अभयसंस्तवः Abhayasam Stava

यस्मान्मयि दयाळुस्त्वमाभिमुख्यं पुराऽकरोः ।तस्मात्कदाऽपि कुत्रापि कुतोऽपि न भयं मम ॥ १॥

yasmānmayi dayāḷustvamābhimukhyaṃ purā'karoḥ |tasmātkadā'pi kutrāpi kuto'pi na bhayaṃ mama || 1||

त्वद्दयार्द्रदृशा दृष्टा ब्रह्माद्या लोकपालताम् ।अगमन्निगमोद्धर्तः क्व दैन्यं क्व च ते दया ॥ २॥

tvaddayārdradṛśā dṛṣṭā brahmādyā lokapālatām |agamannigamoddhartaḥ kva dainyaṃ kva ca te dayā || 2||

यं पासि त्वं किम्पुरुषे सोऽत्र साक्षी कपीश्वरः ।तथा विभीषणः साक्षी दिवि साक्षी ध्रुवो ध्रुवः ॥ ३॥

yaṃ pāsi tvaṃ kimpuruṣe so'tra sākṣī kapīśvaraḥ |tathā vibhīṣaṇaḥ sākṣī divi sākṣī dhruvo dhruvaḥ || 3||

भुवोऽधस्ताद्बलिः साक्षी यद्द्वार्यद्यापि वर्तसे ।धरा च साक्षिणी या प्राग्वराहवपुषोद्धृता ॥ ४॥

bhuvo'dhastādbaliḥ sākṣī yaddvāryadyāpi vartase |dharā ca sākṣiṇī yā prāgvarāhavapuṣoddhṛtā || 4||

वेदश्च साक्षी यद्ग्रन्थं बिभर्षि करपङ्कजे ।गिरिश्च मन्दरः साक्षी देवाश्चाध्वनि चूर्णिताः ॥ ५॥

vedaśca sākṣī yadgranthaṃ bibharṣi karapaṅkaje |giriśca mandaraḥ sākṣī devāścādhvani cūrṇitāḥ || 5||

भवः साक्षी भस्मदैत्यभस्मीकरणविक्रम ।दक्षस्साक्षी रक्षितो यस्त्वया देवर्षिसंसदि ॥ ६॥

bhavaḥ sākṣī bhasmadaityabhasmīkaraṇavikrama |dakṣassākṣī rakṣito yastvayā devarṣisaṃsadi || 6||

द्रौपदी च तथा साक्षिण्यक्षयाम्बरदायक ।सौभद्रस्य सुतः साक्षी यं द्रौण्यस्त्रादजीवयः ॥ ७॥

draupadī ca tathā sākṣiṇyakṣayāmbaradāyaka |saubhadrasya sutaḥ sākṣī yaṃ drauṇyastrādajīvayaḥ || 7||

सुधादृष्टिमृताशेषस्वसैन्योज्जीवनैकद ।कपिसेना साक्षिणी सा प्रह्लादाजामिळावपि ॥ ८॥

sudhādṛṣṭimṛtāśeṣasvasainyojjīvanaikada |kapisenā sākṣiṇī sā prahlādājāmiḷāvapi || 8||

भूयो भूयः साहचर्याद्वयाप्तिर्निर्णीयते किल ।अतस्त्वं नियमेनासि भक्तानां भयभञ्जनः ॥ ९॥

bhūyo bhūyaḥ sāhacaryādvayāptirnirṇīyate kila |atastvaṃ niyamenāsi bhaktānāṃ bhayabhañjanaḥ || 9||

अकुतश्चिद्भ्यं प्राह यतस्ते पादसेवनम् ।स्मृतिर्भागवताख्या तद्व्याप्तिराप्तोक्तितोऽप्यभूत् ॥ १०॥

akutaścidbhyaṃ prāha yataste pādasevanam |smṛtirbhāgavatākhyā tadvyāptirāptoktito'pyabhūt || 10||

दशदिक्षु गताऽसद्भ्यः सतां भयजिहीर्षया ।दशश्लोक्या वादिराजश्चकाराभयसंस्तवम् ॥ ११॥

daśadikṣu gatā'sadbhyaḥ satāṃ bhayajihīrṣayā |daśaślokyā vādirājaścakārābhayasaṃstavam || 11||

इति श्रीमद्वादिराजपूज्यचरणविरचितः अभयसंस्तवः सम्पूर्णः ।भारतीरमणमुख्यप्राणान्तर्गत श्रीकृष्णार्पणमस्तु ।

iti śrīmadvādirājapūjyacaraṇaviracitaḥ abhayasaṃstavaḥ sampūrṇaḥ |bhāratīramaṇamukhyaprāṇāntargata śrīkṛṣṇārpaṇamastu |