शिवदर्शविग्रहवर्णनम् Skandaproktam Shivadarshavigrahavarnanam

(शिवरहस्यान्तर्गते ईश्वराख्ये)महापाण्डरमारुह्य वृषं कैलाससप्रभम् ।त्र्यक्षः शम्बरशूलोद्यत्करो नीलसुकन्धरः ॥ २॥

(śivarahasyāntargate īśvarākhye)mahāpāṇḍaramāruhya vṛṣaṃ kailāsasaprabham |tryakṣaḥ śambaraśūlodyatkaro nīlasukandharaḥ || 2||

गङ्गातुङ्गजटामौलिः शशाङ्ककृतशेखरः ।दिव्यभस्मत्रिपुण्ड्रोद्यत्भालामलविराजितः ॥ ३॥

gaṅgātuṅgajaṭāmauliḥ śaśāṅkakṛtaśekharaḥ |divyabhasmatripuṇḍrodyatbhālāmalavirājitaḥ || 3||

फणामणिघृणिप्रोद्यद्धीरहाराहिसङ्कुलः ।गुरुणा गरजातेन नीलीभूतसुकन्धरः ॥ ४॥

phaṇāmaṇighṛṇiprodyaddhīrahārāhisaṅkulaḥ |guruṇā garajātena nīlībhūtasukandharaḥ || 4||

दन्तित्वक्परिवीताङ्गो व्याघ्रचर्माम्बरावृतः ।वामभागमहादेवीवीक्षितापाङ्गवक्त्रकः ॥ ५॥

dantitvakparivītāṅgo vyāghracarmāmbarāvṛtaḥ |vāmabhāgamahādevīvīkṣitāpāṅgavaktrakaḥ || 5||

नन्दिभृङ्गिमहाकालस्कन्दविघ्नेशसेवितः ।वृन्दारमकुटीकोटिमणिभी राजिताङ्घ्रिकः ॥ ६॥

nandibhṛṅgimahākālaskandavighneśasevitaḥ |vṛndāramakuṭīkoṭimaṇibhī rājitāṅghrikaḥ || 6||

गणेन्द्रवदनोद्भूतशङ्खकाहलनिःस्वनैः ।मृदङ्गढक्काभेरीणामारावोद्घोषिताम्बरः ॥ ७॥

gaṇendravadanodbhūtaśaṅkhakāhalaniḥsvanaiḥ |mṛdaṅgaḍhakkābherīṇāmārāvodghoṣitāmbaraḥ || 7||

छत्रचामरमायूरव्यजनाक्तकरैर्गणैः ।पार्श्वतः सेवितः शम्भुराययौ मङ्कणान्तिकम् ॥ ८॥

chatracāmaramāyūravyajanāktakarairgaṇaiḥ |pārśvataḥ sevitaḥ śambhurāyayau maṅkaṇāntikam || 8||

सुनिर्जरकरोत्सृष्टपुष्पवृष्टिरभूच्च खात् ।ननृतुस्तालसाम्येन लयेनाप्सरसां गणाः ॥ ९॥

sunirjarakarotsṛṣṭapuṣpavṛṣṭirabhūcca khāt |nanṛtustālasāmyena layenāpsarasāṃ gaṇāḥ || 9||

प्रावाद्यन्तोरुवाद्यानि गन्धर्वाः किन्नरास्तथा ।जगुः शिवापदानानि नारदाद्याः सतुम्बराः ॥ १०॥

prāvādyantoruvādyāni gandharvāḥ kinnarāstathā |jaguḥ śivāpadānāni nāradādyāḥ satumbarāḥ || 10||

विष्णुब्रह्मादिभिर्देवैर्जयेशेति नतः स्तुतः ॥ ११॥

viṣṇubrahmādibhirdevairjayeśeti nataḥ stutaḥ || 11||

॥ इति शिवरहस्यान्तर्गते स्कन्दप्रोक्तं शिवदर्शविग्रहवर्णनं सम्पूर्णम् ॥॥ श्रीशिवरहस्यम् । ईश्वराख्यः दशमांशः । अध्यायः १० मङ्कणस्तुतिः । २११॥

|| iti śivarahasyāntargate skandaproktaṃ śivadarśavigrahavarṇanaṃ sampūrṇam |||| śrīśivarahasyam | īśvarākhyaḥ daśamāṃśaḥ | adhyāyaḥ 10 maṅkaṇastutiḥ | 211||

– ॥ श्रीशिवरहस्यम् ।ईश्वराख्यः दशमांशः ।अध्यायः १० मङ्कणस्तुतिः ।२-११॥

– || śrīśivarahasyam |īśvarākhyaḥ daśamāṃśaḥ |adhyāyaḥ 10 maṅkaṇastutiḥ | 2-11||