व्याडेश्वरकृपाकवचम् Shri Vyadeshvara Khripa Khavacham

श्रीगणेशाय नमः ।गुहागरस्थितः साक्षान्महाव्याडेश्वरः शिवः ।पातु मां सङ्कटात्सत्यं शरणागतवत्सलः ॥ १॥

śrīgaṇeśāya namaḥ |guhāgarasthitaḥ sākṣānmahāvyāḍeśvaraḥ śivaḥ |pātu māṃ saṅkaṭātsatyaṃ śaraṇāgatavatsalaḥ || 1||

स मामवतु दुर्भिक्षे सुखे दुःखे दिने दिने ।परिवारं सदा पातु सदनं त्रिपुरान्तकः ॥ २॥

sa māmavatu durbhikṣe sukhe duḥkhe dine dine |parivāraṃ sadā pātu sadanaṃ tripurāntakaḥ || 2||

मम चेतश्च बुद्धिं च धूर्जटी पातु मे मनः ।वृत्तिं पातु पिनाकी मे व्यवसायं जटाधरः ॥ ३॥

mama cetaśca buddhiṃ ca dhūrjaṭī pātu me manaḥ |vṛttiṃ pātu pinākī me vyavasāyaṃ jaṭādharaḥ || 3||

भूमौ तथा पितृलोके लोकनाथः सदाशिवः ।स्वर्गे रक्षतु सर्वेशो महादेवश्च सर्वदा ॥ ४॥

bhūmau tathā pitṛloke lokanāthaḥ sadāśivaḥ |svarge rakṣatu sarveśo mahādevaśca sarvadā || 4||

शीर्षं मे शङ्करः पातु भालं रक्षतु वै भवः ।नेत्रौ दृष्टिं नीलकण्ठः श्रुतिं भूतेश्वरस्तथा ॥ ५॥

śīrṣaṃ me śaṅkaraḥ pātu bhālaṃ rakṣatu vai bhavaḥ |netrau dṛṣṭiṃ nīlakaṇṭhaḥ śrutiṃ bhūteśvarastathā || 5||

भार्गवस्थापितः स्थाणुर्मस्तकं मे सदाऽवतु ।घ्राणं मृत्युञ्जयः पातु मुखं कोङ्कणरक्षकः ॥ ६॥

bhārgavasthāpitaḥ sthāṇurmastakaṃ me sadā'vatu |ghrāṇaṃ mṛtyuñjayaḥ pātu mukhaṃ koṅkaṇarakṣakaḥ || 6||

ओष्ठौ वाणी च जिह्वां च रक्षतां चन्द्रशेखरः ।कन्धरामीश्वरः पातु भुजौ पञ्चाननस्तथा ॥ ७॥

oṣṭhau vāṇī ca jihvāṃ ca rakṣatāṃ candraśekharaḥ |kandharāmīśvaraḥ pātu bhujau pañcānanastathā || 7||

स्कन्धौ महेश्वरः पातु करौ मे शैलजापतिः ।हस्तौ रक्षेदाशुतोषो विश्वनाथः कराङ्गुलीः ॥ ८॥

skandhau maheśvaraḥ pātu karau me śailajāpatiḥ |hastau rakṣedāśutoṣo viśvanāthaḥ karāṅgulīḥ || 8||

भस्मधारी करपृष्ठे शूली करतले तथा ।हृदयं पातु योगीशः उरो मे पार्वतीप्रियः ॥ ९॥

bhasmadhārī karapṛṣṭhe śūlī karatale tathā |hṛdayaṃ pātu yogīśaḥ uro me pārvatīpriyaḥ || 9||

जठरं हव्यवाण्नेत्रो नाभिं भक्तमनोगतः ।स्मरान्तकः कटी पातु सक्थिनी विमलान्तरः ॥ १०॥

jaṭharaṃ havyavāṇnetro nābhiṃ bhaktamanogataḥ |smarāntakaḥ kaṭī pātu sakthinī vimalāntaraḥ || 10||

गुहग्रामेश्वरः पातु जङ्घे ऊरू च गुह्यकम् ।जानुनी स्थाणुरूपेण रक्षेन्मम पुरान्तकः ॥ ११॥

guhagrāmeśvaraḥ pātu jaṅghe ūrū ca guhyakam |jānunī sthāṇurūpeṇa rakṣenmama purāntakaḥ || 11||

गुल्फ गुहपिता रक्षेच्चरणौ कुलदैवतम् ।सर्वाङ्गाणि विभू रक्षेत् त्वग्रक्षेद्भयनाशनः ॥ १२॥

gulpha guhapitā rakṣeccaraṇau kuladaivatam |sarvāṅgāṇi vibhū rakṣet tvagrakṣedbhayanāśanaḥ || 12||

धर्मं मेऽवतु संहर्ता कर्म रक्षेत्पिनाकवान् ।पुण्यं मे पातु काशीशो धैर्यं रक्षतु वै हरः ॥ १३॥

dharmaṃ me'vatu saṃhartā karma rakṣetpinākavān |puṇyaṃ me pātu kāśīśo dhairyaṃ rakṣatu vai haraḥ || 13||

रुद्रो मे सन्ततिं पातु पशून्पशुपतिस्तथा ।वाहनं सर्वगः शम्भुः शीलं त्र्यम्बकवैभवः ॥ १४॥

rudro me santatiṃ pātu paśūnpaśupatistathā |vāhanaṃ sarvagaḥ śambhuḥ śīlaṃ tryambakavaibhavaḥ || 14||

वर्त्म कैलासनाथश्च पातु मे कुलदैवतम् ।सम्पदं साम्ब आनन्दं पातु नर्तनपण्डितः ॥ १५॥

vartma kailāsanāthaśca pātu me kuladaivatam |sampadaṃ sāmba ānandaṃ pātu nartanapaṇḍitaḥ || 15||

सर्वस्थानेषु कालेषु रक्षेन्मां गिरिजापतिः ।कवचस्मरणेनैव पातु व्याडेश्वरः स्वयम् ॥ १६॥

sarvasthāneṣu kāleṣu rakṣenmāṃ girijāpatiḥ |kavacasmaraṇenaiva pātu vyāḍeśvaraḥ svayam || 16||

प्रभाते वा प्रदोषे वा दिने रात्र्यां पठेन्नरः ।विघ्नानि तस्य नश्येयुः सर्वदा सुखभाग्भवेत् ॥ १७॥

prabhāte vā pradoṣe vā dine rātryāṃ paṭhennaraḥ |vighnāni tasya naśyeyuḥ sarvadā sukhabhāgbhavet || 17||

अरुणोदयकाले वा जपेद्दीपकसन्निधौ ।अमोघं कवचं भूयात्प्रज्ञाङ्कुरप्रवर्तनम् ॥ १८॥

aruṇodayakāle vā japeddīpakasannidhau |amoghaṃ kavacaṃ bhūyātprajñāṅkurapravartanam || 18||

अष्टादशेषु लोकेषु रक्षां व्याडेश्वरकृताम् ।प्राप्य भक्तो भवेन्नित्यं सदा शिवकृपाङ्कितः ॥ १९॥

aṣṭādaśeṣu lokeṣu rakṣāṃ vyāḍeśvarakṛtām |prāpya bhakto bhavennityaṃ sadā śivakṛpāṅkitaḥ || 19||

ध्यायेद्व्याडेश्वरं नित्यं जपेन्नाम शिवस्य च ।सद्धर्मकर्मसंयुक्तः सदाचारी सुखी भवेत् ॥ २०॥

dhyāyedvyāḍeśvaraṃ nityaṃ japennāma śivasya ca |saddharmakarmasaṃyuktaḥ sadācārī sukhī bhavet || 20||

एतत्तु कवचं श्रद्धाभक्तियुक्तेन चेतसा ।दिवाकरकविप्राप्तं हृदयानन्दकारणम् ॥ २१॥

etattu kavacaṃ śraddhābhaktiyuktena cetasā |divākarakaviprāptaṃ hṛdayānandakāraṇam || 21||

इति श्रीअनन्तसुतश्रीदिवाकरविरचितं श्रीव्याडेश्वरकृपाकवचं सम्पूर्णम् ॥

iti śrīanantasutaśrīdivākaraviracitaṃ śrīvyāḍeśvarakṛpākavacaṃ sampūrṇam ||