हयग्रीवस्तुतिः Hayagriva Stutih

लसदास्य हयग्रीव लसदोष्ठद्वयारुण ।लसद्दन्तावलीशोभ हयग्रीव लसत्स्मित ॥ १॥

lasadāsya hayagrīva lasadoṣṭhadvayāruṇa |lasaddantāvalīśobha hayagrīva lasatsmita || 1||

लसत्फाल हयग्रीव लसत्कुन्तलमस्तक ।लसत्कर्ण हयग्रीव लसन्नयनपङ्कज ॥ २॥

lasatphāla hayagrīva lasatkuntalamastaka |lasatkarṇa hayagrīva lasannayanapaṅkaja || 2||

लसद्वीक्ष हयग्रीव लसद्भ्रूमण्डलद्वय ।लसद्ग्रीव हयग्रीव लसद्धस्त लसद्भुज ॥ ३॥

lasadvīkṣa hayagrīva lasadbhrūmaṇḍaladvaya |lasadgrīva hayagrīva lasaddhasta lasadbhuja || 3||

लसत्पार्श्व लसत्पृष्ठ कक्षांसयुग सुन्दर ।हयग्रीव लसद्वक्षःस्तनमध्य वलित्रय ॥ ४॥

lasatpārśva lasatpṛṣṭha kakṣāṃsayuga sundara |hayagrīva lasadvakṣaḥstanamadhya valitraya || 4||

हयग्रीव लसत्कुक्षे लसद्रोमलताञ्चित ।हयग्रीव लसन्नाभे लसत्कटियुगान्तर ॥ ५॥

hayagrīva lasatkukṣe lasadromalatāñcita |hayagrīva lasannābhe lasatkaṭiyugāntara || 5||

लसदूरो हयग्रीव लसज्जानुयुगप्रभ ।हयग्रीव लसज्जाङ्घायुग्म पादाम्बुजद्वय ॥ ६॥

lasadūro hayagrīva lasajjānuyugaprabha |hayagrīva lasajjāṅghāyugma pādāmbujadvaya || 6||

हयग्रीव लसत्पादतलरेखारुणद्युते ।लसन्नखाङ्गुलीशोभ हयग्रीवातिसुन्दर ॥ ७॥

hayagrīva lasatpādatalarekhāruṇadyute |lasannakhāṅgulīśobha hayagrīvātisundara || 7||

लसत्किरीटकेयूरकङ्कणाङ्गदकुण्डल ।हयग्रीव लसद्रत्नहारकौस्तुभमण्डन ॥ ८॥

lasatkirīṭakeyūrakaṅkaṇāṅgadakuṇḍala |hayagrīva lasadratnahārakaustubhamaṇḍana || 8||

हयग्रीव लसन्मध्य लसच्चन्दनचर्चित ।लसद्रत्नमयाकल्प श्रीवत्सकृतभूषण ॥ ९॥

hayagrīva lasanmadhya lasaccandanacarcita |lasadratnamayākalpa śrīvatsakṛtabhūṣaṇa || 9||

हयग्रीव लसत्काञ्चीरत्नकिङ्किणिमेखल ।हयग्रीव लसद्वस्त्र मणिनूपुरमण्डित ॥ १०॥

hayagrīva lasatkāñcīratnakiṅkiṇimekhala |hayagrīva lasadvastra maṇinūpuramaṇḍita || 10||

हयग्रीवेन्दुबिम्बस्थ लसच्छङ्खाक्षपुस्तक ।लसन्मुद्र हयग्रीव लसदिन्दुसमद्युते ॥ ११॥

hayagrīvendubimbastha lasacchaṅkhākṣapustaka |lasanmudra hayagrīva lasadindusamadyute || 11||

हयग्रीव रमाहस्तरत्नकुम्भसृतामृत ।हयग्रीव समानश्रीचतूरूपोप्रसेवित ॥ १२॥

hayagrīva ramāhastaratnakumbhasṛtāmṛta |hayagrīva samānaśrīcatūrūpoprasevita || 12||

हयग्रीव सुरश्रेष्ठ हयग्रीव सुरप्रिय ।हयग्रीव सुराराध्य जय शिष्टजयेष्टद ॥ १३॥

hayagrīva suraśreṣṭha hayagrīva surapriya |hayagrīva surārādhya jaya śiṣṭajayeṣṭada || 13||

हयग्रीव महावीर्य हयग्रीव महाबल ।हयग्रीव महाधैर्य जय दुष्टविनष्टिद ॥ १४॥

hayagrīva mahāvīrya hayagrīva mahābala |hayagrīva mahādhairya jaya duṣṭavinaṣṭida || 14||

भयं मृत्युं क्षयं व्यर्थव्ययं नानामयं च मे ।हरे संहर दैत्यारे हरे नरहरे यथा ॥ १५॥

bhayaṃ mṛtyuṃ kṣayaṃ vyarthavyayaṃ nānāmayaṃ ca me |hare saṃhara daityāre hare narahare yathā || 15||

भक्तिं शक्तिं विरक्तिं च भक्तिं मुक्तिं च युक्तिद ।हरे मे देहि दैत्यारे हरे नरहरे यथा ॥ १६॥

bhaktiṃ śaktiṃ viraktiṃ ca bhaktiṃ muktiṃ ca yuktida |hare me dehi daityāre hare narahare yathā || 16||

सदा सर्वेष्टलाभाय सर्वानिष्टनिवृत्तये ।हयग्रीवस्तुतिः पाठ्या वादिराजयतीरिता ॥ १७॥

sadā sarveṣṭalābhāya sarvāniṣṭanivṛttaye |hayagrīvastutiḥ pāṭhyā vādirājayatīritā || 17||

चिन्तामणिर्हयग्रीवो वशे यस्य निषेवितः ।सोऽपि सर्वार्थदो नॄणां किमुतासौ हयाननः ॥ १८॥

cintāmaṇirhayagrīvo vaśe yasya niṣevitaḥ |so'pi sarvārthado nṝṇāṃ kimutāsau hayānanaḥ || 18||

इति श्रीमद्वादिराजपूज्यचरणविरचिताहयग्रीवस्तुतिः सम्पूर्णा ।भारतीरमणमुख्यप्राणान्तर्गत श्रीकृष्णार्पणमस्तु ।

iti śrīmadvādirājapūjyacaraṇaviracitāhayagrīvastutiḥ sampūrṇā |bhāratīramaṇamukhyaprāṇāntargata śrīkṛṣṇārpaṇamastu |