विष्णुस्तोत्रम् ब्रह्मवादीराज्ञाकृतं Brahmavadi Rajna Kritam Vishnu Stotram

(ब्रह्मवादी) राजोवाच ।क्षराक्षरं क्षीरसमुद्रशायिनंक्षितीधरं मूर्तिमतां परं पदम् ।अतीन्द्रियं विश्वभुजां पुरः कृतंनिराकृतं स्तौमि जनार्दनं प्रभुम् ॥ ३१॥

(brahmavādī) rājovāca |kṣarākṣaraṃ kṣīrasamudraśāyinaṃkṣitīdharaṃ mūrtimatāṃ paraṃ padam |atīndriyaṃ viśvabhujāṃ puraḥ kṛtaṃnirākṛtaṃ staumi janārdanaṃ prabhum || 31||

त्वमादिदेवः परमार्थरूपी विभुः पुराणः पुरुषोत्तमश्च ।अतीन्द्रियो वेदविदां प्रधानः प्रपाहि मां शङ्खगदास्त्रपाणे ॥ ३२॥

tvamādidevaḥ paramārtharūpī vibhuḥ purāṇaḥ puruṣottamaśca |atīndriyo vedavidāṃ pradhānaḥ prapāhi māṃ śaṅkhagadāstrapāṇe || 32||

कृतं त्वया देव सुरासुराणां सङ्कीर्त्यतेऽसौ च अनन्तमूर्ते ।सृष्ट्यर्थमेतत्तव देव विष्णो न चेष्टितं कूटगतस्य तत्स्यात् ॥ ३३॥

kṛtaṃ tvayā deva surāsurāṇāṃ saṅkīrtyate'sau ca anantamūrte |sṛṣṭyarthametattava deva viṣṇo na ceṣṭitaṃ kūṭagatasya tatsyāt || 33||

तथैव कूर्मत्वमृगत्वमुच्चैस्त्वया कृतं रूपमनेकरूप ।सर्वज्ञभावादसकृच्च जन्म सङ्कीर्त्त्यते तेऽच्युत नैतदस्ति ॥ ३४॥

tathaiva kūrmatvamṛgatvamuccaistvayā kṛtaṃ rūpamanekarūpa |sarvajñabhāvādasakṛcca janma saṅkīrttyate te'cyuta naitadasti || 34||

नृसिंह नमो वामन जमदग्निनाम दशास्यगोत्रान्तक वासुदेव ।नमोऽस्तु ते बुद्ध कल्किन् खगेश शम्भो नमस्ते विबुधारिनाशन ॥ ३५॥

nṛsiṃha namo vāmana jamadagnināma daśāsyagotrāntaka vāsudeva |namo'stu te buddha kalkin khageśa śambho namaste vibudhārināśana || 35||

नमोऽस्तु नारायण पद्मनाभ नमो नमस्ते पुरुषोत्तमाय ।नमः समस्तामरसङ्घपूज्य नमोऽस्तु ते सर्वविदां प्रधान ॥ ३६॥

namo'stu nārāyaṇa padmanābha namo namaste puruṣottamāya |namaḥ samastāmarasaṅghapūjya namo'stu te sarvavidāṃ pradhāna || 36||

नमः करालास्य नृसिंहमूर्त्ते नमो विशालाद्रिसमान कूर्म ।नमः समुद्रप्रतिमान मत्स्य नमामि त्वां क्रोडरूपिन्ननन्त ॥ ३७॥

namaḥ karālāsya nṛsiṃhamūrtte namo viśālādrisamāna kūrma |namaḥ samudrapratimāna matsya namāmi tvāṃ kroḍarūpinnananta || 37||

सृष्ट्यर्थमेतत् तव देव चेष्टितं न मुख्यपक्षे तव मूर्त्तिता विभो ।अजानता ध्यानमिदं प्रकाशितं नैभिर्विना लक्ष्यसे त्वं पुराण ॥ ३८॥

sṛṣṭyarthametat tava deva ceṣṭitaṃ na mukhyapakṣe tava mūrttitā vibho |ajānatā dhyānamidaṃ prakāśitaṃ naibhirvinā lakṣyase tvaṃ purāṇa || 38||

आद्यो मखस्त्वं स्वयमेव विष्णो मखाङ्गभूतोऽसि हविस्त्वमेव ।पशुर्भवान् ऋत्विगिज्यं त्वमेव त्वां देवसङ्घा मुनयो यजन्ति ॥ ३९॥

ādyo makhastvaṃ svayameva viṣṇo makhāṅgabhūto'si havistvameva |paśurbhavān ṛtvigijyaṃ tvameva tvāṃ devasaṅghā munayo yajanti || 39||

यदेतस्मिन् जगद्ध्रुवं चलाचलं सुरादिकालानलसंस्थमुत्तमम् ।न त्वं विभक्तोऽसि जनार्दनेश प्रयच्छ सिद्धिं हृदयेप्सितां मे ॥ ४०॥

yadetasmin jagaddhruvaṃ calācalaṃ surādikālānalasaṃsthamuttamam |na tvaṃ vibhakto'si janārdaneśa prayaccha siddhiṃ hṛdayepsitāṃ me || 40||

नमः कमलपत्राक्ष मूर्त्तामूर्त्त नमो हरे ।शरणं त्वां प्रपन्नोऽस्मि संसारान्मां समुद्धर ॥ ४१॥

namaḥ kamalapatrākṣa mūrttāmūrtta namo hare |śaraṇaṃ tvāṃ prapanno'smi saṃsārānmāṃ samuddhara || 41||

इति वराहपुराणे पञ्चपञ्चाशत्तमाध्यायान्तर्गतं (ब्रह्मवादी)राज्ञा कृतं विष्णुस्तोत्रं समाप्तम् ।वराहपुराण । अध्याय ५५/३१४१॥वराहपुराण । अध्याय ५५/३१-४१॥

iti varāhapurāṇe pañcapañcāśattamādhyāyāntargataṃ (brahmavādī)rājñā kṛtaṃ viṣṇustotraṃ samāptam |varāhapurāṇa | adhyāya 55/3141||varāhapurāṇa | adhyāya 55/31-41||