शतरुद्रीयमाहात्म्यम् १ Skandaproktam Shatarudriyamahatmyam 1

(शिवरहस्यान्तर्गते ईश्वराख्ये)जैगीषव्यस्कन्दसंवादे(जैगीषव्य) मुनिरुवाच ।भगवन् सर्वतत्त्वज्ञ स्कन्द शङ्करसम्भव ।काण्डे चतुर्थे यजुषि प्रश्नेऽस्मिन् पञ्चमे शुभे ॥ १॥

(śivarahasyāntargate īśvarākhye)jaigīṣavyaskandasaṃvāde(jaigīṣavya) muniruvāca |bhagavan sarvatattvajña skanda śaṅkarasambhava |kāṇḍe caturthe yajuṣi praśne'smin pañcame śubhe || 1||

रुद्रमन्त्राः शतं तस्माच्छतरुद्रीयमुच्यते ।नामानि श्रोतुमिच्छामि तेषां स्कन्द महामते ॥ २॥

rudramantrāḥ śataṃ tasmācchatarudrīyamucyate |nāmāni śrotumicchāmi teṣāṃ skanda mahāmate || 2||

सूत उवाच ।जैगीषव्यवचः श्रुत्वा स्कन्दः सूदिततारकः ।नमस्कृत्य महादेवं प्रवक्तुमुपचक्रमे ॥ ३॥

sūta uvāca |jaigīṣavyavacaḥ śrutvā skandaḥ sūditatārakaḥ |namaskṛtya mahādevaṃ pravaktumupacakrame || 3||

स्कन्द उवाच ।शतरुद्रीयमाहात्म्यं भूयो वक्ष्यामि ते श्रुणु ।यस्य विज्ञानमात्रेण सिद्धिः करतले स्थिता ॥ ४॥

skanda uvāca |śatarudrīyamāhātmyaṃ bhūyo vakṣyāmi te śruṇu |yasya vijñānamātreṇa siddhiḥ karatale sthitā || 4||

वेदेषु शतरुद्रीयं देवतासु महेश्वरः ।क्षेत्रेषु चाविमुक्तं मे मन्त्रःपञ्चाक्षरो वरः ॥ ५॥

vedeṣu śatarudrīyaṃ devatāsu maheśvaraḥ |kṣetreṣu cāvimuktaṃ me mantraḥpañcākṣaro varaḥ || 5||

नृणां यथा द्विजो मुख्यो द्विजेष्वपि च शाम्भवः ।पापनाशकरं विप्र यथा भस्मैव पावनम् ॥ ६॥

nṛṇāṃ yathā dvijo mukhyo dvijeṣvapi ca śāmbhavaḥ |pāpanāśakaraṃ vipra yathā bhasmaiva pāvanam || 6||

भूषणेषु यथा मुख्यं रुद्राक्षं पावनं द्विज ।पुराणेषु यथा स्कान्दं सर्वस्मृतिषु मानवी ॥ ७॥

bhūṣaṇeṣu yathā mukhyaṃ rudrākṣaṃ pāvanaṃ dvija |purāṇeṣu yathā skāndaṃ sarvasmṛtiṣu mānavī || 7||

यथा प्रमाणं मानानां श्रुतिरेव सनातनी ।इतिहासेषु परमं यथा शिवरहस्यकम् ॥ ८॥

yathā pramāṇaṃ mānānāṃ śrutireva sanātanī |itihāseṣu paramaṃ yathā śivarahasyakam || 8||

शतमस्मिन् महामन्त्रास्तिष्ठन्ति भुवि दुर्लभाः ।ऋषिच्छन्दोदेवताभिर्विनियोगैः समन्वितम् ॥ ९॥

śatamasmin mahāmantrāstiṣṭhanti bhuvi durlabhāḥ |ṛṣicchandodevatābhirviniyogaiḥ samanvitam || 9||

जपेत्समग्रं नमकं समग्रं चमकं तथा ।रुद्रमित्युच्यते सद्भिर्महाघौघविनाशनम् ॥ १०॥

japetsamagraṃ namakaṃ samagraṃ camakaṃ tathā |rudramityucyate sadbhirmahāghaughavināśanam || 10||

नमकं चमकेनैकेनानुवाकेन सञ्जपेत् ।एकं(वं) एकादशावृत्त्या रुद्रैकादशिनी स्मृता ॥ ११॥

namakaṃ camakenaikenānuvākena sañjapet |ekaṃ(vaṃ) ekādaśāvṛttyā rudraikādaśinī smṛtā || 11||

रुद्रैकादशिनीं जप्त्वा तथैकादशिनीं पुनः ।श्रीरुद्रमिति विद्वद्भिः कथ्यते भुक्तिमुक्तिदम् ॥ १२॥

rudraikādaśinīṃ japtvā tathaikādaśinīṃ punaḥ |śrīrudramiti vidvadbhiḥ kathyate bhuktimuktidam || 12||

श्रीरुद्रैकादशावृत्त्या महारुद्रमुदाहृतम् ।तथैकादशधा जप्तमतिरुद्रमिति स्मृतम् ॥ १३॥

śrīrudraikādaśāvṛttyā mahārudramudāhṛtam |tathaikādaśadhā japtamatirudramiti smṛtam || 13||

नामधेयानि वक्ष्यामि मन्त्राणां च पृथक् पृथक् ।व्योमबीजादिको मन्त्रः प्रथमः परिकीर्तितः ॥ १४॥

nāmadheyāni vakṣyāmi mantrāṇāṃ ca pṛthak pṛthak |vyomabījādiko mantraḥ prathamaḥ parikīrtitaḥ || 14||

वामदेवर्षिसंयुक्तो द्वात्रिंशार्ण उदाहृतः ।साम्बाख्यदेवतायुक्तोऽनुष्टुप्छन्दोऽष्टसिद्धिदः ॥ १५॥

vāmadevarṣisaṃyukto dvātriṃśārṇa udāhṛtaḥ |sāmbākhyadevatāyukto'nuṣṭupchando'ṣṭasiddhidaḥ || 15||

पवनादि स्तृतीयः स्याद्दैवतछन्दसान्वितः ।अन्तर्यामीऋषिः साम्बशिवो देवोऽष्टसिद्धिदः ॥ १६॥

pavanādi stṛtīyaḥ syāddaivatachandasānvitaḥ |antaryāmīṛṣiḥ sāmbaśivo devo'ṣṭasiddhidaḥ || 16||

चतुर्थी वायुबीजादिरनुष्टुप्छन्दसान्वितः ।अभीष्टसिद्धिदः प्रोक्तो देवता त्रिपुरान्तकः ॥ १७॥

caturthī vāyubījādiranuṣṭupchandasānvitaḥ |abhīṣṭasiddhidaḥ prokto devatā tripurāntakaḥ || 17||

अमृताद्यादिमो मन्त्रो गायत्रीच्छन्दसावृतः ।तथैव सप्तचत्वारिंशद्वर्णोऽभीष्टार्थसिद्धिदः ॥ १८॥

amṛtādyādimo mantro gāyatrīcchandasāvṛtaḥ |tathaiva saptacatvāriṃśadvarṇo'bhīṣṭārthasiddhidaḥ || 18||

चतुर्मुखादिमं चैकचत्वारिंशाक्षरो मनुः ।त्रिष्टुप्छन्दोयुतः षष्ठो भार्गवर्षिःसुरोत्तमाः ॥ १९॥

caturmukhādimaṃ caikacatvāriṃśākṣaro manuḥ |triṣṭupchandoyutaḥ ṣaṣṭho bhārgavarṣiḥsurottamāḥ || 19||

रविदैवतको मन्त्रस्त्रिंशत्सप्तदशाक्षरः ।भार्गवर्षिसमायुक्तो गायत्रीछन्दसावृतः ॥ २०॥

ravidaivatako mantrastriṃśatsaptadaśākṣaraḥ |bhārgavarṣisamāyukto gāyatrīchandasāvṛtaḥ || 20||

सृष्टिकर्त्रादिमोऽभीष्टसिद्धिदः सम्प्रकीर्तितः ।मूलादिमो महामन्त्रः कण्वर्षिर्भयनाशकः ॥ २१॥

sṛṣṭikartrādimo'bhīṣṭasiddhidaḥ samprakīrtitaḥ |mūlādimo mahāmantraḥ kaṇvarṣirbhayanāśakaḥ || 21||

पङ्क्तिश्छन्दस्समायुक्तो नीलकण्ठः सुरोऽष्टमः ।अग्निबीजसमायुक्तो वायुबीजादिमो मनुः ॥ २२॥

paṅktiśchandassamāyukto nīlakaṇṭhaḥ suro'ṣṭamaḥ |agnibījasamāyukto vāyubījādimo manuḥ || 22||

दधीचि(च) ऋषिसंयुक्तश्छन्दसानुष्टुभान्वितः ।त्रिपुरान्तकदेवोऽसौ नमच्छत्रुविनाशनः ॥ २३॥

dadhīci(ca) ṛṣisaṃyuktaśchandasānuṣṭubhānvitaḥ |tripurāntakadevo'sau namacchatruvināśanaḥ || 23||

विष्ण्वादिदेवतायुक्तो दशमो गायत्रसंयुतः ।सहस्राक्षःसुरःशत्रुक्षयकृद्दशमो मनुः ॥ २४॥

viṣṇvādidevatāyukto daśamo gāyatrasaṃyutaḥ |sahasrākṣaḥsuraḥśatrukṣayakṛddaśamo manuḥ || 24||

अमृतादिमहामन्त्रः पङ्क्तिच्छन्दस्समन्वितः ।कपर्दिदेवः कण्वर्षिःसदाविजयसिद्धिदः ॥ २५॥

amṛtādimahāmantraḥ paṅkticchandassamanvitaḥ |kapardidevaḥ kaṇvarṣiḥsadāvijayasiddhidaḥ || 25||

अग्न्यादित्यमहामन्त्रः ऋषिनारदसंयुतः ।गायत्रीछन्दसायुक्तो विरूपाक्षः सुरस्तथा ॥ २६॥

agnyādityamahāmantraḥ ṛṣināradasaṃyutaḥ |gāyatrīchandasāyukto virūpākṣaḥ surastathā || 26||

आयुरारोग्यसंसिद्धिप्रदो द्वात्रिंशदीरितः ।मकारान्त्या रमाविध्या दधीचिऋषिसंयुता ॥ २७॥

āyurārogyasaṃsiddhiprado dvātriṃśadīritaḥ |makārāntyā ramāvidhyā dadhīciṛṣisaṃyutā || 27||

दैवत(?) छन्दसा युक्ता पिनाकिसुरसंयुता ।त्रयोदशीति कथिता तारणे जयदायिनी ॥ २८॥

daivata(?) chandasā yuktā pinākisurasaṃyutā |trayodaśīti kathitā tāraṇe jayadāyinī || 28||

मरुदादिमहाविद्या पङ्क्तिच्छन्दस्समन्विता ।पिनाकिदेवतायुक्ता गौतमर्षिसमन्विता ॥ २९॥

marudādimahāvidyā paṅkticchandassamanvitā |pinākidevatāyuktā gautamarṣisamanvitā || 29||

चतुर्दशीति कथिता वैश्यसेव्यप्रदायिनी ।नमो हिरण्येत्यारभ्य सत्त्वनां पतये नमः ॥ ३०॥

caturdaśīti kathitā vaiśyasevyapradāyinī |namo hiraṇyetyārabhya sattvanāṃ pataye namaḥ || 30||

एतत्पदान्ता विद्यस्यात्पार्वतीशः सुरःस्मृतः ।चतुर्मुखर्षिसंयुक्ता विराट्छन्दस्समन्विता ॥ ३१॥

etatpadāntā vidyasyātpārvatīśaḥ suraḥsmṛtaḥ |caturmukharṣisaṃyuktā virāṭchandassamanvitā || 31||

हृदयादिपदोपेता श्वपतिभ्यश्च वो नमः ।एतदन्तामहाविद्या षोडशी समुदीरिता ॥ ३२॥

hṛdayādipadopetā śvapatibhyaśca vo namaḥ |etadantāmahāvidyā ṣoḍaśī samudīritā || 32||

नारदर्षिसमायुक्तस्त्रिष्टुप्छन्दस्समन्वितः ।अनुवाकश्चतुर्थः स्याद्विद्या सप्तदशी स्मृता ॥ ३३॥

nāradarṣisamāyuktastriṣṭupchandassamanvitaḥ |anuvākaścaturthaḥ syādvidyā saptadaśī smṛtā || 33||

कुमारर्षिसमायुक्ता बार्हतछन्दसा युतामहादेवः सुरः सर्वग्रहदोषनिवारिणी ॥ ३४॥

kumārarṣisamāyuktā bārhatachandasā yutāmahādevaḥ suraḥ sarvagrahadoṣanivāriṇī || 34||

अष्टादशमहाविद्या अनुवाकस्तु पञ्चमः ।गणेशर्षिसमायुक्ता त्रिष्टुप् छन्दस्समन्विता ॥ ३५॥

aṣṭādaśamahāvidyā anuvākastu pañcamaḥ |gaṇeśarṣisamāyuktā triṣṭup chandassamanvitā || 35||

महारुद्रसुताः सर्वे सिद्धिदाऽज्ञाननाशिनी ।षष्ठोऽनुवाक एकोनविंशोमन्त्रः स ईरितः ॥ ३६॥

mahārudrasutāḥ sarve siddhidā'jñānanāśinī |ṣaṣṭho'nuvāka ekonaviṃśomantraḥ sa īritaḥ || 36||

वसिष्ठर्षिसमायुक्तस्त्रिष्टुप्छन्दस्समन्वितः ।परमेश्वरदेवोऽसौ सर्वसम्प्रत्प्रदायकः ।एकविंशो महामन्त्रोह्यनुवाकस्तथाष्टमः ॥ ३७॥

vasiṣṭharṣisamāyuktastriṣṭupchandassamanvitaḥ |parameśvaradevo'sau sarvasampratpradāyakaḥ |ekaviṃśo mahāmantrohyanuvākastathāṣṭamaḥ || 37||

वामदेवर्षिसहितो जगतीछन्दसा वृतः ।उमामहेश्वरसुरश्चिन्तितार्थफलप्रदः ॥ ३८॥

vāmadevarṣisahito jagatīchandasā vṛtaḥ |umāmaheśvarasuraścintitārthaphalapradaḥ || 38||

एतन्मध्यगता विद्या शैवपञ्चाक्षरी शुभा ।ब्रह्मविद्या भक्तिदायिनी सर्वसिद्धिदा ॥ ३९॥

etanmadhyagatā vidyā śaivapañcākṣarī śubhā |brahmavidyā bhaktidāyinī sarvasiddhidā || 39||

वामदेवर्षिसहिता पङ्क्तिछन्दस्समन्विता ।(नमो वर्ष्यायप्रथमा)नमो वर्ष्यायमीवत्केभ्य इत्यन्तसंयुताश्रीरुद्रर्षिसमायुक्ता गायत्रीछन्दसान्विता ॥ ४३॥

vāmadevarṣisahitā paṅktichandassamanvitā |(namo varṣyāyaprathamā)namo varṣyāyamīvatkebhya ityantasaṃyutāśrīrudrarṣisamāyuktā gāyatrīchandasānvitā || 43||

सर्वप्रथमसंस्तुत्यसाम्बशङ्करदेवता ।महासिद्धिप्रदा साक्षाच्छङ्करत्वप्रदायिनी ॥ ४४॥

sarvaprathamasaṃstutyasāmbaśaṅkaradevatā |mahāsiddhipradā sākṣācchaṅkaratvapradāyinī || 44||

द्रापे अन्धस इत्येषा मुनिब्रह्मसमन्विता ।गायत्रीछन्दसा युक्ता स्कन्ददैवतसंयुता ॥ ४५॥

drāpe andhasa ityeṣā munibrahmasamanvitā |gāyatrīchandasā yuktā skandadaivatasaṃyutā || 45||

दारिद्र्य परमैश्वर्यदायिनी ।यातेरुद्रेति विद्या स्यात्सूर्यनारायणात्मिका ॥ ४६॥

dāridrya paramaiśvaryadāyinī |yāterudreti vidyā syātsūryanārāyaṇātmikā || 46||

गायत्रीछन्दसा युक्ता भार्गवर्षिसमन्विता ।सर्वरोगक्षयकरी मनश्चिन्तितसिद्धिदा ॥ ४७॥

gāyatrīchandasā yuktā bhārgavarṣisamanvitā |sarvarogakṣayakarī manaścintitasiddhidā || 47||

इमा इति महाविद्या शङ्करर्षिसमन्विता ।विराट्छन्दोयुता सौख्यसिद्धिदा रुद्रदेवता ॥ ४८॥

imā iti mahāvidyā śaṅkararṣisamanvitā |virāṭchandoyutā saukhyasiddhidā rudradevatā || 48||

मृडानोरुद्रो विद्या स्यात्सङ्कर्षणमुनिस्तुता ।कालाग्निरुद्रदेवीस्याज्जागतछन्दसान्विता ॥ ४९॥

mṛḍānorudro vidyā syātsaṅkarṣaṇamunistutā |kālāgnirudradevīsyājjāgatachandasānvitā || 49||

आधिव्याधिहरी नॄणां दीर्घायुष्यप्रदायिनी ।मानो महान्तमिति च विद्या सूर्यर्षिसंयुता ॥ ५०॥

ādhivyādhiharī nṝṇāṃ dīrghāyuṣyapradāyinī |māno mahāntamiti ca vidyā sūryarṣisaṃyutā || 50||

साम्बशङ्करदेवेशा ककुप् छन्दः समन्विता ।पितृमातृसुत भ्रातृ वियोगक्षयकारिणी ॥ ५१॥

sāmbaśaṅkaradeveśā kakup chandaḥ samanvitā |pitṛmātṛsuta bhrātṛ viyogakṣayakāriṇī || 51||

मानस्तोके महाविद्या वरुणर्षिसमन्विता ।रुद्रदैवतसंयुक्ता दैव(?)च्छन्दस्समन्विता ॥ ५२॥

mānastoke mahāvidyā varuṇarṣisamanvitā |rudradaivatasaṃyuktā daiva(?)cchandassamanvitā || 52||

गर्भपातक्षयकरी सुतायुष्यविवर्धिनी ।आराते गोध्न इत्येषा विद्या ब्रह्मर्षिसंयुता ॥ ५३॥

garbhapātakṣayakarī sutāyuṣyavivardhinī |ārāte godhna ityeṣā vidyā brahmarṣisaṃyutā || 53||

गायत्रीछन्दसा युक्ता शिवदैवतसंयुता ।अजागोमहिषीमत्तगजाश्वत्राणकारिणी ॥ ५४॥

gāyatrīchandasā yuktā śivadaivatasaṃyutā |ajāgomahiṣīmattagajāśvatrāṇakāriṇī || 54||

स्तुहिश्रुतमितिह्येषा दक्षिणामूर्तिदेवता ।ऋषिः प्रजापतिस्तूक्ता गायत्रीछन्दसान्विता ॥ ५५॥

stuhiśrutamitihyeṣā dakṣiṇāmūrtidevatā |ṛṣiḥ prajāpatistūktā gāyatrīchandasānvitā || 55||

अज्ञाननाशिनी सर्वविद्या सिद्धिप्रदायिनी ।परिण प्रथमा विद्या कण्वकर्षिप्रपूजिता ॥ ५६॥

ajñānanāśinī sarvavidyā siddhipradāyinī |pariṇa prathamā vidyā kaṇvakarṣiprapūjitā || 56||

रुद्रदैवतसंयुक्ता नृचिद्गायत्रसंयुता ।मीढुष्टमेति विद्या स्याद्विवस्वदृषिसंयुता ॥ ५७॥

rudradaivatasaṃyuktā nṛcidgāyatrasaṃyutā |mīḍhuṣṭameti vidyā syādvivasvadṛṣisaṃyutā || 57||

साक्षात्कारकरी शम्भोर्गायत्रीछन्दसान्विता ।विकिरीतिमहाविद्या मुनिब्रह्मप्रपूजिता ॥ ५८॥

sākṣātkārakarī śambhorgāyatrīchandasānvitā |vikirītimahāvidyā munibrahmaprapūjitā || 58||

गायत्रीछन्दसा युक्ता वीरभद्राधिदेवता ।सहस्राणि सहस्रेति विद्या भद्रर्षिपूजिता ॥ ५९॥

gāyatrīchandasā yuktā vīrabhadrādhidevatā |sahasrāṇi sahasreti vidyā bhadrarṣipūjitā || 59||

विराट्छन्दःसमायुक्ता परशङ्करदेवता ।सहस्राणीति विद्या स्याच्चतुर्वर्गफलप्रदा ॥ ६०॥

virāṭchandaḥsamāyuktā paraśaṅkaradevatā |sahasrāṇīti vidyā syāccaturvargaphalapradā || 60||

वीरभद्रर्षिसंयुक्ता महारुद्राख्यदेवता ।विराजछन्दसा युक्ता यद्वा सर्वत्र पूजिता ॥ ६१॥

vīrabhadrarṣisaṃyuktā mahārudrākhyadevatā |virājachandasā yuktā yadvā sarvatra pūjitā || 61||

अस्मिन्महत्यादि विद्या नीलग्रीवाधिदेवता ।पराशरर्षिसहिता गायत्रीछन्दसान्विता ॥ ६२॥

asminmahatyādi vidyā nīlagrīvādhidevatā |parāśararṣisahitā gāyatrīchandasānvitā || 62||

नीलग्रीवा इति प्रोक्ता महाविद्या फलप्रदा ।कपलर्षिस्तुता वामदेव देवी नृचिद्युता ॥ ६३॥

nīlagrīvā iti proktā mahāvidyā phalapradā |kapalarṣistutā vāmadeva devī nṛcidyutā || 63||

ये भूतानामधीत्येषा मार्कण्डेयमुनिस्तुता ।मृत्युञ्जयाख्यदेवीस्याद्गायत्रीछन्दसान्विता ॥ ६४॥

ye bhūtānāmadhītyeṣā mārkaṇḍeyamunistutā |mṛtyuñjayākhyadevīsyādgāyatrīchandasānvitā || 64||

ये पथां पथि विद्यास्यादापद्घ्नी रुद्रदेवता ।वामदेवर्षिसहिता पङ्क्तिच्छन्दस्समन्विता ॥ ६५॥

ye pathāṃ pathi vidyāsyādāpadghnī rudradevatā |vāmadevarṣisahitā paṅkticchandassamanvitā || 65||

(य एतावन्तश्च विद्यास्या)य एतावन्तश्च इत्याद्या विद्या श्रीरुद्रदेवता ।ऋषिकण्वसमभ्यर्च्या जगतीच्छन्दसान्विता ॥ ६६॥

(ya etāvantaśca vidyāsyā)ya etāvantaśca ityādyā vidyā śrīrudradevatā |ṛṣikaṇvasamabhyarcyā jagatīcchandasānvitā || 66||

नमो रुद्रेभ्य इत्येषा विद्या श्रीरुद्रदेवता ।सङ्कर्षणमुनिस्तुत्या गायत्रीछन्दसान्विता ॥ ६७॥

namo rudrebhya ityeṣā vidyā śrīrudradevatā |saṅkarṣaṇamunistutyā gāyatrīchandasānvitā || 67||

सर्वाधिव्याधिशमनी चतुर्वर्गफलप्रदा ।एता विद्या मयाऽऽख्याताः शतरुद्रीयमध्यगाः ॥ ६८॥

sarvādhivyādhiśamanī caturvargaphalapradā |etā vidyā mayā''khyātāḥ śatarudrīyamadhyagāḥ || 68||

एकादशानुवाकेभ्यो विद्याशतमजायत ।समग्रं नमकं मालामन्त्ररूपं द्विजोत्तम ॥ ६९॥

ekādaśānuvākebhyo vidyāśatamajāyata |samagraṃ namakaṃ mālāmantrarūpaṃ dvijottama || 69||

शतरुद्रीयमित्युक्तं वेदसारं महोदयम् ।शान्त्यर्थं शं च मे सूक्तं पठित्वादौ द्विजोत्तमाः ॥ ७०॥

śatarudrīyamityuktaṃ vedasāraṃ mahodayam |śāntyarthaṃ śaṃ ca me sūktaṃ paṭhitvādau dvijottamāḥ || 70||

प्रजपेच्छतरुद्रीयं त्रयीसारमनुत्तमम् ।मयैषां सर्वमन्त्राणां छन्दर्ष्यादिकमीरितम् ॥ ७१॥

prajapecchatarudrīyaṃ trayīsāramanuttamam |mayaiṣāṃ sarvamantrāṇāṃ chandarṣyādikamīritam || 71||

उक्तानि(नां) नामधेयानि(नां) माहात्म्यं वक्ष्यतेऽधुना ॥ ७२॥

uktāni(nāṃ) nāmadheyāni(nāṃ) māhātmyaṃ vakṣyate'dhunā || 72||

(ईश्वरप्रोक्तफलम्)मल्लिङ्गं त्वभिवीक्ष्य रुद्रजनमोवाक्यैः स्तुवन् भक्तितःशम्भुं शाम्भवसत्तमोत्तमपदं प्राप्नोति रुद्रं जपन् ।रुद्रेण प्रणमन् प्रदक्षिणविधिं कुर्वन् महापातकैर्मुक्तः श्रीशतरुद्रमन्त्रजपकृच्छम्भोरथान्ते गणः ॥ ७३॥

(īśvaraproktaphalam)malliṅgaṃ tvabhivīkṣya rudrajanamovākyaiḥ stuvan bhaktitaḥśambhuṃ śāmbhavasattamottamapadaṃ prāpnoti rudraṃ japan |rudreṇa praṇaman pradakṣiṇavidhiṃ kurvan mahāpātakairmuktaḥ śrīśatarudramantrajapakṛcchambhorathānte gaṇaḥ || 73||

॥ इति शिवरहस्यान्तर्गते स्कन्दप्रोक्तं शतरुद्रीयमाहात्म्यं १ सम्पूर्णम् ॥॥ श्रीशिवरहस्यम् । ईश्वराख्यः दशमांशः । अध्यायः २७ । १७३॥

|| iti śivarahasyāntargate skandaproktaṃ śatarudrīyamāhātmyaṃ 1 sampūrṇam |||| śrīśivarahasyam | īśvarākhyaḥ daśamāṃśaḥ | adhyāyaḥ 27 | 173||

– ॥ श्रीशिवरहस्यम् ।ईश्वराख्यः दशमांशः ।अध्यायः २७ ।१-७३॥

– || śrīśivarahasyam |īśvarākhyaḥ daśamāṃśaḥ |adhyāyaḥ 27 | 1-73||