शिवस्तोत्रम् (परमेश्वरयोगिन् विरचितम्) Shri Shiva Stotram (3)

ॐ श्रीगणेशाय नमः ।श्रीमद्वस्तु समस्तं व्याघ्याकाशं निदानमानन्दम् ।उपशमतः शिवमेकं सततं हृद्येव भावयेऽनन्तम् ॥ १॥

oṃ śrīgaṇeśāya namaḥ |śrīmadvastu samastaṃ vyāghyākāśaṃ nidānamānandam |upaśamataḥ śivamekaṃ satataṃ hṛdyeva bhāvaye'nantam || 1||

सदसद्रूपां मायां सच्चित्तुलितां समस्तजनयित्रीम् ।देवात्मशक्तिमेकां सदयामुदयाय चिन्तयाम्यनिशम् ॥ २॥

sadasadrūpāṃ māyāṃ saccittulitāṃ samastajanayitrīm |devātmaśaktimekāṃ sadayāmudayāya cintayāmyaniśam || 2||

यदपो बीजं सृष्टा स्त्रीपुंसाभ्यां विराजमसृजदिदम् ।सदसद्रूपं दैवं परमवलम्बे हृदम्बुजोल्लासि ॥ ३॥

yadapo bījaṃ sṛṣṭā strīpuṃsābhyāṃ virājamasṛjadidam |sadasadrūpaṃ daivaṃ paramavalambe hṛdambujollāsi || 3||

यन्मरणं हन्ति नृणां भक्तानामन्तरात्मपाशमयम् ।तदमृतमवलम्बेऽहं दहरगतं ज्योतिषां ज्योतिः ॥ ४॥

yanmaraṇaṃ hanti nṛṇāṃ bhaktānāmantarātmapāśamayam |tadamṛtamavalambe'haṃ daharagataṃ jyotiṣāṃ jyotiḥ || 4||

धर्मार्थकाममोक्षाश्चत्वारो हन्त सन्ति पुरुषार्थाः ।तद्विज्ञानं सरसं कृत्यामस्यां स्त्रियामिवोल्लसति ॥ ५॥

dharmārthakāmamokṣāścatvāro hanta santi puruṣārthāḥ |tadvijñānaṃ sarasaṃ kṛtyāmasyāṃ striyāmivollasati || 5||

पश्यामि शास्त्रवार्धिं तदिदं कृतिसर्षपान्तरुल्लसितम् ।कुक्षिस्थसर्वलोकं भगवन्तं मानसान्तरुदितमिव ॥ ६॥

paśyāmi śāstravārdhiṃ tadidaṃ kṛtisarṣapāntarullasitam |kukṣisthasarvalokaṃ bhagavantaṃ mānasāntaruditamiva || 6||

सोऽकारो वर्णानामादिर्भगवान् जगन्मूलम् ।अहमिति यद्वन्मूलं करणज्ञानस्य नित्यमनुभूतम् ॥ ७॥

so'kāro varṇānāmādirbhagavān jaganmūlam |ahamiti yadvanmūlaṃ karaṇajñānasya nityamanubhūtam || 7||

विद्वत्तया फलं किं विस्मर्तुः सच्चिदङ्घ्रिपद्मनतिम् ।यद्वन्मर्त्यजनोः किं हृदि मन्तव्यं विहातुरात्मानम् ॥ ८॥

vidvattayā phalaṃ kiṃ vismartuḥ saccidaṅghripadmanatim |yadvanmartyajanoḥ kiṃ hṛdi mantavyaṃ vihāturātmānam || 8||

हृन्नीरजस्थसच्छ्रीपदसेवी भुवि चिरं समेघेत ।योगीश्वरः सुषुम्नासुषिरालम्बं लसेदथाकल्पम् ॥ ९॥

hṛnnīrajasthasacchrīpadasevī bhuvi ciraṃ samegheta |yogīśvaraḥ suṣumnāsuṣirālambaṃ lasedathākalpam || 9||

इष्टानिष्टसुदूरश्रीपदभाजां न जातु भुवि कष्टम् ।प्राणापाननिरोधज्योतिर्नाड्यां यथैव निरतानाम् ॥ १०॥

iṣṭāniṣṭasudūraśrīpadabhājāṃ na jātu bhuvi kaṣṭam |prāṇāpānanirodhajyotirnāḍyāṃ yathaiva niratānām || 10||

न तमो न पुण्यपापे सद्धनवच्छलोकपरसमीपेऽपि ।प्रत्यग्ज्योतिर्दहरे यद्वच्चिन्ता न नापि सुखदुःखे ॥ ११॥

na tamo na puṇyapāpe saddhanavacchalokaparasamīpe'pi |pratyagjyotirdahare yadvaccintā na nāpi sukhaduḥkhe || 11||

आत्मानुपमाङ्घ्रिनतादन्यैः शक्या न हातुमात्मार्तिः ।अन्तर्ज्योतिःस्फुरणादितरैर्यद्वत् तमो न वारयितुम् ॥ १२॥

ātmānupamāṅghrinatādanyaiḥ śakyā na hātumātmārtiḥ |antarjyotiḥsphuraṇāditarairyadvat tamo na vārayitum || 12||

योऽतीन्द्रियानलीकव्यवसितिपथिगश्चिरं स वर्धेत ।अन्तर्धमनीरन्ध्राध्वन्यो यद्वत् कदापि न व्यथते ॥ १३॥

yo'tīndriyānalīkavyavasitipathigaściraṃ sa vardheta |antardhamanīrandhrādhvanyo yadvat kadāpi na vyathate || 13||

अष्टगुणाङ्घ्रेरनतं न शिरोगुणवन्निरार्तिकरणयुतम् ।स्वात्मानुकूलकृत्ये विमुखं यद्वन्मनोऽपि न विवेकि ॥ १४॥

aṣṭaguṇāṅghreranataṃ na śiroguṇavannirārtikaraṇayutam |svātmānukūlakṛtye vimukhaṃ yadvanmano'pi na viveki || 14||

धर्माब्धिदेवचरणप्रणतान्नान्यैर्भवाब्धिरुत्तार्यः ।चिन्तावार्धिस्तार्यो न यथा मनसो निरोधनादितरैः ॥ १५॥

dharmābdhidevacaraṇapraṇatānnānyairbhavābdhiruttāryaḥ |cintāvārdhistāryo na yathā manaso nirodhanāditaraiḥ || 15||

प्रतरन्ति जन्मजलधिं न तरन्तीशाङ्घ्रिसेवकेभ्योऽन्ये ।देहादिवासनाब्धि यद्वद्यमिनो यथातथान्ये न ॥ १६॥

prataranti janmajaladhiṃ na tarantīśāṅghrisevakebhyo'nye |dehādivāsanābdhi yadvadyamino yathātathānye na || 16||

इति परमेश्वरयोगिन् विरचितं श्रीशिवस्तोत्रं सम्पूर्णम् ।

iti parameśvarayogin viracitaṃ śrīśivastotraṃ sampūrṇam |