व्याडेश्वरस्तोत्रम् Shri Vyadeshvara Shtotram

अनाथबन्धुं करुणैकसिन्धुं प्रसन्नमूर्तिं सुपवित्रकीर्तिम् ।गौरीकलत्रं कमनीयगात्रं व्याडेश्वरं नौमि जगन्निवासम् ॥ १॥

anāthabandhuṃ karuṇaikasindhuṃ prasannamūrtiṃ supavitrakīrtim |gaurīkalatraṃ kamanīyagātraṃ vyāḍeśvaraṃ naumi jagannivāsam || 1||

लसालिनेत्रं शुभपञ्चवक्त्रं भुजङ्गभूषं लघुचित्रवेषम् ।भस्माङ्गरागं क्रतुशिष्टभागं व्याडेश्वरं नौमि जगन्निवासम् ॥ २॥

lasālinetraṃ śubhapañcavaktraṃ bhujaṅgabhūṣaṃ laghucitraveṣam |bhasmāṅgarāgaṃ kratuśiṣṭabhāgaṃ vyāḍeśvaraṃ naumi jagannivāsam || 2||

चन्द्रावदातं गजवक्त्रतातं चन्द्रार्धचूडं जगदेकनीडम् ।पवित्रगोत्रं वृषराजपत्रं व्याडेश्वरं नौमि जगन्निवासम् ॥ ३॥

candrāvadātaṃ gajavaktratātaṃ candrārdhacūḍaṃ jagadekanīḍam |pavitragotraṃ vṛṣarājapatraṃ vyāḍeśvaraṃ naumi jagannivāsam || 3||

आनन्दकन्दं हतवैरिवृन्दं कृतान्तकालं नृकपालमालम् ।तीव्रप्रतापं प्रलयाग्निकोपं व्याडेश्वरं नौमि जगन्निवासम् ॥ ४॥

ānandakandaṃ hatavairivṛndaṃ kṛtāntakālaṃ nṛkapālamālam |tīvrapratāpaṃ pralayāgnikopaṃ vyāḍeśvaraṃ naumi jagannivāsam || 4||

शिरोधिनीलं करिचर्मचेलं पिनाकहेतिं भृतभूरिभूतिम् ।समस्त हेतूं प्रययान्तकेतुं व्याडेश्वरं नौमि जगन्निवासम् ॥ ५॥

śirodhinīlaṃ karicarmacelaṃ pinākahetiṃ bhṛtabhūribhūtim |samasta hetūṃ prayayāntaketuṃ vyāḍeśvaraṃ naumi jagannivāsam || 5||

व्याडेश्वरं नौमि हरं महेश्वरं गङ्गाधरं पापहरं कृपाकरम् ।गौरीवरं शूलधरं हतासुरं विश्वम्भरं देववरं परात्परम् ॥ ६॥

vyāḍeśvaraṃ naumi haraṃ maheśvaraṃ gaṅgādharaṃ pāpaharaṃ kṛpākaram |gaurīvaraṃ śūladharaṃ hatāsuraṃ viśvambharaṃ devavaraṃ parātparam || 6||

इति व्याडेशदेवस्य स्तोत्रं यः सर्वदा जपेत् ।लब्ध्वा व्याडेश्वरे भक्तिं भुक्तिमुक्ति लभेत सः ॥ ७॥

iti vyāḍeśadevasya stotraṃ yaḥ sarvadā japet |labdhvā vyāḍeśvare bhaktiṃ bhuktimukti labheta saḥ || 7||

इति श्रीव्याडेश्वरस्तोत्रं सम्पूर्णम् ।णा

iti śrīvyāḍeśvarastotraṃ sampūrṇam |ṇā