शिवमङ्गलस्तोत्रम् Shri Shivamangala Stotram

मङ्गलं भगवान् शम्भुर्मङ्गलं पुरशासनः ।मङ्गलं सोमसूर्याग्निलोचनो मम मङ्गलम् ॥ १॥

maṅgalaṃ bhagavān śambhurmaṅgalaṃ puraśāsanaḥ |maṅgalaṃ somasūryāgnilocano mama maṅgalam || 1||

यन्मङ्गलं कुमारस्य गिरिजाकल्पयत् पुरा ।तारकं जेतुकामस्य तन्मे भवतु मङ्गलम् ॥ २॥

yanmaṅgalaṃ kumārasya girijākalpayat purā |tārakaṃ jetukāmasya tanme bhavatu maṅgalam || 2||

मङ्गलं पार्वतीनाथो मङ्गलं जाह्नवीधरः ।मङ्गलं गिरिजा देवी मङ्गलं सर्वमङ्गलम्(ला) ॥ ३॥

maṅgalaṃ pārvatīnātho maṅgalaṃ jāhnavīdharaḥ |maṅgalaṃ girijā devī maṅgalaṃ sarvamaṅgalam(lā) || 3||

गिरीन्द्रस्य च मेनायास्त्रैलोक्यस्य तपःफले ।पार्वत्या जन्मदिवसे तन्मे भवतु मङ्गलम् ॥ ४॥

girīndrasya ca menāyāstrailokyasya tapaḥphale |pārvatyā janmadivase tanme bhavatu maṅgalam || 4||

त्रिपुरं हन्तुकामस्य दिधक्षोरन्धकासुरम् ।भवान्या यत्कृतं भर्तुस्तन्मे भवतु मङ्गलम् ॥ ५॥

tripuraṃ hantukāmasya didhakṣorandhakāsuram |bhavānyā yatkṛtaṃ bhartustanme bhavatu maṅgalam || 5||

ईश्वराज्ञानुयातस्य वीरभद्रस्य शूलिना ।यत्कृतं मङ्गलं कार्यं तन्मे भवतु मङ्गलम् ॥ ६॥

īśvarājñānuyātasya vīrabhadrasya śūlinā |yatkṛtaṃ maṅgalaṃ kāryaṃ tanme bhavatu maṅgalam || 6||

हारभूषणकेयूरलीलाभुजगभूषयोः ।शिवयोः सदृशोद्वाहे तन्मे भवतु मङ्गलम् ॥ ७॥

hārabhūṣaṇakeyūralīlābhujagabhūṣayoḥ |śivayoḥ sadṛśodvāhe tanme bhavatu maṅgalam || 7||

यः शिवो नामरूपाभ्यां या देवी सर्वमङ्गला ।तयोः संसरणात् पुंसां सर्वतो जयमङ्गलम् ॥ ८॥

yaḥ śivo nāmarūpābhyāṃ yā devī sarvamaṅgalā |tayoḥ saṃsaraṇāt puṃsāṃ sarvato jayamaṅgalam || 8||

॥ इति श्रीशिवमङ्गलस्तोत्रं सम्पूर्णम् ॥

|| iti śrīśivamaṅgalastotraṃ sampūrṇam ||