गोपालस्तुतिः Gopalastutih

श्रीगणेशाय नमः ॥गोधूलिधूसरतनो करुणैकपात्र नारायणाभयद गोपजनाभिराम ।गोगोपिकानयनरञ्जनवंशपाणे वेदान्तवेद्य मम देहि करावलम्बम् ॥ १॥

śrīgaṇeśāya namaḥ ||godhūlidhūsaratano karuṇaikapātra nārāyaṇābhayada gopajanābhirāma |gogopikānayanarañjanavaṃśapāṇe vedāntavedya mama dehi karāvalambam || 1||

आभीरदारमुखपङ्कजसौरभोत्थमाध्वीसुधादनपटो नवनीतचोर ।गोपाङ्गनाङ्गपरिरम्भणजातहास वेदान्तवेद्य मम देहि करावलम्बम् ॥ २॥

ābhīradāramukhapaṅkajasaurabhotthamādhvīsudhādanapaṭo navanītacora |gopāṅganāṅgaparirambhaṇajātahāsa vedāntavedya mama dehi karāvalambam || 2||

गोवर्द्धनोद्धरणखेदभवोदविन्दुसंसिक्तसुन्दरमुखाब्जदयार्द्रदृष्टे ।लावण्यधाम सुरवन्दितपादपद्म वेदान्तवेद्य मम देहि करावलम्बम् ॥ ३॥

govarddhanoddharaṇakhedabhavodavindusaṃsiktasundaramukhābjadayārdradṛṣṭe |lāvaṇyadhāma suravanditapādapadma vedāntavedya mama dehi karāvalambam || 3||

सूर्यात्मजातटसमुद्भवनीपवृक्षशाखाधिरोहजनितद्विगुणाङ्गकान्ते ।वंशीरवेण धवलीतिकृताभिशब्द वेदान्तवेद्य मम देहि करावलम्बम् ॥ ४॥

sūryātmajātaṭasamudbhavanīpavṛkṣaśākhādhirohajanitadviguṇāṅgakānte |vaṃśīraveṇa dhavalītikṛtābhiśabda vedāntavedya mama dehi karāvalambam || 4||

सव्येन पाणिकमलेन विधाय भक्ष्यमास्वादयन्तमपरेण विलोलनेत्र ।त्वां देवताश्च मुनयः प्रविलोकयन्ति वेदान्तवेद्य मम देहि करावलम्बम् ॥ ५॥

savyena pāṇikamalena vidhāya bhakṣyamāsvādayantamapareṇa vilolanetra |tvāṃ devatāśca munayaḥ pravilokayanti vedāntavedya mama dehi karāvalambam || 5||

लक्ष्मीपते तरुणवारिजपत्रनेत्र पीताम्बरार्जुनसख स्मरसुन्दराङ्ग ।नारायणाच्युत जनार्दन चक्रपाणे वेदान्तवेद्य मम देहि करावलम्बम् ॥ ६॥

lakṣmīpate taruṇavārijapatranetra pītāmbarārjunasakha smarasundarāṅga |nārāyaṇācyuta janārdana cakrapāṇe vedāntavedya mama dehi karāvalambam || 6||

ब्रह्मेन्द्ररुद्रमरुदश्विसहस्ररश्मिनाराधिपान्तककुबेरविशालदक्ष ।मारीचकश्यपसनातनवन्दिताङ्घ्रे वेदान्तवेद्य मम देहि करावलम्बम् ॥ ७॥

brahmendrarudramarudaśvisahasraraśminārādhipāntakakuberaviśāladakṣa |mārīcakaśyapasanātanavanditāṅghre vedāntavedya mama dehi karāvalambam || 7||

नमः पद्मनाभारविन्दाक्ष विष्णो नमस्ते हृषीकेश जिष्णो नमस्ते ।नमो वासुदेवाखिलाधार भूमन्नमस्ते सुराधीश ते विश्वरूप ॥ ८॥

namaḥ padmanābhāravindākṣa viṣṇo namaste hṛṣīkeśa jiṣṇo namaste |namo vāsudevākhilādhāra bhūmannamaste surādhīśa te viśvarūpa || 8||

नमः कैटभारे मुरारे खरारे नमो दानवारे नमो रावणारे ।नमः कंसविध्वंसनारिष्टशत्रो नमो धेनुकारे नमः पूतनारे ॥ ९॥

namaḥ kaiṭabhāre murāre kharāre namo dānavāre namo rāvaṇāre |namaḥ kaṃsavidhvaṃsanāriṣṭaśatro namo dhenukāre namaḥ pūtanāre || 9||

नमः शङ्खपाणे नमश्चक्रपाणे नमः शार्ङ्गपाणे नमः पद्मपाणे ।नमो वेदरूपाय तुभ्यं पराय नमो यज्ञभोक्त्रे नमस्तेऽगुणाय ॥ १०॥

namaḥ śaṅkhapāṇe namaścakrapāṇe namaḥ śārṅgapāṇe namaḥ padmapāṇe |namo vedarūpāya tubhyaṃ parāya namo yajñabhoktre namaste'guṇāya || 10||

अजा रुद्रधाताऽऽदिदेवाः स्वरूपं परं नाभिजानन्ति मायामयेशम् ।यजन्तीह नित्यं ततः स्थूलरूपं प्रसीदाशु मे दीनबन्धो रमेश ॥ ११॥

ajā rudradhātā''didevāḥ svarūpaṃ paraṃ nābhijānanti māyāmayeśam |yajantīha nityaṃ tataḥ sthūlarūpaṃ prasīdāśu me dīnabandho rameśa || 11||

संसारपाशदृढबन्धनिपीडितस्य मोहान्धकारभयकूपनिपातितस्य ।कामाभिलाषविविधोरगदंशितस्य दीनस्य मे कुरु दयां करुणैकपात्र ॥ १२॥

saṃsārapāśadṛḍhabandhanipīḍitasya mohāndhakārabhayakūpanipātitasya |kāmābhilāṣavividhoragadaṃśitasya dīnasya me kuru dayāṃ karuṇaikapātra || 12||

आर्तो मत्सदृशो नान्यस्त्वत्तो नान्यः कृपाकरः ।अनन्यगतिकं नाथ कथं मां समुपेक्षसे ॥ १३॥

ārto matsadṛśo nānyastvatto nānyaḥ kṛpākaraḥ |ananyagatikaṃ nātha kathaṃ māṃ samupekṣase || 13||

आकर्णयाशु कृपणस्य कृपावचांसिलब्धोऽसि नाथ बहुभिः किल जन्मसङ्गः ।अद्य प्रभो यदि दयां कुरुषे न मे त्वंत्वत्तः परं कथय कं शरणं श्रयामि ॥ १४॥

ākarṇayāśu kṛpaṇasya kṛpāvacāṃsilabdho'si nātha bahubhiḥ kila janmasaṅgaḥ |adya prabho yadi dayāṃ kuruṣe na me tvaṃtvattaḥ paraṃ kathaya kaṃ śaraṇaṃ śrayāmi || 14||

श्रीयादवेन्द्र करुणार्णव विश्वरूपलक्ष्मीनिवास सुरवन्दितपादपद्म ।त्वामागतोऽस्मि शरणं सकलत्रपुत्रोयद्रोचते भगवते कुरु तन्नमस्ते ॥ १५॥

śrīyādavendra karuṇārṇava viśvarūpalakṣmīnivāsa suravanditapādapadma |tvāmāgato'smi śaraṇaṃ sakalatraputroyadrocate bhagavate kuru tannamaste || 15||

इति गोपालस्तुतिः सम्पूर्णा ।

iti gopālastutiḥ sampūrṇā |