brāhmaṇāḥ sā'gnayo vaktrāḥ dordaṇḍāḥ sāyudhā nṛpāḥ |pārśvādviśaścoruyugājjātāḥ śūdrāśca pādataḥ || 26||

नेत्राद्भानुरभूत्तुभ्यं पद्भ्यां भूः श्रोत्रयोर्दिशः ।नाभ्या ह्यभूदन्तरिक्षं शशाङ्को मनसस्तव ॥ २७॥

netrādbhānurabhūttubhyaṃ padbhyāṃ bhūḥ śrotrayordiśaḥ |nābhyā hyabhūdantarikṣaṃ śaśāṅko manasastava || 27||

प्राणाद्वायुः समभवत्कामाद्ब्रह्मा पितामहः ।क्रोधात्त्रिनयनो रुद्रः शीर्ष्णोर्द्यौः समवर्तत ॥ २८॥

prāṇādvāyuḥ samabhavatkāmādbrahmā pitāmahaḥ |krodhāttrinayano rudraḥ śīrṣṇordyauḥ samavartata || 28||

इन्द्राग्नी वदनात्तुभ्यं पशवो मलसम्भवाः ।ओषध्यो रोमसम्भूता विराजस्त्वं नमोऽस्तु ते ॥ २९॥

indrāgnī vadanāttubhyaṃ paśavo malasambhavāḥ |oṣadhyo romasambhūtā virājastvaṃ namo'stu te || 29||

पुष्पहास नमस्तेऽस्तु महाहास नमोऽस्तु ते ।ओङ्कारस्त्वं वषट्कारो वौषट्त्वं च स्वधा सुधा ॥ ३०॥

puṣpahāsa namaste'stu mahāhāsa namo'stu te |oṅkārastvaṃ vaṣaṭkāro vauṣaṭtvaṃ ca svadhā sudhā || 30||

स्वाहाकार नमस्तुभ्यं हन्तकार नमोऽस्तु ते ।सर्वाकार निराकार वेदाकार नमोऽस्तु ते ॥ ३१॥

svāhākāra namastubhyaṃ hantakāra namo'stu te |sarvākāra nirākāra vedākāra namo'stu te || 31||

त्वं हि वेदमयो देवः सर्वदेवमयस्तथा ।सर्वतीर्थमयश्चैव सर्वयज्ञमयस्तथा ॥ ३२॥

tvaṃ hi vedamayo devaḥ sarvadevamayastathā |sarvatīrthamayaścaiva sarvayajñamayastathā || 32||

नमस्ते यज्ञपुरुष यज्ञभागभुजे नमः ।नमः सहस्रधाराय शतधाराय ते नमः ॥ ३३॥

namaste yajñapuruṣa yajñabhāgabhuje namaḥ |namaḥ sahasradhārāya śatadhārāya te namaḥ || 33||

भूर्भुवः स्वः स्वरूपाय गोदायामृतदायिने ।सुवर्णब्रह्मदात्रे च सर्वदात्रे च ते नमः ॥ ३४॥

bhūrbhuvaḥ svaḥ svarūpāya godāyāmṛtadāyine |suvarṇabrahmadātre ca sarvadātre ca te namaḥ || 34||

ब्रह्मेशाय नमस्तुभ्यं ब्रह्मादे ब्रह्मरूपधृक् ।परब्रह्म नमस्तेऽस्तु शब्दब्रह्म नमोऽस्तु ते ॥ ३५॥

brahmeśāya namastubhyaṃ brahmāde brahmarūpadhṛk |parabrahma namaste'stu śabdabrahma namo'stu te || 35||

विद्यास्त्वं वेद्यरूपस्त्वं वेदनीयस्त्वमेव च ।बुद्धिस्त्वमपि बोध्यश्च बोधस्त्वं च नमोऽस्तु ते ॥ ३६॥

vidyāstvaṃ vedyarūpastvaṃ vedanīyastvameva ca |buddhistvamapi bodhyaśca bodhastvaṃ ca namo'stu te || 36||

होता होमश्च हव्यं च हूयमानश्च हव्यवाट् ।पाता पोता च पूतश्च पावनीयश्च ॐ नमः ॥ ३७॥

hotā homaśca havyaṃ ca hūyamānaśca havyavāṭ |pātā potā ca pūtaśca pāvanīyaśca oṃ namaḥ || 37||

हन्ता च हन्यमानश्च ह्रियमाणस्त्वमेव च ।हर्त्ता नेता च नीतिश्च पूज्योऽग्र्यो विश्वधार्यसि ॥ ३८॥

hantā ca hanyamānaśca hriyamāṇastvameva ca |harttā netā ca nītiśca pūjyo'gryo viśvadhāryasi || 38||

स्रुक्स्रुवौ परधामासि कपालोलूखलोऽरणिः ।यज्ञपात्रारणेयस्त्वं एकधा बहुधा त्रिधा ॥ ३९॥

sruksruvau paradhāmāsi kapālolūkhalo'raṇiḥ |yajñapātrāraṇeyastvaṃ ekadhā bahudhā tridhā || 39||

यज्ञस्त्वं यजमानस्त्वं ईड्यस्त्वमसि याजकः ।ज्ञाता ज्ञेयस्तथा ज्ञानं ध्येयो ध्याताऽसि चेश्वरः ॥ ४०॥

yajñastvaṃ yajamānastvaṃ īḍyastvamasi yājakaḥ |jñātā jñeyastathā jñānaṃ dhyeyo dhyātā'si ceśvaraḥ || 40||

ध्यानयोगश्च योगी च गतिर्मोक्षो धृतिः सुखम् ।योगाङ्गानि त्वमीशानः सर्वगस्त्वं नमोऽस्तु ते ॥ ४१॥

dhyānayogaśca yogī ca gatirmokṣo dhṛtiḥ sukham |yogāṅgāni tvamīśānaḥ sarvagastvaṃ namo'stu te || 41||

ब्रह्मा होता तथोद्गाता साम यूपोऽथ दक्षिणा ।दीक्षा त्वं त्वं पुरोडाशस्त्वं पशुः पशुवाह्यसि ॥ ४२॥

brahmā hotā tathodgātā sāma yūpo'tha dakṣiṇā |dīkṣā tvaṃ tvaṃ puroḍāśastvaṃ paśuḥ paśuvāhyasi || 42||

गुह्यो धाता च परमः शिवो नारायणस्तथा ।महाजनो निरयनः सहस्राऽर्केन्दुरूपवान् ॥ ४३॥

guhyo dhātā ca paramaḥ śivo nārāyaṇastathā |mahājano nirayanaḥ sahasrā'rkendurūpavān || 43||

द्वादशारोऽथ षण्णाभिस्त्रिव्यूहो द्वियुगस्तथा ।कालचक्रो भवानीशो नमस्ते पुरुषोत्तम ॥ ४४॥

dvādaśāro'tha ṣaṇṇābhistrivyūho dviyugastathā |kālacakro bhavānīśo namaste puruṣottama || 44||

पराक्रमो विक्रमस्त्वं हयग्रीवो हरीश्वरः ।नरेश्वरोऽथ व्रह्मेशः सूर्येशस्त्वं नमोऽस्तु ते ॥ ४५॥

parākramo vikramastvaṃ hayagrīvo harīśvaraḥ |nareśvaro'tha vrahmeśaḥ sūryeśastvaṃ namo'stu te || 45||

अश्ववक्त्रो महामेधाः शम्भुः शुक्रः प्रभञ्जनः ।मित्रावरुणमूर्तिस्त्वममूर्तिरनघः परः ॥ ४६॥

aśvavaktro mahāmedhāḥ śambhuḥ śukraḥ prabhañjanaḥ |mitrāvaruṇamūrtistvamamūrtiranaghaḥ paraḥ || 46||

प्राग्वंशकायो भूतादिर्महाभूतोऽच्युतो द्विजः ।त्वमूर्ध्वकर्त्ता ऊर्ध्वश्च ऊर्ध्वरेता नमोऽस्तु ते ॥ ४७॥

prāgvaṃśakāyo bhūtādirmahābhūto'cyuto dvijaḥ |tvamūrdhvakarttā ūrdhvaśca ūrdhvaretā namo'stu te || 47||

महापातकहा त्वं च उपपातकहा तथा ।अनीशः सर्वपापेभ्यस्त्वामहं शरणं गतः ॥ ४८॥

mahāpātakahā tvaṃ ca upapātakahā tathā |anīśaḥ sarvapāpebhyastvāmahaṃ śaraṇaṃ gataḥ || 48||

फलश्रुतिः ।इत्येतत्परमं स्तोत्रं सर्वपापप्रमोचनम् ।महेश्वरेण कथितं वाराणस्यां पुरा मुने ॥ ४९॥

phalaśrutiḥ |ityetatparamaṃ stotraṃ sarvapāpapramocanam |maheśvareṇa kathitaṃ vārāṇasyāṃ purā mune || 49||

केशवस्याग्रतो गत्वा स्नात्वा तीर्थे सितोदके ।उपशान्तस्तथा जातो रुद्रः पापवशात्ततः ॥ ५०॥

keśavasyāgrato gatvā snātvā tīrthe sitodake |upaśāntastathā jāto rudraḥ pāpavaśāttataḥ || 50||

एतत्पवित्रं त्रिपुरघ्नभाषितं पठन्नरो विष्णुपरो महर्षे ।विमुक्तपापो ह्युपशान्तमूर्तिः सम्पूज्यते देववरैः प्रसिद्धैः ॥ ५१॥

etatpavitraṃ tripuraghnabhāṣitaṃ paṭhannaro viṣṇuparo maharṣe |vimuktapāpo hyupaśāntamūrtiḥ sampūjyate devavaraiḥ prasiddhaiḥ || 51||

॥ इति श्रीवामनमहापूराणे पापप्रशमनस्तोत्रं सम्पूर्णम् ॥वामनपुराण । अध्याय ८७/१५१॥वामनपुराण । अध्याय ८७/१-५१॥

|| iti śrīvāmanamahāpūrāṇe pāpapraśamanastotraṃ sampūrṇam ||vāmanapurāṇa | adhyāya 87/151||vāmanapurāṇa | adhyāya 87/1-51||