शिवस्तोत्रम् (विष्ण्वादिकृतं शिवपुराणान्तर्गतम् देवदेव महादेव लौकिकाचारकृत्प्रभो) Vishnvadikritam Shiva Stotram

विष्ण्वादय ऊचुः ।देवदेव महादेव लौकिकाचारकृत्प्रभो ।ब्रह्म त्वामीश्वरं शम्भुं जानीमः कृपया तव ॥ १॥

viṣṇvādaya ūcuḥ |devadeva mahādeva laukikācārakṛtprabho |brahma tvāmīśvaraṃ śambhuṃ jānīmaḥ kṛpayā tava || 1||

किं मोहयसि नस्तात मायया परया तव ।दुर्ज्ञेयया सदा पुंसां मोहिन्या परमेश्वर ॥ २॥

kiṃ mohayasi nastāta māyayā parayā tava |durjñeyayā sadā puṃsāṃ mohinyā parameśvara || 2||

प्रकृतः पुरुषस्यापि जगतो योनिबीजयोः ।परब्रह्म परस्त्वं च मनोवाचामगोचरः ॥ ३॥

prakṛtaḥ puruṣasyāpi jagato yonibījayoḥ |parabrahma parastvaṃ ca manovācāmagocaraḥ || 3||

त्वमेव विश्वं सृजसि पास्यत्सि निजतन्त्रतः ।स्वरूपां शिवशक्तिं हि क्रीडन्नूर्णपटो यथा ॥ ४॥

tvameva viśvaṃ sṛjasi pāsyatsi nijatantrataḥ |svarūpāṃ śivaśaktiṃ hi krīḍannūrṇapaṭo yathā || 4||

त्वमेव क्रतुमीशान ससर्जिथ दयापरः ।दक्षेण सूत्रेण विभो सदा त्रय्यभिपत्तये ॥ ५॥

tvameva kratumīśāna sasarjitha dayāparaḥ |dakṣeṇa sūtreṇa vibho sadā trayyabhipattaye || 5||

त्वयैव लोकेऽवसितास्सेतवो यान् धृतव्रताः ।शुद्धान् श्रद्दधते विप्रा वेदमार्गविचक्षणाः ॥ ६॥

tvayaiva loke'vasitāssetavo yān dhṛtavratāḥ |śuddhān śraddadhate viprā vedamārgavicakṣaṇāḥ || 6||

कर्तुस्त्वं मङ्गलानां हि स्वपरं तु मुखे विभो ।अमङ्गलानां च हितं मिश्रं वाथ विपर्ययम् ॥ ७॥

kartustvaṃ maṅgalānāṃ hi svaparaṃ tu mukhe vibho |amaṅgalānāṃ ca hitaṃ miśraṃ vātha viparyayam || 7||

सर्वकर्मफलानां हि सदा दाता त्वमेव हि ।सर्वे हि प्रोक्ता हि यशस्तत्पतिस्त्वं श्रुतिश्रुतः ॥ ८॥

sarvakarmaphalānāṃ hi sadā dātā tvameva hi |sarve hi proktā hi yaśastatpatistvaṃ śrutiśrutaḥ || 8||

पृथग्धियः कर्मदृशोऽरुन्तुदाश्च दुराशयाः ।वितुदन्ति परान्मूढा दुरुक्तैर्मत्सरान्विताः ॥ ९॥

pṛthagdhiyaḥ karmadṛśo'runtudāśca durāśayāḥ |vitudanti parānmūḍhā duruktairmatsarānvitāḥ || 9||

तेषां दैववधानां भो भूयात्त्वच्च वधो विभो ।भगवन्परमेशान कृपां कुरु परप्रभो ॥ २\।४१\।१०॥नमो रुद्राय शान्ताय ब्रह्मणे परमात्मने ।कपर्दिने महेशाय ज्योत्स्नायै महते नमः ॥ ११॥

teṣāṃ daivavadhānāṃ bho bhūyāttvacca vadho vibho |bhagavanparameśāna kṛpāṃ kuru paraprabho || 2\|41\|10||namo rudrāya śāntāya brahmaṇe paramātmane |kapardine maheśāya jyotsnāyai mahate namaḥ || 11||

त्वं हि विश्वसृजां स्रष्टा धाता त्वं प्रपितामहः ।त्रिगुणात्मा निर्गुणश्च प्रकृतेः पुरुषात्परः ॥ १२॥

tvaṃ hi viśvasṛjāṃ sraṣṭā dhātā tvaṃ prapitāmahaḥ |triguṇātmā nirguṇaśca prakṛteḥ puruṣātparaḥ || 12||

नमस्ते नीलकण्ठाय वेधसे परमात्मने ।विश्वाय विश्वबीजाय जगदानन्दहेतवे ॥ १३॥

namaste nīlakaṇṭhāya vedhase paramātmane |viśvāya viśvabījāya jagadānandahetave || 13||

ॐ कारस्त्वं वषट्कारस्सर्वारम्भप्रवर्तकः ।हन्तकास्स्वधाकारो हव्यकव्यान्नभुक् सदा ॥ १४॥

oṃ kārastvaṃ vaṣaṭkārassarvārambhapravartakaḥ |hantakāssvadhākāro havyakavyānnabhuk sadā || 14||

कृतः कथं यज्ञभङ्गस्त्वया धर्मपरायण ।ब्रह्मण्यस्त्वं महादेव कथं यज्ञहनो विभो ॥ १५॥

kṛtaḥ kathaṃ yajñabhaṅgastvayā dharmaparāyaṇa |brahmaṇyastvaṃ mahādeva kathaṃ yajñahano vibho || 15||

ब्राह्मणानां गवां चैव धर्मस्य प्रतिपालकः ।शरण्योऽसि सदानन्त्यः सर्वेषां प्राणिनां प्रभो ॥ १६॥

brāhmaṇānāṃ gavāṃ caiva dharmasya pratipālakaḥ |śaraṇyo'si sadānantyaḥ sarveṣāṃ prāṇināṃ prabho || 16||

नमस्ते भगवन् रुद्र भास्करामिततेजसे ।नमो भवाय देवाय रसायाम्बुमयाय ते ॥ १७॥

namaste bhagavan rudra bhāskarāmitatejase |namo bhavāya devāya rasāyāmbumayāya te || 17||

शर्वाय क्षितिरूपाय सदा सुरभिणे नमः ।रुद्रायाग्निस्वरूपाय महातेजस्विने नमः ॥ १८॥

śarvāya kṣitirūpāya sadā surabhiṇe namaḥ |rudrāyāgnisvarūpāya mahātejasvine namaḥ || 18||

ईशाय वायवे तुभ्यं संस्पर्शाय नमो नमः ।पशूनाम्पतये तुभ्यं यजमानाय वेधसे ॥ १९॥

īśāya vāyave tubhyaṃ saṃsparśāya namo namaḥ |paśūnāmpataye tubhyaṃ yajamānāya vedhase || 19||

भीमाय व्योमरूपाय शब्दमात्राय ते नमः ।महादेवाय सोमाय प्रवृत्ताय नमोऽस्तु ते ॥ २\।४१\।२०॥उग्राय सूर्यरूपाय नमस्ते कर्मयोगिने ।नमस्ते कालकालाय नमस्ते रुद्र मन्यवे ॥ २१॥

bhīmāya vyomarūpāya śabdamātrāya te namaḥ |mahādevāya somāya pravṛttāya namo'stu te || 2\|41\|20||ugrāya sūryarūpāya namaste karmayogine |namaste kālakālāya namaste rudra manyave || 21||

नमश्शिवाय भीमाय शङ्कराय शिवाय ते ।उग्रोऽसि सर्वभूतानां नियन्ता यच्छिवोऽसि नः ॥ २२॥

namaśśivāya bhīmāya śaṅkarāya śivāya te |ugro'si sarvabhūtānāṃ niyantā yacchivo'si naḥ || 22||

मयस्कराय विश्वाय ब्रह्मणे ह्यार्तिनाशिने ।अम्बिकापतये तुभ्यमुमायाः पतये नमः ॥ २३॥

mayaskarāya viśvāya brahmaṇe hyārtināśine |ambikāpataye tubhyamumāyāḥ pataye namaḥ || 23||

शर्वाय सर्वरूपाय पुरुषाय परात्मने ।सदसद्व्यक्तिहीनाय महतः कारणाय ते ॥ २४॥

śarvāya sarvarūpāya puruṣāya parātmane |sadasadvyaktihīnāya mahataḥ kāraṇāya te || 24||

जाताय बहुधा लोके प्रभूताय नमो नमः ।नीलाय नीलरुद्राय कद्रुद्राय प्रचेतसे ॥ २५॥

jātāya bahudhā loke prabhūtāya namo namaḥ |nīlāya nīlarudrāya kadrudrāya pracetase || 25||

मीढुष्टमाय देवाय शिपिविष्टाय ते नमः ।महीयसे नमस्तुभ्यं हन्त्रे देवारिणां सदा ॥ २६॥

mīḍhuṣṭamāya devāya śipiviṣṭāya te namaḥ |mahīyase namastubhyaṃ hantre devāriṇāṃ sadā || 26||

ताराय च सुताराय तरुणाय सुतेजसे ।हरिकेशाय देवाय महेशाय नमो नमः ॥ २७॥

tārāya ca sutārāya taruṇāya sutejase |harikeśāya devāya maheśāya namo namaḥ || 27||

देवानां शम्भवे तुभ्यं विभवे परमात्मने ।परमाय नमस्तुभ्यं कालकण्ठाय ते नमः ॥ २८॥

devānāṃ śambhave tubhyaṃ vibhave paramātmane |paramāya namastubhyaṃ kālakaṇṭhāya te namaḥ || 28||

हिरण्याय परेशाय हिरण्यवपुषे नमः ।भीमाय भीमरूपाय भीमकर्मरताय च ॥ २९॥

hiraṇyāya pareśāya hiraṇyavapuṣe namaḥ |bhīmāya bhīmarūpāya bhīmakarmaratāya ca || 29||

भस्मदिग्धशरीराय रुद्राक्षाभरणाय च ।नमो ह्रस्वाय दीर्घाय वामनाय नमोऽस्तु ते ॥ २\।४१\।३०॥दूरेवधाय ते देवाग्रेवधाय नमो नमः ।धन्विने शूलिने तुभ्यं गदिने हलिने नमः ॥ ३१॥

bhasmadigdhaśarīrāya rudrākṣābharaṇāya ca |namo hrasvāya dīrghāya vāmanāya namo'stu te || 2\|41\|30||dūrevadhāya te devāgrevadhāya namo namaḥ |dhanvine śūline tubhyaṃ gadine haline namaḥ || 31||

नानायुधधरायैव दैत्यदानवनाशिने ।सद्याय सद्यरूपाय सद्योजाताय वै नमः ॥ ३२॥

nānāyudhadharāyaiva daityadānavanāśine |sadyāya sadyarūpāya sadyojātāya vai namaḥ || 32||

वामाय वामरूपाय वामनेत्राय ते नमः ।अघोराय परेशाय विकटाय नमो नमः ॥ ३३॥

vāmāya vāmarūpāya vāmanetrāya te namaḥ |aghorāya pareśāya vikaṭāya namo namaḥ || 33||

तत्पुरुषाय नाथाय पुराणपुरुषाय च ।पुरुषार्थप्रदानाय व्रतिने परमेष्ठिने ॥ ३४॥

tatpuruṣāya nāthāya purāṇapuruṣāya ca |puruṣārthapradānāya vratine parameṣṭhine || 34||

ईशानाय नमस्तुभ्यमीश्वराय नमो नमः ।ब्रह्मणे ब्रह्मरूपाय नमस्साक्षात्परात्मने ॥ ३५॥

īśānāya namastubhyamīśvarāya namo namaḥ |brahmaṇe brahmarūpāya namassākṣātparātmane || 35||

उग्रोऽसि सर्वदुष्टानां नियन्तासि शिवोऽसि नः ।कालकूटाशिने तुभ्यं देवाद्यवनकारिणे ॥ ३६॥

ugro'si sarvaduṣṭānāṃ niyantāsi śivo'si naḥ |kālakūṭāśine tubhyaṃ devādyavanakāriṇe || 36||

वीराय वीरभद्राय रक्षद्वीराय शूलिने ।महादेवाय महते पशूनां पतये नमः ॥ ३७॥

vīrāya vīrabhadrāya rakṣadvīrāya śūline |mahādevāya mahate paśūnāṃ pataye namaḥ || 37||

वीरात्मने सुविद्याय श्रीकण्ठाय पिनाकिने ।नमोऽनन्ताय सूक्ष्माय नमस्ते मृत्युमन्यवे ॥ ३८॥

vīrātmane suvidyāya śrīkaṇṭhāya pinākine |namo'nantāya sūkṣmāya namaste mṛtyumanyave || 38||

पराय परमेशाय परात्परतराय ते ।परात्पराय विभवे नमस्ते विश्वमूर्तये ॥ ३९॥

parāya parameśāya parātparatarāya te |parātparāya vibhave namaste viśvamūrtaye || 39||

नमो विष्णुकलत्राय विष्णुक्षेत्राय भानवे ।भैरवाय शरण्याय त्र्यम्बकाय विहारिणे ॥ २\।४१\।४०॥मृत्युञ्जयाय शोकाय त्रिगुणाय गुणात्मने ।चन्द्रसूर्याग्निनेत्राय सर्वकारणसेतवे ॥ ४१॥

namo viṣṇukalatrāya viṣṇukṣetrāya bhānave |bhairavāya śaraṇyāya tryambakāya vihāriṇe || 2\|41\|40||mṛtyuñjayāya śokāya triguṇāya guṇātmane |candrasūryāgninetrāya sarvakāraṇasetave || 41||

भवता हि जगत्सर्वं व्याप्तं स्वेनैव तेजसा ।परब्रह्म निर्विकारी चिदानन्दः प्रकाशवान् ॥ ४२॥

bhavatā hi jagatsarvaṃ vyāptaṃ svenaiva tejasā |parabrahma nirvikārī cidānandaḥ prakāśavān || 42||

ब्रह्मविष्ण्विन्द्रचन्द्रादिप्रमुखास्सकलास्सुराः ।मुनयश्चापरे त्वत्तस्सम्प्रसूता महेश्वर ॥ ४३॥

brahmaviṣṇvindracandrādipramukhāssakalāssurāḥ |munayaścāpare tvattassamprasūtā maheśvara || 43||

यतो बिभर्षि सकलं विभज्य तनुमष्टधा ।अष्टमूर्तिरितीशश्च त्वमाद्यः करुणामयः ॥ ४४॥

yato bibharṣi sakalaṃ vibhajya tanumaṣṭadhā |aṣṭamūrtiritīśaśca tvamādyaḥ karuṇāmayaḥ || 44||

त्वद्भयाद्वाति वातोऽयं दहत्यग्निर्भयात्तव ।सूर्यस्तपति ते भीत्या मृत्युर्धावति सर्वतः ॥ ४५॥

tvadbhayādvāti vāto'yaṃ dahatyagnirbhayāttava |sūryastapati te bhītyā mṛtyurdhāvati sarvataḥ || 45||

दयासिन्धो महेशान प्रसीद परमेश्वर ।रक्ष रक्ष सदैवास्मान् यस्मान्नष्टान् विचेतसः ॥ ४६॥

dayāsindho maheśāna prasīda parameśvara |rakṣa rakṣa sadaivāsmān yasmānnaṣṭān vicetasaḥ || 46||

रक्षिताः सततं नाथ त्वयैव करुणानिधे ।नानापद्भ्यो वयं शम्भो तथैवाद्य प्रपाहि नः ॥ ४७॥

rakṣitāḥ satataṃ nātha tvayaiva karuṇānidhe |nānāpadbhyo vayaṃ śambho tathaivādya prapāhi naḥ || 47||

यज्ञस्योद्धरणं नाथ कुरु शीघ्रं प्रसादकृत् ।असमाप्तस्य दुर्गेश दक्षस्य च प्रजापतेः ॥ ४८॥

yajñasyoddharaṇaṃ nātha kuru śīghraṃ prasādakṛt |asamāptasya durgeśa dakṣasya ca prajāpateḥ || 48||

भगोऽक्षिणी प्रपद्येत यजमानश्च जीवतु ।पूष्णो दन्ताश्च रोहन्तु भृगोः श्मश्रूणि पूर्ववत् ॥ ४९॥

bhago'kṣiṇī prapadyeta yajamānaśca jīvatu |pūṣṇo dantāśca rohantu bhṛgoḥ śmaśrūṇi pūrvavat || 49||

भवतानुग्रहीतानां देवादीनां च सर्वशः ।आरोग्यं भग्नगात्राणां शङ्कर त्वायुधाश्मभिः ॥ २\।४१\।५०॥पूर्णभागोऽस्तु ते नाथावशिष्टेऽध्वरकर्मणि ।रुद्रभागेन यज्ञस्ते कल्पितो नान्यथा क्वचित् ॥ ५१॥

bhavatānugrahītānāṃ devādīnāṃ ca sarvaśaḥ |ārogyaṃ bhagnagātrāṇāṃ śaṅkara tvāyudhāśmabhiḥ || 2\|41\|50||pūrṇabhāgo'stu te nāthāvaśiṣṭe'dhvarakarmaṇi |rudrabhāgena yajñaste kalpito nānyathā kvacit || 51||

इत्युक्त्वा सप्रजेशश्च रमेशश्च कृताञ्जलिः ।दण्डवत्पतितो भूमौ क्षमापयितुमुद्यतः ॥ ५२॥

ityuktvā saprajeśaśca rameśaśca kṛtāñjaliḥ |daṇḍavatpatito bhūmau kṣamāpayitumudyataḥ || 52||

इति श्रीशिवमहापुराणे द्वितीयायां रुद्रसंहितायाम् ।द्वितीये सतीखण्डे देवस्तुतिवर्णनं नामैकचत्वारिंशोऽध्यायः ॥ ४१॥

iti śrīśivamahāpurāṇe dvitīyāyāṃ rudrasaṃhitāyām |dvitīye satīkhaṇḍe devastutivarṇanaṃ nāmaikacatvāriṃśo'dhyāyaḥ || 41||

शिवपुराण । रुद्रसंहिता । सतीखण्ड । अध्याय ४१/१४७॥शिवपुराण । रुद्रसंहिता । सतीखण्ड । अध्याय ४१/१-४७॥

śivapurāṇa | rudrasaṃhitā | satīkhaṇḍa | adhyāya 41/147||śivapurāṇa | rudrasaṃhitā | satīkhaṇḍa | adhyāya 41/1-47||