भैरवाष्टकम् २ Shribhairavashtakam 2

॥ श्रीगणेशाय नमः ॥॥ श्रीउमामहेश्वराभ्यां नमः ॥॥ श्रीगुरवे नमः ॥॥ श्रीभैरवाय नमः ॥श्रीभैरवो रुद्रमहेश्वरो यो महामहाकाल अधीश्वरोऽथ ।यो जीवनाथोऽत्र विराजमानः श्रीभैरवं तं शरणं प्रपद्ये ॥ १॥

|| śrīgaṇeśāya namaḥ |||| śrīumāmaheśvarābhyāṃ namaḥ |||| śrīgurave namaḥ |||| śrībhairavāya namaḥ ||śrībhairavo rudramaheśvaro yo mahāmahākāla adhīśvaro'tha |yo jīvanātho'tra virājamānaḥ śrībhairavaṃ taṃ śaraṇaṃ prapadye || 1||

पद्मासनासीनमपूर्वरूपं महेन्द्रचर्मोपरि शोभमानम् ।गदाऽब्ज पाशान्वित चक्रचिह्नं श्रीभैरवं तं शरणं प्रपद्ये ॥ २॥

padmāsanāsīnamapūrvarūpaṃ mahendracarmopari śobhamānam |gadā'bja pāśānvita cakracihnaṃ śrībhairavaṃ taṃ śaraṇaṃ prapadye || 2||

यो रक्तगोरश्च चतुर्भुजश्च पुरः स्थितोद्भासित पानपात्रः ।भुजङ्गभूयोऽमितविक्रमो यः श्रीभैरवं तं शरणं प्रपद्ये ॥ ३॥

yo raktagoraśca caturbhujaśca puraḥ sthitodbhāsita pānapātraḥ |bhujaṅgabhūyo'mitavikramo yaḥ śrībhairavaṃ taṃ śaraṇaṃ prapadye || 3||

रुद्राक्षमाला कलिकाङ्गरूपं त्रिपुण्ड्रयुक्तं शशिभाल शुभ्रम् ।जटाधरं श्वानवरं महान्तं श्रीभैरवं तं शरणं प्रपद्ये ॥ ४॥

rudrākṣamālā kalikāṅgarūpaṃ tripuṇḍrayuktaṃ śaśibhāla śubhram |jaṭādharaṃ śvānavaraṃ mahāntaṃ śrībhairavaṃ taṃ śaraṇaṃ prapadye || 4||

यो देवदेवोऽस्ति परः पवित्रः भुक्तिञ्च मुक्तिं च ददाति नित्यम् ।योऽनन्तरूपः सुखदो जनानां श्रीभैरवं तं शरणं प्रपद्ये ॥ ५॥

yo devadevo'sti paraḥ pavitraḥ bhuktiñca muktiṃ ca dadāti nityam |yo'nantarūpaḥ sukhado janānāṃ śrībhairavaṃ taṃ śaraṇaṃ prapadye || 5||

यो बिन्दुनाथोऽखिलनादनाथः श्रीभैरवीचक्रपनागनाथः ।महाद्भूतो भूतपतिः परेशः श्रीभैरवं तं शरणं प्रपद्ये ॥ ६॥

yo bindunātho'khilanādanāthaḥ śrībhairavīcakrapanāganāthaḥ |mahādbhūto bhūtapatiḥ pareśaḥ śrībhairavaṃ taṃ śaraṇaṃ prapadye || 6||

ये योगिनो ध्यानपरा नितान्तं स्वान्तःस्थमीशं जगदीश्वरं वै ।पश्यन्ति पारं भवसागरस्य श्रीभैरवं तं शरणं प्रपद्ये ॥ ७॥

ye yogino dhyānaparā nitāntaṃ svāntaḥsthamīśaṃ jagadīśvaraṃ vai |paśyanti pāraṃ bhavasāgarasya śrībhairavaṃ taṃ śaraṇaṃ prapadye || 7||

धर्मध्वजं शङ्कररूपमेकं शरण्यमित्थं भुवनेषु सिद्धम् ।द्विजेन्द्रपूज्यं विमलं त्रिनेत्रं श्रीभैरवं तं शरणं प्रपद्ये ॥ ८॥

dharmadhvajaṃ śaṅkararūpamekaṃ śaraṇyamitthaṃ bhuvaneṣu siddham |dvijendrapūjyaṃ vimalaṃ trinetraṃ śrībhairavaṃ taṃ śaraṇaṃ prapadye || 8||

भैरवाष्टकमेतद् यः श्रद्धा भक्ति समन्वितः ।सायं प्रातः पठेन्नित्यं स यशस्वी सुखी भवेत् ॥ ९॥

bhairavāṣṭakametad yaḥ śraddhā bhakti samanvitaḥ |sāyaṃ prātaḥ paṭhennityaṃ sa yaśasvī sukhī bhavet || 9||

॥ श्रीगार्ग्यमुनिविरचितं भैरवाष्टकं सम्पूर्णम् ॥

|| śrīgārgyamuniviracitaṃ bhairavāṣṭakaṃ sampūrṇam ||